Xi riníʼ chuʼnísanu ne xiñee risácani

1. ¿Ximodo nánnanu guendariuunisa ca nácani ti cosa risaca ni rusiidiʼ Biblia?

ORA ridúʼyanu riuunisa tuuxa, guizáʼ riéchenu. Ne zacá rizaaca ni dede primé biaje guca reunir primé congregación stiʼ ca xpinni Cristu lu Pentecostés stiʼ iza 33 ra guyuunisa stale binni. Dxi que bidii apóstol Pedro ti discursu ra bisiene pabiáʼ risaca nga chuʼnísacabe (Hech. 2:38, 40, 41). Gudiʼdiʼ tiempu, bicaa apóstol Pablo ca cosa ni maca bizíʼdinu «de guendariuunisa» nácacani ca cosa ni maʼ bizíʼdinu «ni jma naquiiñeʼ gánnanu de Cristu» (Heb. 6:1, 2). Zándaca guiníʼ íquenu cadi nagana nga guizíʼdinu de guendariuunisa, peru nácani tobi de ca cosa nabé risaca rusiidiʼ Biblia. Nga runi naquiiñeʼ guiene chaahuinu ni.

2. ¿Xiñee nabé risaca guiene chaahuinu ni rusiidiʼ Biblia de guendariuunisa?

² Guzéʼtenu ti ejemplu ni zacané laanu gúʼyanu xiñee nabé risaca guiene chaahuinu ni rusiidiʼ Biblia de guendariuunisa, neca maʼ zinenu stale iza de guyuʼnísanu o cayuʼnu listu para chuʼnísanu. Pa racalaʼdxiʼ tuuxa gucuí ti yoo, naquiiñeʼ guʼyaʼ chuʼ base stini naguidxi. Zaqueca nga pa racaláʼdxinu gaca fe stinu nadipaʼ, naquiiñeʼ chuʼnu seguru guiene chaahuinu guiráʼ ni rusiidiʼ Biblia, ládecani nuu guendariuunisa. Nga runi, lu artículo riʼ zacábinu ca pregunta riʼ: ¿xi riníʼ chuʼnísanu?, ¿ximodo rácani ne xiñee? Ne ¿xiñee riuunisa tuuxa lu lá Dios, lu lá Xiiñiʼ ne lu lá espíritu santu?

XI RINÍʼ NE XIÑEE RISACA CHUʼNÍSANU

3. ¿Xi rusihuínninu ora riuʼnísanu?

³ Ora riuʼnísanu, rusihuínninu binni: 1) maʼ bizíʼdinu ni dxandíʼ de Jehová ne de Jesucristu, 2) maʼ guca arrepentirnu de ca pecadu stinu, 3) maʼ bichaʼnu modo nabáninu para guninu ni ná Jehová, 4) maʼ biene chaahuinu Jesús nga ni caquiiñeʼ Jehová para gulá laanu ne 5) maʼ gúdxinu Jehová lu ti oración zúninu ni ná ne zaqueca zúninu ni ná organización stibe. Ora maʼ bíninu promesa o maʼ bidiʼnu xquendanabáninu Jehová ne maʼ guyuʼnísanu, óraca nga ruzulú rizanu lu neza ni ziné lu guendanabani ni qué zaluxe.

4. ¿Xi riníʼ guiaaziʼ tuuxa ndaaniʼ nisa? (Laaca zanda gúʼyaluʼ imagen ca).

⁴ Ora riuʼnísanu, interu cuerpu stinu riaaziʼ ndaaniʼ nisaa ne despué ribeecabe laanu ndaaniʼ nisa, casi ñaca bigáʼchinu ne despué ñásanu de lade gueʼtuʼ (bichaaga ni né Colosenses 2:12). ¿Xiñee biaʼsi ejemplu riʼ yaʼ? Purtiʼ ora riáʼzinu ndaaniʼ nisa rusihuínnini maʼ bisaana de gúninu ca cosa ni cadi jneza bíninu dxiqué ne ra guireʼnu ndaaniʼ nisa rusihuínnini ni jma risaca lu xquendanabáninu nga gúninu ni ná Jehová.

5. ¿Xiñee zanda guchaaganu ni biʼniʼ Noé para gucuí arca que né ca cosa ni rúninu para chuʼnu listu ti ganda chuʼnísanu? (1 Pedro 3:18-21).

