Ora guni predicarnu gúninu ni «casi runi ti maestru ni nanna gusiidiʼ»

1. ¿Ximodo naquiiñeʼ gusíʼdinu, ne xiñee? (2 Timoteo 4:2; laaca zanda gúʼyaluʼ imagen ca).

GUDXI JESÚS ca xpinni: «Lagacané binni de guiráʼ guidxi gaca discípulo stinneʼ [ . . . ]. Lagusiidiʼ laacaʼ gúnicaʼ guiráʼ ni maʼ bineʼ mandar laatu» (Mat. 28:19, 20). Casi ridúʼyanu, guniʼbe guiráʼ xixé xpínnibe naquiiñeʼ gusiidicaʼ binni. Dxandíʼ, ruuyaʼ Jehová «guiráʼ ca ni nachaʼhuiʼ ladxidóʼ», ne racané ca ángel ca laanu guidxélanu laacabe (Hech. 13:48; Juan 6:44; Apoc. 14:6). Peru naquiiñeʼ guizíʼdinu gusíʼdinu binni de Jehová. Guiníʼ íquenu ejemplu stiʼ apóstol Pablo ne Bernabé. Ruzeeteʼ Biblia ora biʼniʼ predicarcaʼ ndaaniʼ sinagoga stiʼ guidxi Iconio, «ne pur modo guniʼcaʼ nabé gucanecaʼ stale judíu ne stale griegu guni cré» (Hech. 14:1). Rihuinni dxíchicaʼ, guirópacabe bisiidicabe «casi runi ti maestru ni nanna gusiidiʼ» (biindaʼ 2 Timoteo 4:2). Ne laanu, ca xpinni Cristu, laaca naquiiñeʼ gúninu zacá.

2. ¿Xiñee nuu tu laa runi sentir qué zanda gusiidiʼ jma jneza?

² Zándaca nuu tu laa runi sentir qué zanda gusiidiʼ jneza. Zándaca guiníʼcabe: «Qué ñaaʼ scuela» o «Huaxiéʼ nannaʼ gusiideʼ, qué gapaʼ gracia ca». Caadxi binni ni riete lu Biblia laaca biʼniʼ sentircaʼ zacá (Éx. 4:10; Jer. 1:6). Ne zándaca nuu tu laa riree gana ne riníʼ: «Seguru qué gannaʼ gusiideʼ, nga runi qué ridxelaʼ binni cásica xcaadxi hermanu». Nánnanu cadi guiráʼ diʼ binni nga riná gucaadiaga ca noticia galán. Ne pa gucaadiaga binni laanu o coʼ, cadi pur stipa stinu ni. Casi bidúʼyanu, racané Jehová ne ca ángel ca laanu guidxélanu binni ni nayá ladxidóʼ. Neca zacá, racaláʼdxinu chuulaʼdxiʼ binni ni cusíʼdinu. Para ganda gúninu ni, guidúʼyanu chonna cosa ni zacané laanu gusíʼdinu jma jneza.

GUIZAALÁʼDXINU BINNI

3. ¿Xiñee gunda yendá Jesús ndaaniʼ ladxidóʼ binni?

³ Biblia ná nanna Jesús «xi nuu ndaaniʼ ladxidóʼ binni» (Juan 2:25). Ndiʼ riníʼ randa rudiibe cuenta xi caníʼ ique binni ne xi rucaa laa guni xiixa. Nga runi, cumu riene chaahuibe xi caquiiñeʼ binni randa rindaabe ndaaniʼ ladxidoʼcaʼ. Nanna Jesús caquiiñecaʼ chuʼ tu gusiidiʼ laacaʼ de Dios ne quixhedxí ladxidoʼcaʼ purtiʼ naná modo nabánicaʼ pur ruquiichináʼ ca xaíque yuʼduʼ que laacaʼ (Mat. 9:36; 23:4). Ne de laacani nga guníʼ Jesús lu Sermón del Monte. Stale binni rinacaʼ gucaadiágacaʼ Jesús purtiʼ guniʼbe ca cosa ni riguu xizaa laacaʼ.

4. ¿Ximodo rusihuínninu rizaaláʼdxinu binni? (Laaca zanda gúʼyaluʼ ca imagen ca).

