¿Ximodo zanda gudiʼnu xquixe peʼ Jehová pur bidii Xiiñiʼ pur laanu?

1, 2. Ora guiníʼ íquenu sacrificiu ni biʼniʼ Jesús pur laanu, ¿xi zucaani laanu gúninu, ne xiñee? (2 Corintios 5:14, 15; laaca zanda gúʼyaluʼ imagen ca).

GUNÍʼ ique guleecabe lii lade ca escombro stiʼ ti edificiu ni bixá. ¿Cadi dxandíʼ nudiiluʼ xquixe peʼ binni ni bilá lii ca la? Ne neca bilárube xcaadxi binni, peru lii qué zusaana de gudiiluʼ xquixe peʼ laabe, ne qué zusiaandaluʼ ni bíʼnibe pur lii.

² Casi bizíʼdinu lu artículo ni gudiʼdiʼ que, caquiiñeʼ chuʼ tu quixe pur laanu para ganda guilanu de lu náʼ pecadu ni bisaanané Adán ne Eva laanu. Ne nga nga ni biʼniʼ Jehová ora bidii Xiiñiʼ casi sacrificiu. Pur ni biaxa pur laanu ca, primé, zanda guni perdonar Jehová ca pecadu stinu. Guiropa, rudii Jehová laanu esperanza zedandá dxi zácanu binni sin donda. Ne guionna, racaneni guibiguetaʼ chuʼnu tobi si né Dios sti biaje. Ne pur laani zanda guibáninu sin qué chuʼ dxi gátinu lu guidxilayú cubi ni chigudii Jehová laanu. Ra bidii Jesús xquendanabani pur laanu bisihuínnibe nabé nadxiibe laanu, ti guendarannaxhii ni maca nápabe laanu ante gueedabe lu guidxilayú riʼ (Prov. 8:30, 31). Sicaríʼ bizeeteʼ apóstol Pablo de guendarannaxhii ca: «Runi obligar guendarannaxhii stiʼ Cristu laadu» (biindaʼ 2 Corintios 5:14, 15). ¿Xi riníʼ ca diidxaʼ riʼ yaʼ? Ora guiníʼ íquenu guendarannaxhii ni napa Jesús cada tobi de laanu, rucaani laanu gudiʼnu xquixe peʼ pur gudíxecabe pur laanu ne qué rusiáʼndanu ni bíʼnicabe pur laanu.

3. ¿Xiñee maʼ gadxé modo rusihuínninu rudiʼnu xquixe peʼ Jehová pur bidii Xiiñiʼ gati pur laanu?

³ ¿Ximodo zusihuínniluʼ rudiiluʼ xquixe peʼ Jehová pur bidii Xiiñiʼ gati pur lii? Cada tobi de laanu gadxé gadxé modo rusihuínninu ni. Guzéʼtenu ti ejemplu. Guníʼ ique chonna binni ni racalaʼdxiʼ guni viajar ti lugar, peru cada tobi de laacabe de gadxé gadxé guidxi laacabe. Nga runi, gadxé gadxé neza zacaacabe para chindácabe ra chécabe que. Zaqueca nga laanu, cada tobi gadxé gadxé modo zusihuinni rudii xquixe peʼ Jehová pur ni gudixe pur laanu. Nga runi, gucuá artículo riʼ para chonna grupu de binni, primé, para ca binni ni ridúʼndanenu Biblia, guiropa, para ca xpinni Cristu ni maʼ guyuunisa, ne guionna, para ca dendxuhuiiniʼ ni maʼ bixhele de Dios.

CA NI RIDÚʼNDANENU BIBLIA

4. ¿Ximodo nga ruuyaʼ Jehová ni nuu ndaaniʼ ladxidóʼ ca binni ni ridúʼndanenu Biblia?

