Biiyaʼ chuʼluʼ gaxha de Jehová laga canazarouʼ scuela

1, 2. a) Pa maʼ gudixhe íqueluʼ sarouʼ scuela, ¿xi cadi naquiiñeʼ gusaana de gúniluʼ? b) ¿Xi riníʼ diidxaʼ «cadi gusaana de gúninu ni»? (Filipenses 3:16).

MAʼ GUDIXHE ique caadxi xpinni Jehová sárucaʼ scuela gunduuxesicaʼ preparatoria. Zándaca guiníʼ íquecabe nga zacané laacabe guidxélacabe ti dxiiñaʼ ni gacané laacabe gápacabe ni iquiiñecabe ne gúnicabe xhiiñaʼ Jehová. Pa maʼ gudixhe íqueluʼ sarouʼ scuela, ¿xi zacané lii cadi gusaana de gaca xhamíguluʼ Jehová? (Sant. 4:8a). Zándaca biaʼ tiempu guzaluʼ scuela bidxaagaluluʼ guendanagana ni ñanda nusirá fe stiluʼ. Peru cadi naquiiñeʼ gusaana de guni progresarnu, ni caninu raríʼ nga, «cadi gusaana de gúninu ni» canabaʼ Jehová laanu cásica huayúninu ni (biindaʼ Filipenses 3:16).

² Lu diidxaʼ griegu, ra ná «cadi gusaana de gúninu ni» zeeda ti diidxaʼ ni biquiiñecabe para guiníʼcabe de modo runi marchar ca soldadu. Nga runi, pa quixhe íqueluʼ sarouʼ scuela, caquiiñeruʼ «guni marcharluʼ» sin guiaanadxiluʼ para gúniluʼ xhiiñaʼ Jehová. Lu artículo riʼ zadúʼyanu tapa principiu ni zeeda lu Biblia ni zándaca maca runibiaʼluʼ ne ni zacané lii. Cásica yenándaluʼ cani dxiqué, zaqueca naquiiñeʼ chinándaluʼ cani yanna laga canazaluʼ scuela ne despué de gunduuxeluʼ ni.

CADI GUSAANA DE GÚNILUʼ CA COSA NI GACANÉ LII CHUʼLUʼ GAXHA DE JEHOVÁ

3. Laga canazaluʼ scuela, ¿xiñee caquiiñeʼ gápaluʼ cuidadu?

³ Ni zanda guizaaca. Pa quixhe íqueluʼ sarouʼ scuela la? nabé ziuu xhiiñaluʼ, ne zándaca caquiiñeʼ guchaaluʼ caadxi de ca cosa ni rúniluʼ guiráʼ dxi. Ne normal nga guyúbiluʼ gácaluʼ ti buen estudiante. Peru pa qué gápaluʼ cuidadu la? chaahuiʼ chaahuiʼ maʼ huaxiéʼ zusisácaluʼ gúniluʼ xhiiñaʼ Jehová. Ne zándaca laaca maʼ zusaana de cheluʼ reunión, predicación, maʼ qué zúniluʼ estudiu personal stiluʼ ne maʼ qué zuni orarluʼ (Apoc. 2:4).

4. ¿Ximodo zanda chinándanu conseju ni ná cadi gusaana de gúninu «xhiiñaʼ Señor»? (1 Corintios 15:58).

⁴ (Biindaʼ 1 Corintios 15:58). Cásica qué riaba ti bicicleta ora zigusanu laa, laanu laaca ruzuhuaʼnu dxiichiʼ ne qué riábanu ora qué rusaana de gúninu «xhiiñaʼ Señor». ¿Ximodo zanda chinándaluʼ conseju riʼ yaʼ? Cadi guiaandaʼ lii, neca nabé risaca tiempu ni riquiiñeluʼ para gúniluʼ xhiiñaʼ Jehová, peru ni jma risaca nga chúʼcani primé lu xquendanabániluʼ. Cadi guiaandaʼ lii ni jma risaca lu xquendanabániluʼ nga gúniluʼ xhiiñaʼ Jehová, cadi saluʼ scuela (Mat. 22:37). Ti hermana joven láʼ Samantha guníʼ: «Gudixheʼ iqueʼ pa gudieeʼ cuenta jma cusisacaʼ scuela que Jehová la? zusaanaʼ de chaaʼ scuela».

