Gápanu confianza Dios ni runi mandar guiráʼ xixé ni nuu

1. ¿Gunáʼ nga ca guendanagana ni bidxagalú Job?

DECHE ca deche bidxagalú Job stale guendanagana: guti guiráʼ xiiñibe, guca huarabe ne binítibe ca cosa ni nápabe. Laaca bisaana de guni respetar binni laabe. Ne guionnaʼ hombre ni ná xhamigu laabe, ni zeʼ para quixhedxí ladxidoʼbe ni bíʼnicaʼ nga bininacaʼ laabe pur ca cosa ni gúdxicaʼ laabe. Ne nabé nuu xheelaʼ Job xizaa pur ca cosa ni cazaacabe que ne pur ngue gudxi laabe: «¡Guluudí Dios ne guti!» (Job 2:9; 15:4, 5; 19:1-3). Guiráʼ ni bidxaagalú Job riʼ, ñándaca nucaani laa nusaana de ñapa confianza Jehová, Dios ni dxandíʼ, ni rapa ca ni nadxii laabe ne rúnicaʼ ni nabe.

2, 3. a) ¿Xi zándaca guinabadiidxanu laca laanu ora cayacananu? b) ¿Xi rizíʼdinu de libru stiʼ Job?

² Nabáninu lu ca últimu dxi ra jma nagana raca tiempu ne nadipaʼ raca para binni guni huantar ni (2 Tim. 3:1). Nga runi, cásica Job, zándaca guidxaagalunu guendanagana ni gucaa laanu gusihuínninu pa nápanu confianza Jehová. Jmaruʼ si ora deche ca deche guidxaagalunu guendanagana, zándaca guni sentirnu maʼ qué zanda gudxíʼlunu cani ne maʼ qué zanda guni huantarnu. Dede nuu tu laa riníʼ ique pa rizaaláʼdxiruʼ Jehová laacaʼ.

³ Pa huayuu biaje huayuni sentirluʼ zacá, cadi guireeluʼ gana. Biziidiʼ Job qué ziuu dxi gusaana Jehová ca ni qué rixeleʼ de laa. Guiranu zanda ganna dxíchinu qué ziuu dxi gusaana Bixhózenu ni nuu guibáʼ laanu. Para cadi guixélenu de laabe, guidúʼyanu chupa cosa risaca ni riete lu libru stiʼ Job. Primé, Jehová si nga Dios ni runi mandar guiráʼ xixé ni nuu. Ne guiropa, zanda gucueeza Dios stinu ni jma napa poder ca cosa feu ni cayaca lu guidxilayú riʼ para guni cumplir ni maʼ gudixhe ique guni, ne zanda gudiibe ni caquiiñeʼ ca xpínnibe para cadi guixélecaʼ de laabe ne gápabe laacaʼ para cadi gacanacaʼ.

BIDXIÑA BINIDXABAʼ LÁDECABE

4. ¿Tuu nga ca ni guca reunir guibáʼ casi riete lu libru stiʼ Job?

⁴ Ti dxi guca reunir ca xiiñiʼ Dios ni dxandíʼ nezalú Jehová guibáʼ. Lu Biblia ná: «Laaca bidxiña Binidxabaʼ ládecabe» (Job 1:6). Hombre ni bicaa libru stiʼ Job nga primé ni guníʼ de enemigu stiʼ Dios ra biquiiñeʼ diidxaʼ Binidxabaʼ, ne riniʼni tuuxa ni rucaalú. Para tiempu riʼ, maʼ cadi naca Binidxabaʼ ti xiiñiʼ Dios ni ruzuubaʼ diidxaʼ, sínuque maʼ nácabe enemigu stiʼ Jehová, stiʼ ca ángel ne stiʼ binni guidxilayú. Ora guníʼ Dios ca diidxaʼ ni zeeda lu Génesis 3:15, bisihuinni maʼ cadi naca Binidxabaʼ parte de familia stibe ni nuu guibáʼ, ni runi representar «gunaa» de ra chiguiree descendencia que.