⁴ ¿Ñee cayuundanécabe lii Biblia la? Pa zacá ni, nga rusihuinni racalaʼdxiʼ Jehová gaca xhamíguluʼ laa ne cayacanebe lii guidxíñaluʼ gaxha de laabe (Juan 6:44; Hech. 13:48). Biblia ná «Jehová nga ruuyaʼ ni nuu ndaaniʼ ladxidoʼno». Ndiʼ riníʼ nánnabe ne rudiibe cuenta guiráʼ stipa ni rúniluʼ para guiziidiluʼ de laabe. Ne guizáʼ riéchebe ora gúʼyabe cayúniluʼ stipa guibániluʼ casi ná ca ley stibe (Prov. 17:3; 27:11). Pur ni biaxa pur laanu zanda gaca xhamigu Jehová lii (Rom. 5:10, 11). ¡Qué chuʼ dxi guiaandaʼ nga lii!

5. ¿Ximodo zanda chinanda ca ni ridúʼndanenu Biblia conseju ni zeeda lu Filipenses 3:16?

⁵ ¿Ximodo rusihuínniluʼ rudiiluʼ xquixe peʼ Jehová pur ni biaxa pur laanu yaʼ? Ti modo zanda gúniluʼ ni nga ra chinándaluʼ conseju ni bidii apóstol Pablo ca xpinni Cristu de Filipos, sicaríʼ guniʼbe: «Nga runi, dede biaʼ ra biʼniʼ progresarnu, cadi gusaana de gúninu ni» (Filip. 3:16). Nga runi, cadi gusaana de guiziidiluʼ de lu Stiidxaʼ Dios cásica maca cayúniluʼ ni; cadi gudiiluʼ lugar chuʼ tu gucueeza lii de saluʼ lu neza ni ziné lii lu guendanabani ni qué zaluxe (Mat. 7:14; Luc. 9:62).

6. ¿Xi zanda guni ca binni ridúʼndanenu Biblia pa raca nagana para laacaʼ chinándacaʼ xiixa cosa nacubi ni caziidicaʼ? (Deuteronomio 30:11-14; laaca zanda gúʼyaluʼ imagen ca).

⁶ ¿Ñee raca nagana para lii chinándaluʼ xiixa ni nacubi biziidiluʼ de lu Biblia la? Pa zacá ni la? galán guni investigarluʼ de laani ne guinábaluʼ Jehová gacané lii guiene chaahuiluʼ ni (Sal. 86:11). Peru pa maʼ bíʼniluʼ ni bizéʼtenu riʼ, ne raca nagana para lii chinándaluʼ ni caziidiluʼ la? cadi chuʼluʼ xizaa, zanda guiníʼ íqueluʼ de laani despué, peru cadi gusaana de guiziidiluʼ de lu Biblia. Yanna, ¿pa raca nagana para lii gusaana de gúniluʼ xiixa ni qué riuulaʼdxiʼ Jehová yaʼ? Galán cadi guiaandaʼ lii nanna Jehová nácanu binni ruchee ne qué zanábabe laanu xiixa ni qué zanda gúninu. Zanda chinándaluʼ ca ley stibe (biindaʼ Deuteronomio 30:11-14). Ne laabe caniʼbe zacanebe lii (Is. 41:10, 13; 1 Cor. 10:13). Nga runi, cadi guireʼnu gana. Lugar de guiníʼ íqueluʼ ca cosa ni cayaca nagana para lii gúniluʼ, ni jma galán nga gúʼyaluʼ guiráʼ cosa sicarú ni maʼ biʼniʼ Jehová pur lii, ne lade cani nuu gudíxebe para gulabe lii. Ne ra tidiʼ tiempu zaroobaʼ guendarannaxhii ni nápaluʼ Jehová, ne zuuyaluʼ «cadi nagana ca mandamientu» stibe (1 Juan 5:3).a