5. ¿Xi zacané lii para cadi gusaana de gúniluʼ xhiiñaʼ Jehová?

⁵ Xi zanda gúniluʼ ante cheluʼ scuela guilúxesiouʼ preparatoria. Cadi guiaandaʼ lii xii nga ni jma risaca para lii. Guníʼ ique ndiʼ: «¿Ñee maʼ gudixheʼ iqueʼ xi guneʼ para cadi gusaanaʼ de chaaʼ reunión, guneʼ predicar ne guneʼ estudiu personal stinneʼ la?» (Jos. 1:8; Mat. 28:19, 20; Heb. 10:25). Laaca galán guiziidiluʼ de ca cosa ni bíʼniluʼ dxiqué. Guníʼ ique: «¿Xi gucané naa para cadi gusaanaʼ de guneʼ ca cosa ca laga canazayaʼ scuela yaʼ? ¿Ñee nuu xiixa ni ñuuladxeʼ ñuneʼ de sti modo la? ¿Xi zanda guneʼ yanna para cheni naa jma galán?». Gudixhe ique gúniluʼ jma lu xhiiñaʼ Jehová laga canazaluʼ scuela. Biʼniʼ stipa gácaluʼ ti buen estudiante, peru gupa lii para cadi guixéleluʼ de Jehová (Mat. 6:24).a

6. ¿Gunáʼ nga ca pregunta ni nabé risaca guiníʼ íqueluʼ? (Laaca zanda gúʼyaluʼ imagen ca).

⁶ Ora guzulú cheluʼ scuela, gatigá guníʼ ique ximodo nuuluʼ. Guzéʼtenu ti ejemplu, cada beeu zanda guiníʼ íqueluʼ: «¿Ñee cayúneruaʼ xhiiñaʼ Jehová primé lu xquendanabaneʼ la?». Laaca galán guiníʼ íqueluʼ ca pregunta riʼ: ¿ñee maʼ biaaluʼ guiaadxaluʼ reunión o chindaluʼ huadxí la?, ne laga cayaca reunión, ¿ñee nisi maʼ caníʼ íqueluʼ ca tarea stiluʼ o puru si lu videollamada riuuluʼ lu ca reunión la? Laaca galán gúʼyaluʼ pa maʼ huaxiéʼ runi orarluʼ ne pa maʼ huaxiéʼ ruundaluʼ Biblia, o pa rireeluʼ predicación purtiʼ si maʼ biaaluʼ gúniluʼ ni ne maʼ guiuba nuuluʼ guilúxeluʼ. Pa gudiiluʼ cuenta maʼ huaxiéʼ rúniluʼ xhiiñaʼ Jehová, nagueendaca biyubi xi gúniluʼ. Cadi guiaandaʼ lii ni jma risaca lu xquendanabániluʼ nga gúniluʼ xhiiñaʼ Jehová ne cadi scuela.

GUPA MODO RINÍʼ ÍQUELUʼ

7. Laga canazarouʼ scuela, ¿gunáʼ nga ca cosa ni cadi naquiiñeʼ gudiiluʼ lugar guchaa modo riníʼ íqueluʼ?

⁷ Ni zanda guizaaca. Ra scuela zándaca chuʼ tu gacalaʼdxiʼ quiteʼ laanu ra gabi laanu xiixa ni zeeda de xquendabiaaniʼ si, casi ca ni qué runi cré Dios o ca ni runi cré evolución (Col. 2:8). O zándaca ziuu tu zabi lii gápaluʼ stale confianza laca lii. Ti hermanu joven guníʼ: «Qué rusiidisícabe laadu modo gúnidu xiixa, sínuque laaca ruyúbicabe ximodo guchaacabe modo riníʼ íquedu, ne stale biaje cadi biaʼsi cani né modo riníʼ ique Jehová. Siempre rábicabe laadu zabeendudu ni galán pa gápadu confianza laca laadu. Pur modo riníʼ íquecabe ca bicaani naa cadi guyubeʼ Jehová ne pur nga guca nagana para naa gapaʼ confianza laabe».