⁴ ¿Ximodo rusihuínninu rizaaláʼdxinu binni yaʼ? Ra guiénenu xi riguu xizaa laacaʼ. Lu guidxilayú ni runi mandar Binidxabaʼ guiráʼ xixenu racananu pur ti cosa o sti cosa. Ra cadi guiaandaʼ nga laanu racaneni laanu guni sentirnu ni runi sentir binni ora guni predicarnu laacaʼ. Guzéʼtenu ti ejemplu, ¿ñee cayete lu noticia xiixa ni bizaaca ni nabé caguu xizaa binni la? ¿Ñee riuu ca ni napa xiiñiʼ xizaa pa guizaaca xiiñicaʼ xiixa ra scuela la? ¿Ñee nagana guidxela binni dxiiñaʼ neza ra nabézaluʼ la? Galán guiníʼ íquenu modo nabani binni ca dxi nagana riʼ, laacabe la? qué gánnacabe ca cosa galán ni ruzeeteʼ Biblia chigaca despué (2 Tim. 3:1; Is. 65:13, 14).

5. ¿Xiñee maʼ gadxé guca Jesús de ca fariseu? (Mateo 11:28-30).

⁵ Bizaalaʼdxiʼ Jesús binni, ne biiyaʼ binni dxandíʼ rizaaláʼdxibe laacaʼ pur modo biʼniʼ tratarbe laacaʼ. ¡Maʼ gadxé si laabe de ca fariseu! Laacaʼ riníʼ íquecaʼ jma risácacaʼ que xcaadxi binni ne guizáʼ feu modo runi tratarcaʼ binni (Mat. 23:13; Juan 7:49). Peru maʼ gadxé si modo guca Jesús, laa guca nachaʼhuiʼ ne biʼniʼ respetar binni. Gúcabe ti binni nadóʼ ne dxandíʼ peʼ gúcabe humilde, ne ngue gucané laabe gácabe ti maestru ni nanna gusiidiʼ (biindaʼ Mateo 11:28-30). Laanu laaca naquiiñeʼ gácanu nachaʼhuiʼ né binni ne guni respetarnu laacaʼ.

6. ¿Xi zacané laanu gácanu nachaʼhuiʼ ne gusihuínninu nápanu respetu ca binni ni qué ná gucaadiaga mensaje ni zinenu?

⁶ Nuu tu laa qué riná gucaadiaga mensaje ni zinenu ne dede ridxiichicaʼ. ¿Xi gúninu ora guizaaca ni yaʼ? Bisiidiʼ Jesús cadi gucáʼlunu ca ni gucaalú laanu, ne laaca guniʼbe: «Laguni tratar bien ca ni nanalaʼdxiʼ laatu, lauguu ndaayaʼ ca ni riguu dí laatu ne laguni orar pur ca ni runi maltratar laatu» (Luc. 6:27, 28). Que zaca nagana para laanu gácanu nachaʼhuiʼ né ca binni ni gucaalú laanu pa guietenaláʼdxinu zándaca nuu ti razón ni rucaa laacabe cadi gucaadiágacabe laanu. Nuu de laacabe rucaanápecabe mensaje ni zinenu, peru xcaadxi la? zándaca qué ridxaagalucaʼ laanu galán purtiʼ nabé nuucaʼ xizaa pur ca guendanagana ni nápacaʼ ndaaniʼ familia sticaʼ o pur xiixa guendanagana nápacaʼ. O zándaca yendanu ra lídxicabe ora cadxiichicabe o cadi galán cayuni sentírcabe. Ora guizaacanu ca ni bizéʼtenu riʼ, galán chinándanu conseju riʼ: «Siempre laguiníʼ diidxaʼ ni guiaba binni, ne cásica riaba zidi lu guendaró para gaca nanixe, zacaca laguni né stiidxatu, ti gánnatu ximodo guicábitu cada binni» (Col. 4:6). Pa gúninu stipa guiénenu binni ne gánnanu xi caquiiñecaʼ, zacaneni laanu cadi guni sentirnu feu ora qué nácabe gucaadiágabe laanu ne zacaneni laanu gácanu ti binni ni nanna gusiidiʼ.