7. Ca joven ni naca bixhoze ne jñaa Testigu, ¿xi zanda quixhe íquecaʼ gúnicaʼ?

⁷ ¿Ñee naca bixhózeluʼ ne jñaaluʼ Testigu ne cusiidicabe lii ni ná Jehová la? Pa zacá ni, laaca nácaluʼ ti binni ni ruundaʼ Biblia. Xiiñicabe nga zeeda gaca binni ni ruundanécabe Biblia ni jma risaca. Pa joven lii, cadi guiaandaʼ lii sicaríʼ ná Biblia: «Laguidxiña ra nuu Dios ne laa zadxiña laatu» (Sant. 4:8; 1 Crón. 28:9). Pa quixhe íqueluʼ guidxíñaluʼ Jehová la? zadxíñabe lii. Racalaʼdxiʼ Jehová gaca xhamigu lii, ne cadi purtiʼ si naca bixhózeluʼ ne jñaaluʼ Testigu. ¿Xi racané laanu guidxíñanu gaxha de Dios ne gueeda gácabe xhamígunu yaʼ? Laani nga ni biaxa pur laanu, ne cadi naquiiñeʼ gusiáʼndanu ni (Rom. 5:1, 2). Joven, guníʼ ique pabiáʼ risaca guendaguti stiʼ Jesús para lii ante cheluʼ Conmemoración. Ra guiníʼ íqueluʼ de laani zucaani lii quixhe íqueluʼ gápaluʼ xiixa meta ndaaniʼ xquidxi Jehová ne zucaani lii gúniluʼ stipa ugaandaluʼ ni. Zacá zusihuínniluʼ guizáʼ rudiiluʼ xquixe peʼ Jehová purtiʼ bidii Xiiñiʼ para gulá lii.b

CA XPINNI CRISTU NI MAʼ GUYUUNISA

8. ¿Ximodo maʼ bisihuinni ca ni maʼ guyuunisa nápacaʼ fe pur ni biaxa pur laacaʼ?

⁸ Pa maʼ guyuunísaluʼ, maʼ bisihuínniluʼ de gadxé gadxé modo nápaluʼ fe lu ni biaxa pur lii. Guzéʼtenu caadxi ejemplu. Bidxíñaluʼ Jehová ne bíʼniluʼ ni ná ca ley stiʼ. Zinándaluʼ mandatu ni guníʼ Jesús de gaca predicar ne gúninu discípulo. Maʼ bidiiluʼ xquendanabániluʼ Jehová ne maʼ guyuunísaluʼ. Ne laaca zándaca maʼ bidxaagaluluʼ guendanagana pur cayúniluʼ ni ná Jehová (2 Tim. 3:12). Pur maʼ biʼniʼ huantarluʼ ne pur fe stiluʼ, maʼ bisihuínniluʼ nadxiiluʼ Jehová ne rudiiluʼ xquixe peʼ laa pur gudixe pur lii (Heb. 12:2, 3).

9. Laanu, ca ni maʼ guyuʼnísanu, ¿xiñee naquiiñeʼ chuʼnu cuidadu?

⁹ Yanna, laanu, ca ni maʼ guyuʼnísanu, naquiiñeʼ gápanu cuidadu. ¿Xiñee yaʼ? Purtiʼ zándaca ra tidiʼ tiempu guzulú gusiáʼndanu pabiáʼ risaca ni biʼniʼ Jehová ne Jesús pur laanu. Guiníʼ íquenu ni bizaaca ca xpinni Cristu de guidxi Éfeso, neca biʼniʼ felicitar Jesús laacabe pur biʼniʼ huantárcabe, sicaríʼ gúdxibe congregación que: «Napaʼ xiixa contra lii: maʼ bisaanaluʼ guendarannaxhii ni gúpaluʼ dxi bizululuʼ» (Apoc. 2:3, 4). Rusihuinni ca diidxaʼ ni guni Jesús riʼ, ti xpinni Cristu la? zanda guni ni ná Jehová purtiʼ si maʼ biaa guni ni. Zanda guni orarbe, chebe reunión ne guni predicarbe, peru rúnibe cani purtiʼ si maʼ biaabe gúnibe cani, ne cadi pur guendarannaxhii. Yanna, ¿xi zanda gúninu pa runi sentirnu maʼ huaxiéʼ nadxiinu Jehová yaʼ?

