Gudixhe ique chuʼnísaluʼ

1. a) ¿Gunáʼ nga caadxi de ca ndaayaʼ ni ricaanu ora riuʼnísanu? b) ¿Xi zadúʼyanu lu artículo riʼ?

¿ÑEE maʼ bidiiluʼ xquendanabániluʼ Jehová ne maʼ guyuunísaluʼ la? ¡Guizáʼ galán decisión ca! Ra bíʼniluʼ ni gunábaluʼ Dios gápaluʼ ti conciencia nayá (1 Ped. 3:21). Laaca bisihuínniluʼ zanda guni xcaadxi ni bíʼniluʼ ca. Yanna, ¿pa caʼruʼ chuʼnísaluʼ yaʼ? Nanna dxíchidu nadxiiluʼ Jehová ne racaláʼdxiluʼ gúniluʼ ni ná. Nánnaluʼ caquiiñeʼ chuʼnísaluʼ para gaca perdonar ca pecadu stiluʼ ne chuulaʼdxiʼ Dios ni rúniluʼ (Hech. 2:38-40). Neca zacá, zándaca nuu xiixa ni cucueeza lii para gúniluʼ ni. Nabé zacané artículo riʼ lii. Zadúʼyanu 1) xiñee nuu tu laa qué riguixhe ique chúʼnisa, 2) xiñee galán cadi guiaandaʼ laanu maʼ gaxha nuu fin ne 3) xi ndaayaʼ zacaanu ra gúninu stipa pur chuʼnísanu nagueenda.

XIÑEE NUU TU LAA QUÉ RIGUIXHE IQUE CHÚʼNISA

2. ¿Xiñee nuu tu laa qué riguixhe ique chúʼnisa?

² Nuu tu laa racalaʼdxiʼ guni ni ná Jehová, peru qué rinágacaʼ chuʼnísacaʼ purtiʼ ridxíbicaʼ. Zándaca ridxíbicabe purtiʼ riníʼ íquecabe qué zúnicabe ca cosa ca modo riuulaʼdxiʼ Dios. Pa nga nga ni cayuni sentirluʼ, zanda gúʼndaluʼ ca textu ni zeeda lu Biblia ni zanda gacané lii chuʼluʼ seguru cadi cabeza Dios gúniluʼ ca cosa ca jneza ne sin gucheeluʼ ne riéchebe ora rudiiluʼ laabe ni jma galán de lii (Sal. 103:13, 14; Col. 3:23). Yanna, pa ridxíbiluʼ gucaalúcabe lii, gunabaʼ Jehová gacané lii guni sentirluʼ casi biʼniʼ sentir hombre bicaa Salmo riʼ, laabe bicaabe: «Jehová nuuné naa; qué zadxibediáʼ. ¿Xi zanda guni binni naa yaʼ?» (Sal. 118:6).

3. ¿Xiñee nuu tu laa qué riná ga chúʼnisa? (Laaca zanda gúʼyaluʼ imagen ca).

³ Nuu tu laa qué riná ga chúʼnisa purtiʼ riníʼ íquecaʼ huaxiéʼ nánnacaʼ de lu Biblia. Peru ¿pabiáʼ nga naquiiñeʼ gánnanu de lu Biblia yaʼ? Guiníʼ íquenu relatu riʼ. Laga nuu Pablo ne Silas ndaaniʼ cárcel, guca ti xu naroʼbaʼ ne bindaa ca cadena liibicabe. Despué, biʼniʼ predicárcabe hombre ni rapa ra cárcel que ne guiráʼ ca ni nuu ra lidxi. Zándaca biene hombre riʼ ne familia stiʼ Dios nga biʼniʼ milagru que para gulá ca xpinni. Ne gueelaʼ que guizáʼ biziidicabe stale cosa risaca de Jehová ne de Jesús. ¿Xi bizaaca despué yaʼ? Óraque «guyuunisa hombre que né idubi familia stiʼ» (Hech. 16:25-33). Pa maʼ runibiaʼluʼ Jehová, nadxiiluʼ laabe de guidubi ladxidoʼloʼ, riéneluʼ ca cosa ni cadi nagana zeeda lu Biblia, maʼ guca arrepentirluʼ de ca pecadu stiluʼ ne maʼ gudixhe íqueluʼ guzuubaluʼ stiidxaʼ Jehová, maʼ nuuluʼ listu para chuʼnísaluʼ (Mar. 12:30).