BIQUIIÑEʼ BIBLIA ORA GUSIIDILUʼ BINNI

7. ¿Ximodo bisihuinni Jesús biquiiñeʼ Stiidxaʼ Dios ora bisiidiʼ binni? (Juan 7:14-16).

⁷ Ora bisiidiʼ Jesús binni qué nusiidiʼ ni ná si ique, sínuque biquiiñeʼ Stiidxaʼ Dios, ne bíʼnibe ni de ti modo cadi nagana guiene binni ne ganda guietenalaʼdxiʼ ni cayunadiaga. Biblia ná: «Nabé cadxagayaa binni pur modo rusiidibe, purtiʼ rusiidibe casi tuuxa ni napa autoridad ne cadi casi ca escriba» (Mar. 1:22; biiyaʼ nota de estudiu «no como los escribas»). Tiempu bibani Jesús, ca escriba que gatigá ruzeetecaʼ ni guníʼ caadxi maestru ni nabé runi respetarcaʼ ora maʼ cusiidicaʼ binni. Maʼ gadxé guca Jesús, purtiʼ gatigá bizeeteʼ ni ná lu Stiidxaʼ Dios. Neca nabé nánnabe stale purtiʼ guyuube né Bixhózebe guibáʼ, peru qué niquiiñebe ca cosa ni nánnabe para si guidxagayaa binni laabe o gucaabe laacaʼ guni sentircaʼ qué gánnacaʼ gastiʼ. Biquiiñebe Stiidxaʼ Dios para gusiidibe binni xi racalaʼdxiʼ Bixhózebe gúnicaʼ (biindaʼ Juan 7:14-16). ¡Guizáʼ galán ejemplu ni bisaanané Jesús laanu!

8. ¿Ximodo yenanda apóstol Pedro ejemplu stiʼ Jesús?

⁸ Ca discípulo stiʼ Jesús yenándacaʼ ejemplu stibe ne biquiiñecaʼ Stiidxaʼ Dios ora bisiidicaʼ. Guidúʼyanu ni bizaaca apóstol Pedro. Neca huaxiéʼ scuela nápabe, lu Pentecostés stiʼ iza 33, yendabe ndaaniʼ ladxidóʼ binni ra biquiiñebe Stiidxaʼ Dios para gusiénebe laacaʼ ca profecía ni guca cumplir luguiáʼ Jesús (Hech. 2:14-37). ¿Xi guleendube yaʼ? «Guyuunisa ca ni gucuaa mensaje que de guidubi ladxidóʼ. Dxi queca, biaʼ 3,000 binni guca discípulo» (Hech. 2:41).

9. ¿Xiñee risaca iquíʼñenu Biblia ora gusíʼdinu binni?

⁹ Gástiruʼ stiʼ cosa ni jma zacané laanu chindanu ndaaniʼ ladxidóʼ binni que Stiidxaʼ Dios (Heb. 4:12). Nga runi iquíʼñenu ni para gusíʼdinu binni. Racaláʼdxinu guni predicarnu «stiidxaʼ Dios», ne cadi ni ná si íquenu (2 Tim. 4:2). Proverbios 2:6 ná: «Jehová nga rudii guendabiaaniʼ; de ruaabe riree guendananna ne guendariene». Ora riquíʼñenu Biblia para gusíʼdinu binni, cudiʼnu lugar Jehová nga guiníʼ (Mal. 2:7). Racaláʼdxinu ganna binni lu Biblia nga zeeda guendabiaaniʼ stiʼ Jehová ne jma galán ni que guendabiaaniʼ stiʼ binni. Zeedani de Dios ne rusiidini laanu ni naquiiñeʼ gúninu para chuulaʼdxiʼ ni bizáʼ laanu ni gúninu ne guibáninu nayecheʼ (2 Tim. 3:16, 17).

10. ¿Ximodo zanda gacanenu binni ni cudiʼnu estudiu ganna zeeda ni cusíʼdinu laa lu Biblia?

