Guni respetarnu decisión ni guicaa xcaadxi

1, 2. ¿Xiñee nuu biaje gadxé decisión ni ricaanu que xcaadxi hermanu?

¿ÑEE gúnicabe mal de lii pur xiixa decisión ni gucuaaluʼ o zándaca lii gúniluʼ mal de tuuxa hermanu pur xiixa decisión ni gucuaa o xiixa ni biʼniʼ la? Zándaca guiranu huazaacanu ca ni bizeʼtenu riʼ.

² Cadi naquiiñeʼ guidxagayaanu, nuu biaje gadxe decisión ricaanu que xcaadxi hermanu. ¿Xiñee yaʼ? Purtiʼ maʼ gadxé modo riníʼ ique cada tobi de laanu pur guidxi ra gule, pur modo bisiniisi familia stiʼ laa ne pur ca cosa ni maʼ bizaaca lu xquendanabani. Nga runi cadi gudiʼnu lugar gucaa nga laanu cadi chuʼnu tobi si né ca hermanu de congregación (Efes. 4:3).

3. ¿Xi zanda gucaa laanu guininu mal de ti hermanu pur decisión ni guicaa?

³ Ora ricaa ti hermanu xiixa decisión ni qué riuuláʼdxinu, zándaca guiníʼ íquenu caquiiñeʼ gábinu laabe naquiiñeʼ guchaabe decisión ni maʼ gucaabe ca o gábinu xcaadxi ni riníʼ íquenu de laani. Ne zándaca rúninu ni purtiʼ nadxiinu ca hermanu ne racaláʼdxinu cheni laacabe galán (Prov. 17:17). Nga runi, qué racaláʼdxinu gúnicabe xiixa ni guxheleʼ laacabe de Jehová.

4, 5. ¿Xi naquiiñeʼ gúninu pa gadxé decisión ni gucaa ti xpinni Cristu de ni nicaanu?

⁴ ¿Ñee caquiiñeʼ gábinu ti hermanu cadi cayuuláʼdxinu decisión ni gucuaa la? Ziuu biaje caquiiñeʼ gúninu ni. Guzéʼtenu ti ejemplu, pa gánnanu ca íquebe gúnibe xiixa ni qué riuulaʼdxiʼ Jehová la? zacanenu laabe guchaabe modo riníʼ íquebe purtiʼ nadxiinu laabe (Prov. 27:5, 6). Peru ¿pa cadi cucheené decisión ni guicabe ca nin ti ley stiʼ Dios, sínuque maʼ gadxé si ni de decisión ni nicanu yaʼ? Romanos 14:1 cayabi laanu xi naquiiñeʼ gúninu, nani: «Cadi guni juzgartu binni purtiʼ si gadxé opinión napa».

⁵ Peru nuu biaje raca nagana para laanu guni respetarnu decisión ni gucuaa binni ca. Lu artículo riʼ chiguidúʼyanu xiñee caquiiñeʼ guni respetarnu decisión ni guicaa xcaadxi ne ximodo zanda gúninu ni. Peru primé guidúʼyanu chupa chonna ejemplu ni zanda gucaa laanu guiníʼ íquenu cadi jneza decisión ni guicaa ca hermanu.

¿GUNÁʼ NGA CA DECISIÓN NI ZÁNDACA GUNI JUZGARNU?

6, 7. Bizeeteʼ caadxi ejemplu ni zándaca gucaa laanu guni juzgarnu decisión ni guicaa xcaadxi.

⁶ Casi maʼ bidúʼyanu, zándaca pur modo biniisinu o pur ca cosa ni maʼ bizaaca lu xquendanabáninu riníʼ íquenu jneza nga gaca xiixa cosa modo rábinu. Ne zándaca riníʼ íquenu ruuyaʼ xcaadxi ca cosa ca modo ridúʼyanu cani. Peru cadi naquiiñeʼ gácani zacá. Guidúʼyanu xhoopaʼ ejemplu. Primé: Ante gaca ti hermanu Testigu, nabé guxudxi bixhoze. Ora guyebe ti reunión social ne biyaabe cayeʼ ca hermanu que ti bebida ni napa alcohol, qué ñuuláʼdxibe ni bíʼyabe ne gúdxibe laacaʼ cadi jneza ni cayúnicaʼ. Guiropa: Bianda ti hermana ni napa ti guendahuará malu. Despué gúnnabe laaca napa ti hermana guendahuará ni gúpabe que. Cumu racaláʼdxibe gacanebe laa la? rucaabe hermana riʼ chinanda tratamientu ni gucuaabe. Zándaca rábibe laa, xi tipu guendaró go, gueʼ xiixa medicina o xiixa remediu. Guionna: Ante gaca ti hermanu Testigu guyuu ndaaniʼ ti religión ni qué rusiidiʼ ni dxandíʼ ne yanna maʼ qué racaláʼdxibe guibiguetaʼ gúnibe ca cosa ni bíʼnibe ndaaniʼ religión que. Ora gúnnabe guyé ti hermanu ti funeral ne guyuu ndaaniʼ ti yuʼduʼ, guizáʼ bidxiichibe.a