5. ¿Xi zanda guizíʼdinu de reunión ni guca guibáʼ que?

⁵ Biʼniʼ Jehová guicá lu Biblia reunión ni guca guibáʼ que para gusiidibe laanu xi bizaaca raqué. Pur ni guníʼ Binidxabaʼ, bisihuinni rusiguii, malu laa ne riníʼ cosa ni cadi dxandíʼ de ca xpinni Jehová (Job 1:9; bichaaga ni né Apocalipsis 12:10). Ne laaca rusiidini laanu ti cosa ni riguixhedxí ladxidoʼno: riquiiñeʼ Jehová autoridad stiʼ biaʼsi ne jneza. Laaca rusiidini laanu riguixhe Dios ni jma napa poder xi zanda ne xi qué zanda guni tuuxa.

RIGUIXHE JEHOVÁ XI ZANDA NE XI QUÉ ZANDA GUNI TUUXA

6. ¿Ximodo bisihuinni Jehová laa si nga nanna xi zazaaca lu reunión que? (Job 1:7, 8).

⁶ (Biindaʼ Job 1:7, 8). Bisihuinni Jehová lu reunión que laasibe nga nánnabe xi zanda guizaaca raqué. Gunabadiidxabe Binidxabaʼ: «¿Ñee maʼ biiyaluʼ Job, siervu stinneʼ la?». Nánnabe maʼ biiyadxí Binidxabaʼ hombre riʼ ne racalaʼdxiʼ guniná laabe. Guidúʼyanu ximodo biquiiñeʼ Jehová poder stiʼ para gacané Job.

7. Casi riete lu Job 1:10, 11, ¿xi guníʼ Binidxabaʼ zuni binni guidxilayú?

⁷ (Biindaʼ Job 1:10, 11). Jehová nga Dios ni runi mandar guiráʼ xixé ni nuu ne ni jma napa poder, ne laabe riguíxhebe ximodo iquiiñebe autoridad ne poder stibe (Jer. 32:17; Dan. 4:35). Peru guníʼ Binidxabaʼ cadi jneza diʼ caquiiñeʼ Jehová poder stiʼ, rudiibe ca binni casi Job stale cosa galán para guni adorarcaʼ laabe. Casi xa ñaca niniʼbe runi adorar binni Dios para si guicaacaʼ ndaayaʼ stibe. Yanna, ¿xi gudixhe ique Jehová guni yaʼ?

8, 9. ¿Xi gudxi Jehová Binidxabaʼ qué zanda guni, ne xiñee? (Job 1:12; laaca zanda gúʼyaluʼ imagen ca).

⁸ (Biindaʼ Job 1:12). Bidii Jehová lugar Binidxabaʼ gusihuinni pa napa razón de ni guníʼ de Job que. Peru nezalú guiráʼ ca ángel que gúdxibe laa: «Cadi canuʼ laabe». Gupa xidé yenanda Binidxabaʼ ni ná Jehová, qué gápabe poder de gúnibe xiixa Job. Ne dede yanna qué randa runi Binidxabaʼ ca cosa ni gudxi Jehová laa cadi guni. Casi ridúʼyanu, biquiiñeʼ Jehová autoridad ne poder stiʼ para gapa Job ne zaqueca gusihuínnibe nácabe ti Dios ni runi ni jneza ne ni nadxii binni.

⁹ Qué ñanda nusihuinni Binidxabaʼ napa razón, purtiʼ qué nixeleʼ Job de Bixhozeʼ ni nuu guibáʼ (Job 1:22). Peru nanna Jehová qué zaguiidxináʼ si Binidxabaʼ ne cá ique guni xiixa.

10. ¿Xiñee bidii Jehová lugar guibiguetaʼ guniná Binidxabaʼ Job? (Job 2:2-6).

