Izindlela Ezinhlanu Zokuthuthukisa Izinga Lokuphila Kwakho
NGUMLOBELI WE-PHAPHAMA! ECENTRAL AFRICAN REPUBLIC
UKWEHLA kwamandla emali, ukugula, ukungondleki, ubumpofu—lezi zinkinga zandile emazweni asathuthuka. Futhi alikho ikhambi elisheshayo eliseduze, okungenani ngokubona komuntu. Uma uhlala ezweni elisathuthuka, kukhona yini ongakwenza ukuze uthuthukise izinga lokuphila kwakho? Yebo, kukhona! Nakhu ukusikisela okuyisihlanu ongase ukuthole kuwusizo futhi kusebenza.
Okokuqala: Yiba Nengadi
“Olima insimu yakhe uyakusutha ngokudla,” kusho iBhayibheli kuyizAga 28:19. Ngempela, kungakumangalisa ukubona ukuthi kungakanani ongase ukuthole esivandeni nje esincane. Encwadini yakhe ethi Le jardin potager sous les tropiques (Ingadi Yemifino Ezindaweni Ezishisayo), umlobi uHenk Waayenberg uthi isivande esingamamitha-skwele angu-50 kuya kwangu-100 singakhiqiza imifino eyanele yokondla umkhaya onabantu abayisithupha!
Kungani uthenga izinto ongazitshalela zona? Ungase ukwazi ukutshala izinto ezinjenge-okra, upelepele, isipinashi, i-parsley, i-lemongrass, ishaladi, umdumbula, amathanga, ubhatata, umoba, utamatisi, ukhukhamba, nommbila khona kanye eceleni komuzi wakho, kuye ngenhlabathi kanye nesimo sezulu. Okungenani, leyo ngadi inganezela ekudleni komkhaya wakho, kungase kube ngisho nanokusalayo ongase ukudayise.
Uma unendawo eyanele, ungase futhi ucabangele ukutshala izihlahla ezihlukahlukene zezithelo. Kwezinye izimo, isihlahla esisodwa sezithelo singathela izithelo ezingaphezu kwalezo wena nomkhaya wakho eningase nizidle. Ukufunda ukwenza umquba—inqubo yokusebenzisa izinto ezingasasetshenziswa ukuba wenze umanyolo—kuyokusiza ukuba uthuthukise indlela okhiqiza ngayo ukudla. Izihlahla zingenza okungaphezu kokuveza ukudla kanye nemali eyengeziwe yomkhaya wakho. Izihlahla ezitshalwe endaweni ekahle zingakha umthunzi, zihlanze umoya, futhi zenze indawo yakho ibukeke kahle ngokwengeziwe.
Nokho, kuthiwani uma wazi okuncane ngokutshala? Ingabe unabo abangane, omakhelwane noma obajwayele abanolwazi ngalokhu? Kungani-ke ungabaceli ukuba bakusize noma bakunikeze amacebiso? Ungase ukwazi ukuthenga noma ukuboleka ezinye izincwadi ezimayelana nokutshala.—Bheka isihloko esithi “Kungani Ungabi Nesivande?” kuyi-Phaphama! ka-November 22, 1974 (NgesiNgisi, May 22, 1974).
Okwesibili: Thenga Ngobuningi
Ingabe izinto eziyisisekelo njengofulawa, ilayisi namafutha uzithenga kancane? Uma kunjalo, kungenzeka uchitha ingxenye enkulu yemali yakho. Kunalokho, uma kungenzeka, zama ukuthenga ukudla okunjalo ngobuningi, nihlanganyele izindleko nemikhaya emibili, emithathu noma ngaphezulu. Ukuthenga ngobuningi kungakongela imali futhi ngesikhathi sezithelo ezithile noma imifino. Kwezinye izimo, ungase ngisho ukwazi nokuthenga izinto ezitolo ezidayisa izinto ngobuningi.
