I-OSCE Iyini? Ingabe Iyophumelela?

Ngumlobeli we-Phaphama! ePortugal

NGEMVA kweMpi Yezwe II, kwaphakama umbango phakathi kwamazwe aseNtshonalanga emibuso yokuhwebelana ngokukhululekile nentando yeningi na-mazwe obuKhomanisi eSoviet eseMpumalanga. Ngalinye lalamazwe ahlangene lasungula inhlangano yalo yezokulondeka: iNorth Atlantic Treaty Organization (NATO) eNtshonalanga neWarsaw Pact eMpumalanga.

Ngo-1975 iMpi Yomshoshaphansi yayisidambe ngokwanele ukuba iZizwe ezingu-35, kuhlanganise i-United States neRussia, zisayine lokho okubizwa ngokuthi iSivumelwano SaseHelsinki. I-Conference on Security and Cooperation in Europe (CSCE) yasungulwa. Kwakuyinkundla yokuxoxisana nokubonisana phakathi kwezigaba ezimbili zamazwe ahlangene.

KuyiBudapest Summit ngo-1994, i-CSCE yashintsha igama layo yaba yi-Organization for Security and Cooperation in Europe (OSCE). Namuhla, yakhiwa iMibuso engu-54 ehlanganyelayo, ehlanganisa i-United States, iCanada, nayo yonke iMibuso okwakungeyaseSoviet Union.

Umgomo Wayo

Umgomo walamazwe angamalungu e-OSCE uwukuqinisekisa ukulondeka kweYurophu nokukhuthaza ukuqalwa kokusebenza kwamalungelo esintu, ukuqeda izikhali, inkululeko yentando yeningi nokusingatha izingxabano zezifunda.

Kwaba nomhlangano wezikhulu zemibuso we-OSCE eLisbon, ePortugal ngo-December 2-3, 1996. Ekuqaleni, ukunakekela kwagxiliswa kuyi-NATO, ngenxa yokuthi amalungu amaningana e-NATO, kuhlanganise ne-United States, athanda ukuba kwandiswe i-NATO ukuze kuhlanganiswe namazwe engeziwe aseYurophu Ephakathi nawaseMpumalanga Yurophu. Kodwa kunokusekela ukwandiswa kwe-NATO ukuba ihlanganise amazwe ahlangene aseMpumalanga, iRussia namanye amazwe ahlangene aseMpumalanga afuna ukuba i-OSCE ibe inkundla yezindaba zokulondeka kweYurophu.

Umongameli waseRussia, uViktor Chernomyrdin, wathi emhlanganweni: “Siyavumelana nokuqiniswa kwe-OSCE, okuyiyona ndawo kuphela eYurophu lapho yonke iMibuso ingasebenza khona ndawonye. Iyindawo engcono emhlabeni wonke yokuxoxa ngokulondeka nokuvikeleka.”

Ngasekupheleni komhlangano wezikhulu ilanga elikhazimulayo lantambama labonakala linika ithemba, naphezu kokuphawula kwamaphephandaba mayelana nemiphumela yawo efiphele. Kungakhathaliseki ukuthi i-OSCE iyaphumelela noma iyehluleka, abathandi bokuthula kuyo yonke indawo bangaqiniseka ukuthi ukuthula kweqiniso nokulondeka kuzofezeka ngokushesha emhlabeni wonke ngaphansi kokubusa koMbuso kaNkulunkulu.—IHubo 72:1, 7, 8.

[Isithombe ekhasini 31]

I-Cultural Center yaseBelém, eLisbon, ePortugal, lapho umhlangano wawuqhutshelwa khona