4. ¿Gunáʼ nga stiʼ razón ni rucaa xcaadxi cadi chuʼnísacaʼ? (Laaca zanda gúʼyaluʼ imagen ca).

⁴ Stale tu laa racalaʼdxiʼ guni ni ná Dios, peru qué rinacaʼ chuʼnísacaʼ purtiʼ riníʼ íquecaʼ guizáʼ nagana zaca ni para laacaʼ. Dxandíʼ, zándaca riníʼ íquecabe zacá purtiʼ zuchaa decisión ca xquendanabánicabe (Luc. 14:27-30). Peru stale tu laa nabé riuucaʼ xizaa pur ca sacrificiu ni caquiiñeʼ gúnicaʼ para gúnicaʼ ni ná Jehová. Ne nga peʼ nga ni bizaaca Candace. Neca biniisibe ndaaniʼ ti familia ni naca Testigu, peru laabe qué ninabe ñácabe Testigu. Despué, dxi maʼ huaniisibe, bizulú biindabe Biblia sti biaje. Laabe guniʼbe: «Neca nannaʼ xii nga ni naquiiñeʼ guneʼ para gusiecheʼ ladxidóʼ Jehová, peru laaca riuuladxeʼ modo nabaneʼ que. Nannaʼ zaca nagana para naa gusaanaʼ ca cosa ni riuuladxeʼ guneʼ». Ne xcaadxi riníʼ ique qué zanda guibánicaʼ modo ná Jehová. Ridxíbicaʼ gúnicaʼ ti pecadu grave despué de chuʼnísacaʼ ne cueecabe laacaʼ de ndaaniʼ congregación. ¿Xi zanda gúniluʼ pa riguu tobi de ca ni bizéʼtenu ca xizaa lii yaʼ?

5. ¿Xi caquiiñeʼ guidúʼyanu pa caníʼ íquenu chuʼnísanu? (Mateo 13:44-46).

⁵ Ora chisinu xiixa, qué riníʼ íquesinu pabiáʼ chitíxenu pur laani, sínuque laaca riníʼ íquenu pa biaʼsi biaʼcá nga risácani. Pa guidúʼyanu nabé risácani ne baratu cutoocabe ni la? zándaca nagueendaca zazinu ni. Zaqueca nga laanu, ora guiníʼ íquenu chuʼnísanu, qué zadúʼyasinu xi guiráʼ chigúninu para chuʼnísanu, guiráʼ ni caquiiñeʼ guchaʼnu, sínuque laaca zadúʼyanu pabiáʼ risaca ni zuni ganarnu, ziuʼnu jma gaxha de Jehová. Biquiiñeʼ Jesús chupa ejemplu para gusiidiʼ de ni caninu ca (biindaʼ Mateo 13:44-46). Lu cada tobi de ca ejemplu ca ridúʼyanu de guidubi ladxidóʼ ti hombre bitoo guiráʼ ni napa para guzíʼ xiixa nabé risaca ni bidxela. Lii laaca maʼ bidxélaluʼ ti cosa nabé risaca, laani nga: ni dxandíʼ de Reinu stiʼ Dios. Pa caníʼ íqueluʼ pa dxandíʼ peʼ naquiiñeʼ guchaaluʼ modo nabániluʼ para ganda chuʼnísaluʼ, guníʼ ique ca ejemplu bizeeteʼ Jesús ca. Zanda guiníʼ íqueluʼ: «¿Ñee nuaaʼ seguru bidxelaʼ xiixa nabé risaca la? ¿Ñee risaca para naa nacaʼ xhamiguaʼ Jehová, esperanza ni maʼ bidiibe naa de guibaneʼ sin qué chuʼ dxi gateʼ ne ca hermanu ne ca hermana ni napaʼ la?». Ni guicábiluʼ zacané lii gánnaluʼ xi caquiiñeʼ guchaaluʼ para ganda chuʼnísaluʼ.

6. ¿Xi zanda gacané laanu gápanu ti ladxidóʼ ni naʼ chinanda ni ná Jehová?