8. ¿Xiñee nabé risaca gápanu modo riníʼ íquenu? (Proverbios 5:1, 2).

⁸ (Biindaʼ Proverbios 5:1, 2). Biblia cayabi laanu nabé risaca gápanu modo riníʼ íquenu. Pa caquiiñeʼ gápanu xiixa la? nga riníʼ cucaalúcabe ni. Ne nga peʼ nga ni cayuni Binidxabaʼ ne ca xpinni, cucaalucaʼ modo riníʼ íquenu (1 Ped. 5:8). Modo ruuyaʼ binni guidxilayú ca ley stiʼ Dios, modo riníʼ íquecabe bizulú guendanabani ne ni riníʼ íquecabe de Dios zanda gucaani lii guirá fe stiluʼ. Zándaca guiníʼ ique binni «jma risaca» modo ruuyacaʼ ca cosa ni bizéʼtenu riʼ, peru cadi dxandíʼ diʼ ni purtiʼ «qué iquiiñeʼ guendabiaaniʼ stiʼ binni guidxilayú para Dios» (1 Cor. 3:18-20).

9. ¿Xi zanda gúniluʼ para gápaluʼ modo riníʼ íqueluʼ?

⁹ Xi zanda gúniluʼ ante cheluʼ scuela guilúxesiouʼ preparatoria. Para gápaluʼ modo riníʼ íqueluʼ, naquiiñeʼ chuʼluʼ seguru de ni runi creluʼ. Nga runi, ante guzululuʼ scuela, nabé risaca guiníʼ íqueluʼ ca pregunta riʼ: «¿Xiñee runeʼ cré Dios? ¿Xiñee nuaaʼ seguru Biblia nga Stiidxaʼ Dios? ¿Xi rucaa naa guneʼ cré jma risaca ca ley ni zeeda lu Biblia ni caníʼ modo naquiiñeʼ guibani ca xpinni Cristu que modo riníʼ ique binni guidxilayú?». Laaca galán guiníʼ íqueluʼ ximodo biiyaluʼ ca cosa riʼ dxi guzaluʼ scuela. Guníʼ ique: «¿Gupaʼ duda pa dxandíʼ nuu Dios ora biiyaʼ modo rusiidicabe de evolución la? ¿Ñee guca nagana para naa cadi chinandaʼ xiixa cosa malu ni runi ca compañeru stinneʼ la? ¿Ñee nuu xiixa ni ñuuladxeʼ ñuneʼ de sti modo la? ¿Xi zanda guneʼ yanna para guzuhuaaʼ dxiicheʼ lu ni runeʼ cré?». Gudixhe ique gápaluʼ modo riníʼ íqueluʼ laga canazaluʼ scuela (2 Tim. 2:16-18).b

10. ¿Xiruʼ naquiiñeʼ gúniluʼ para cadi guchaacabe modo riníʼ íqueluʼ?

¹⁰ Ora maʼ bizululuʼ scuela, gatigá biiyaʼ ximodo nuuluʼ. Guníʼ ique ca pregunta riʼ: «¿Ñee maʼ cadi malu ruuyaʼ modo nabani ca binni ni riniáʼ scuela la? ¿Ñee maʼ randa rudieeʼ cuenta pora nga cusiidicabe ni zeeda si de xquendabiaaniʼ binni la? ¿Ñee nuaaʼ seguru Reinu si stiʼ Dios nga zanda guni chaahuiʼ ca guendanagana ni nuu lu guidxilayú riʼ la?». Para cadi guchaa ca compañeru ne ca maestru stiluʼ modo riníʼ íqueluʼ, cadi naquiiñeʼ gusaana de gúʼndaluʼ Biblia ne guiníʼ íqueluʼ ni nani. Ti cosa ni zacané lii cadi gápaluʼ duda nga quixheʼ íqueluʼ guni estudiar chaahuiluʼ Stiidxaʼ Dios (1 Tim. 4:15).

