Ximodo racané libru stiʼ Job laanu ora cayacananu

1, 2. ¿Gunáʼ nga ca razón nápanu para guidúʼndanu libru stiʼ Job?

¿ÑEE huayuundaluʼ libru stiʼ Job ca dxi riʼ la? Neca gucuá ni raca biaʼ chonna mil gaayuʼ gayuaa iza, peru nabé rusisaca binni ni purtiʼ riníʼcabe nabé nuu xpiaaniʼ binni ni bicaa ni, biquiiñebe diidxaʼ ni cadi nagana para guiene binni ne ni chindá ndaaniʼ ladxidoʼcaʼ. Moisés nga bicaa libru sicarú riʼ, peru Jehová nga guníʼ xi guicá luni (2 Tim. 3:16).

² Naca libru stiʼ Job tobi de ca libru jma risaca zeeda lu Biblia. ¿Xiñee yaʼ? Tobi de ca razón ca nga purtiʼ racaneni ca ángel ne zaqueca laanu para cuinu gúninu ni ná Jehová ne gacanenu guiá lá, ne nabé risaca ni. Guiropa, racaneni laanu gunibiáʼ chaahuinu ca cualidad sicarú ni napa Jehová casi guendarannaxhii ni rusihuínnibe, nuu xpiaanibe, rúnibe ni jneza ne poder ni nápabe. Lu libru si stiʼ Job nga jma riete naca Jehová «Dios ni jma napaʼ poder». Ne guionna, rusiene libru stiʼ Job laanu xiñee rudii Dios lugar gacaná binni ne ricábini stale pregunta nabé risaca.

3. ¿Ximodo racané libru stiʼ Job laanu?

³ Zanda peʼ guininu ora ridúʼndanu libru stiʼ Job zeeda gácani casi ora niguíbanu lu ti dani nasoo. Ne ora rindanu punta dani ca randa ridúʼyanu stale cosa. Ngueca nga rizaaca ora ridúʼndanu libru riʼ, racaneni laanu guidúʼyanu ca guendanagana stinu modo ruuyaʼ Jehová cani. Lu artículo riʼ zadúʼyanu ximodo racané libru stiʼ Job laanu ora cayacananu, zadúʼyanu ximodo zándaca gucané historia stiʼ Job caadxi de ca israelita ni bibani dxiqué ne ximodo racaneni laanu yanna. Ne laaca zadúʼyanu ximodo zanda iquíʼñenu libru riʼ para gacanenu xcaadxi.

BIDII DIOS LUGAR GACANÁ JOB

4. ¿Xiñee gadxé peʼ Job de caadxi de ca israelita ni nuu Egipto que?

⁴ Guleza Job ndaaniʼ guidxi Uz, zándaca biaana guidxi riʼ ladu rindani gubidxa de Tierra Prometida ne ladu guiaʼ de guidxi Arabia, tiempu naca ca israelita que esclavu Egipto. Caadxi de ca israelita que bizulú biʼniʼ adorarcaʼ ca bidóʼ ni nuu ndaaniʼ guidxi Egipto, peru gadxé si guca Job purtiʼ qué nusaana de ñuni adorar Jehová (Jos. 24:14; Ezeq. 20:8). Dios peʼ guníʼ: «Gástiruʼ stobi casi laabe lu Guidxilayú» (Job 1:8).a Nabé gupa Job stale cosa risaca, laaca gúcabe ti binni risaca ne nabé biʼniʼ respetar binni laabe (Job 1:3). Pabiáʼ bidxiichi Binidxabaʼ ora biʼyaʼ cayuni ti hombre casi Job ni náʼ Dios yaʼ.

5. ¿Xiñee bidii Jehová lugar gacaná Job? (Job 1:20-22; 2:9, 10).

⁵ Guníʼ Binidxabaʼ zudxiideche Job Jehová pa gacaná (Job 1:7-11; 2:2-5). Pur ni guniʼbe ca bisaanabe stale duda. Nga runi, neca guizáʼ nadxii Jehová Job, bidiibe lugar gusihuinni Binidxabaʼ pa napa razón o pa coʼ (Job 1:12-19; 2:6-8). Guxha Binidxabaʼ ca maniʼ stiʼ Job, biiti chii xiiñibe ne bicaa laabe ti guendahuará malu ni bininá dede ndaaniʼ batañeebe hasta galaa íquebe. Neca bininá Binidxabaʼ Job, peru qué nixélebe de Jehová (biindaʼ Job 1:20-22; 2:9, 10). Ra gudiʼdiʼ tiempu bisianda Jehová Job, bibiguetaʼ gúpabe cosa risaca ne bueltu, biʼniʼ respetar binni laabe sti biaje ne bidii Jehová laabe xhii xiiñibe. Ne laaca guluu Jehová ndaayaʼ laabe para guibánibe xadxí. Bibani Job sti gayuaa cuarenta iza jma, ne zacá gunda biiyabe tapa generación de binni ni zeeda de laabe (Job 42:10-13, 16). Yanna, ¿ximodo gucané relatu riʼ caadxi de ca xpinni Dios ni bibani dxiqué ne ximodo racaneni laanu yaʼ?