10. ¿Ximodo zanda chinándanu conseju ni zeeda lu 1 Timoteo 4:13, 15?

¹⁰ Gudxi apóstol Pablo Timoteo guiníʼ ique modo cayuni xhiiñaʼ Jehová ne guni ni né stale gana (biindaʼ 1 Timoteo 4:13, 15). ¿Ximodo zanda chinándanu conseju riʼ yaʼ? Ra guyúbinu guni adorarnu Jehová né guendanayecheʼ ne cadi guireʼnu gana (Rom. 12:11; biiyaʼ nota de estudiu «Que el espíritu los llene de fervor»). Guzéʼtenu ti ejemplu. Ora chuunu reunión zanda quixhe íquenu gucaadiaga chaahuinu guiráʼ ni guiete lúcani ne galán quixhe íquenu gaca prepararnu para laacani. Quixhe íquenu guyúbinu ti lugar ra ganda gúninu estudiu personal stinu sin chuʼ xiixa o tuuxa ni guchiiñaʼ laanu ne ganda guiníʼ íquenu ni cayuni estudiarnu. Cásica caquiiñeʼ cuʼnu yaga lu ti bele para cadi guizuíʼ, zaqueca nga naquiiñeʼ gúninu ne ca ni bizéʼtenu riʼ para gusihuínninu nabé rudiʼnu xquixe peʼ Jehová pur ni gudixe pur laanu ne pur guiráʼ ni huayuni pur laanu. Ne ca semana ante ganda Conmemoración zanda guiníʼ íquenu ca cosa galán ni nápanu pur nácanu testigu stiʼ Jehová. Nga zacané laanu gusisácanu jma ni biaxa pur laanu ne pur laani zanda gaca xhamígunu Jehová.

11, 12. Pa chuʼ biaje guni sentirnu careʼnu gana o maʼ huaxiéʼ cayúninu xhiiñaʼ Jehová, ¿ñee caníʼ nga maʼ cadi cudii Jehová laanu espíritu santu stiʼ la? (Laaca zanda gúʼyaluʼ imagen ca).

¹¹ Pa chuʼ biaje guni sentirnu careʼnu gana o maʼ huaxiéʼ cayúninu xhiiñaʼ Jehová, cadi guiníʼ íquenu cadi cudii Jehová laanu espíritu santu stiʼ. Cadi guiaandaʼ lii ca diidxaʼ ni bicaa apóstol Pablo ra nuu ca xpinni Cristu de Corinto ora caníʼ modo runi xhiiñaʼ Jehová: «Pa guneʼ ni neca qué gapaʼ gana la? laaca si naquiiñeʼ guneʼ ni purtiʼ laani nga responsabilidad stinneʼ» (1 Cor. 9:17). ¿Xi gucalaʼdxiʼ Pablo niníʼ raríʼ yaʼ?

¹² Casi ridúʼyanu, guyuu biaje qué gapa Pablo gana guni predicar. Peru neca cayuni sentirbe zaqué, riguixhe íquebe cadi gusaana de guni predicarbe. Laaca galán gúninu cásica bíʼnibe ca. Quixhe íquenu gúninu ni jneza neca chuʼ biaje huaxiéʼ gana nápanu. Guinábanu Jehová gudii laanu deseu ne poder para gúninu guiráʼ ni riuuláʼdxibe (Filip. 2:13). Cadi gusaana de gúninu ca cosa ni ruchiña laanu gaxha de Jehová. Zanda chuʼnu seguru pa gúninu cani zacanécani laanu guibiguetaʼ gannaxhiinu Jehová sti biaje ne gúninu xhiiñaʼ né stale gana.