⁶ Lu ejemplu stiʼ hombre ni zigusaba trigu, guníʼ Jesús de gadxé gadxé tipu ladxidóʼ ra ziyaba semiá stiʼ mensaje stiʼ Reinu. Nuu caadxi binni nápacaʼ ti ladxidóʼ ni rucueeza laacaʼ de guiziidicaʼ de Dios. Peru nuu xcaadxi rucaadiágacaʼ mensaje stiʼ Reinu de guidubi ladxidoʼcaʼ ne rúnicaʼ ni caziidicaʼ (Luc. 8:5-15). Pa cayuni sentirluʼ chupa ladxidoʼloʼ, cadi guireeluʼ gana. Zacané Dios lii gápaluʼ ti ladxidóʼ nacubi, tobi ni naʼ chinanda ni nabe. Gunabaʼ laabe gacanebe lii iguudxi ladxidoʼloʼ para ganda gachebiituʼ semiá stiʼ Reinu ndaaniʼ ni (Ezeq. 18:31; 36:26).

7, 8. ¿Xiñee qué ganda chúʼnisa caadxi joven? (Laaca zanda gúʼyaluʼ imagen ca).

⁷ Nuu caadxi joven nadxiicaʼ Jehová, peru qué ganda chuʼnísacaʼ purtiʼ rúnicaʼ ni ná xcaadxi binni. Zándaca ra scuela rusiidicabe laacaʼ cadi gúnicaʼ menu xcaadxi pur modo nácacaʼ ne guni respetárcabe laacaʼ pur modo nabánicaʼ, neca rúnicaʼ cosa ni qué riuulaʼdxiʼ Jehová. Peru pa chinándacabe conseju riʼ la? nabé zuninani laacabe (Sal. 1:1, 2; Prov. 7:1-5). Joven, ¿xi zanda gúniluʼ para cadi chinándaluʼ ni nácabe ca yaʼ? Galán chinándaluʼ ejemplu stiʼ salmista ni bicaa ca diidxaʼ riʼ para Jehová: «Jma rieneʼ chaahueʼ que guiráʼ ca maestru stinneʼ, purtiʼ nabé riníʼ iqueʼ ca ni rusietenaláʼdxiluʼ naa». (Sal. 119:99).

⁸ Nuu caadxi Testigu sin gudiicaʼ cuenta rucueezacaʼ chúʼnisa ca xiiñicaʼ. Jma ricá íquecaʼ cheʼ ca xiiñicaʼ scuela ne gápacabe ti dxiiñaʼ galán, o qué riguucaʼ gana laacabe quixhe íquecabe gúnicabe jma lu xhiiñaʼ Jehová. Joven, ¿runi sentirluʼ zándaruʼ gacané bixhózeluʼ ne jñaaluʼ lii para chuʼluʼ jma gaxha de Jehová la? ¿Laga pa guiníʼneluʼ laacabe de laani yaʼ? Ne cadi guiaandaʼ lii: biaʼ tiica iza nápaluʼ zanda gaca xhamíguluʼ Jehová (Prov. 20:11).

9. ¿Xiñee nuu tu laa qué ganda chúʼnisa?

⁹ Nuu tu laa maʼ runi cumplir ca requisitu para ganda chúʼnisa, peru qué ganda guni ni purtiʼ nuu tu cucueeza laa. Guzéʼtenu ti ejemplu, zándaca ti xhamigu o ti familia stiʼ cayabi laa cueza para ganda chuʼnísacaʼ juntu. Gastiʼ naca chuʼnísanenu tuuxa ni nadxiinu juntu. Peru ¿ñee risaca razón ca para cadi chuʼnisagaluʼ la? Cadi guiaandaʼ laanu, ora rudiʼnu xquendanabáninu Jehová, nácani ti promesa ni cada tobi runi né laabe. Cadi naquiiñeʼ cuézanu chúʼnisa stobi para ganda chuʼnísanu (Rom. 14:12).

XIÑEE CADI NAQUIIÑEʼ GUIAANDAʼ LAANU MAYACA GUEEDA FIN

10. ¿Xiñee nuu tu laa qué riná guchaa modo nabani para chúʼnisa?

¹⁰ Aparte de ca razón ni maʼ bidúʼyanu, nuu tu laa qué naʼ chúʼnisa purtiʼ riníʼ íquecaʼ náparucaʼ stale tiempu para guchaacaʼ modo nabánicaʼ ante gueeda fin. ¿Ñee jneza guiníʼ íquenu zacá la? Ndiʼ nga ni gudxi Jesús ca discípulo stiʼ para quixhenabe laacaʼ: «Lachuu listu, purtiʼ ti hora ni cadi lica caníʼ íquetu zeeda Xiiñiʼ Hombre» (Luc. 12:40).