6. Pa gunna ca israelita que ni bizaaca Job, ¿ximodo zándaca gucaneni laacaʼ? (Laaca zanda gúʼyaluʼ imagen ca).

⁶ Ximodo zándaca gucané ni bizaaca Job ca israelita. Nabé gucaná ca israelita que dxi nuucaʼ Egipto. Guiníʼ íquenu ni bizaaca Josué ne Caleb, gúcacabe esclavu dxi nácacabe joven ne despué guzácabe 40 iza lu desiertu pur donda stiʼ caadxi binni ni qué nuzuubaʼ diidxaʼ. Pa gunna ca israelita que de ca guendanagana ni gudiʼdiʼ Job ne xi bizaaca despué la? nanna dxíchinu gucaneni laacaʼ, ne zaqueca ca xiiñicaʼ, para guiénecaʼ tuu nga napa donda pur racaná binni. Ne guiene chaahuicaʼ xiñee rudii Dios lugar gacaná binni ne pabiáʼ risaca nga guzuubaʼ binni diidxaʼ ne cadi guixélecaʼ de laabe.

7, 8. ¿Ximodo zanda gacané libru stiʼ Job ca ni cayacaná? Bizeeteʼ ti experiencia.

⁷ Ximodo zanda gacané ni bizaaca Job laanu. Ca dxi riʼ, stale binni rusaana de gápacaʼ fe Dios purtiʼ qué riénecaʼ xiñee rizaaca binni nachaʼhui cosa malu. Guidúʼyanu xi bizaaca ti gunaa de guidxi Ruanda láʼ Hazel.b Dxi joven laabe, biʼniʼ crebe Dios. Peru bizaacabe caadxi cosa ni bicaa laabe gusaana de guni crebe laa. Guca divorciar bixhózebe ne jñaabe ne bichaganáʼ jñaabe sti hombre ni nabé bininá laabe. Despué, gulaxoo ti hombre laabe. Ora biyubi Hazel ñacanécabe laa ndaaniʼ religión ra rié, guirutiʼ tu ñacané laa. Ti dxi bicaabe ti carta para Dios ne gúdxibe laa: «Rinieniáʼ lii ne runeʼ stipa guneʼ ni jneza, peru puru si yuubaʼ ruseendaluʼ para naa. Nga runi maʼ gudixheʼ iqueʼ guixeleʼ de lii ne guneʼ ni gapaʼ gana para chuaaʼ nayecheʼ». Cásica Hazel, stale binni maʼ bicaacabe laacaʼ guni crecaʼ Dios nga napa donda pur ca yuubaʼ ni cadíʼdicaʼ, guizáʼ riuubaʼ ladxidoʼno ora ridúʼyanu guizaaca nga.

⁸ Peru maʼ gucané libru stiʼ Job laanu guiénenu cadi Dios diʼ nga napa donda pur ca yuubaʼ ni ridídinu, sínuque Binidxabaʼ. Laaca maʼ bizíʼdinu cadi casi ziuunu guininu cayacaná tuuxa purtiʼ caguixe guiráʼ ni maʼ biʼniʼ, purtiʼ Biblia peʼ cayabi laanu «guiranu rizaacanu cosa ni cadi caníʼ íquenu ne ora cadi cabézanu ni» (Ecl. 9:11; Job 4:1, 8). Ne maʼ bizíʼdinu ora qué rixélenu de Jehová neca cadiidinu lu guendanagana, racanenu laabe guiá labe ne rusihuínninu rusiguii Binidxabaʼ (Job 2:3; Prov. 27:11). Maʼ bisiidiʼ Biblia laanu xi pur racananu ne xi pur racaná ca binni ni nadxiinu. ¡Guizáʼ rudiʼnu xquixe peʼ Jehová pur laani! ¿Xi gúcaxa de Hazel yaʼ? Bizulú biʼniʼ estudiarné ca Testigu laabe ne biénebe cadi Dios diʼ nga napa donda pur ca yuubaʼ ni cadíʼdibe. Laabe guniʼbe: «Bixheleʼ ladxiduáʼ nezalú Jehová ne gudxeʼ laabe cadi dxandíʼ diʼ ngue nuaaʼ guixeleʼ de laabe. Yanna huaxa maʼ nannaʼ nadxii Jehová naa ne maʼ nabaneʼ nayecheʼ». ¿Cadi dxandíʼ ratadxí ladxidoʼno gánnanu, xiñee cudii Dios lugar gacaná binni la? Yanna, guidúʼyanu ximodo zanda gacané ni bizaaca Job cada tobi de laanu ora cayacananu.