13. ¿Ximodo zanda gúʼyanu pa zuhuaʼnu dxiichiʼ lu fe stinu?

¹³ Lu 2 Corintios 13:5 ná: «Siempre laguuyaʼ ximodo nuutu para gánnatu pa zuhuaatu dxiichiʼ lu fe stitu. Siempre laguuyaʼ tu clase binni nácatu». Para ganda chinándanu conseju riʼ, galán guiníʼ íquenu ca pregunta riʼ: «¿Ñee rusihuinneʼ Reinu stiʼ Dios nga ni jma risaca lu xquendanabaneʼ la? Pur ca cosa ni runeʼ para chuaaʼ nayecheʼ ti ratu, ¿ñee rusihuinneʼ nanaladxeʼ ca cosa malu la? ¿Ñee ruyubeʼ chuʼ paz lade ca hermanu ne chuʼcaʼ tobi si la?» (Sal. 97:10; Mat. 6:33; Efes. 4:2, 3). Galán guiníʼ íquenu ca pregunta riʼ tiempu riaba Conmemoración. Ora guiníʼ íquenu ni biʼniʼ Jehová ne Jesús pur laanu, rucaani laanu gudiʼnu xquixe peʼ laacabe ne rusietenalaʼdxiʼ ni laanu maʼ cadi nabáninu para laanu, sínuque para Cristu Jesús.c

CA DENDXUHUIINIʼ NI MAʼ BIXELEʼ DE DIOS

14. ¿Xiñee maʼ bixeleʼ caadxi xpinni Cristu de congregación?

¹⁴ Caadxi xpinni Cristu bixélecaʼ de congregación despué de bíʼnicaʼ ni ná Jehová chupa chonna beeu o pur stale iza. ¿Xiñee yaʼ? Zándaca purtiʼ nabé guyuucabe xizaa pur ca cosa ni caquiiñecabe (Luc. 21:34). Xcaadxi zándaca bixélecaʼ pur xiixa ni biʼniʼ o guníʼ ti hermanu (Sant. 3:2). Ne zándaca xcaadxi bíʼnicaʼ ti pecadu grave ne qué nacaʼ guinábacaʼ gacanécabe laacaʼ. Pa lii nga tobi de ca dendxuhuiiniʼ ni maʼ bixhele de Dios, ¿xi zanda gúniluʼ para guibiguétaluʼ ra nuu Jehová yaʼ? Pur ni biaxa pur laanu, ¿xi zucaani lii gúniluʼ yaʼ?

15. ¿Ximodo ruuyaʼ Jehová ca xpinni Cristu ni maʼ bixeleʼ de laa? (Ezequiel 34:11, 12, 16).

¹⁵ Guiníʼ íquenu modo ruuyaʼ Jehová ca xpinni ni maʼ bixeleʼ de laa. Caʼruʼ diʼ gusiaandabe laacaʼ, ruuyabe laacaʼ casi dendxuhuiiniʼ ni cananiti ne cuyúbibe laacaʼ. Rudiibe laacaʼ guendaró ne racanebe laacaʼ guibiguétacaʼ ra nuube (biindaʼ Ezequiel 34:11, 12, 16). ¿Ñee laaca cayuni Jehová nga pur lii la? ¡Laaca pue! Ra cayuundaluʼ artículo riʼ cusihuínniluʼ caʼruʼ gusaana de gannaxhiiluʼ Jehová. Cadi guiaandaʼ lii, biiyaʼ Jehová xiixa galán ndaaniʼ ladxidoʼloʼ ne pur nga bichíñabe lii ra nuube. Ne caʼruʼ gusaana Jehová de guʼyaʼ ca cosa galán ni nuu ndaaniʼ ladxidoʼloʼ, nga runi racaláʼdxibe guibiguétaluʼ ndaaniʼ familia stibe.

