Isibonelo Sokulingiswa
NGUMLOBELI WE-PHAPHAMA! ECHILE
UGiacomo Castelli unendlu ahlala kuyo e-Antofagasta, idolobha elinabantu abangaba ngu-170-000 enyakatho yeChile. Emi kuvulandi ngo-June ngonyaka odlule, wabona iqembu labantu lisepaki lakulendawo. “Okwakungakholeki kwakuwukubona intsha ihleka futhi izijabulisa nabazali bayo,” ebhala encwadini eya ephephandabeni i-Mercurio. Ukuze aqiniseke ngalesi simanga ayesibona, waya kuleli paki.
“Ngaphinde ngabamba ongezansi,” kuphawula lombhali owayenelukuluku lokufuna ukwazi. “Lapho eminye yemikhaya iqeda ukudla ukudla kwayo kwasemini, ilungu ngalinye laqala ukucosha ukudla okwakuwele ngephutha ongwengweni lase likufaka esikhwameni salo sezibi. . . .
“Ngafuna ukwazi ukuthi bangobani laba bantu abangajwayelekile,” kuqhubeka lombhali. “Ngaya entombazaneni ethile eyisimomondiya, futhi ngobumnene yathi kimi: ‘SingoFakazi BakaJehova, futhi sinomhlangano eRegional Stadium.’” Phakathi nekhefu lasemini, amaqembu abantu ababekulomhlangano wesifunda abangaphezu kwabangu-3000 ayeze kuleli paki ezokudla ukudla kwawo kwasemini.
Lombhali uthi: “NgingumRoma Katolika onguMphostoli. Ngiya ngokwethembeka eMiseni elingcwele futhi ngaze ngathatha ngisho nohambo lokuyokhulekela eLourdes, eFrance, eminyakeni eminingi edlule.
“Nokho, ngenxa yokuhlonipha indlela ejulile engakhuliswa ngayo njengomKristu, kumelwe ngizibuze ngobuqotho: Yini lena abanayo thina maKatolika, inkolo yeningi labantu eChile, esingenayo? Kungani lentsha kubonakala ikhululeke kangaka lapho inabazali bayo kuyilapho amadodakazi ami amathathu engibalekela lapho nje ngihlongoza indaba yokushaywa umoya nawo?
“Kungani abantwana bethu abangamaKatolika benobudlova; kungani beklabalasa futhi bedlala ‘i-Power Rangers,’ beshaya abanye abantwana, . . . kuyilapho laba bantwana benokuthula, beneme futhi beyikhathalela indawo ezungezile? Kungani thina maKatolika singahlangani emihlanganweni ngaphandle kokuhileleka kwezentengiselwano ezinyanyekayo ezizungeze izindawo zethu zenkolo ezingcwelengcwele, njengamathempeli aseLa Tirana, e-Andacollo namanye?”
Lombhali, uMnu. Castelli, waphetha incwadi yakhe eya ephephandabeni ngalombuzo: “Ingabe labo kithi abazibheka njengamaKatolika namaKristu bayoke bafane nabo? Kwangathi uNkulunkulu neNcasakazi bangasisiza senze kanjalo.”