⁵ (Biindaʼ 1 Pedro 3:18-21). Ca cosa ni rúninu para chuʼnu listu ante chuʼnísanu, zanda guchaaganu cani né ni biʼniʼ Noé para gucuí arca que. Pa deruʼ cayunibiaʼluʼ Jehová, zándaca zuni sentirluʼ guizáʼ stale cosa nga ni naquiiñeʼ gúniluʼ para chuʼnísaluʼ ne nácani ti dxiiñaʼ nadipaʼ casi ñaca nucuiluʼ arca stiʼ Noé. Peru ¿ñee caquiiñeʼ gúniluʼ ni la? Caquiiñeʼ. Guiníʼ íquenu ni bizaaca Noé. Para ganda guilabe ora gaca Diluviu que, napa xidé chinándabe guiráʼ ni gudxi Dios laabe de modo gucuibe arca que. Ne lu Biblia riete «bíʼnibe ni casi peʼ modo gudxi Dios laabe» (Gén. 6:22). ¿Xiñee yaʼ? Purtiʼ gúpabe fe ne gucané Jehová laabe. Cásica Noé, laaca zanda gúniluʼ ni canabaʼ Dios lii para chuʼnísaluʼ.

6. Ora guníʼ Pedro «Bautismo ni culá laatu», ¿xii ndiʼ caniʼbe racá?

⁶ Lu versículo 21, bicaa apóstol Pedro: «Bautismo ni culá laatu». Né ca diidxaʼ riʼ cadi caníʼ diʼ Pedro guiáʼzisinu ndaaniʼ nisa maca bilanu. Ne laaca qué ruxhiádini ca pecadu stinu, purtiʼ ni ruxhiá pecadu stinu nga rini stiʼ Jesús (1 Juan 1:7). Nabé risaca chuʼnísanu purtiʼ canabaʼ Jehová ni laanu. Ne laaca riquiiñeʼ ni para «guinábanu Dios gudii laanu ti conciencia nayá». Ne riecheʼ Jehová ora guinábanu ni laa. Pur rini ni bixhii Jesús runi perdonarbe ca pecadu stinu ne zacá zanda guilanu, ni caninu raríʼ nga, gápanu guendanabani ni qué zaluxe. Ne laani nga ni guníʼ Pedro ora bizeeteʼ ca diidxaʼ «Bautismo ni culá laatu».

XIMODO RIUUNISA TUUXA

7. ¿Ximodo naquiiñeʼ chúʼnisa tuuxa?

⁷ ¿Ximodo naquiiñeʼ chúʼnisa tuuxa? Qué ruzeeteʼ diʼ Biblia stale cosa de laani, ni riniʼni nga naquiiñeʼ guiaaziʼ tobi ndaaniʼ nisa. Ca conseju ni zeeda lu Biblia racanécani ca ni chichuunisa gánnacaʼ xi lari gácucaʼ para ora chuʼnísacaʼ ne ganna ca ni cayuuyaʼ laacabe xi naquiiñeʼ gúnicaʼ (1 Cor. 14:40; 1 Tim. 2:9). Ti ancianu nga riguunisa, peru qué ruyúbinu gusisácanu ancianu ca (1 Cor. 1:14, 15). Risaca guendariuunisa ca neca huaxiéʼ o stale binni cayuuyaʼ ca ni chichuunisa (Hech. 8:36).

8. ¿Gunáʼ nga chupa pregunta ni rúnicabe ca ni chichuunisa, ne xiñee? (Hechos 2:38-42; laaca zanda gúʼyaluʼ imagen ca).

⁸ Biblia ná, ti xpinni Cristu napa xidé «gusiidiʼ binni ca diidxaʼ ni rulá», ni caninu raríʼ nga, gusíʼdinu ni runi crenu (Rom. 10:9, 10; laaca zanda gúʼyaluʼ nota de estudiu «declaras públicamente»). Ne ti modo jma jneza gúninu ni nga ora riuʼnísanu, casi maʼ bidúʼyanu, nácani ti cosa nabé risaca para ganda guilanu. Para gusihuinni ca ni chichuunisa ni runi crecaʼ ricábicaʼ chupa pregunta. Primé ca nga: «¿Ñee maʼ guca arrepentirluʼ de ca pecadu stiluʼ, maʼ guca dedicarluʼ Jehová ne maʼ biʼniʼ aceptarluʼ Jesucristu nga biquiiñeʼ Jehová para bilá laanu la?». Rusihuinni pregunta riʼ modo maʼ bichaa binni ca xquendanabani para chuʼ listu ti chúʼnisa ne ruluiʼni ca diidxaʼ ni gudxi Pedro ca binni que lu Pentecostés. Guiropa pregunta ca nga: «¿Ñee maʼ riéneluʼ ora chuʼnísaluʼ cusihuínniluʼ nezalú binni maʼ nácaluʼ testigu stiʼ Jehová ne dede yanna maʼ nácaluʼ parte de organización stiʼ Dios la?». Rusietenalaʼdxiʼ pregunta riʼ laanu para ganda guni cumplirnu voto ni maʼ bíninu Jehová, naquiiñeʼ chinándanu organización stibe ne gúninu ni nabe né ca hermanu stinu, cásica biʼniʼ ca xpinni Cristu de primé siglu que (biindaʼ Hechos 2:38-42). Ca ni guicabi «maʼ» guiropaʼ pregunta riʼ, maʼ nuuca listu para chuʼnísacaʼ.

