Ungayithuthukisa Inkumbulo Yakho

“Angive ngikhohlwa.” Wake wakusho yini lokho? Uma kunjalo, ungaphelelwa ithemba. Amacebiso ambalwa alula nomzamo omncane kungaletha intuthuko emangalisayo. Ungabeyi ubuchopho bakho. Amakhono abo ayamangalisa.

UBUCHOPHO buyenza kanjani imigilingwane yabo emangalisayo? Eminyakeni yamuva ubuchopho buye bacutshungulwa kakhulu kunanini ngaphambili. Nakuba sebuqondwa kangcono, kusekuncane kakhulu esikwaziyo ngokuthi ubuchopho bukufeza kanjani ngempela lokhu obukwazi ukukwenza.

Indlela esifunda futhi sikhumbule ngayo ukwaziswa ayicaci kahle, kodwa abacwaningi bazama ukuyisombulula lemfihlakalo. Amangqamuzana emizwa asebuchosheni ayizigidi eziyizinkulungwane eziyishumi kuya kweziyikhulu yiwona ahilelekile ekufundeni nasekukhumbuleni. Kodwa kunemizila yokuxhumana ephakathi kwamangqamuzana emizwa okungenani eliphinda kayizinkulungwane eziyishumi lelo nani. Enye inkolelo-mbono iwukuthi njengoba ukusebenzisa imizila yokuxhumana, noma ama-synapses, kuyenza iqine, kungokufanayo nangokufunda.

Lapho sikhula, amandla engqondo angancipha; ukusabela kwemizimba yethu kungase kungasheshi. Amangqamuzana obuchopho awazivuseleli, futhi ngokusobala abantu abadala abalahlekela ngokuqhubekayo. Kodwa amakhono ethu engqondo singawalondoloza isikhathi esijana, kuye ngokwezinga esiyisebenzisa ngalo.

Isimo sethu sengqondo siyabuthonya ubuchopho. Umbono wokulindela okuhle, wokujabula, uthuthukisa indlela ingqondo esebenza ngayo kungakhathaliseki ukuthi singakanani. Okunye ukucindezeleka kungazuzisa, kodwa ukucindezeleka okungamahlala-khona, okweqile kukhinyabeza ukusebenza kahle kwengqondo. Ukuvivinya umzimba kungasiza ekunciphiseni ukucindezeleka kwengqondo.

Ngisho noma zikhuthaza kangakanani, sisengazikhohlwa izinto ezibalulekile, kungakhathaliseki ukuthi sibadala kangakanani. Ingabe singathuthuka? Abantu abaningi banenkinga yokukhumbula amagama abantu abahlangana nabo.

Ukukhumbula Amagama Abantu

Ukusikisela okumbalwa okulula kungakusiza kakhulu ukuba uwakhumbule kangcono amagama. Ukuba nesithakazelo kumuntu kuyasiza. Igama lomuntu libalulekile kuye. Ngokuvamile siyalikhohlwa igama ngoba sisuke singalizwanga kahle kwasekuqaleni. Ngakho lapho wethulwa kothile, lilalele kahle igama. Mcele lowo muntu aliphinde uma kudingeka noma aze ngisho asho nokuthi libhalwa kanjani. Lisebenzise kaningi engxoxweni yakho. Lapho uvalelisa, mbize ngegama lowo muntu. Uyomangala ukuthi lamaphuzu ambalwa ayokusiza kanjani.

Elinye icebiso elingathuthukisa inkumbulo yakho ngokuqhubekayo liwukuhlobanisa igama lomuntu nokuthile ongaba nomfanekiso wako engqondweni. Uma ungenza lomfanekiso uphile, kuyoba ngcono nakakhulu.

Ngokwesibonelo, othile wayenenkinga yokukhumbula igama lomuntu ayemjwayele, okwakunguGlenn. Ngakho lapho embona, wayecabanga ngencazelo yegama lesiNgisi elithi “glen,” elisho “umhosha othé qekelele.” Wayakha isithombe salomuntu ekulowo mhosha, ebuka indawo enhle. Njalo kwakusebenza; igama likaGlenn lalivele lifike engqondweni yakhe.

Amagama amaningi angase angabi nayo incazelo kuwe, ngakho kuyodingeka usebenzise igama elifana nalo. Akulutho ngisho noma igama olisebenzisayo lingenawo umsindo ofana ncamashí nowalelo gama. Inkumbulo yakho iyolikhumbula kangcono igama uma ulihlobanisa nokuthile okwaziyo. Uma uzakhela amagama akho nemifanekiso engqondweni, agxila kakhudlwana engqondweni.

Ake sithi wethulwa ku-Nkk. Nokuzola Zulu. Esikhundleni salo ungafaka ukuzola nezulu. Ucabanga ngezulu elizolile.