BIQUIIÑEʼ TIEMPU STILUʼ JNEZA

11. Laga canazarouʼ scuela, ¿ximodo naquiiñeʼ gúʼyaluʼ tiempu stiluʼ?

¹¹ Ni zanda guizaaca. Ora rizaruʼ binni scuela huaxiéʼ tiempu rapa, ne jmaruʼ si rizaaca ni ora chiguni examen o mayaca guni entregar xiixa proyectu. Pa qué guiziidiluʼ iquiiñeluʼ tiempu stiluʼ jneza la? nabé zaca estresarluʼ ne dede zándaca gaca huaraluʼ. Nga runi nabé risaca gápaluʼ xcuérpuluʼ ne xquendabiaaniluʼ.

12. ¿Gunáʼ nga ca cosa ni naquiiñeʼ cueeluʼ tiempu para gúniluʼ? (Efesios 5:15, 16).

¹² (Biindaʼ Efesios 5:15, 16). Para gúʼyaluʼ pa caquiiñeluʼ tiempu stiluʼ jneza, caquiiñeʼ gúʼyaluʼ gunáʼ nga ca cosa jma risaca. Ne zándaca gácani nagana purtiʼ stale cosa nga ni naquiiñeʼ gúniluʼ. Neca naquiiñeʼ cueeluʼ tiempu para guʼnuʼ ca tarea stiluʼ, peru jma risaca nga cueeluʼ tiempu para chuʼluʼ né familia stiluʼ ne ca hermanu de congregación (Sal. 133:1; Prov. 18:1). Ne cadi guiaandaʼ lii, primé ni naquiiñeʼ gúniluʼ nga ca cosa ni guchiña lii gaxha de Dios (Mat. 6:33). Ne laaca zándaca naquiiñeʼ guni tenderluʼ responsabilidad ni nápaluʼ ndaaniʼ familia o ra dxiiñaʼ. Ne cadi guiaandaʼ lii gúniluʼ ejerciciu ne guiziiláʼdxiluʼ biaʼ caquiiñeʼ purtiʼ zacaneni lii chuʼluʼ nazaaca (Ecl. 4:6; 1 Tim. 4:8). Para cadi gusaana de gúniluʼ ca cosa riʼ, risaca iquiiñeluʼ tiempu stiluʼ jneza.

13. ¿Xi zanda gúniluʼ para iquiiñeluʼ tiempu stiluʼ jma jneza?

¹³ Xi zanda gúniluʼ ante cheluʼ scuela guilúxesiouʼ preparatoria. Biblia ná ora riguixhe chaahuiʼ tobi xi chiguni, riree ca cosa ca jneza (Prov. 21:5). Nga runi, ante guzululuʼ scuela, gudixhe pabiáʼ tiempu gúniluʼ cada cosa ne biʼniʼ stipa chinándaluʼ ni. Galán guinabadiidxaluʼ: «Dxi guzayaʼ scuela dxiqué, ¿ñee jneza biquiiñeʼ tiempu stinneʼ la? ¿Ñee nuu xiixa ni ñuuladxeʼ ñuneʼ de sti modo la? ¿Xi zanda guneʼ yanna para guneʼ ni jma jneza?». Gudixhe ique iquiiñeluʼ tiempu stiluʼ jneza para cadi gucueezani lii de gúniluʼ ca cosa ni jma risaca.c

14. ¿Gunáʼ nga ca pregunta ni naquiiñeʼ guiníʼ íqueluʼ?

¹⁴ Ora maʼ canazaluʼ scuela, gatigá biiyaʼ ximodo nuuluʼ. Guníʼ ique ndiʼ: «¿Ñee cayanda cayuneʼ ejerciciu ne caziiladxeʼ biaʼ naquiiñeʼ la? ¿Ñee napaʼ tiempu para chuaaʼ né ca hermanu la? ¿Ñee rudieeʼ ca tarea stinneʼ né tiempu la? Pa qué rudieeʼ cani, ¿ñee purtiʼ cayuneʼ stale cosa la? o purtiʼ runeʼ cani maʼ puestu hora? ¿Ñee laaca ngueca nicabi ca xhamiguaʼ ne ca familia stinneʼ ca pregunta riʼ la?». Pa gúʼyaluʼ caquiiñeʼ guchaaluʼ tiempu ni maʼ gudíxheluʼ para gúniluʼ cada cosa, nagueendaca biʼniʼ ni. Ne laaca zanda guinábaluʼ conseju ca binni ni ruuyaluʼ riquiiñeʼ tiempu stiʼ jneza (Prov. 11:14).

