Binibiáʼ rey David Jehová ne gupa confianza laabe. Ne gunábabe Jehová gacané laabe dxi canazananda rey Saúl ne xcaadxi binni laabe. Ora bíʼyabe bicabi Jehová oración stibe ne bilá laabe, bicaabe ridxi ne guniʼbe: «¡Nabani Jehová!» (Sal. 18:46). Né ca diidxaʼ riʼ, cadi caníʼsibe nuu Dios. Ti libru ná caníʼ David zaqué purtiʼ napa confianza Jehová «casi ti Dios ni nabani ne racané xquidxi stale biaje». Biiyaʼ David modo gucané Jehová laa lu xquendanabani, ne nga gucané laabe chuʼbe seguru nabani Jehová ne bidiini stipa laabe para gúnibe ni ná Jehová ne gusisácabe laa (Sal. 18:28, 29, 49). Pa nuunu seguru naca Jehová ti Dios ni nabani, zacaneni laanu gúninu ni nabe né stale gana. Zudiini stipa laanu para guni huantarnu intiica guendanagana ne zacaneni laanu gúninu xhiiñabe né guiráʼ stipa stinu. Peru cadi ngasi, laaca zacaneni laanu quixhe íquenu cadi guixélenu de laabe. w24.06 20, 21 párr. 3, 4

¿Xi rizíʼdinu de ca diidxaʼ ni bicaa apóstol Pablo ra nuu ca xpinni Cristu de Tesalónica? Rusiidini laanu pa málasi gabi tuuxa laanu o gunadiáganu caníʼcabe xiixa ni qué huadúʼndanu lu Biblia, cadi casi ziuunu guni crenu ni. Tiempu guyuu Unión Soviética, gudiiziʼ ca enemigu stinu ti carta, ni nácabe zeeda de central mundial, ra canábacabe ca hermanu que gúnicaʼ sti grupu de xpinni Dios. Neca ruluíʼ dxandíʼ ni ná carta que, ca hermanu ni zuhuaa dxiichiʼ lu ni runi cré qué ñábacaʼ lu trampa riʼ. Bidiicaʼ cuenta cadi ngue nga ni huaziidicaʼ lu Biblia. Tiempu riʼ, laaca riquiiñeʼ ca enemigu stinu tecnología para gucaacaʼ laanu guni dudarnu o para guni dividircaʼ laanu. Nga runi naquiiñeʼ gápanu laanu para cadi quítecabe laanu, ne ora gunadiáganu o guidúʼndanu xiixa, primeru guiduʼyaʼ chaahuinu pa nuuni tobi si né ni huazíʼdinu lu Biblia (2 Tes. 2:2; 1 Juan 4:1). w24.07 12 párr. 14, 15

Decisión jma risaca ni zanda guicaa tuuxa nga gudii laa Jehová ne chuʼ ndaaniʼ familia stibe. Ne nga peʼ nga ni racalaʼdxiʼ Jehová guni guiráʼ xixé binni. ¿Xiñee yaʼ? Racaláʼdxibe gaca xhamígube laacaʼ ne gápacaʼ guendanabani ni qué zaluxe (Deut. 30:19, 20; Gál. 6:7, 8). Qué runi obligar diʼ Jehová guirutiʼ guni ni nabe. Sínuque rudiibe lugar cada tobi cuí xi guni. Yanna, ¿xi rizaaca pa guni cometer ti xpinni Cristu ni maʼ guyuunisa ti pecadu grave yaʼ? Pa qué gaca arrepentirbe la? naquiiñeʼ cueecabe laabe de ndaaniʼ congregación (1 Cor. 5:13). Peru neca zacá, de guidubi ladxidóʼ Jehová ribeza guibiguetaʼ binni ni maʼ bichee ca ra nuu. Zanda peʼ guininu tobi de ca razón jma risaca pur bidii Jehová rescate ca nga para ganda guni perdonarbe ca binni ni gaca arrepentir de ca pecadu stiʼ. Cumu nabé nadxii Dios stinu binni la? racaláʼdxibe gacanebe ca ni maʼ bichee ne cayábibe laacaʼ gaca arrepentircaʼ (Zac. 1:3; Rom. 2:4; Sant. 4:8). w24.08 14 párr. 1, 2