XIMODO RACANÉ NI BIZAACA JOB LAANU GUNI HUANTARNU

9. ¿Ximodo nusiéneluʼ yuubaʼ cadiʼdiʼ Job? (Santiago 5:11).

⁹ Guníʼ ique cayuuyaluʼ Job zuba ndaaniʼ dé ludé, stubi, naze guiʼdxuʼ ladi ne cutopa yuubaʼ laa. Maʼ nisi dxita laa ne pur pedazu cayaba beela ladi pur guendahuará ni napa. Maʼ huaxiéʼ stipa napa Job ne ni zanda si gúnibe nga cuuñebe ládibe né ti ndaa bisiʼñaʼ o ti ndaa guisu de yu ne quicheruaabe purtiʼ guizáʼ cayuubabe. Ruluíʼ si cayuni Job huantar para cadi gatiʼ, peru cadi zacá diʼ ni, ni cayúnibe nga cayuni huantarbe purtiʼ qué racaláʼdxibe guixélebe de Jehová (biindaʼ Santiago 5:11). ¿Xi gucané laabe yaʼ?

10. ¿Xi rusihuinni nabé guca xhamigu Job Jehová, ne ximodo nánnanu ni?

¹⁰ Gastiʼ qué nucueeza Job de ñabi Jehová xi guiráʼ nuu ndaaniʼ ladxidóʼ (Job 10:1, 2; 16:20). Lu capítulo 3 stiʼ libru ni ziné labe, ridúʼyanu nabé gudicheruaabe pur guiráʼ ni cazaacabe que purtiʼ guníʼ íquebe Jehová biseendaʼ cani. Despué, gudxi chonna hombre ni ná xhamigu laabe cayuni castigar Dios laabe pur ca pecadu stibe, peru laabe gúdxibe Jehová qué huayuu dxi gucheenebe laa, casi xa ñaca ñábibe laa jma rúnibe ni jneza que laa (Job 10:1-3; 32:1, 2; 35:1, 2). Peru laaca bizeetebe guniʼbe cosa sin niníʼ íquebe (Job 6:3, 26). Lu capítulo 31 ridúʼyanu racalaʼdxiʼ Job gucaadiaga Jehová laa ne guiníʼ qué runi merecerbe ni cadíʼdibe que (Job 31:35). Nánnanu qué gapa Job derechu gabi Jehová gusiene laa xiñee cadiʼdiʼ lu guendanagana que.

11. ¿Ximodo bicabi Jehová Job?

¹¹ Pur ca diidxaʼ ni gudxi Job Jehová rihuinni guizáʼ xhamígube laa ne nápabe confianza zuuyaʼ cadi caxélebe de laa. Ora gundisaʼ Jehová ti bi yooxhoʼ para bicabi Job qué ñábidibe laa xiñee cayacaná ne laaca qué nidíndenebe laa xiñee nisi caguicheruaa pur ca yuubaʼ ni cadiʼdiʼ ne laaca qué ñábibe laa xiñee cada ratu caníʼ qué gapa donda. Ni bíʼnibe nga guluu jnézabe laa né guendarannaxhii, casi runi ti hombre né xiiñiʼ. Ne nabé gucané nga Job purtiʼ bidii cuenta cadi jneza modo caníʼ ique ne guca arrepentir pur guiráʼ ni guníʼ sin niníʼ ique (Job 31:6; 40:4, 5; 42:1-6). Yanna, ¿ximodo gucané ni bizaaca Job ca binni ni bibani dxiqué ne ximodo racaneni laanu yanna yaʼ?

12. ¿Ximodo zándaca gucané ni bizaaca Job ca israelita?