Okwesithathu: Funda Ikhono Lokulondoloza Ukudla
Ukuthenga ngobuningi kuphakamisa inkinga yokuthi kungagcinwa kanjani ukudla okonakalayo. Ukomisa ukudla kungenye yezindlela ezithandwayo nezisebenzayo. Abesifazane abaningi e-Afrika baziphilisa ngokomisa izithelo, i-okra, ubhontshisi, amathanga, izintanga zethanga kanye nemifino. Ukomisa akudingi mshini othile okhethekile. Lokho okomiswayo kungase kubekwe entweni ethile ehlanzekile noma kulengiswe, mhlawumbe kumbozwe ngendwangu elula yokuvimbela izimpukane. Umoya nelanga kuyobe sekomisa.—Bheka isihloko esithi “Ungaphila Yini Ngezindleko Ezincane?” esikuyi-Phaphama! ka-February 22, 1976 (NgesiNgisi, August 8, 1975).
Okwesine: Zama Ukufuya Kancane
Ungakwazi yini ukuzifuyela izinkukhu, izimbuzi, amajuba noma ezinye izilwane? Ezindaweni eziningi inyama seyaba yivelakancane. Kodwa ngosizo oluncane lwabanye, ungafunda ukuthi ungaba kanjani nemfuyo encane. Uyayithanda yini inhlanzi? Ungase-ke uzame ukufunda ukwenza idanyana elincane lezinhlanzi. Inyama, amaqanda nenhlanzi kunokusansimbi, i-calcium, amavithamini, amaminerali namaprotheni—okubalulekile empilweni yomkhaya wakho.
Okwesihlanu: Londoloza Inhlanzeko Efanele
Inhlanzeko ibalulekile futhi empilweni yomkhaya wakho. Indawo engahlanzekile ibanga amagundane, izimpukane namaphela—okuyimbangela yazo zonke izinhlobo zezifo. Ukulondoloza inhlanzeko efanele kuyodinga isikhathi sakho nomzamo. Kodwa lokho okudingwa inhlanzeko kubiza ngaphansi kwezindleko zemithi nodokotela. Izinga lenhlanzeko lingahluka ngezinga elithile kumuntu ngamunye nasezweni ngalinye. Nokho, kunezimiso ezimbalwa ezisebenza kuyo yonke indawo.
Ngokwesibonelo, cabanga ngendlu encane. Emaphandleni ngokuvamile ziyangcola zinganakwa bese ziba umthombo omkhulu wokugula nezifo. Izisebenzi zendawo zezempilo zingase zikwazi ukukunikeza iziyalezo eziphathelene nokuthi ungayakha kanjani indlu yangasese ehlanzekile ngezindleko eziphansi.
Kuthiwani ngekhaya lakho? Ingabe lihlanzekile futhi linakekelwa kahle? Ingabe linuka kahle? Kuthiwani ngekhishi lakho? Ingabe licocekile futhi lihlanzekile? Ukudla kufanele kuhlanzeke futhi kuphekwe kahle ukuze kube nempilo. Amanzi angcolile aba namagciwane nezinambuzane. Ngakho wacwenge noma uwabilise amanzi ngaphambi kokuba uwasebenzise. Yakaza izitsha zokudlela ngamanzi abilayo, futhi ugezisise izandla zakho ngaphambi kokuba uphathe ukudla. Gcina amanzi ezitsheni ezihlanzekile ezivalwayo.
Izinja, amakati, izinkukhu nezimbuzi akufanele kuvunyelwe kuchachaze ekhishini—uma ufuna ukulondoloza inhlanzeko. Namagundane akufanele avunyelwe agijime phezu kwamabhodwe namapani, angcolise ukudla kwakho. Unoxhaka nje ungase uyixazulule le nkinga.—Bheka esithi “Ukuhlangabezana Nenselele Yokuhlanzeka,” esikuyi-Phaphama! ka-October 8, 1988 (NgesiNgisi, September 22, 1988).
Ekugcineni, uMbuso kaNkulunkulu kuphela oyozixazulula ngokuphelele zonke izinkinga zesintu. (Mathewu 6:9, 10) Nokho, okwamanje lokhu kusikisela okulula kungase kukusize ukuba uthuthukisa izinga lokuphila kwakho.
[Izithombe ekhasini 18]
Yiba nengadi
[Izithombe ekhasini 19]
Thenga ngobuningi
[Izithombe ekhasini 19]
Funda ikhono lokulondoloza ukudla
[Izithombe ekhasini 20]
Zama ukufuya kancane
[Izithombe ekhasini 20]
Londoloza inhlanzeko efanele