9. ¿Xi caquiiñeʼ gúninu para chuulaʼdxiʼ Dios ni rúninu?

⁹ Dede ante guzulú guiziidiluʼ ni ná Biblia, zándaca nabániluʼ sin gúniluʼ xiixa cosa malu o xiixa pecadu grave. O zándaca bixhózeluʼ ne jñaaluʼ nácacaʼ xpinni Cristu ne gucanecaʼ lii gannaxhiiluʼ Jehová. ¿Ñee caquiiñeʼ gaca arrepentirluʼ ne chuʼnísaluʼ para chuulaʼdxiʼ Dios ni gúniluʼ la? Caquiiñeʼ pue. Cadi guiaandaʼ laanu guiranu gulenenu donda ni ruxheleʼ laanu de Dios (Sal. 51:5). Peru, ora bizulú binibiaʼnu Jehová, gudixhe íquenu gúninu ni ná ne cadi ni rábinu. Despué de nga, maʼ zanda gaca arrepentirnu de ca pecadu stinu, gusaana de gúninu ca cosa ni qué riuulaʼdxiʼ Dios ne quixhe íquenu gúninu ca cosa ni riuuláʼdxibe. Óraca maʼ zanda chuʼnísanu (Hech. 3:19).

10. ¿Xi caquiiñeʼ gúniluʼ neca maʼ guyuunísaluʼ ndaaniʼ sti religión?

¹⁰ Yanna, ¿pa guyuunísaluʼ ndaaniʼ sti religión yaʼ? Neca peʼ bíʼniluʼ ni, caquiiñeʼ chuʼnísaluʼ casi ti testigu stiʼ Jehová. ¿Xiñee yaʼ? Purtiʼ dxi bíʼniluʼ ni, caʼruʼ guiziidiʼ chaahuiluʼ guiráʼ ni dxandíʼ de Jehová ne de Jesús. Ne pa bíʼniluʼ ti oración para gudiiluʼ lii Dios ne guʼdxuʼ laabe zúniluʼ ni nabe la? dxi bíʼniluʼ ni caʼruʼ diʼ guiene chaahuiluʼ xi peʼ nga racaláʼdxibe gúniluʼ. Guidúʼyanu ni bizaaca lu primé siglu. Dxi yendá apóstol Pablo ndaaniʼ guidxi Éfeso biiyabe caadxi hombre raqué ni maʼ guyuunisa peru qué runibiaʼcaʼ ni bisiidiʼ Cristu, gucanebe laacaʼ guiénecaʼ caquiiñeʼ chuʼnísacaʼ sti biaje (Hech. 19:1-5).b Zaqueca nga laani ca dxi stinu riʼ, para chuʼnísanu ne gácani jneza nezalú Jehová la? caquiiñeʼ guiziidiʼ chaahuinu xi peʼ nga racalaʼdxiʼ Dios gúninu.

«LU LÁ BIXHOZEʼ, LU LÁ XIIÑIʼ NE LU LÁ ESPÍRITU SANTU»

11. ¿Xi riníʼ ca diidxaʼ chuʼnísanu «lu lá Bixhozeʼ, lu lá Xiiñiʼ ne lu lá espíritu santu»? (Mateo 28:18-20).

¹¹ Guníʼ Jesús ca ni nacubi gaca discípulo stibe caquiiñeʼ chuʼnísacaʼ «lu lá Bixhozeʼ, lu lá Xiiñiʼ ne lu lá espíritu santu» (biindaʼ Mateo 28:18-20). ¿Xii nga guniʼbe racá pue? Lu Stiidxaʼ Dios, ora raca traducir diidxaʼ «lu lá» o nombre stiʼ tuuxa, riquiiñeʼ ni para guiníʼcabe de modo naca tuuxa. Peru laaca riquiiñeʼ ca diidxaʼ ca para guiníʼcabe de puestu o autoridad ni napa binni ca. Nga runi pa chigúninu xiixa lu lá tuuxa o xiixa la? riníʼ nga maʼ nánnanu pabiáʼ autoridad napa binni ca (bichaaga ni né Mateo 10:41; biiyaʼ nota de estudiu «porque es profeta»). Yanna, guidúʼyanu ximodo zanda gúninu para gusihuínninu riénenu pabiáʼ risaca puestu o autoridad ni napa Bixhózenu ne Xiiñiʼ ne pabiáʼ risaca espíritu santu.

