Xi zanda gacané laanu gánnanu pa zazárunu scuela

1, 2. a) ¿Xi decisión naquiiñeʼ guicaa ca joven? b) ¿Xi zadúʼyanu lu artículo riʼ?

PA JOVEN lii, zándaca stale biaje huanabadiidxacabe lii: «¿Xi dxiiñaʼ racaláʼdxiluʼ gúniluʼ?». Nanna dxíchinu ni jma galán zanda gúniluʼ nga gúniluʼ xhiiñaʼ Jehová de tiempu completu. Peru laaca naquiiñeʼ gúniluʼ dxiiñaʼ para gápaluʼ ni tidineluʼ dxi (2 Tes. 3:10). Zándaca maʼ huaníʼ íqueluʼ xi dxiiñaʼ racaláʼdxiluʼ gúniluʼ.

² Caadxi joven, para ganda guidxélacaʼ dxiiñaʼ nagueenda, despué de maʼ guníʼnecaʼ bixhózecaʼ ne jñaacaʼ, riguixhe íquecaʼ sárucaʼ scuela despué de maʼ bireecaʼ de preparatoria.a Zándaca huaníʼ íqueluʼ pa zazarouʼ scuela ne xi chiguundaluʼ. Lu artículo riʼ, chiguidúʼyanu caadxi principiu ni zeeda lu Biblia ni zacané lii guicaaluʼ decisión jneza. Neca gucuá artículo riʼ para ca joven, peru zanda gacaneni tutiica xpinni Cristu ni caníʼ ique saruʼ scuela, gastiʼ nacaʼ panda iza napa. Zanda iquiiñeʼ ca ni maʼ napa xiiñiʼ ca conseju riʼ para gacanecaʼ laacabe.

«¿ZAZAYARUAʼ SCUELA LA?»

3. ¿Xiñee zándaca quixhe ique caadxi xpinni Cristu sárucaʼ scuela?

³ Ndaaniʼ caadxi guidxi, preparatoria si rié binni ne randa rápacaʼ ni guibáninecaʼ. Peru ndaaniʼ xcaadxi guidxi caquiiñeʼ saruʼ binni scuela para ganda guidxela ti dxiiñaʼ ra ganda guni ganar jma ne ra guni dxiiñaʼ huaxiéʼ hora. Para ti xpinni Cristu la? nga zacané laa gapa jma tiempu para guni predicar o guni jma lu xhiiñaʼ Dios. Pa saruʼ ti xpinni Cristu scuela la? naquiiñeʼ guni stale stipa ne zándaca zadxaagalú caadxi guendanagana.

4. Pa racalaʼdxiʼ ti xpinni Cristu saruʼ scuela, ¿tu naquiiñeʼ guicaa decisión ca? (Laaca zanda gúʼyaluʼ nota ca).

⁴ Biblia ná «cada tobi de laanu naquiiñeʼ guni cumplir né responsabilidad stiʼ» (Gál. 6:5; biiyaʼ nota de estudio). Nga runi, cada xpinni Cristu ni maʼ huaniisi nga naquiiñeʼ guicaa decisión pa zazaruʼ scuela o pa maʼ coʼ.b Para ca ni caʼruʼ gusaa 18 iza la? bixhózecaʼ ne jñaacaʼ nga naquiiñeʼ guʼyaʼ pa zazárucabe scuela (Efes. 6:1). Laaca naquiiñeʼ gacanécabe ca xiiñicabe dede yanna, ti zacá ora maʼ huaniisicaʼ guicaacaʼ decisión jneza ora guiníʼ íquecaʼ pa zazárucaʼ scuela (Prov. 22:6).

5. ¿Pora naquiiñeʼ guicaa ti xpinni Cristu decisión pa zazaruʼ scuela o pa ma coʼ, ne xiñee? (Laaca zanda gúʼyaluʼ imagen ca).