⁷ Guidúʼyanu xhupa ejemplu. Guidapa: Biniisi ti hermanu tiempu cadi jneza ruuyaʼ binni gapa hombre guicha ruaa ne gacu gunaa pantalón ora checaʼ reunión, asamblea ne guni predicarcaʼ. Neca maʼ nánnabe ca instrucción nacubi ni maʼ bidii Grupu ni Zániru, peru rábirube ca hermanu cadi galán diʼ gusaanacaʼ guicha ruaacaʼ, ne ca hermana la? rábibe laacaʼ gácucaʼ vestidu ora maʼ cayúnicaʼ xhiiñaʼ Jehová. Gaayuʼ: Runibiáʼ ti ancianu ti hermanu ni guzaruʼ scuela ne despué bisaana de guni ni ná Jehová. Yanna, guizáʼ nuu ancianu riʼ xizaa purtiʼ maʼ gudixhe ique ti hermanu joven de congregación stibe saruʼ scuela ne racaláʼdxibe gucaabe joven ca ne zaqueca bixhoze ne jñaa guchaacaʼ decisión ni maʼ gucuaacaʼ.

8. a) ¿Xiñee zándaca guzulú guni juzgar ca ni napa xiiñiʼ xcaadxi xpinni Cristu ni cusiniisi xiiñiʼ? b) ¿Xi zanda guizaaca pa guzulú guni juzgarnu ca decisión ni guicaa ca hermanu?

⁸ Yanna, guidúʼyanu ti ejemplu ni zanda gacané ca ni napa xiiñiʼ. Xhoopaʼ: Laatu, ca ni napa xiiñiʼ, rúnitu stipa gusiniisitu ca xiiñitu «casi ná Jehová ne casi ná ca conseju stiʼ» (Efes. 6:4). Peru nuu xcaadxi xpinni Cristu qué rucueezapecaʼ ca xiiñicaʼ. Zándaca qué riguíxhecaʼ ti hora para guibiguetaʼ xiiñicaʼ ra lídxicaʼ, rudiicaʼ lugar quítecabe videojuegu ra cadi cadinde binni o rudiicabe laacaʼ ti teléfono neca nahuiinirucaʼ. Nga runi, zándaca guni sentir xiiñitu nabé riguíxhetu regla para laa ne guinabadiidxaʼ laatu: «¿Xiñee cadi casi bixhoze ne jñaa ca xhamiguaʼ laatu pue?». Ne pa guizaaca ndiʼ zándaca guzulú guni juzgartu xcaadxi xpinni Cristu ni cusiniisi xiiñiʼ. Dede raríʼ maʼ bidúʼyanu xhoopaʼ ejemplu, peru nuuruʼ xcaadxi. Zándaca guzulú guininu paraa riquiiñeʼ ti hermanu xpueltu, panda biaje riebe de vacación o xi rúnibe para chuʼbe nayecheʼ. Ni dxandíʼ nga, intiica si decisión guicaa ti hermanu zanda guchiichi ni laanu, tisi maʼ gadxé ni de decisión ni nicaanu. Peru cadi gudiʼnu lugar jma guisaca ni guiníʼ íquenu que chuʼnu né ca hermanu de congregación tobi si.

9. ¿Xi cadi naquiiñeʼ guiaandaʼ laanu? (Laaca zanda gúʼyaluʼ imagen ca).

⁹ Zándaca guicaanu xiixa decisión peru maʼ gadxé ni de decisión ni guicaa sti hermanu, peru qué riníʼ diʼ nga tobi de ca decisión ca jneza ne stobi ca cadi jneza (Rom. 14:5). Ora riete lu Biblia guiráʼ ca xpinni Cristu naquiiñeʼ chuʼcaʼ tobi si lu ni riníʼ íquecaʼ, ni caniʼni nga ngueca modo naquiiñeʼ guidúʼyanu ca ley stiʼ Jehová, ne cadi caníʼ diʼ ni ngueca nga modo naquiiñeʼ guiníʼ íquenu (2 Cor. 13:11). Guníʼ ique racalaʼdxiʼ caadxi binni chizacaʼ xiixa lugar. Zándaca cada tobi de laacabe gadxé modo quixhe ique chindá raqué pur ni riuulaʼdxiʼ guni. Peru guiracaʼ zindacaʼ ngueca lugar. Ngueca nga ni zanda guizaacanu, zándaca maʼ gadxé decisión guicaanu de xcaadxi xpinni Cristu, peru guiranu racaláʼdxinu gúninu ti cosa: gusiéchenu ladxidóʼ Jehová. Nga runi qué runi juzgarnu decisión ni guicaacaʼ xcaadxi (Mat. 7:1; 1 Tes. 4:11).