12. ¿Xi guiráʼ caquiiñeʼ guiénenu ora chuʼnísanu lu lá Bixhozeʼ? (Apocalipsis 4:11; laaca zanda gúʼyaluʼ imagen ca).

¹² Lu lá Bixhozeʼ. Riénenu Jehová nga Bixhózenu ni nuu guibáʼ, laabe nga bidiibe laanu guendanabani, laabe nga Dios ni jma napa poder ne laabe nga bizaʼbe guiráʼ ni nuu (biindaʼ Apocalipsis 4:11). Laaca nánnanu ne riénenu rucaadiágabe ca oración stinu, rininu de laabe nezalú guiráʼ binni ne riquíʼñenu labe né stale respetu ora runi orarnu ne ora rinínenu sti binni de laabe (Sal. 65:2). Peru caquiiñeʼ guiénenu sti cosa. Ca binni ni bicaadiaga discursu bidii Pedro lu Pentecostés que maʼ nánnacabe caadxi cosa de Jehová, peru caquiiñeʼ guiénecabe riquiiñebe Jesucristu para ganda gulabe binni (Rom. 5:8).

13. ¿Xi guiráʼ caquiiñeʼ guiénenu ora chuʼnísanu lu lá Xiiñiʼ Dios? (Laaca zanda gúʼyaluʼ imagen ca).

¹³ Lu lá Xiiñiʼ. Nánnanu ne riénenu Jesús nga tobi lucha Xiiñiʼ Dios ne laabe nga «neza», ni caninu nga, pur laasibe nga zanda gaca xhamígunu Jehová (Juan 14:6). Laaca riénenu laabe nga gudíxebe para gulabe laanu, purtiʼ gútibe para ganda guicaanu ti guendanabani ni qué ziuu dxi guiluxe. Yanna, cumu maʼ nánnanu nga nga bíʼnibe la? rucaa nga laanu chinándanu ejemplu stibe guiráʼ dxi biaʼ dxi nabáninu ne cadi dxi si guyuʼnísanu (1 Juan 2:6). Nga runi, cásica Jesús, runi predicarnu né gana ne qué rudiʼnu lugar chuʼ xiixa ni gucueeza laanu (Luc. 4:43). Ne dede nuudu dispuestu guni huantarnu ora sanándacabe laanu ne rúninu ni purtiʼ qué racaláʼdxinu guchéʼnenu Dios (2 Tim. 3:12). Ne laaca runi respetarnu puestu ni napa Jesús purtiʼ laa nga «xaíque stiʼ ca xpinni» ne pur nga né stale gana rinándanu ni gabi ca hombre ni maʼ gulibe para guni dirigir ne gapa ca xpínnibe (Efes. 4:8, 11, 12; 5:23).

14. a) ¿Xi guiráʼ caquiiñeʼ guiénenu ora chuʼnísanu lu lá espíritu santu? (Laaca zanda gúʼyaluʼ imagen ca). b) ¿Gunáʼ nga xcaadxi modo riuunisa ca ungidu? (Biiyaʼ cuadru ni láʼ «Xcaadxi modo riuunisa ca ungidu»).

¹⁴ Lu lá espíritu santu. Nánnanu ni dxandíʼ de espíritu santu ne runi crenu ni: cadi naca espíritu santu ti binni ne cadi nácani parte de ti trinidad, laani nga stipa stiʼ Dios ni runiné dxiiñaʼ. Nánnanu ne runi crenu espíritu santu nga gucané ca profeta ne ca hombre bicaa Biblia, nga runi ridúʼndanu ni guiráʼ dxi ne rúninu ni rusiidiʼ ni laanu lu guendanabani stinu (2 Ped. 1:20, 21). Ne laaca rúninu stipa para cadi gúninu xiixa pecadu grave, purtiʼ nánnanu pa gúninu nga la? maʼ qué zacaanu espíritu santu ne maʼ qué zúnini dxiiñaʼ stini ndaaniʼ congregación casi naquiiñeʼ gúnini (Efes. 4:30).

15. ¿Xi caquiiñeʼ gucaa ique cada tobi de laanu guni?

¹⁵ Pa maʼ guyuunísaluʼ, bicaa ique guiene chaahuiluʼ guiráʼ cosa «de guendariuunisa»c ne bicaa ique gúniluʼ ni gúdxiluʼ Jehová zúniluʼ dxi bidiiluʼ guendanabani stiluʼ laabe ne guyuunísaluʼ. Yanna, ¿pa caʼruʼ chuʼnísaluʼ yaʼ? ¿Ñee nuu xiixa ni cucueeza lii la? Lu sti artículo ca zaninu xi zanda gúniluʼ para cadi gusaana de guiniisiluʼ lu Stiidxaʼ Dios dede dxi chuʼnísaluʼ.