Kudingeka ukuprakthize ngenkuthalo isikhathi esithile, kodwa kuyasebenza ngempela. UHarry Lorayne uchaza lendlela encwadini yakhe ethi How to Develop a Super-Power Memory, futhi uye wayisebenzisa kaningi emphakathini. Uthi: “Izikhathi eziningi ngiye ngethulwa kubantu abayikhulu noma amakhulu amabili ngemizuzu eyishumi nesihlanu noma ngaphansi, futhi ngangakhohlwa nelilodwa igama!”

Indlela Yokukhumbula Izinhlu

Ungalithuthukisa kanjani ikhono lakho lokukhumbula uhlu lwezinto ezingahlobene? Indlela elula ibizwa ngokuthi isimiso sokuhlanganisa izinto. Isebenza ngalendlela: Wakha umfanekiso wento ngayinye esohlwini bese uhlobanisa umfanekiso wento yokuqala nomfanekiso weyesibili, bese wenza okufanayo phakathi kweyesibili neyesithathu, njalonjalo.

Ngokwesibonelo, kufanele uthenge izinto ezinhlanu esitolo: ubisi, isinkwa, i-bulb yokukhanyisa, u-anyanisi, no-ayisikhilimu. Qala ngokuhlanganisa ubisi nesinkwa. Cabanga uthela ubisi entweni ethile lusesinkweni. Nakuba lomfanekiso uyinqaba, uzosiza ekugxiliseni izinto engqondweni yakho. Zama nokwenza lesi senzo siphile sihilele wena uthela ubisi.

Ngemva kokuhlanganisa ubisi nesinkwa, dlulela entweni elandelayo, i-bulb yokukhanyisa. Ungase uhlanganise isinkwa ne-bulb ngokuzibona uzama ukufaka isinkwa ezimbotsheni zesigaxa sokukhanyisa. Yibe usuhlanganisa i-bulb no-anyanisi ngokuzicabanga ucwecwa i-bulb enkulu yokukhanyisa futhi ukhala njengoba ucwecwa. Yiqiniso, kungcono uma uzihlobanisela wena izinto. Ingabe ungakwazi ukuhlobanisa izinto ezimbili zokugcina, u-anyanisi no-ayisikhilimu? Mhlawumbe ungacabanga udla u-ayisikhilimu ka-anyanisi!

Ake ubone ukuthi ungakwazi yini ukulukhumbula loluhlu. Khona-ke hlola inkumbulo yakho ngohlu ozenzele lona. Lwenze lube lude ngendlela othanda ngayo. Khumbula, ukuze wenze izinto ozihlobanisile zikhumbuleke, ungenza ukuba zihlekise noma zingafanelani. Zama ukwenza lomfanekiso uphile, bese ufaka enye into esikhundleni senye.

Abanye bangase baphikise ngokuthi lendlela ithatha isikhathi eside kunokumane nje ulubambe ngekhanda loluhlu. Nokho, kuthatha isikhathi eside ukuyichaza kunokuyisebenzisa. Lapho usuke wayisebenzisa, uyokwazi ukuhlobanisa izinto ngokushesha, futhi ukukhumbula kwakho nezinga lokufunda kuyoba ngcono ngaphezu kwalapho uzama ukufunda ngaphandle kwalesi simiso. Lapho abantu abangu-15 becelwa ukuba bakhumbule uhlu lwanoma iziphi izinto ezingu-15 bengasebenzisi isimiso esithile, bathola amaphuzu angu-8,5. Kolunye uhlu lisebenzisa isimiso sokuhlobanisa izinto esizibonayo, iqembu elifanayo lathola amaphuzu angu-14,3. Yiqiniso, uma ukhumbula ukuphatha uhlu olubhalwe phansi lwezinto ozozithenga, uyozikhumbula zonke!

Ukukhumbula Okufundayo

Kulenkathi yolwazi oluningi, enye ingxenye iningi lethu elidinga usizo kuyo kusekutadisheni ngokuphumelelayo. Ukutadisha kubalulekile esikoleni, ebhizinisini, ekuzithuthukiseni, nasekulungiseleleni ukukhuluma eningini. Ngaphezu kwalokho, umKristu kufanele abekele eceleni isikhathi sesifundo seBhayibheli somuntu siqu.—Johane 17:3.

Ungase uthi, ‘Kodwa nginenkinga yokukhumbula engiye ngakufunda.’ Yini engenziwa? Ukufunda ukuzuza ngokugcwele esikhathini sakho sokutadisha kungakusiza ukuba ukhumbule okufundayo. Nakhu okunye ukusikisela.

Lapho utadisha, ukuhleleka komuntu siqu kubalulekile. Izincwadi, izinto zokubhala, kanye nephepha makube seduze. Zama ukutadishela endaweni ekahle engenazo iziphazamiso eziningi futhi enokukhanya okufanele. Cima umsakazo nethelevishini.