⁵ ¿Pora naquiiñeʼ guiníʼ ique ti xpinni Cristu pa zazaruʼ scuela o pa maʼ coʼ? Stale joven riníʼ íquecaʼ ni ora canazacaʼ preparatoria. Ne ni jma jneza gúnicabe nga guiniʼnécabe bixhózecabe ne jñaacabe de laani ante guicaacabe xiixa decisión. Nga zacané laatu guni investigartu juntu ti gánnatu xi zanda gúnitu. Dede zanda cuiluʼ xi materia zanda gúʼndaluʼ ra scuela, ni zacané lii chuʼluʼ listu para ni racaláʼdxiluʼ gúʼndaluʼ despué o de dxiiñaʼ ni racalaʼdxiluʼ gápaluʼ. Peru ¿ñee caquiiñeʼ peʼ guicaaluʼ decisión ca ante gunduuxeluʼ preparatoria la? Cadi caquiiñeʼ peʼ gácani zacá (Prov. 21:5). Caadxi joven, ora maʼ bireecaʼ de preparatoria ruyúbicaʼ ti dxiiñaʼ ne rácacaʼ precursor laga caníʼ íquecaʼ pa zazárucaʼ scuela. Ne nuu tu laa ricaa decisión ca despué de chupa chonna iza.

6. ¿Xi zacané lii guicaaluʼ ti decisión jneza ora guiníʼ íqueluʼ pa zazarouʼ scuela?

⁶ ¿Xi zacané lii guicaaluʼ ti decisión jneza ora guiníʼ íqueluʼ pa zazarouʼ scuela? Guniʼné Jehová de laani (Sant. 1:5). Ne biʼniʼ guiropaʼ cosa riʼ. Primé, guníʼ ique xiñee racaláʼdxirouʼ saluʼ scuela (Sal. 26:2). Guiropa, guníʼ ique chaahuiʼ xi zabeenduluʼ ne xi guendanagana zadxaagaluluʼ (Prov. 14:15). Guzéʼterunu jma de guiropaʼ cosa ni caquiiñeʼ gúninu ca.

«¿XIÑEE RACALADXERUÁʼ CHAAʼ SCUELA?»

7. ¿Xi ti pregunta nabé risaca guiníʼ íqueluʼ, ne xiñee?

⁷ Pa caníʼ íquerouʼ cheluʼ scuela, nabé risaca guiníʼ íqueluʼ ca pregunta riʼ: «¿Xiñee racaladxeruáʼ chaaʼ scuela yaʼ?». Stale tu laa riguixhe ique cheruʼ scuela para ganda guidxela ti dxiiñaʼ ni chuulaʼdxiʼ o ra quíxecabe laa galán. ¿Ñee malu nga la? Qué zanda guininu malu ni (1 Tim. 5:8). Peru Biblia cayabi laanu gápanu cuidadu cadi gannaxhiinu bueltu ne cadi guyúbinu gápanu cosa risaca lu guidxilayú malu riʼ (Prov. 23:4, 5; 1 Tim. 6:8-10; 1 Juan 2:17). Pa ni cuyúbiluʼ nga gácaluʼ ti binni ricu o tuuxa risaca la? zándaca cadi dxandíʼ peʼ ziuuluʼ nayecheʼ ne ni jma feu nga zaxéleluʼ de Jehová.

8, 9. a) ¿Ximodo naquiiñeʼ guʼyaʼ ca xpinni Cristu sárucaʼ scuela? (Mateo 6:33). b) ¿Xi rusiidiʼ ni guníʼ Josefina, Morine ne Iris laanu?

⁸ Ni jma naquiiñeʼ guisaca lu xquendanabáninu nga gúninu ni ná Jehová (Mat. 22:37, 38; Filip. 3:8). Yanna, ¿ximodo naquiiñeʼ gúʼyaluʼ saruʼ binni scuela yaʼ? Biiyaʼ ni casi xiixa ni zacané lii gápaluʼ ni iquiiñeluʼ ne ganda gúniluʼ xhiiñaʼ Jehová de guidubi ladxidoʼloʼ (biindaʼ Mateo 6:33).

