Umbono WeBhayibheli
Ingabe Kufanele Uthembele Kunembeza Wakho Ukuba Ukuqondise?
NJENGOBA wewuka ngomgwaqo omatasa, udlula owesifazane ogqoke econsa ngokungaqapheli owisa isizumbulu semali phansi. Njengoba ugoba ukuze uyicoshe, umbona engena ngokushesha emotweni ephambili okuthiwa i-limousine. Yini ozoyenza? Uzommemeza noma uzovele uyishutheke ngokushesha ekhukhwini lakho?
Impendulo ixhomeke kunembeza wakho. Ubuyokutshela ukuba wenzeni? Okubaluleke nakakhulu, ingabe ungakwethemba lokho okutshela khona? Ingabe ngokulondeka ungathembela kunembeza wakho ukuba ukuqondise?
Lokho Oyikho
Unembeza uye wachazwa njengomuzwa ongokwemvelo walokho okulungile nokungalungile, okuwubulungisa nokungesikho, okuwukuziphatha okuhle nokuwukuziphatha okubi. KwabaseRoma 2:14, 15, iBhayibheli lichaza indlela unembeza osebenza ngayo: “Ngokuba nxa abezizwe abangenawo umthetho ngokwemvelo benza okomthetho‚ laba‚ bengenawo umthetho‚ bangumthetho wabo ngokwabo‚ babonakalisa ukuthi umsebenzi womthetho ulotshiwe ezinhliziyweni zabo‚ nonembeza wabo uyafakaza naye‚ imicabango yabo imangalelana noma ivunana.” Ngakho, unembeza wakho uklanyelwe ukukwenza ukwazi ukuhlola izimo, wenze ukukhetha okuhle, futhi uzahlulele wena ngalokho okukhethile. Kodwa ingabe ungawethemba?
Kunemibandela. Empeleni, kunobufakazi obuningi obubonisa ukuthi unembeza ophambukayo ungaholela umuntu ekuziphatheni okubi. Iqiniso lokuthi unembeza womuntu umvumela ukuba aziphathe ngendlela ethile aliqinisekisi ukuthi uNkulunkulu uyayivumela. Ngokwesibonelo, ngaphambi kokuba abe umKristu, uSawulu waseTarsu wayehola ekushushiseni amaKristu. Waze ngisho wavumela futhi wahlanganyela ekubulaweni komfel’ ukholo ongumKristu uStefanu. Kukho konke lokhu, unembeza wakhe awuzange umlahle.—IzEnzo 7:58, 59; Galathiya 1:13, 14; 1 Thimothewu 1:12-16.
EJalimane lobuNazi phakathi neMpi Yezwe II, amabutho amaningi ama-SS athi ayemane nje elandela iziyalezo lapho ehlupha futhi ebulala izigidi zabantu ababesezinkanjini zokuhlushwa zikaHitler. Onembeza bawo bawavumela ukuba akwenze. Kodwa ukwahlulela kwezwe—kungasaphathwa ukwahlulela kukaNkulunkulu—akuzange kuzivune izenzo zawo. Ngokufanelekile, alahlwa.
Kungani Ungasebenzi Kahle?
Kungani okuthile okudalwe uNkulunkulu kungenakusebenza kahle? IBhayibheli liyachaza. Ngenxa yokuwela komuntu esonweni ngokungalaleli kuka-Adamu, kuthiwa isono ‘sabusa,’ siphoqelela abantu ukuba balalele izifiso zaso. (Roma 5:12; 6:12) Unembeza womuntu, owawuphelele ekuqaleni, wasonteka; amandla ashukumisayo esono manje aphikisana nawo. (Roma 7:18-20) Lokhu kwaqalisa impi esiyijwayele kakhulu: “Ngalokho ngifumana kimina engithanda ukwenza okuhle umthetho wokuthi kukhona okubi kimi‚ . . . ngibona omunye umthetho ezithweni zami olwayo nomthetho wengqondo yami‚ ungithumbela emthethweni wesono osezithweni zami.”—Roma 7:21-23.
Ngaphezu kwalobuthakathaka obuzuzwe njengefa, onembeza bethu babuye bathintwe izinto ezingaphandle. Ngokwesibonelo, ukucindezela kontanga ngokusobala kwasonta noma kwacindezela onembeza bamabutho ama-SS amaNazi okukhulunywe ngawo ngenhla. (Qhathanisa nezAga 29:25.) Ngaphezu kwalokho, ukugxisha ingqondo ngezinto ezingakhi, ezinjengokuziphatha okubi nobudlovu obukuTV nakumabhayisikobho nasezincwadini, nakho kunethonya. Uma sibuka izinto ezinjalo ngaso sonke isikhathi, ngokuhamba kwesikhathi ziyobonakala zingezimbi kangako, futhi unembeza wethu uyoba buthakathaka. Uma sikubeka ngendlela ehlukile, “ukujwayelana nababi konakalisa ukuziphatha okuhle.”—1 Korinte 15:33.