Misa isikhathi esifanayo sokutadisha. Kwabanye ukutadisha nsuku zonke izikhathi ezimfushane kungaphumelela kakhulu kunokutadisha kanye isikhathi eside. Kuhle ukuhlukanisa isikhathi sakho sibe izingxenye ezihlukene. Kunokutadisha amahora amabili ungaphumuli, kungangcono ukuhlukanisa isikhathi sibe izikhawu eziyimizuzu esukela kwengu-25 kuye kwengu-40 isikhathi ngasinye, kube namakhefu amafushane emizuzu embalwa. Ukucwaninga kuye kwabonisa ukuthi lokhu kubangela ukuba ukhumbule kakhudlwana.

Nquma ukuthi ikuphi ukwaziswa ofuna ukukuhlanganisa ngesikhathi sakho sokufunda. Lokhu kwenza ukuba ukwazi ukugxilisa ingqondo. Ngaphambi kokuba uqale incwadi, yiba nemizuzu embalwa yokuyibuka yonke. Bheka isihloko. Hlola ikhasi elibonisa izihloko eziqukethe, eliyichaza kafushane incwadi. Yibe usufunda isandulela noma isethulo. Lapha kungase kushiwo injongo yomlobi nombono wakhe.

Ngaphambi kokuba uqale ukufunda isahluko, ake uthi ukusibhekabheka. Bheka izihlokwana, imifanekiso, amashadi, izindaba ezichaza kafushane, nezigaba zokuqala nezokuphetha. Wothi nje nhlá umusho wokuqala wesigaba ngasinye. Ngokuvamile lemisho iqukethe umqondo oyinhloko. Thola umqondo wendaba yonke. Zibuze imibuzo: ‘Yini umbhali azimisele ukuyichaza? Yini engingayizuza kulokhu kwaziswa? Ayini amaphuzu ayinhloko?’

Ukugxilisa ingqondo kubalulekile. Kufanele uhileleke ngokugcwele. Imfihlo iwukwenza isikhathi sakho sokutadisha sibe esiqabula ngangokunokwenzeka. Yakha ugqozi ngokucabangela izici eziwusizo zokwaziswa. Kubone ngeso lengqondo. Sebenzisa izinzwa ngokucabanga iphunga, ukunambitha, nokuthinta uma indaba ikuvumela lokhu.

Lapho usukuqonda ukwaziswa, usuke usukulungele ukubhala amaphuzu. Ukubhala kahle amaphuzu kungenza ukuba usheshe ukuqonde futhi ukukhumbule ukwaziswa. Amaphuzu akudingekile abhalwe ngemisho ephelele kodwa kufanele abhalwe ngamagama ayisihluthulelo noma imishwana ekusiza ukuba ukhumbule imiqondo eyinhloko.

Ukuqonda ukwaziswa akusho ngempela ukuthi uyokwazi ukukukhumbula konke esikhathini esizayo. Iqiniso liwukuthi esikhathini esingamahora angu-24 ukufundile ukwaziswa, cishe okungamaphesenti angu-80 ungabe usukukhohliwe, okungenani okwesikhashana. Lokho kuyadumaza, kodwa okuningi kwalawo maphesenti angu-80 kungabuya ngokubukeza ukwaziswa. Ngemva kokufunda ngakunye, bukeza ukwaziswa imizuzu embalwa. Uma kungenzeka, phinda ubukeze ngemva kosuku, uphinde futhi ngemva kwesonto, bese kuba ngemva kwenyanga. Ukusebenzisa kwakho lamaphuzu kungakusiza ukuba uzuze kakhulu esikhathini sakho esiyigugu sokutadisha futhi ukukhumbule lokho obukade ukufunda.

Ngakho ungabeyi ubuchopho bakho. Ikhono lakho lokukhumbula izinto lingathuthuka. Esinye isazi sesayensi sabhekisela ebuchosheni ngokuthi “buyinto eyinkimbinkimbi kunazo zonke esisazitholile emhlabeni wethu.” Kubonisa ukuhlakanipha okumangalisayo namandla oMdali wabo, uJehova.—IHubo 139:14.

[Umdwebo ekhasini 15]

Ukuze ukhumbule lezi zinhlu, sebenzisa isimo sokuhlanganisa izinto: Yakha umfanekiso engqondweni wento ngayinye. Yibe usuhlobanisa umfanekiso wokuqala nowesibili njalo njalo

Uhlu lwezinto oyozithenga:

1. Ubisi Hlanganisa u-1 no-2

2. Isinkwa Hlanganisa u-2 no-3

3. I-“bulb” yokukhanyisa Hlanganisa u-3 no-4

4. U-anyanisi Hlanganisa u-4 no-5

5. U-ayisikhilimu