⁹ Guidúʼyanu ximodo ruuyaʼ caadxi xpinni Cristu saruʼ binni scuela. Josefina de guidxi Chile, guníʼ: «Gudixheʼ iqueʼ chaaruaʼ scuela para ganda guidxelaʼ ti dxiiñaʼ ni gacané naa guneʼ jma lu xhiiñaʼ Jehová. Gudixheʼ iqueʼ cadi gusisacaʼ scuela, sínuque ca meta ni napaʼ ndaaniʼ xquidxi Jehová». Ti hermana láʼ Morine guyé cursu ti iza para guiziidiʼ ugá guicha ique binni. ¿Xiñee yaʼ? Laabe guniʼbe: «Meta stinneʼ nga chigacaniáʼ ra caquiiñeʼ tu guni predicar, ngue runi biyubeʼ ti cursu ni gacané naa guneʼ ni. Biluxe si cursu que bizuluáʼ cayuneʼ dxiiñaʼ ne bineʼ ahorrar para chindezaʼ sti ladu. Ne ora yendayaʼ ra chigacaniáʼ que nagueendaca bidxelaʼ dxiiñaʼ de ni biziideʼ que». Iris, ti hermana ni xadxí guzá scuela para gaca dentista, guníʼ: «Pa sarouʼ scuela zacaneni lii gápaluʼ xiixa habilidad, peru cadi dxandíʼ peʼ zabániluʼ nayecheʼ. Pa racaláʼdxiluʼ guibániluʼ nayecheʼ ne gápaluʼ guiráʼ ni caquiiñeluʼ la? gudixhe ique gúniluʼ ni ná Jehová primé lu xquendanabániluʼ». Nga runi, ora ni jma risaca para laanu nga chuʼnu gaxha de Jehová, ricaanu decisión ni dxandíʼ peʼ rusiecheʼ laanu.

«¿XI ZABEENDULUʼ PA SAROUʼ SCUELA NE XI GUENDANAGANA ZÁPALUʼ?»

10. ¿Ximodo racané Deuteronomio 32:29 lii guicaaluʼ decisión pa zazarouʼ scuela?

¹⁰ Zándaca maʼ gudixhe íqueluʼ xi gúʼndaluʼ. Pa zacá ni, galán guiníʼ íqueluʼ nuuruʼ xcaadxi cursu o carrera zanda gúʼndaluʼ, zándaca gácani casi ni maʼ gudixhe íqueluʼ gúʼndaluʼ o maʼ gadxé (bichaaga ni né Proverbios 18:17). Yanna riʼ maʼ cadi nagana guni estudiar binni purtiʼ maʼ nuu cursu lu internet. Laaca galán guiníʼ íqueluʼ pa zuundarouʼ o pa zápaluʼ ni tidineluʼ dxi biaʼ ra maʼ biindaluʼ. Guzéʼtenu ni bizaaca Johanna, ti hermana de guidxi Finlandia, laabe maʼ qué niguixhe íquebe nizárube scuela. Sicaríʼ guniʼbe: «Despué de binduuxeʼ scuela biaʼ rinabaʼ gobiernu guʼndaʼ binni, gucaʼ precursora ne bineʼ dxiiñaʼ galaa dxi. Huayuneʼ dxiiñaʼ gadxé gadxé lugar, ne maʼ biiyaʼ qué rusaana de guni Jehová ni maʼ guníʼ, gudii ni caquiiñeʼ ca xpinni». Cadi guiaandaʼ lii, intiica si decisión ni quixhe íqueluʼ guicaaluʼ zabeenduluʼ ni galán, peru laaca zápaluʼ guendanagana. Nga runi, galán guiníʼ íqueluʼ: «¿Ñee jma stale cosa zabeenduáʼ que ca guendanagana ni zadxaagaluáʼ pur laani la?» (biindaʼ Deuteronomio 32:29; 1 Cor. 10:23). Guidúʼyanu chupa chonna cosa ni zacané lii gánnaluʼ respuesta stiʼ pregunta ca.

11. ¿Xiñee naquiiñeʼ guiníʼ íqueluʼ panda hora zaquiiñeluʼ lu ti semana pa cheluʼ scuela? (Laaca zanda gúʼyaluʼ ca imagen ca).