¹⁰ Ora maʼ cayaca prepararnu para gusíʼdinu tuuxa, galán guiníʼ íquenu ximodo guluinu laabe ni rusiidiʼ Biblia. Neca riquíʼñenu imagen ne videu para gusíʼdinu binni ni zeeda lu Biblia, peru naquiiñeʼ gúʼyabe Biblia nga libru ni jma riquíʼñenu para gusíʼdinu binni. Ora maʼ cudiʼnu estudiu laabe, galán guidúʼndanenu laabe ca textu ni zeeda lu Biblia ne gacanenu laabe guiníʼ íquebe xi rusiidicani laabe. Ora guluinu laabe ca videu o ca imagen, galán gúʼyanu pa cayénebe xi conseju zeeda lu Biblia cusiidicani. Qué riníʼ diʼ nga naquiiñeʼ guininu stale ne guidúʼndanu cada tobi de ca textu ni zeeda lu lección ni cadúʼndanenu laabe. Ni jma galán gúninu nga gacanenu binni ni cudiʼnu estudiu ca guiene xi riníʼ ca versículo ni ridúʼndanenu laa ne pa cadi cayénebe ni la? galán guidúʼndanenu ni laabe sti biaje. Pa gúninu guiráʼ ni bizéʼtenu riʼ, zanna binni ca cayuni estudiar Biblia, ne cadi cayuni estudiarbe ti libru, ti imagen o ti videu (1 Cor. 2:13).

11, 12. a) ¿Ximodo zanda gusihuínninu nápanu paciencia binni ni cudiʼnu estudiu? (Hechos 17:1-4; laaca zanda gúʼyaluʼ imagen ca). b) ¿Xi cadi naquiiñeʼ guiaandaʼ laanu de modo naca caadxi binni, ne ximodo zanda gacanenu laacabe?

¹¹ Pa guidúʼyanu cayaca nagana para binni ni cudiʼnu estudiu guiene xiixa puntu, galán guietenaláʼdxinu conseju ni bidii Pablo: «Biʼniʼ predicar stiidxaʼ Dios, [ . . . ] biʼniʼ ni né paciencia». Nuu tu laa riniisi lu Stiidxaʼ Dios nagueenda ne nuu tu laa coʼ. Zándaca para laanu cadi nagana xiixa cosa ni zeeda lu Biblia, peru xcaadxi binni zándaca caquiiñecaʼ jma tiempu para guiene chaahuicaʼ ni caziidicaʼ. Guzéʼtenu ti ejemplu, ndaaniʼ guidxi Tesalónica, chupa chonna biaje biquiiñeʼ Pablo Stiidxaʼ Dios para gacané ca judíu guiene chaahuicaʼ ne guicaacaʼ ni cusiidibe laacaʼ (biindaʼ Hechos 17:1-4).

¹² Sti modo zanda gápanu paciencia binni ni cudiʼnu estudiu nga ra gudiʼnu tiempu laa para guicabi ca pregunta ni gúninu laa ne ra gúninu stipa cadi guininu stale. Gúninu stipa gucaadiaga chaahuinu laabe para gánnanu modo riníʼ íquebe. Despué guidúʼndanenu laabe ca versículo ni zeeda lu Biblia para gacanenu laabe guiene chaahuibe modo riníʼ ique Jehová. Cadi guiaandaʼ laanu nuu binni qué huayuu dxi gúʼyacaʼ ti Biblia ne qué gánnacaʼ xi nani. Nga runi, galán guiníʼ íquenu chinenu ti Biblia Traducción del Nuevo Mundo para laabe. Laaca zanda guluinu laabe folletu ni láʼ «Cani zaziidiluʼ lu Stiidxaʼ Dios», para gúʼyabe nuu stale información risaca zeeda lu Biblia. Laaca zanda gacanenu laabe gúʼyabe ximodo zanda gacané Biblia laabe ra guidúʼndanenu laabe chupa chonna versículo stiʼ pregunta 15, ni zeeda lu folletu ca, ni caníʼ ximodo racané Biblia laanu guibáninu nayecheʼ. Pa guluinu binni ni cadúʼndanenu Biblia napa Stiidxaʼ Dios poder zácanu ti binni ni nanna gusiidiʼ.