11. Casi rieeteʼ lu Salmo 119:60, ¿xi runi sentirnu pur ca norma stiʼ Jehová ra jma runibiaʼnu laabe?

¹¹ Ni rucaa laanu gudiʼnu xquendanabáninu Jehová ne chuʼnísanu nga guendarannaxhii ni nápanu Jehová ne ca norma stibe. Ra jma runibiaʼnu Jehová ridúʼyanu guizáʼ nadxiibe laanu ne rapa ca norma stibe laanu. Ne pur nga racaláʼdxinu gúninu ni nácani nagueendaca (biindaʼ Salmo 119:60). Bisiene discípulo Santiago sti razón ni nápanu para chinándanu ca mandamientu stiʼ Jehová nagueendaca: qué gánnanu xi zazaaca de laanu guixíʼ. Zándaca qué zabáninu sti dxi para gúninu ni jneza. Nga runi nagasi ca nga naquiiñeʼ gúninu ni canabaʼ Jehová laanu gúninu (Sant. 4:13-17).

12. ¿Xi rizíʼdinu de ejemplu stiʼ ca trabajador ni yeguni dxiiñaʼ lu layú uva que?

¹² Yanna, zándaca nuu tu guiníʼ ique: «¿Ñee cadi xa guníʼ Jesús lu ejemplu stiʼ ca trabajador yeguni dxiiñaʼ lu layú uva que guyuu tu biʼniʼ dxiiñaʼ ti hora si ne biáxacaʼ biaʼca biaxa ca ni biʼniʼ dxiiñaʼ guidubi dxi que?» Dxandíʼ ni. Peru ¿xi razón gúpacabe para bíʼnicabe dxiiñaʼ ti hora si yaʼ? Laacabe guníʼcabe: «Purtiʼ guirutiʼ caʼruʼ gudii laadu dxiiñaʼ». Cadi purtiʼ nachaabacabe. Pa ñuu tu nudii laacabe dxiiñaʼ ñúnicabe ni guidubi dxi. Casi peʼ gúdxicabe laacaʼ chigúnicaʼ dxiiñaʼ nagueendaca zecaʼ (Mat. 20:1-16). Ca dxi riʼ, maʼ bicaa Jesús ridxi laanu para chinándanu laa ne gacanenu laa gaca predicar. Ne casi peʼ gucaʼdiáganu laabe nagueendaca naquiiñeʼ chuunu.

13. ¿Xi rizíʼdinu de xheelaʼ Lot?

¹³ Zándaca ca ni qué naʼ ga chúʼnisa ca gudiicaʼ cuenta despué zaca jma nagana para laacaʼ guchaacaʼ modo nabánicaʼ para ganda chuulaʼdxiʼ Dios ni rúnicaʼ. Nanna Jesús zacá ni, ngue runi gúdxibe ca discípulo stibe: «Laguietenalaʼdxiʼ de xheelaʼ Lot» (Luc. 17:31-35). Nánnabe zanitilú Sodoma ne Gomorra, peru ruluíʼ si nabé gucuánube ca cosa ni cusaanabe (Gén. 19:23-26). Rusietenalaʼdxiʼ relatu riʼ laanu zedandá dxi zieeguʼ puertaʼ ra rilá binni. Ora guedandá dxi ni maʼ gudixhe Dios, zieeguni né llave ne maʼ qué ziuu dxi guixéleni (Luc. 13:24, 25).

14. Ra gúʼyaluʼ maʼ cayaca cumplir ca profecía ni caníʼ mayaca gueeda fin stiʼ guidxilayú riʼ, ¿xi zucaani lii gúniluʼ?

¹⁴ Guiráʼ ni cazaaca yanna riʼ, rusihuínnicani maʼ cayaca cumplir ca profecía ni caníʼ mayaca gueeda fin stiʼ guidxilayú riʼ. Zándaca cadi cazaaca ca cosa ni cá lu Biblia lugar ra nabézaluʼ, peru ora gúʼyaluʼ cazaaca cani xcaadxi lugar, naquiiñeʼ gucaani lii guchaaluʼ modo nabániluʼ para ganda chuʼnísaluʼ nagueendaca. Guiníʼ íquenu ni bicaa apóstol Pedro ra nuu caadxi xpinni Cristu de primé siglu que: «Lacuu xpiaanitu [o «lagapa buen juiciu»]». ¿Xiñee bidiibe laacaʼ conseju riʼ yaʼ? Laca laabe guniʼbe: «Maʼ zedadxiña dxi guiluxe guiráʼ cosa» (1 Ped. 4:7; nota). Casi ridúʼyanu, raríʼ caniʼbe tiempu chiguinitilú Jerusalén ne templu que. Peru ca xpinni Cristu que zitu nabézacaʼ de Jerusalén. Ngue runi qué zuniná ni guizaaca que laacabe (1 Ped. 1:1). Peru ra gúʼyacabe modo gaca cumplir ca diidxaʼ que, zacaneni laacabe gápacabe jma confianza zuni cumplir Jehová guiráʼ promesa stiʼ. Ngueca nga ni cazaaca yanna, cayuuyaluʼ modo cayaca cumplir ca profecía ni cusihuinni mayaca gueeda fin stiʼ guidxilayú riʼ. Ne nga cayacané lii gatanaluʼ ne cadi gusaana de gúniluʼ stipa para ganda chuʼnísaluʼ.