¹¹ Pabiáʼ tiempu zaquiiñeluʼ. Lu ti semana, ¿panda hora zaquiiñeluʼ para cheluʼ clase, gúniluʼ ca tarea ne xcaadxi cosa ni guinábacabe lii ra scuela yaʼ? ¿Ñee zápaluʼ tiempu para gúniluʼ ca cosa ni guchiña lii gaxha de Jehová ne ca cosa ni naquiiñeʼ gúniluʼ ndaaniʼ lídxiluʼ la? (Filip. 1:10). ¿Ñee zusidxágani xquendabiaaniluʼ, maʼ qué zápaluʼ stipa para gúniluʼ estudiu personal stiluʼ o gaca prepararluʼ para ca reunión ca la? Ndiʼ nga ni bizaaca Jeroz, ti hermanu de guidxi India. Sicaríʼ guniʼbe: «Guizáʼ nagana raca para naa guneʼ predicar guiráʼ semana, chaaʼ ca reunión ca ne gucaadiaʼgaʼ chaahueʼ ni riete lúcani. Yanna, maʼ bidieeʼ cuenta biniteʼ siaʼ tiempu ne stipa stinneʼ lu cursu ni gucuaaʼ que». Dxandíʼ, nuu cursu qué raxha peʼ ni tiempu stiʼ tuuxa: nuuni rié binni chupa chonna si dxi lu ti semana ne nuu de laacani la? huaxiéʼ tarea rusaananécabe binni. Guzéʼtenu ti ejemplu, ti hermana de Mozambique ni láʼ Rabeca, bisiene guizáʼ nayecheʼ nuu pur decisión ni gucuaa. Sicaríʼ guniʼbe: «Cursu ni gucuaaʼ que rindaani chupa hora cada dxi, ngue gucané naa cadi gusaana de gacaʼ precursora regular».

12. ¿Gunáʼ nga ca pregunta ni zanda gacané lii iquiiñeluʼ tiempu stiluʼ jneza? (Eclesiastés 12:1).

¹² Pabiáʼ zandaani. ¿Panda beeu o iza zazaluʼ scuela? ¿Ñee zaquiiñeluʼ tiempu stiluʼ jneza la? (Efes. 5:15-17). ¿Ñee zudiini lugar laga nácaluʼ joven gudiiluʼ ni jma galán nápaluʼ Jehová ra gúniluʼ ni nabe de tiempu completu la? (biindaʼ Eclesiastés 12:1). ¿Ñee nuuruʼ cursu jma nachucu de ni racaláʼdxiluʼ guni estudiarluʼ ca la? Guzéʼtenu ti ejemplu, nuu scuela ra rusiidicabe tuuxa guni xiixa dxiiñahuiiniʼ ne xcaadxi scuela rusiidicaʼ gápaluʼ xiixa habilidad lu chupa chonna si beeu ne jma baratu cani que ñeluʼ scuela roʼ. Mario, de guidxi Chile, bizeeteʼ: «Guyaaʼ ti cursu de chupa iza, jma baratu bireeni naa que ñaaʼ scuela roʼ. Cumu tapa si gubidxa gupaʼ clase ndaaniʼ semana la? gunda gucaʼ precursor laga cayuundaʼ».

13. ¿Gunáʼ nga chupa chonna peligru ni ridxaagaluʼ tuuxa ora runi estudiar sti ladu?

¹³ Paraa guni estudiarluʼ. Zándaca guidxélaluʼ ti scuela gaxha de ra nabézaluʼ. Peru ¿pa naquiiñeʼ cheluʼ stiʼ guidxi yaʼ? Cadi guiaandaʼ lii pa chindézaluʼ zitu de ra nabeza familia stiluʼ, zándaca zindezaneluʼ tuuxa ni runi bialuʼ o familia stiluʼ ni cadi naca Testigu, ne zándaca gucaacabe lii guixéleluʼ de Jehová (Prov. 22:3; 1 Cor. 15:33). Matias, ti hermanu de Mozambique, guzabe ti cursu de ti iza ne huaxiéʼ bueltu binítibe luni, neca zacá raca arrepentirbe pur guzabe cursu que. ¿Xiñee yaʼ? Sicaríʼ guniʼbe: «Tiempu que gulezaʼ ndaaniʼ ti internadu ne guiráʼ dxi bidxaagaluáʼ stale cosa ni nucaa naa nucheeniáʼ Jehová. Pa cá ique tuuxa guni estudiar la? ni zanda gabeʼ laa nga cadi chindeza zitu de familia stiʼ». Ne ti hermana de guidxi Rusia guníʼ sicaríʼ: «Qué nidxaagaluáʼ guendanagana nin tentación purtiʼ gulezaʼ ra lidxi bixhozeʼ ne jñaaʼ lugar de ñaanaʼ ra scuela ra riaana ca estudiante». Sti cosa ni zanda gúniluʼ nga guni estudiarluʼ pur internet.

14. ¿Ximodo zanda gacané Lucas 14:28 lii guicaaluʼ decisión jneza?