GACANENU BINNI GUSISACA JEHOVÁ

13. Ora gusíʼdinu binni, ¿tu racaláʼdxinu guisaca? Bizeeteʼ ti ejemplu.

¹³ Ni racaláʼdxinu nga gacanenu binni gunibiáʼ Jehová ne guidxíñacaʼ ra nuube (Sant. 4:8). Zeeda gácanu casi ti binni ni naaze ti lámpara, ni cayacané sti binni para ganda guidxela ti cosa ni cuyubi ni nuu ra nacahui. Para ganda gacanenu laabe, qué ruzáʼninu laca laanu, sínuque cosa ni cuyúbibe ca. Zaqueca nga laanu, ora rusíʼdinu binni, qué racaláʼdxinu guʼyaʼ binni pabiáʼ nánnanu, sínuque ni racaláʼdxinu nga guisaca Jehová ne modo riníʼ ique.

14. ¿Ximodo zanda gacanenu tuuxa ni cadúʼndanenu gapa deseu de gusiecheʼ ladxidóʼ Jehová?

¹⁴ Ora gudiʼnu estudiu tuuxa gacanenu laa gapa deseu de gusiecheʼ ladxidóʼ Jehová (Prov. 27:11). Cadi gusíʼdisinu estudiante ca guni ni jneza ne gucaanáʼ ni cadi jneza para si gaca testigu stiʼ Jehová. Ni racaláʼdxinu nga guchaabe xquendanabánibe purtiʼ racaláʼdxibe gusiéchebe Dios. Guzéʼtenu ti ejemplu, pa cayaca nagana para laabe gusaanabe xiixa tradición o costumbre, galán gúninu laabe ca pregunta riʼ: «¿Xiñee nanalaʼdxiʼ Jehová ni? ¿Xiñee canabaʼ Jehová lii gusaana de gúniluʼ xiixa ni riuuláʼdxiluʼ? ¿Ximodo rusihuinni ni canabaʼ Jehová lii gúniluʼ nadxiibe lii?». Gacanenu estudiante ca guiníʼ ique ca cualidad ni napa Jehová, ora gúnibe ni, jma ziénebe pabiáʼ nadxii Bixhózenu ni nuu guibáʼ laabe. ¿Xi zabeendunu yaʼ? Zápabe deseu de gusiéchebe ladxidóʼ Jehová.

GÚNINU STIPA GUSÍʼDINU JMA JNEZA

15. ¿Xi zanda gúninu para gácanu tuuxa ni nanna gusiidiʼ?

¹⁵ Zanda guni orarnu Jehová para gacané laanu gácanu tuuxa ni nanna gusiidiʼ (1 Juan 5:14). Despué de guni orarnu naquiiñeʼ gúninu xiixa ni cuʼ Jehová ndaayaʼ, ne para nga naquiiñeʼ quíxhenu stale atención lu ca reunión ni rápanu ne gúninu ni cazíʼdinu. Zaqueca ora gusíʼdinu tuuxa de lu Biblia, galán guinábanu ti hermanu o ti hermana ni nanna gusiidiʼ chiné laanu ne despué gabi laanu paraa caquiiñeʼ gúninu dxiiñaʼ ti gácanu ti binni ni nanna gusiidiʼ. Cadi guiaandaʼ laanu, neca maʼ nánnanu xi chigusíʼdinu binni, peru binni ni cadúʼndanenu ca coʼ. Nga runi, gúninu stipa guiénenu laabe. Gacanenu laabe gúʼyabe xi zabeendube pur ni caziidibe ne gusisácabe ca promesa stiʼ Jehová. Zacá zacanenu laabe gaca xhamígube Jehová ne guibánibe nayecheʼ (Sal. 1:1-3).

16. ¿Xiñee galán cadi gusaana de gusíʼdinu jma jneza?

¹⁶ Ti cosa ni jma rusiecheʼ laanu nga gusíʼdinu de Jehová. Ne lu guidxilayú cubi ca zusíʼdirunu binni. Nga runi, ora guni predicarnu ca noticia galán cadi gusaana de guizaaláʼdxinu binni, iquíʼñenu Biblia ora gusíʼdinu laacaʼ ne gacanenu laacaʼ gunibiaʼcaʼ Jehová. Pa gúninu ca ni bizéʼtenu riʼ, zazíʼdinu gácanu ti binni ni nanna gusiidiʼ.