16. ¿Xi zanda gacané ca dendxuhuiiniʼ ni maʼ bixeleʼ de xquidxi Dios guibiguétacaʼ ra nuu Jehová? (Laaca zanda gúʼyaluʼ imagen ca).

¹⁶ Lu folletu ni láʼ Cabeza Jiobá guibiguétaluʼ zeeda caadxi diidxaʼ ni caguu gana lii para guibiguétaluʼ, nani: «Zuluíʼ Jiobá lii neza guibiguétaluʼ ra nuu. Laabe zacanebe lii gudxiiluluʼ cani riguu xizaa lii, guni sentirluʼ galán neca bininácabe ladxidoʼloʼ ne cadi guchiiñaʼ xquendabiaaniluʼ lii. Ora maʼ gucané Jiobá lii la? ziuuláʼdxiluʼ gúniluʼ ni nabe stiʼ biaje né ca binni ridagulisaa». Cadi guiaandaʼ lii racalaʼdxiʼ ca ancianu gacanecaʼ lii. «Cada tobi de laacabe zaca casi ti lugar ra rilá tuuxa ora cundubi bi, ti lugar ra rilá tuuxa ora guizáʼ reciu cayaba nisaguié» (Is. 32:2). ¿Xiñee qué guiníʼ íqueluʼ xi zanda gúniluʼ para guni chaahuiluʼ ca cosa ca né Jehová yaʼ? (Is. 1:18; 1 Ped. 2:25). ¿Ñee zanda cheluʼ ca reunión ni raca ra Yoo stiʼ Reinu la? ¿Ñee zanda guiníʼneluʼ tobi de ca ancianu ne gábiluʼ laa racaláʼdxiluʼ guibiguétaluʼ ra nuu Jehová la? Zándaca laabe guyúbibe tuuxa para gudii lii estudiu ti tiempu si. Zanda chuʼluʼ seguru zaguu Jehová ndaayaʼ guiráʼ stipa ni gúniluʼ para gusihuínniluʼ rudiiluʼ xquixe peʼ pur ni biaxa pur laanu.

¿XI ZÚNILUʼ?

17, 18. ¿Xi zanda gúninu ca dxi ante guedandá dxi guietenaláʼdxinu guendaguti stiʼ Jesús?

¹⁷ Guníʼ Jesús bidii Dios «tobi lucha Xiiñiʼ, ti guiráʼ tu gapa fe Xiiñibe cadi guinitilú, sínuque guicaa guendanabani ni qué zaluxe» (Juan 3:16). Ni biaxa pur laanu nga ni riquiiñeʼ Jehová para gulá laanu de lu ná pecadu ne guendaguti. Qué chuʼ dxi gusiáʼndanu ni (Rom. 3:23, 24; 2 Cor. 6:1). Ca dxi ante guedandá dxi guietenaláʼdxinu guendaguti stiʼ Jesús, zanda guiníʼ íquenu guendarannaxhii ni bisihuinni Jehová ne Jesús cada tobi de laanu, ne guendarannaxhii ca nga ni gucaa cada tobi de laanu gusihuínninu rudiʼnu xquixe peʼ laacabe.

¹⁸ ¿Ximodo zusihuínniluʼ rudiiluʼ xquixe peʼ Jehová pur ni biaxa pur laanu yaʼ? Cada tobi de laanu, gadxé gadxé modo rudii xquixe peʼ Jehová. Peru gunna dxichi zaguu Jehová ndaayaʼ guiráʼ stipa ni gúniluʼ ne zaqueca zaguube ndaayaʼ stipa ni cayuni ca xpínnibe ni nuu lu guidubi naca guidxilayú, purtiʼ maʼ cadi nabáninu para laanu, sínuque nabáninu para ni gutiʼ ne ni bibani pur laanu (2 Cor. 5:15).