¹⁴ Pagala zaguíxeluʼ. Nuu carrera o cursu cadi caru cani, ne nuu lugar la? gobiernu riguixe cani. Ora zacá rizaacani, rizaruʼ binni scuela para guiziidiʼ jma ne ganna xiixa habilidad ti ganda guidxela ti dxiiñaʼ sin guniti stale bueltu. Peru nuu lugar la? guizáʼ caru nga guʼndaʼ tuuxa ti carrera o ti cursu. Ne riuuruʼ xcaadxi gastu. Guzéʼtenu ti ejemplu, zándaca caquiiñeʼ quíxeluʼ tuuxa gudii lii clase para ganda guiaanaluʼ ra scuela ra racaláʼdxiluʼ cheluʼ ca. Nuu binni ruzaabiʼ para ganda quixe scuela stiʼ. Adilson, de guidxi Mozambique, dede yanna racaná pur decisión gucuaa. Sicaríʼ guniʼbe: «Guizáʼ stale cosa biʼniʼ familia stinneʼ para quixe tapa iza guyaaʼ scuela. Huaxiéʼ bueltu gúpacabe para sícabe ni gócabe ne ca cosa ni iquiiñecabe». Nga runi, galán guiníʼ íqueluʼ: «¿Pagala guiaxa para guneʼ estudiar ni cayuuladxeʼ riʼ yaʼ? ¿Ñee zanda quixe familia stinneʼ ni o zanda quixe ni la? ¿Ñee nuu sti carrera o cursu jma baratu la? Pa guinabaʼ ti préstamu, ¿pabiáʼ zanda para guireecayaʼ ni yaʼ? Ora gunduuxeʼ scuela, ¿ñee zadxelaʼ ti dxiiñaʼ ni gacané naa gapaʼ ni caquiiñeʼ ne quixe ra nuzaabeʼ la?» (biindaʼ Lucas 14:28; Prov. 22:7).

15. ¿Xiñee galán dede ante gúʼyaluʼ pa nuu dxiiñaʼ ante guicaaluʼ decisión xi gúʼndaluʼ?

¹⁵ Biiyaʼ pa zadxélaluʼ dxiiñaʼ. Guníʼ ique gunáʼ nga ca dxiiñaʼ ni jma raca neza ra nabézaluʼ o lugar ra racaláʼdxiluʼ chindézaluʼ. Ni racaláʼdxiluʼ guni estudiarluʼ o cursu ni nápaluʼ gana gúniluʼ ca, ¿ñee zacaneni lii guidxélaluʼ dxiiñaʼ la? Nuu carrera o cursu qué rusiidicabe tuuxa gapa xiixa habilidad, sínuque puru si información de gadxé gadxé tema ruundacabe (Col. 2:8). Ti hermana de guidxi India guníʼ: «Ni bineʼ estudiar que, qué nusiidini naa ñapaʼ ca habilidad ni caquiiñeʼ ca empresa ni rudii dxiiñaʼ, ngue runi qué nidxelaʼ ti dxiiñaʼ de ni biindaʼ que». Lu xcaadxi carrera o cursu rusiidicabe tuuxa gapa habilidad para guni dxiiñaʼ, peru huaxiéʼ si empresa runi contratar. Ne nga peʼ nga ni bizaaca ti hermanu láʼ Sublime, de República Centroafricana, laa biindaʼ ti cursu para guni chaahuiʼ clima. Sicaríʼ guniʼbe: «Lugar ra nabezaʼ, stale de ca binni ca, laca laacaʼ runi chaahuicaʼ ca cosa sticaʼ, nga runi, guizáʼ raca nagana para naa guidxelaʼ dxiiñaʼ».

16. ¿Xiñee galán guiníʼ íqueluʼ xi clase dxiiñaʼ zadxélaluʼ ne ni racaláʼdxiluʼ guni estudiarluʼ ca?