XIÑEE CAQUIIÑEʼ GUNI RESPETARNU DECISIÓN NI GUICAA XCAADXI

10. Casi riete lu Santiago 4:12, ¿xii ndiʼ qué gápanu derechu gúninu, ne xiñee?

¹⁰ Lu Biblia riete caadxi razón ni racané laanu guni respetarnu decisión ni ricaa xcaadxi binni. Guidúʼyanu chupa chonna de laacani. Qué gápanu derechu guni juzgarnu ni runi xcaadxi ora guicaacaʼ decisión lu xquendanabánicaʼ (biindaʼ Santiago 4:12). Jehová nga Dios ni riguixhe ley ne Juez ni jma risaca. Nga runi laasibe nápabe derechu quíxhebe ley ne regla, ne cuídxibe cuenta ca hermanu (Rom. 14:10). Cadi lu nanu nuu guni juzgarnu o guininu cadi jneza ca decisión ni guicaa xcaadxi purtiʼ si maʼ gadxé ni riníʼ íquenu.b

11. ¿Ximodo racanenu chuʼ congregación tobi si? (Laaca zanda gúʼyaluʼ imagen ca).

¹¹ Racalaʼdxiʼ Jehová chuʼ ca xpinni tobi si. Nabé riuulaʼdxiʼ Jehová guʼyaʼ gadxé gadxé tipu binni ne gadxé gadxé cosa. Ne ridúʼyanu zacá ni lu ca cosa ni bizaʼbe. Guzéʼtenu ti ejemplu. Cadi ngueca diʼ forma napa ca hieluhuiiniʼ ni riaba de guibáʼ. Ne ngueca nga ni rizaacanu. Lade jma de xhono mil millón de binni ni nabani lu guidxilayú riʼ, gastiʼ chupa binni ngueca modo laacaʼ ne modo rihuínnicaʼ. Bizáʼ Jehová laanu para gácanu gadxé peʼ de xcaadxi binni ne cadi casi laacaʼ. Peru racaláʼdxibe chuʼnu tobi si. Nga runi, neca gadxé peʼ laanu de xcaadxi, cadi naquiiñeʼ gudiʼnu lugar guxheleʼ nga laanu de laacabe, sínuque naquiiñeʼ guyúbinu chuʼnu tobi si ne nayecheʼ né laacabe. Ni jma risaca para laanu ndaaniʼ congregación nga chuʼnu tobi si, ne cadi ni riuuláʼdxinu o modo riníʼ íquenu (Rom. 14:19).

XIMODO RUSIHUÍNNINU RUNI RESPETARNU NI RINÍʼ XCAADXI NE DECISIÓN NI RICAACAʼ

12, 13. ¿Xi pregunta naquiiñeʼ guiníʼ íquenu pa cadúʼyanu ruluíʼ si bichee ti hermanu? (Gálatas 6:1; laaca zanda gúʼyaluʼ cuadru ni láʼ «Pa para lii ruluíʼ cadi jneza decisión ni gucuaa tuuxa»).

¹² Ora ricaa xcaadxi decisión. Guníʼ ique ndiʼ: «¿Ñee cuchee hermanu ca la? o cayúnibe xiixa ni gadxé peʼ modo ñuneʼ la?». Pa cucheenebe xiixa mandatu ni zeeda lu Biblia, guníʼ ique ndiʼ: «¿Ñee naa nga caquiiñeʼ guinieniáʼ laabe la? o ti ancianu?». Pa lii nga binni ni caquiiñeʼ guiniʼné laabe la? biʼniʼ ni né diidxaʼ nadóʼ (biindaʼ Gálatas 6:1). Peru stale biaje zándaca cayúnibe xiixa ni gadxé peʼ modo ñúninu. Pa zacá ni la? cadi guininu cadi jneza decisión ni gucuaabe. Guni respetarnu derechu ni napa hermanu ca de cuí xi guni ne cadi guni juzgarnu laa (Rom. 14:2-4).

¹³ Guiníʼ íquenu ndiʼ. Pa chinenu ti xhamígunu ti restaurante, ¿cadi dxandíʼ qué zacanu tema guinábabe laaca ni canábanu la? Coʼ pue, zudiʼnu lugar guinábabe ni racaláʼdxibe gobe. Intiica si guinábabe qué zúnini laanu gastiʼ. Ne laaca qué ziuuláʼdxinu guinábabe guendaró ni chiguidoʼno purtiʼ si riuuláʼdxibe ni. Zaqueca nga laanu, rusihuínninu runi respetarnu xcaadxi ra rudiʼnu lugar guicaacaʼ decisión sticaʼ sin cuʼ ruaʼnu.