¹⁰ (Biindaʼ Job 2:2-6). Gudixhe ique Binidxabaʼ gúniruʼ xiixa cosa malu Job. Guniʼbe zudxiideche Job Dios para gulá xquendanabani. Para gusihuinni Jehová cadi dxandíʼ ni ná Binidxabaʼ ca la? bidiibe lugar guniná Binidxabaʼ Job. Peru sti biaje gúdxibe laa: «Cadi guutiluʼ laabe». Ne napa xidé guni respetar Binidxabaʼ ni guníʼ Jehová. Sti biaje ca ridúʼyanu qué zanda guni Binidxabaʼ ni racalaʼdxiʼ, purtiʼ maʼ gudixhe Jehová ni qué zanda gunibe.

GULEE JEHOVÁ GUENDANAGANA STIʼ JOB

11. Casi riete lu Job 42:10-13, ¿ximodo guluu Jehová ndaayaʼ Job despué de guleebe ca guendanagana stiʼ?

¹¹ (Biindaʼ Job 42:10-13). Ora bisihuinni Job qué ziuu dxi gusaana Jehová, bicueeza Jehová Binidxabaʼ para cadi guniná laabe ne zaqueca gucané Jehová laabe para maʼ cadi gacanabe. Sti biaje ca qué gapa Binidxabaʼ poder para guchaa ni maʼ gudixhe ique Jehová. Maʼ qué ñanda ñuninabe Job, xpinni Jehová ni guizaa nadxii.

12. ¿Ximodo huayacané Jehová xcaadxi de ca xpinni ni gúpacaʼ confianza laabe pur poder ni nápabe?

¹² Lu ca últimu dxi, stale de ca xpinni Jehová maʼ biiyacaʼ ximodo riquiiñebe poder stibe para gulabe laacaʼ. Guzéʼtenu ti ejemplu, lu iza 1945 ti grupu de chupa gayuaa treinta testigu stiʼ Jehová ni nuucaʼ ndaaniʼ ti campu de concentración nazi, bilacaʼ de ñáticaʼ. Despué si de nga bicaacabe ni bizaacacabe que ne guníʼcabe Jehová nga bilá laacabe cásica bilá guionna hebreu que para cadi ñáʼquicaʼ ndaaniʼ horno. Gunda bidxiilúcabe guendanagana riʼ pur fe nadipaʼ ni gúpacabe. Bidii Jehová poder stiʼ laacabe ne laacaʼ biʼniʼ sentírcabe bilá Jehová laacabe cásica bilá Daniel ora guluucabe laa ra nuu ca lión que. Ne dede dxi que gudixhe íquecabe gúnicabe ni ná Jehová para siempre. Laaca guníʼcabe gúnicabe ni ná Jehová nga ti cosa jma galán zanda gúnicabe ne guizáʼ naroʼbaʼ ndaayaʼ rudii Jehová laacabe pur laani (bichaaga ni né Daniel 3:27; 6:22).

13. Ora tídiluʼ lu guendanagana, ¿xi nanna dxíchiluʼ zuni Jehová? (Laaca zanda gúʼyaluʼ ca imagen ca).

¹³ Zándaca laanu laaca huadídinu lu guendanagana ne huayuni sentirnu casi ñaca niguucabe laanu ndaaniʼ bizé ra nuu ca lión que (1 Ped. 5:8-10). Zándaca ziuʼnu triste ne zaníʼ íquenu qué ziuu dxi guiree guiráʼ ca guendanagana ni nápanu. Ora guizaacanu nga, galán guietenaláʼdxinu guiráʼ ni bizaaca Job. Zanda chuʼnu seguru napa Jehová poder para gacané laanu gudxíʼlunu ca guendanagana stinu yanna ne lu guidxilayú cubi ca. Maʼ gudíxhebe ti tiempu para gunduuxebe guiráʼ ca cosa feu ni runiná laanu ne guidxilayú malu riʼ. Ne laaca maʼ qué zudiibe lugar guniná xiixa laanu nin ti ratuhuiiniʼ.

