Umbono WeBhayibheli
Ingabe AmaKristu Kumelwe Abe Mpofu?
UJESU wake watshela umbusi osemusha ocebile ukuthi kwakudingeka ahambe ayodayisa konke ayenakho abele abampofu. Ukulandisa kuthi le ndoda yadabuka ngala mazwi kaJesu yahamba ilusizi, ‘ngoba yayinempahla eningi.’ UJesu wabe esethi kubafundi bakhe: “Yeka ukuthi kuyoba yinto enzima kangakanani ngalabo abanemali ukungena embusweni kaNkulunkulu!” UJesu wanezela: “Kulula ukuba ikamela lichushe embotsheni yenaliti kunokuba isicebi singene embusweni kaNkulunkulu.”—Marku 10:21-23; Mathewu 19:24.
Wayesho ukuthini uJesu? Ingabe ingcebo nokukhulekela kweqiniso akuhambisani? Ingabe amaKristu kufanele azizwe enecala uma enemali? Ingabe uNkulunkulu ufuna ukuba aphile ngobumpofu?
UNkulunkulu Wamukela “Zonke Izinhlobo Zabantu”
Ezikhathini zasendulo uNkulunkulu akazange afune ukuba ama-Israyeli aphile ngobumpofu. Cabangela lesi sibonelo: Ngemva kokuhlala endaweni ababeyabelwe, abantu babelima futhi bahwebe ukuze bazondle futhi bondle nabathandekayo babo. Izici ezinjengezimo zomnotho, isimo sezulu, impilo noma amakhono okuhweba kwakuyoba nethonya ekuphumeleleni kwemizamo yabo. UMthetho KaMose wawuyala ama-Israyeli ukuba abe nozwela uma kuba khona ohluphekayo ngokwezomnotho bese eba mpofu. (Levitikusi 25:35-40) Ngakolunye uhlangothi, abanye babeceba. UBhowazi, indoda eyayinokholo futhi iqotho eyaba ukhokho kaJesu Kristu, uchazwa ngokuthi ‘wayengumuntu owayecebe kakhulu.’—Ruthe 2:1.
Kwakunesimo esifanayo ngesikhathi sokuphila kukaJesu. Lapho ekhuluma nendoda eyisicebi okukhulunywe ngayo ekuqaleni, uJesu wayengahlosile ukukhuthaza ukuphila ngokuzincisha injabulo. Kunalokho, wayefundisa isifundo esibalulekile. Abantu bangase bacabange ukuthi akunakwenzeka ukuba abantu abacebile babonise ukuzithoba bamukele indlela kaNkulunkulu yensindiso. Kodwa, uJesu wathi: “Kubantu lokhu akunakwenzeka, kodwa kuNkulunkulu zonke izinto zingenzeka.”—Mathewu 19:26.
Ibandla lobuKristu lekhulu lokuqala lalamukela “zonke izinhlobo zabantu.” (1 Thimothewu 2:4) Lokhu kwakuhlanganisa abanye ababecebile, abanye ababephila ukuphila okusendimeni, nabaningi ababempofu. Kungenzeka abanye abantu babeqongelele ingcebo bengakabi amaKristu. Kwezinye izimo kungenzeka izimo ezivumayo nezinqumo ezihlakaniphile kwezohwebo zaletha ingcebo kamuva.
Ngokufanayo, ubuzalwane bobuKristu namuhla buhlanganisa abantu abanezizinda ezihlukahlukene zezomnotho. Bonke balwela ukulandela isiqondiso seBhayibheli ezindabeni zezimali, ngoba ukuthanda izinto ezibonakalayo kungathinta noma ngabe ubani. Isifundo uJesu asifundisa ngombusi ocebile osemusha sisiza wonke amaKristu ukuba aphaphamele ithonya elinamandla imali nezinto ezibonakalayo okungaba nalo kumuntu.—Marku 4:19.
Isixwayiso Kwabacebile
Nakuba iBhayibheli lingayilahli ingcebo, kodwa liyakulahla ukuthanda imali. Umbhali weBhayibheli uPawulu wathi: “Uthando lwemali luyimpande yazo zonke izinhlobo zezinto ezilimazayo.” Waphawula ukuthi ngenxa yokudela izithakazelo ezingokomoya ngoba befisa ukuceba, “abanye baye baduka okholweni futhi bazigwaza yonke indawo ngeminjunju eminingi.”—1 Thimothewu 6:10.
Kuyathakazelisa ukuthi uPawulu wanikeza abacebile iziyalezo eziqondile. Wathi: “Yala labo abacebile esimisweni samanje sezinto ukuba bangaqhoshi, futhi bangabeki ithemba labo engcebweni engaqinisekile, kodwa kuNkulunkulu, osinikeza zonke izinto ngokucebile ukuze sizijabulele.” (1 Thimothewu 6:17) Kusobala ukuthi kunengozi yokuba abantu abacebile baqhoshe babe nomuzwa wokuthi baphakeme kunabanye. Futhi, bangase balingeke ukuba bacabange ukuthi ingcebo ingabanikeza ukulondeka kwangempela—okuyinto okunguNkulunkulu kuphela ongayinikeza ngokugcwele.
AmaKristu acebile angaxwaya lezi zingozi ‘ngokuceba emisebenzini emihle.’ Le misebenzi ihlanganisa ukuba ‘nesandla esivulekile, ukulungela ukwabelana izinto nabanye,’ nokusiza abaswele ngokukhululekile. (1 Thimothewu 6:18) AmaKristu—acebile nampofu—angasebenzisa nenye yengcebo yawo ukuze asakaze izindaba ezinhle zoMbuso kaNkulunkulu, okuyinto amaKristu eqiniso ayikhathalela kakhulu namuhla. Lo moya wokupha wembula isimo sengqondo esifanele ngezinto ezibonakalayo futhi wenza umuntu athandeke kuJehova uNkulunkulu nakuJesu Kristu, abathanda abantu abapha benamile.—Mathewu 24:14; Luka 16:9; 2 Korinte 9:7.
Izinto Ezibaluleke Ngokwengeziwe
Kusobala ukuthi akuyona imfuneko ukuba amaKristu abe mpofu. Kodwa futhi akufanele ‘azimisele ukuceba.’ (1 Thimothewu 6:9) Asebenza ngokuzikhandla ukuze abe nendlela yokuziphilisa esesilinganisweni. Imizamo yawo iyoba nempumelelo engafani, kuxhomeke ezicini ezihlukahlukene nasesimisweni sezomnotho aphila ngaphansi kwaso.—UmShumayeli 11:6.
Kungakhathaliseki ukuthi siyini isimo sawo sezimali, amaKristu kufanele alwele ‘ukuqiniseka ngezinto ezibaluleke kakhulu.’ (Filipi 1:10) Ngokubeka izinto ezingokomoya kuqala, ‘azibekelela ngokulondekile isisekelo esihle sesikhathi esizayo, ukuze abambisise ukuphila kwangempela.’—1 Thimothewu 6:19.