14. ¿Ximodo zanda gacanenu chuʼ congregación tobi si ora guicaanu xiixa decisión? (1 Corintios 8:12, 13).

¹⁴ Ora lii peʼ ricaaluʼ ti decisión. Zanda gacaneluʼ chuʼ congregación tobi si pa gúniluʼ stipa cadi guninaluʼ xcaadxi (biindaʼ 1 Corintios 8:12, 13). Guníʼ ique chiguicaaluʼ ti decisión ne nánnaluʼ zanda gúniluʼ ni cá íqueluʼ gúniluʼ. Peru pa nánnaluʼ zuninani ti hermanu, ¿ñee jneza guicaaluʼ decisión ca la? (1 Cor. 10:23, 24).c Pa guizaaca nga la? galán cadi guicaluʼ tema gaca ni racaláʼdxiluʼ (Rom. 15:1). Peru ¿cadi casi guninu naquiiñeʼ guni respetar xcaadxi decisión ni guicaanu la? Zacá ni. Caquiiñeʼ guni respetárcabe decisión ni guicaanu ne laanu caquiiñeʼ guni respetarnu decisión ni guicaacabe. Peru laaca cadi naquiiñeʼ guiaandaʼ laanu conseju ni zeeda lu Romanos 12:18: «Laguni biaʼ gándatiʼ para chuʼtu en paz né guiráʼ binni». Nga runi, rúninu guiráʼ ni nuu lu nanu para chuʼnu tobi si né ca hermanu stinu ne cadi guninanu laacaʼ.

15. ¿Ximodo zanda gacané ca ancianu chuʼ congregación tobi si? (1 Corintios 4:6).

¹⁵ Runi respetar ca ancianu decisión ni ricaa xcaadxi. Racanécabe chuʼ congregación tobi si ra cadi quíxhecabe xi guni cada hermanu ne ra cadi guinábacabe ca hermanu gúnicaʼ «ni maʼ cadi cá lu Stiidxaʼ Dios» (biindaʼ 1 Corintios 4:6). Ne qué rudiicabe xiixa conseju ni cadi cá lu Biblia o ni cadi zeeda lu xiixa publicación. Ne ora guinabaʼ tuuxa hermanu laacabe gacanécabe laa, qué rudiicabe laa xiixa conseju pur ni maʼ bizaacacabe, sínuque ni zeeda lu Stiidxaʼ Dios (Is. 48:17, 18).

16. ¿Ximodo rusihuinni ca ancianu runi respetarcaʼ decisión ni ricaa cuerpu de ancianu?

¹⁶ Laaca runi respetar ca ancianu decisión ni guicaa cuerpu de ancianu. Ora maʼ biʼniʼ orar cuerpu de ancianu ne maʼ gunabaʼ espíritu santu, maʼ biindaʼ chaahuicaʼ ni ná Biblia ne maʼ gucuaacaʼ ti decisión la? guiracaʼ naquiiñeʼ guni apoyarcaʼ decisión ni gucuaa mayoría de laacaʼ neca gadxé modo riníʼ íquecaʼ de laani (Efes. 5:17). Ora guʼndaʼ ca ancianu xiixa instrucción ni zeeda de organización, rúnicaʼ stipa guiene chaahuicaʼ ni ne cadi gúnicaʼ sti cosa ni cadi cá luni. Qué riquiiñecabe xiixa ni cá lu ca publicación stinu para si gusihuínnicabe jneza ni caníʼcabe o modo riníʼ íquecabe.

17. ¿Xi ribeendunu ora runi respetarnu decisión ni ricaa xcaadxi?

¹⁷ Casi maʼ bidúʼyanu, gadxé peʼ cada tobi de laanu. Gadxé gadxé nga ni riuuláʼdxinu ne modo riníʼ íquenu. ¡Guizáʼ galán naca xquidxi Jehová zacá! Nuunu nayecheʼ ndaaniʼ xquídxibe purtiʼ nuu hermanu de gadxé gadxé lugar ne gadxé gadxé modo laacaʼ. Peru neca gadxé laanu de laacabe, cadi gudiʼnu lugar guxheleʼ nga laanu de ca hermanu stinu, sínuque guyúbinu chuʼ paz ndaaniʼ congregación. Rúninu stipa pur cadi guninanu xcaadxi ne runi respetarnu decisión ni ricaa cada tobi de laacabe. Nga racané chuʼ congregación tobi si ne chuʼ ca hermanu nayecheʼ (Sal. 133:1; Mat. 5:9).