BIDXAAGA BINNI NI NUU XPIAANIʼ

15. Laga canazaluʼ scuela, ¿xi naquiiñeʼ chuʼluʼ cuidadu?

¹⁵ Ni zanda guizaaca. Ora maʼ canazaluʼ scuela, zándaca gabi ca xcompañéruluʼ lii chizáneluʼ laacaʼ paxaraa ora maʼ bilúxetu clase, ne zándaca guiníʼ íqueluʼ chineluʼ laacabe. Purtiʼ rúnitu stale cosa juntu ne purtiʼ nuutu stale hora ra scuela. Dede zándaca guiníʼ íqueluʼ jma stale cosa runineluʼ laacabe que ca hermanu de congregación. Peru naquiiñeʼ chuʼluʼ cuidadu. Neca tobi si ra riziidineluʼ laacabe, peru cadi ngueca si principiu zinándatu. Ne pa chuʼluʼ jma tiempu né laacabe, zándaca jma nagueenda zacá modo riníʼ íquecabe lii (1 Cor. 15:33). Nga peʼ nga ni bizaaca Michael, laabe biindabe tapa iza ti carrera para gácabe electricista. Sicaríʼ guniʼbe: «Cumu jma de cuarenta hora ridideʼ né ca compañeru stinneʼ lu ti semana la? ra gudiʼdiʼ tiempu guníʼ iqueʼ cadi malu modo ruuyacabe ca gunaa, ca música ni rucaadiágacabe ne ca diidxaʼ guidxa ni riníʼcabe».

16. ¿Xi rusiidiʼ Proverbios 13:20 laanu?

¹⁶ (Biindaʼ Proverbios 13:20). Cayabi Biblia laanu de ca guendanagana ni zanda guidxaagalunu pa guidxaaganu binni ni qué runi ni ná Dios. Peru laaca ruzeeteni «tu canazané binni nuu xpiaaniʼ la? zaca binni nuu xpiaaniʼ». ¿Xi rizíʼdinu de laani yaʼ? Zanda guicá xpiaʼ binni ni ridxaaganu laanu. Nga runi biyubi gaca xhamíguluʼ ca ni racalaʼdxiʼ cheni lii galán, ne ca ni nadxii Jehová cásica nadxiiluʼ laa de guidubi ladxidoʼloʼ (Sal. 101:6, 7; 119:63).

17. ¿Xi zanda gúniluʼ para cadi guidxaagaluʼ ca binni ni qué runi ni ná Dios?

¹⁷ Xi zanda gúniluʼ ante cheluʼ scuela guilúxesiouʼ preparatoria. Gudixhe ique pabiáʼ zadxaagaluʼ ca compañeru ni chineluʼ scuela. Ti Testigu láʼ Trenton guníʼ: «Guizáʼ galán racaʼ llevar ca compañeru stinneʼ, peru qué rireeniáʼ laacabe despué de guilúxedu clase. Nácacabe compañeru stinneʼ, cadi ca xhamiguaʼ. Yanna, ¿lii yaʼ? ¿Maʼ biiyaluʼ pabiáʼ tiempu naquiiñeʼ guidxaagaluʼ ca compañeru stiluʼ la? Zanda guiníʼ íqueluʼ ndiʼ: «¿Xi bineʼ para cadi guidxaagaʼ piaʼ ca compañeru ni yeniáʼ scuela yaʼ? ¿Ñee nuu xiixa ni ñuuladxeʼ ñuneʼ de sti modo la? ¿Xi zanda guneʼ yanna para guneʼ ni jma jneza?». Gudixhe ique sáneluʼ binni nuu xpiaaniʼ ne cadi guidxaagaluʼ binni ni cadi nadxii Jehová.d

18. ¿Gunáʼ nga caadxi pregunta ni zanda guiníʼ íqueluʼ? (Laaca zanda gúʼyaluʼ imagen ca).