¹² Ximodo zándaca gucané ni bizaaca Job ca israelita. Guiníʼ íquenu ni bizaaca Moisés. Casi líder stiʼ guidxi Israel, biʼniʼ huantarbe stale guendanagana, bininácabe laabe ne guyuu biaje biʼniʼ sentirbe maʼ bidxágabe. Peru maʼ gadxé si guca Moisés de ca israelita que purtiʼ laacaʼ guniʼcaʼ mal de Jehová, peru Moisés biyubi laabe para gabi laabe xi guiráʼ naguu xizaa laa (Éx. 16:6-8; Núm. 11:10-14; 14:1-4, 11; 16:41, 49; 17:5). Laaca gupa xidé biʼniʼ huantarbe ora guluu jneza Jehová laabe. Ne ti biaje laga nuu ca israelita que Cadés, zándaca dxi maʼ zinécabe 40 iza de canazácabe lu desiertu, bidxichi Moisés ne «guníʼ cosa sin niníʼ ique» ne qué nusisaca Jehová (Sal. 106:32, 33). Ne pur ngue qué nudii Jehová lugar ñuube ndaaniʼ Tierra Prometida (Deut. 32:50-52). Nabé bininá nga Moisés, peru gúcabe humilde ne bíʼnibe ni gudxi Jehová laabe. Zándaca laaca gucané ni bizaaca Job ca israelita ni chichuu ndaaniʼ Tierra Prometida guni huantarcaʼ ca guendanagana ni guidxagalucaʼ. Pa niníʼ íquecabe ni bizaaca Job ñanda niziidicabe ñábicabe Jehová xi cayuni sentírcabe, nusaana de niníʼ íquecabe jma rúnicabe ni jneza que Dios ne ñácacabe humilde para nuzuubacabe diidxaʼ ora guluu jneza Jehová laacabe.

13. ¿Ximodo zanda gacané ni bizaaca Job laanu guni huantarnu? (Hebreos 10:36).

¹³ Ximodo zanda gacané ni bizaaca Job laanu. Laanu, ca xpinni Cristu, laaca caquiiñeʼ guni huantarnu (biindaʼ Hebreos 10:36). Zándaca nápanu ti guendahuará ni cayuniná cuerpu stinu o xquendabiaaninu, zándaca nápanu guendanagana ndaaniʼ familia stinu, guti tuuxa ni nadxiinu o cudxíʼlunu xiixa guendanagana naroʼbaʼ ne zándaca ziuu biaje zaníʼ o zuni tuuxa xiixa ni guchiichi o cuʼ laanu triste (Prov. 12:18). Peru rusiidiʼ libru stiʼ Job laanu zanda gábinu Jehová xi guiráʼ nuu ndaaniʼ ladxidoʼno ne gápanu confianza zucaadiagabe laanu (1 Juan 5:14). Qué zadxiichinédibe laanu pa málasi guininu xiixa ni cadi jneza ora cuxhélenu ladxidoʼno nezalube, cásica bizaaca Job, sínuque zacanebe laanu gánnanu xi gúninu ne zudiibe laanu stipa ni caquíʼñenu para guni huantarnu (2 Crón. 16:9; Sant. 1:5). Ne cásica bíʼnibe né Job, pa gúʼyabe caquiiñeʼ uguu jnézabe laanu, zúnibe ni ne zaquiiñebe Stiidxabe, organización stibe, ti ancianu o ti xhamígunu. Rusiidiʼ ejemplu stiʼ Job laanu, ora uguu jneza Jehová laanu, caquiiñeʼ guni huantarnu (Heb. 12:5-7). Cumu guca Job humilde ne bicaadiaga Jehová la? guyeni laa galán ne laaca zieni laanu galán pa gácanu humilde ne gucaʼdiáganu ca conseju ni gudiicabe laanu (2 Cor. 13:11). ¡Nabé stale cosa rizíʼdinu de ni bizaaca Job! Guidúʼyanu ximodo zanda iquíʼñenu historia stibe para gacanenu xcaadxi.

IQUÍʼÑENU LIBRU STIʼ JOB PARA GACANENU XCAADXI

14. ¿Gunáʼ nga ti modo zanda gusiénenu binni xiñee racananu?

¹⁴ Ora riguni predicarnu, nuu tu laa rinabadiidxaʼ laanu xiñee racaná binni. Ne riuuláʼdxinu guluinu laacabe xi rusiidiʼ Biblia de laani. Nuu biaje rusiénenu laacabe xi bizaaca ndaaniʼ jardín de Edén. Zándaca rábinu laacabe, bisiguii Binidxabaʼ, ti ángel malu, Adán ne Eva ne pur nga bicheenecaʼ Dios (Gén. 3:1-6). Despué, zándaca rusiénenu laacabe racananu ne rátinu purtiʼ bidxiideche Adán ne Eva Jehová (Rom. 5:12). Ne últimu, rusiénenu laacabe cudii Dios lugar tidiʼ tiempu para guihuinni rusiguii Binidxabaʼ ne para ganna binni zedandá dxi zaree guiráʼ ni cayuniná laacaʼ ne zabánicaʼ sin qué chuʼ dxi gáticaʼ (Apoc. 21:3, 4). Ora ricábinu pregunta stiʼ binni zacá racanenu laacaʼ guiénecaʼ xiñee racananu.