¹⁶ Laaca galán guiníʼ íqueluʼ xi clase dxiiñaʼ zanda gúniluʼ pur ni chiguni estudiarluʼ ca. ¿Ñee nácani ti cosa ni ziuuláʼdxiluʼ gúniluʼ la? (Ecl. 3:12, 13). ¿Tu clase binni zunineluʼ dxiiñaʼ? ¿Ñee zácani ti dxiiñaʼ ra chuʼ xquendanabániluʼ ra naxoo, ti dxiiñaʼ ni nabé zuni estresar lii o zácani ti dxiiñaʼ ra ruyúbicabe tíndecabe pur xiixa puestu la? ¿Pabiáʼ zaguíxecabe lii? ¿Ñee zugaandani para siluʼ ni iquiiñeluʼ la? ¿Ñee caquiiñeʼ guiziidirouʼ para cadi guchuugucabe lii de dxiiñaʼ ca la? Ne ni jma risaca, ¿ñee zacaneni lii gúniluʼ ni ná Reinu primé lu xquendanabániluʼ la? (Ecl. 12:13). Peru pa huaxiéʼ dxiiñaʼ nuu la? qué zacanu tema gudiicabe laanu dxiiñaʼ ni racaladxinu gúninu. Cadi guiaandaʼ lii, decisión ni guicaaluʼ para guni estudiarluʼ zanda gacaneni lii o coʼ guidxélaluʼ dxiiñaʼ. Tabitha, de guidxi India, gucuaa ti cursu para guiziidiʼ quiba lari. Sicaríʼ guniʼbe: «Gudixhe iqueʼ gacaʼ modista purtiʼ zacaneni naa gacaʼ precursora, qué riaadxaʼ dxiiñaʼ de laani, zanda quíxheluʼ horariu stiluʼ ne cadi caquiiñeʼ gápaluʼ stale bueltu para guzulú gúniluʼ dxiiñaʼ ca». Ne zacá bizaaca ni: ni biziidibe que gucaneni laabe gápabe ni caquiiñebe ne gácabe precursora.

17. a) ¿Paraa zanda guidxélaluʼ información ni caquiiñeluʼ para guicaaluʼ decisión jneza? b) ¿Xi principiu zeeda lu Biblia zacané lii guicaaluʼ ti decisión? (Laaca zanda gúʼyaluʼ cuadru ni láʼ «Ca principiu ni zeeda lu Biblia ni zanda gacané lii»).

¹⁷ Lu artículo riʼ maʼ bidúʼyanu caadxi cosa ni caquiiñeʼ guiníʼ ique tuuxa para ganna pa zazaruʼ scuela. Yanna, ¿paraa zanda guidxélaluʼ información ni gacané lii guicaaluʼ decisión jneza yaʼ? Pa maʼ nánnaluʼ xi racaláʼdxiluʼ gúʼndaluʼ la? galán cheluʼ ra scuela ca o chuʼluʼ lu sitiu de internet stiʼ scuela ca para gánnaluʼ jma de laani. Laaca galán gánnaluʼ pa zadxélaluʼ dxiiñaʼ de ni racaláʼdxiluʼ gúʼndaluʼ. Laaca zanda guiníʼneluʼ binni ni biindaʼ ni racaláʼdxiluʼ gúʼndaluʼ ca o ni runi dxiiñaʼ de laani (Prov. 13:10). Gunabadiidxaʼ laabe xi huabeendube ne xi qué riuuláʼdxibe de laani. Ne laaca galán guiníʼneluʼ de laani ca hermanu ni cayuni xhiiñaʼ Jehová né guendanayecheʼ (Prov. 15:22). ¿Xi conseju zanda gudiicabe lii de za binni scuela ne de dxiiñaʼ ni riuuláʼdxiluʼ gúniluʼ yaʼ? Zándaca gábicabe lii xiixa ni qué lica niníʼ íqueluʼ.

18. ¿Xi cadi naquiiñeʼ guiaandaʼ laanu?

¹⁸ Casi maʼ bidúʼyanu, saruʼ binni scuela la? nápani ra galán ne ra feu. Nga runi, biiyaʼ chaahuiʼ xi racaláʼdxiluʼ gúniluʼ ne biʼniʼ orar. Cadi guiaandaʼ lii neca zápaluʼ ni guibanineluʼ ra saluʼ scuela, peru ni dxandíʼ peʼ zusiecheʼ lii nga gaca xhamíguluʼ Jehová (Sal. 16:9, 11). Siempre rápabe ca xpínnibe, gastiʼ naca pa guzacaʼ scuela o pa coʼ (Heb. 13:5). Yanna, ¿pa maʼ gudixhe íqueluʼ sarouʼ scuela yaʼ? ¿Xi zacané lii cadi gusaana de gaca xhamíguluʼ Jehová? Nga peʼ nga ni chiguidúʼyanu lu sti artículo ca.