NADXII JEHOVÁ CA XPINNI NI QUÉ RIXELEʼ DE LAA

14, 15. ¿Xi zuni Jehová pur ca xpinni ni qué guixeleʼ de laa, ne xiñee? (Job 14:15; laaca zanda gúʼyaluʼ imagen ca).

¹⁴ (Biindaʼ Job 14:15). Nadxii Bixhózenu ni nuu guibáʼ ca xpinni ni qué rixeleʼ de laa. Guizáʼ nadxiibe laacaʼ, ora ráticaʼ racaláʼdxibe gudxiguétabe xquendanabánicaʼ. Ndaaniʼ guidxilayú cubi ca, lugar de chuʼ yuubaʼ ni rusaana guendaguti ziuu guendanayecheʼ purtiʼ zabani ca binni ni maʼ guti (Is. 65:17).

¹⁵ Neca bibániruʼ Job ndaaniʼ guidxilayú ni naaze Binidxabaʼ, lu Biblia riete bisianda Jehová laabe ne bidii laabe stale ndaayaʼ jma de biaʼ ni gúpabe dxiqué. Ca ndaayaʼ ni bidii laabe que ti guisi si ni de guiráʼ ndaayaʼ ni chigudii laabe huidxe si. Bisihuinni Jehová racalaʼdxiʼ guibani guiráʼ xixé ca xpinni ni qué guixeleʼ de laa nayecheʼ ne sin chuʼ xiixa ni guchiiñaʼ laacaʼ. Zudiibe guiráʼ ca ni qué guixeleʼ de laabe oportunidad de guibánicaʼ sin qué chuʼ dxi gáticaʼ lu guidxilayú cubi ne gácacaʼ perfectu (Apoc. 21:3, 4). Cumu nácabe Dios ni runi mandar guiráʼ xixé ni nuu la? nápabe poder ne racaláʼdxibe gúnibe ni. ¡Pabiáʼ riguixhedxí nga ladxidoʼno ora cadídinu lu guendanagana!

16. ¿Xi sti razón nápanu para gápanu confianza Dios ni runi mandar guiráʼ xixé ni nuu?

¹⁶ Bibániruʼ Job stale iza, despué guti. Peru cumu Jehová nga Dios ni runi mandar guiráʼ xixé ni nuu la? nápabe poder para gusibánibe ca ni maʼ guti (Deut. 32:39). Nga runi, guirutiʼ zanda gucueeza laabe de guindísabe ca ni nadxiibe ni maʼ guti. Ne guirutiʼ zanda gucueeza laabe de gúnibe ni ora maʼ gudíxhebe gúnibe ni (Rom. 8:38, 39).

GÁPANU CONFIANZA JEHOVÁ DE GUIDUBI LADXIDOʼNO

17. ¿Xiñee zanda guininu qué huayanda gunduuxeʼ Binidxabaʼ xquidxi Jehová?

¹⁷ Rudii relatu stiʼ Job laanu razón para gápanu confianza Jehová de guidubi ladxidoʼno. Rudiʼnu xquixe peʼ Jehová purtiʼ rucueezabe Binidxabaʼ para cadi gunduuxeʼ xquídxibe. Ca dxi riʼ, jma de gaʼ millón de binni nácacaʼ xpinni Jehová ni qué rixeleʼ de laa ne ndiʼ nga ti prueba ni rusihuinni pabiáʼ poder napa Dios ni runi mandar guiráʼ xixé ni nuu. Stale biaje maʼ huadúʼyanu nin ti guiibaʼ ni bizáʼ hombre qué huayanda guniná xquidxi Dios (Is. 54:17). Stale gobiernu ne zaqueca ca xaíque yuʼduʼ ni nápacaʼ poder, huayúbicaʼ guninacaʼ xquidxi Dios, peru qué huayúnicabe ni purtiʼ Jehová cayapa laanu. Ne gastiʼ ni zanda gucueeza laanu para gusihuínninu Jehová nga Dios ni dxandíʼ ne Binidxabaʼ rusiguii ne ruuti binni. Nin guendaguti qué zanda gucueeza laanu de gúninu ni, purtiʼ zandisaʼ Jehová de lade gueʼtuʼ ca ni qué guixeleʼ de laa (Os. 13:14).