15. ¿Ximodo naquiiñeʼ cuézanu dxi stiʼ Jehová? (2 Pedro 3:10-13).

¹⁵ Lu guiropa carta ni bicaa Pedro, bisiene ximodo naquiiñeʼ cuézanu «dxi stiʼ Jehová», ni caninu nga, dxi guiluxe guidxilayú malu riʼ. Lu primé siglu que cayaadxaruʼ stale para guedandá dxi ca. Neca zaqué, gudxi Pedro ca xpinni Cristu que chuʼcaʼ «pendiente» de ora gueeda dxi que o guni desearcaʼ guiuba gueedani (biindaʼ 2 Pedro 3:10-13; nota). Laaca cadi naquiiñeʼ guiaandaʼ laanu mayaca nuu dxi ca ne maʼ guiuba racaláʼdxinu gueedani. Nga runi, rúninu stipa chuʼnu listu ne gaca conducta stinu nayá ne gúninu cosa ni gusihuinni runi adorarnu Dios. Ne nánnanu guizáʼ riecheʼ Jehová ora guʼyaʼ gúninu zacá. ¿Riníʼ íqueluʼ ximodo zuni sentirbe ora gúʼyabe lii cudiiluʼ laabe xquendanabániluʼ ne cayuunísaluʼ la?

CA NDAAYAʼ NI ZACAALUʼ PA CHUʼNÍSALUʼ

16. ¿Pora nga jma galán naquiiñeʼ chuʼnísaluʼ? (2 Corintios 6:1, 2; laaca zanda gúʼyaluʼ ca imagen ca).

¹⁶ Yanna peʼ nga jma naquiiñeʼ chuʼnísaluʼ (biindaʼ 2 Corintios 6:1, 2). Guzéʼtenu ejemplu galán ni bisaana eunuco etíope ni biʼniʼ predicar Felipe que. Ora biénebe ni dxandíʼ de ca noticia galán ne casi peʼ bíʼyabe zanda chuʼnísabe la? bíʼnibe ni nagueendaca. Qué niníʼ íquedibe: «Primé racalaʼdxeʼ guiziideʼ jma de ca noticia galán. Zándaca jma delante ca zadxélanu sti lugar para ganda chuaanisaʼ». Qué niníʼ íquedibe zacá, sínuque gúdxibe Felipe: «¿Xi cucueeza naa de chuaanisaʼ yaʼ?» (Hech. 8:26, 27, 35-39). Ne despué de guyuunisa eunuco que, biʼniʼ seguir neza zeʼ ne ziyecheʼ.

17. ¿Xi ti cosa nanna dxíchinu?

¹⁷ Pa nuu xiixa ni cucueeza lii de chuʼnísaluʼ, gunna dxichi racalaʼdxiʼ Jehová gacané lii gaca xhamíguluʼ laa (Rom. 2:4). Cumu cayacanebe lii la? Gastiʼ qué zuchibi lii, gastiʼ qué zuchiiñaʼ lii ne guirutiʼ zucueeza lii de chuʼnísaluʼ. Ora chuʼnísaluʼ, nabé nayecheʼ zuni sentirluʼ purtiʼ zápaluʼ ti conciencia nayá nezalú Dios ne zándaca zuuyaluʼ maʼ qué zasaca ca cosa ni bisaanaluʼ (Filip. 3:8, 13). Nga zacané lii cuézaluʼ né guendanayecheʼ ca cosa ni gueedaruʼ, ni caninu raríʼ nga, dxi gaca cumplir ca promesa ni maʼ biʼniʼ Jehová ca ni maʼ bidii xquendanabani laa ne ca ni maʼ guyuunisa (Hech. 3:19).