Uma umuntu eqeqeshelwe ukwazi nokuhlonipha imithetho kaNkulunkulu, ngokusobala unembeza wakhe uyoba isiqondiso esinokwethenjelwa kakhulu kunalapho umuntu engaqeqeshiwe ngaleyondlela. Nakuba kunjalo, ngisho nomuntu onokuqonda nokwazisa okuqotho ngezindlela zikaNkulunkulu ngezinye izikhathi usengathola ukuthi ngenxa yesono esizuzwe njengefa kanye nokungapheleli, futhi mhlawumbe namathonya angaphandle, unembeza wakhe awusiso isiqondiso okungathenjelwa kuso.
Yini Esingayenza?
Ingabe unembeza ungashintshwa, wenziwe usheshe usabele ezimisweni zokulunga? Yebo. UPawulu weluleka amaKristu ukuthi ‘ngokujwayela ukuwusebenzisa umqondo, angaba nawo osulungele ukwahlukanisa okuhle nokubi.’ (Heberu 5:11-14) Ukuwusebenzisa okunjalo nokuwuqeqesha kuhlanganisa ukutadisha iBhayibheli, ukunaka ngokukhethekile isibonelo esiphelele esasishiyelwa uJesu Kristu. (1 Petru 2:21, 22) Ngemva kwalokho, njengoba sisebenzisa amandla ethu okuqonda ekwenzeni izinqumo, onembeza bethu bayosidedisela kude kakhulu nemicabango kanye nezenzo ezimbi futhi bayosishukumisela ukuba senze okutusekayo nokulungile.
Nakuba kunjalo, akumelwe sizibekele izimiso zethu zokulunga noma sithi uma okuthile “kungawuhluphi unembeza wami,” kulungile. Indlela efanele nelondekile yokusebenzisa unembeza kubantu abangaphelele ingafaniswa nemikhuba yokuqapha yomshayeli oshayela ngokuphepha. Lapho umshayeli efuna ukuhamba ngakolunye uhlangothi, ngokuzenzakalelayo uqala ajeqeze esibukweni esibonisa izimoto ezingemuva. Uma ebona imoto, uyazi ukuthi akuphephile ukuba aye ngakolunye uhlangothi. Nokho, ngisho nalapho engaboni lutho, umshayeli ohlakaniphile uyazi ukuthi kunezindawo ezicashile angase angakwazi ukuzibona ngesibuko—ngeke ukwazi ukubona yonke into ngazo zonke izikhathi ngokuthembela esibukweni nje kuphela. Ngakho, akabheki nje kuphela esibukweni. Uphendula ikhanda lakhe ukuba abuke, aqiniseke ukuthi uhlangothi afuna ukuya kulo alunalutho ngaphambi kokuba athathe isinyathelo. Kungokufanayo nangonembeza. Uma ukuxwayisa, wulalele! Kodwa ngisho nalapho ungakuxwayisi, yiba njengomshayeli ohlakaniphile—yenza okunye ukuhlola ukuze uqiniseke ukuthi akunangozi.
Hlola ukucabanga kwakho ukuze ubone ukuthi kuyovumelana yini nokucabanga kukaNkulunkulu. Sebenzisa iZwi lakhe njengendlela yokuzihlola ukuze uhlaziye unembeza wakho. IzAga 3:5, 6 ngokuhlakanipha zithi: “Themba kuJehova ngayo yonke inhliziyo yakho, ungenciki kokwakho ukuqonda. Mazise yena ezindleleni zakho zonke, uyakuqondisa imikhondo yakho.”
Ngakho kuwukuhlakanipha ukulalela unembeza wakho. Kodwa kuhlakaniphe nakakhulu ukuqhathanisa konke esikwenzayo nentando kaNkulunkulu njengoba yembulwe eZwini lakhe. Yilapho kuphela esingasho khona ngokuqiniseka ukuthi, “Siyethemba ukuthi sinonembeza omuhle.”—Heberu 13:18; 2 Korinte 1:12.
[Isithombe ekhasini 26]
“Ukuphenduka kukaSt. Paul”
[Umthombo]
Painting by Caravaggio: Scala/Art Resource, N.Y.