18. ¿Xiñee cadi naquiiñeʼ guidxíbinu neca guizaaca intiica si cosa?

¹⁸ Guiníʼ íquenu lu relatu stiʼ Job rusiroobani fe stinu ziuu Jehová né laanu intiica si guizaaca huidxe si. Nga runi, cadi naquiiñeʼ guidxíbinu. Binidxabaʼ ne ejércitu stiʼ zaníʼ íquecaʼ guirutiʼ cayapa xquidxi Dios ne zucaalucaʼ ni. Peru cásica guca ca dxi stiʼ Job, Jehová maʼ nanna xi chiguni ne qué zudiibe lugar gunduuxeʼ Binidxabaʼ xquídxibe. Maʼ cadi candaa zedandá dxi zabee Jehová guiráʼ ca yuubaʼ ni nuu pur Binidxabaʼ. Ti mil iza zuseguyoo Jesús Binidxabaʼ ne ca demonio stiʼ ndaaniʼ abismo (Luc. 8:31; Apoc. 20:1-3). Ne ra maʼ zidiʼdiʼ tiempu, zanitilú Binidxabaʼ ne guirá ni runi apoyar laa (Apoc. 20:10). Casi maʼ guníʼ Jehová ni chiguizaaca, zucaache Jesús ique Binidxabaʼ: ne para siempre zunduuxebe laa (Gén. 3:15; Rom. 16:20).

19. ¿Xi ndaayaʼ zudii Jehová ca ni gapa confianza laabe de guidubi ladxidoʼcaʼ? (Laaca zanda gúʼyaluʼ imagen ca).

¹⁹ Guizáʼ maʼ racaláʼdxinu gueeda guidxilayú cubi, ra zabáninu nayecheʼ sin chuʼ xiixa ni guchiña laanu. Jma galán zabáninu racá. Maʼ biʼniʼ prometer Jehová: «¡Biiyaʼ! Cayuneʼ guiráʼ cosa nacubi» (Apoc. 21:5). Despué de stale iza, maʼ qué zanda gucaa Binidxabaʼ ne ca demonio stiʼ binni guni cosa ni cadi jneza ne zaqueca guniná laacabe. ¡Guizáʼ zaguixhedxí nga ladxidoʼno! Guiráʼ ni riguu xizaa laanu yanna maʼ qué ziuu dxi guninácani laanu. Ca ni guilá lu Armagedón zuuyacaʼ zaca stale milagru ni qué huayuu dxi gúʼyacaʼ. Ziasa ca binni ni nadxiinu de lade gueʼtuʼ. Ne tiempu ca zabáninu galán ne nayecheʼ cásica gucalaʼdxiʼ Bixhózenu ni nuu guibáʼ.

20. ¿Xi maʼ gudixhe íqueluʼ gúniluʼ?

²⁰ Intiica prueba ni guidxaagalunu lu ca últimu dxi riʼ, naquiiñeʼ gácanu nadxibalú, quixhe íquenu gápanu confianza Jehová de guidubi ladxidoʼno ne quixhe íquenu guzúʼbanu stiidxaʼ tobi lucha ni runi mandar laanu. Racaláʼdxinu gusihuínninu nadxiinu Bixhózenu ni nuu guibáʼ ne gusihuínninu cadi dxandíʼ guiráʼ ni guníʼ Binidxabaʼ. Nánnanu zabáninu galán huidxe si purtiʼ Jehová, Dios ni runi mandar guiráʼ xixé ni nuu, racalaʼdxiʼ iquiiñeʼ poder stiʼ para quixe ca xpinni ni qué rixeleʼ de laa.