15. ¿Ximodo zanda iquíʼñenu libru stiʼ Job ora guinabadiidxaʼ tuuxa laanu xiñee racananu? (Laaca zanda gúʼyaluʼ ca imagen ca).

¹⁵ Sti modo zanda guicábinu tuuxa ni guinabadiidxaʼ laanu xiñee racananu nga guinínenu laa de Job. Primé ca la? zanda gábinu laabe galán pregunta ni bíʼnibe, despué zanda gábinu laabe laaca biʼniʼ Job, ti hombre ni bibani dxiqué, pregunta ca purtiʼ cadiʼdiʼ lu stale guendanagana, dede guníʼ íquebe Dios biseendaʼ cani (Job 7:17-21). Zándaca zadxagayaabe gánnabe maʼ stale tu huayuni pregunta ca biaʼ tiempu huabani binni lu guidxilayú riʼ. Despué, zanda gusiénenu laabe cadi Dios diʼ napa donda pur ca yuubaʼ ni cadiʼdiʼ Job que, sínuque Binidxabaʼ. Bininabe Job para gusihuínnibe runi binni ni ná Dios purtiʼ si rudii laacaʼ cosa galán ne zusaanacaʼ Dios ora tídicaʼ lu guendanagana. Despué, laaca zanda gábinu binni ca neca cadi Dios ngue cayuniná Job, bidiibe lugar gacaná purtiʼ nánnabe qué zaxeleʼ binni guidxilayú de laabe ne nga zusihuinni rusiguii Binidxabaʼ. Ne últimu, zanda guininu guluu Jehová ndaayaʼ Job purtiʼ qué nixeleʼ de laabe. Casi maʼ ridúʼyanu, zanda quixhedxinu ladxidóʼ xcaadxi ra gábinu laacaʼ cadi Jehová diʼ cuseendaʼ ca yuubaʼ ni cadíʼdicaʼ.

16. Bizeeteʼ ti experiencia ni rusihuinni ximodo zanda gacané libru stiʼ Job tuuxa ni cayacaná.

¹⁶ Guidúʼyanu ximodo gucané libru stiʼ Job ti hombre láʼ Mario. Lu iza 2021, cayuni predicar ti hermana pur teléfono, ne primé binni bicabi laabe nga Mario. Biindanebe laa ti textu ne bisiénebe laa rucaadiaga Dios ca oración stinu ne laaca cayabi laanu zabáninu galán huidxe si. Despué gunabadiidxabe laa xi riníʼ ique de versículo ca ne gudxi Mario laabe ante guicabi llamada stibe, cucaa ti nota purtiʼ chiguuti laca laa. Guníʼ Mario: «Runeʼ cré Dios, peru siadóʼ riʼ bineʼ sentir maʼ bisaanabe naa stubeʼ». Lu guiropa llamada que guníʼcabe de ca yuubaʼ ni bidxagalú Job, ne gudixhe ique Mario guʼndaʼ interu naca libru stiʼ Job. Ngue runi biseendaʼ hermana que laabe ti enlace stiʼ jw.org para gúʼndabe Biblia lu internet. ¿Xi bizaaca despué yaʼ? Bizulú cayuundanécabe Mario de lu Biblia ne guizáʼ nayecheʼ nuube purtiʼ caziidibe de Dios ni bisihuinni nadxii laabe ra bizaalaʼdxiʼ laabe.

17. ¿Xiñee rudiʼnu xquixe peʼ Jehová pur bidii lugar guicá historia stiʼ Job lu Stiidxaʼ? (Job 34:12).

¹⁷ Rihuinni dxíchica napa Biblia stale poder: racaneni ne riguixhedxini ladxidóʼ ca binni ni cayacaná (Heb. 4:12). Guizáʼ rudiʼnu xquixe peʼ Jehová purtiʼ bidii lugar guicá historia stiʼ Job lu Stiidxaʼ (Job 19:23, 24). Cayabi libru stiʼ Job laanu «qué runi Dios cosa malu» (biindaʼ Job 34:12). Laaca rusiidini laanu xiñee cudii Dios lugar gacananu ne ximodo zanda guni huantarnu. Ne laaca racaneni laanu quixhedxinu ladxidóʼ ca ni cayacaná. Lu stiʼ artículo ca zadúʼyanu xcaadxi cosa ni zanda guizíʼdinu de libru stiʼ Job ne laaca zazíʼdinu ximodo zanda gudiʼnu conseju ni gacané.