¹⁸ Gatigá biiyaʼ ximodo nuuluʼ. Galán guiníʼ íqueluʼ ndiʼ: «¿Ñee nabé cadxaagaʼ ca compañeru ni riniáʼ scuela la? ¿Ñee cacá modo riníʼcabe, modo riníʼ íquecabe o ni rúnicabe naa la? ¿Ñee ñuulaʼdxiʼ Jehová modo nicabeʼ ca pregunta riʼ la?» (Sal. 1:1). Pa cayuuyaluʼ maʼ cacá xpiaʼ ca compañeru stiluʼ lii, nagueendaca biʼniʼ xiixa. Biiyaʼ gannaxhii ca xhamíguluʼ Jehová cásica nadxiiluʼ laa. Ne cadi guiaandaʼ lii guni predicarluʼ ca compañeru stiluʼ. Cumu runibiáʼcabe lii la? zanda gacaneluʼ laacabe guiziidicabe ni ná Stiidxaʼ Dios.

GUCA PREPARAR CHAAHUIʼ

19. Ante guzululuʼ cherouʼ scuela, ¿xi zanda gúniluʼ para ganda guidxaagaluluʼ ca guendanagana ni gueedaneni? Bizeeteʼ ti ejemplu.

¹⁹ Ti binni ni rizá ndaaniʼ bosque o riguiʼbaʼ dani, ante guzulube chebe paxaraa, napa xidé gaca preparar chaahuibe. Naquiiñeʼ chuʼbe seguru nuube nazaaca, gácube lari biaʼsi peʼ para ni chigúnibe ne laaca naquiiñeʼ gánnabe paraa peʼ racaláʼdxibe chindabe. Dxandíʼ, qué zanda diʼ gánnabe xi guiráʼ zazaaca laga zebe lugar que, peru pa gaca preparar chaahuibe la? zacaneni laabe chindabe ra racaláʼdxibe chindabe. Ngueca nga ni naquiiñeʼ gúniluʼ pa cá íqueluʼ cherouʼ scuela. Guyuu seguru gaca fe stiluʼ naguidxi, gucu «armadura ni rudii Dios» ne cadi guiaandaʼ lii ni racaláʼdxiluʼ nga gusisácaluʼ Jehová lu guiráʼ ni gúniluʼ ne cadi gácaluʼ ti binni risaca o ni napa bueltu (Efes. 6:11-13; 1 Cor. 9:26, 27; 10:31).

20. ¿Ximodo zanda chinándaluʼ conseju riʼ «Siempre laguuyaʼ ximodo nuutu para gánnatu pa zuhuaatu dxiichiʼ lu fe stitu»?

²⁰ Biblia rudii conseju riʼ: «Siempre laguuyaʼ ximodo nuutu para gánnatu pa zuhuaatu dxiichiʼ lu fe stitu. Siempre laguuyaʼ tu clase binni nácatu» (2 Cor. 13:5). ¿Ximodo zanda chinándaluʼ ni ná conseju riʼ laga cayuni estudiarluʼ yaʼ? Galán quixhe íqueluʼ gatigá gúʼyaluʼ ximodo nuuluʼ lu guidapaʼ cosa ni bizéʼtenu lu artículo riʼ. ¿Ñee nápaluʼ ti programa ni racané lii chuʼluʼ gaxha de Jehová la? ¿Ñee cayápaluʼ modo riníʼ íqueluʼ para cadi guicá guendabiaaniʼ stiʼ binni guidxilayú lii la? ¿Ñee caquiiñeluʼ tiempu stiluʼ jneza la? ¿Ñee cayúniluʼ stipa gaca xhamíguluʼ ca hermanu ne cadi cayaca xhamíguluʼ ca binni ni qué runi ni ná Dios la? Gatigá caquiiñeʼ guiníʼ íqueluʼ ca pregunta riʼ, gastiʼ naca pa canazaluʼ scuela, pa cayúniluʼ dxiiñaʼ o ratiica si nuuluʼ. Biʼniʼ stipa gaca fe stiluʼ naguidxi ratiica si nuuluʼ ne intiica si ni cayúniluʼ. Zanda gápaluʼ confianza zaguu Jehová ndaayaʼ stipa ni cayúniluʼ (Prov. 3:5, 6).