Ni rinabadiidxaʼ ca ni ruundaʼ

¿Padxí maʼ guiníʼ ca guidxi ca «¡Maʼ nuu paz ne seguridad!»?

Nacubi bisiene Torre stiʼ ni rapaa huidxe si zaguu Dios ndaaniʼ ladxidóʼ «chii cachu» (guirá ca gobiernu) gúnicaʼ «ni cá íquebe» gudiicaʼ poder ne autoridad sticaʼ «bestia salvaje color naxiñáʼ rini» (Naciones Unidas). Laaca runibiáʼcabe bestia riʼ casi «imagen stiʼ bestia salvaje» (Apoc. 13:14, 15; 17:3, 16, 17). Despué, zunduuxe «chii cachu» ne bestia salvaje (né poder ni deruʼ gucuaa) guiráʼ religión ni qué rusiidiʼ ni dxandíʼ. Yanna, ¿ñee zaníʼ ca guidxi ca «¡Maʼ nuu paz ne seguridad!»b ante la? o despué de guinitilú ca religión ni qué rusiidiʼ ni dxandíʼ (1 Tes. 5:3).

Qué gánnadinu padxí peʼ nga guiníʼ ca guidxi ca «¡Maʼ nuu paz ne seguridad!». Pa ñánnanu guiráʼ xixé ni chiguizaaca la? qué ninándanu conseju ni gatigá bidii Jesús ca xpinni, ora gúdxibe laacaʼ: «Lagataná» (Mat. 24:42; 25:13; 26:41). Yanna, guiduʼyaʼ chaahuinu ca diidxaʼ ni bicaa apóstol Pablo pur espíritu santu lu carta para ca binni de Tesalónica.

Pablo bicá: «Ora maʼ caníʼ binni “¡Maʼ nuu paz ne seguridad!”, málasi zanitilucaʼ» (1 Tes. 5:2, 3). Sicaríʼ huasiene ca publicación stinu ca diidxaʼ ni guníʼ Pablo, ora maʼ guiníʼ binni «¡Maʼ nuu paz ne seguridad!», zácani ante guzulú gran tribulación, ni zuzulú ora maʼ guinitilú Babilonia guidxi roʼ (laani nga guiráʼ religión ni qué rusiidiʼ ni dxandíʼ). Laaca huasiénecani ora guiníʼ binni «¡Maʼ nuu paz ne seguridad!», laani nga seña ni zusihuínnini maʼ chisulú gran tribulación.

Peru ra guiduʼndaʼ chaahuinu ca diidxaʼ riʼ, ruluíʼ nuu sti modo guiénenu cani: zándaca zaníʼ binni «¡Maʼ nuu paz ne seguridad!» despué de guinitilú ca religión ni qué rusiidiʼ ni dxandíʼ. ¿Xiñee rininu zacá yaʼ? Guidúʼyanu ca pregunta riʼ.

¿Ñee huayacané ca religión ni qué rusiidiʼ ni dxandíʼ chuʼ guerra lu guidxilayú riʼ la? Biblia rusiene «ridxélacabe rini [ . . . ] stiʼ guiráʼ ca ni biiticabe lu guidxilayú» ra nuu Babilonia guidxi roʼ ni zeeda gaca «prostituta» que (Apoc. 17:1, 5; 18:24). Ra maʼ gudiʼdiʼ stale iza, ca religión ni qué rusiidiʼ ni dxandíʼ huayacanecaʼ chuʼ guerra ne stale biaje laaca huacaacabe binni tíndecaʼ ne guutisaacaʼ. Nga runi qué huayanda diʼ cúʼcabe paz ne seguridad, sínuque huaguucabe guerra ne guendaquéiquiiñeʼ. Yanna, ¿ñee zedandá dxi zaníʼ ca guidxi ca «¡Maʼ nuu paz ne seguridad!» despué de guinitilú Babilonia guidxi roʼ la? Zándaca, peru qué zanda guininu zacá peʼ zácani.

¿Xi zazaaca ora guiníʼ ca gobiernu ca «¡Maʼ nuu paz ne seguridad!»? Sicaríʼ bicaa Pablo: «Málasi zanitilucaʼ» (1 Tes. 5:3). Lu nota de estudiu stiʼ versículo riʼ ná: «Raríʼ caníʼ Pablo ora maʼ guiníʼcabe “¡Maʼ nuu paz ne seguridad!” nagueendaca zanitilú ca ni caniʼni. Málasi zanitilucaʼ ne gastiʼ ni gucueezani». Pa primé guinitilú ca religión ni qué rusiidiʼ ni dxandíʼ ne despué de laani guiníʼ ca guidxi ca «¡Maʼ nuu paz ne seguridad!», óraque nga málasi zanitilú ca guidxi ca.

¿Xi zuni xquidxi Jehová? Sicaríʼ guníʼ Pablo: «Laatu la? hermanu caʼ, cadi nuutu lu guelacahui, nga runi qué zanaazeʼ dxi que laatu, casi raca né ti gubaanaʼ ni qué ranna rirá gueelaʼ» (1 Tes. 5:4). Guníʼ ique ndiʼ: Pa primé guinitilú ca religión ni qué rusiidiʼ ni dxandíʼ ne despué guiníʼcabe «¡Maʼ nuu paz ne seguridad!» la? zanna xquidxi Jehová maʼ chiguinitilú ca guidxi ca. Peru para ca guidxi ni caníʼ «¡Maʼ nuu paz ne seguridad!» zanitilucaʼ ne zácani casi ora riuu gubaanaʼ ra lidxi binni: málasi ne guirutiʼ cabeza ni.

¿Xi cabézanu guizaaca? Maʼ cadi candaa zunduuxe «chii cachu» ne bestia salvaje (né poder ni maʼ gucuaa) guiráʼ religión ni qué rusiidiʼ ni dxandíʼ. Zacá zuzulú gran tribulación. Laaca maʼ nánnanu zedandá dxí zaníʼ ca guidxi ca «¡Maʼ nuu paz ne seguridad!». ¿Pora zácani yaʼ? Maʼ bidúʼyanu chupa modo zanda gácani. Primé modo zanda gácani: zácani ante gunduuxecabe religión ni qué rusiidiʼ ni dxandíʼ. Guiropa modo zanda gácani: zácani despué de gunduuxecabe religión ni qué rusiidiʼ ni dxandíʼ. Ni naquiiñeʼ gúninu nga cuézanu para guidúʼyanu xi zazaaca. Stale de ca profecía zeeda lu Biblia jma nga riénecabe ni ora maʼ cayaca cumplírcani o despué de gaca cumplírcani (bichaaga ni né Juan 12:16).

Neca qué gánnanu padxí peʼ nga guiníʼ ca guidxi ca «¡Maʼ nuu paz ne seguridad!», ni jma risaca para laanu nga cadi guixélenu de Jehová. Nga runi «gatananu ne cuʼ xpiaaninu» ti zacá intiica si modo guizaaca ca cosa ca ziuʼnu listu para gudxíʼlunu cani (1 Tes. 5:6).