Ora gusiiditu Stiidxaʼ Dios laguiníʼ diidxaʼ ni guiaba binni

1. ¿Xi naquiiñeʼ gúninu pa racaláʼdxinu chuʼnu ndaaniʼ familia stiʼ Jehová?

ORA primé biaje guinínenu tuuxa hermanu o hermana, zándaca guinabadiidxanu laabe, ¿ximodo biziidibe de Jehová? Ne rúninu ni purtiʼ ni dxandíʼ zeeda lu Biblia nabé risácani para cada tobi de laanu, ne nabáninu casi nani. ¿Xiñee yaʼ? Purtiʼ nánnanu zanda gácanu familia stiʼ Jehová pa gusihuínninu nadxiinu ni dxandíʼ ne nabáninu casi nani, ne zusihuínninu zacá ni lu guiráʼ ni gúninu ne ni guininu (Sal. 15:1-3).a

2. a) ¿Ximodo binibiáʼcabe Jesús? b) ¿Ximodo biiyaʼ binni ni dxandíʼ bisiidiʼ Jesús?

² Siempre guníʼ Jesús ni dxandíʼ. Dede né ca enemigu stibe guniʼcaʼ siempre riniʼbe ni dxandíʼ neca xcaadxi binni qué riuuláʼdxicaʼ ni riniʼbe (Mat. 22:16). Gudxi Jesús ca xpinni ximodo zuuyaʼ binni ni cusiidiʼ, sicaríʼ guniʼbe: «Purtiʼ zedanduaaʼ división. Zucaalú hombre bixhoze, ne zucaalú ti baʼdudxaapaʼ jñaa ne zucaalú ti gunaa suegra» (Mat. 10:35). Qué ñacalaʼdxiʼ diʼ Jesús nucaanáʼ binni ni cusiidiʼ ne ni rusiidiʼ ca discípulo stiʼ, peru nánnabe zaqué zácani (Mat. 23:37). Neca rusiidibe ni dxandíʼ, peru nánnabe ni cusiidibe que zaguuni división, ziuu chupa grupu: ca ni nadxii ni dxandíʼ ni zeeda lu Biblia ne ca ni coʼ (2 Tes. 2:9-11).

3. ¿Xi zazíʼdinu lu artículo riʼ?

³ Cásica Jesús, rúninu stipa pur guininu ni dxandíʼ, ne guni predicarnu ne gusíʼdinu ni zeeda lu Biblia dede né ora qué chuulaʼdxiʼ binni ni gábinu laa. ¿Ñee riníʼ nga cadi naquiiñeʼ gúʼyanu modo ne pora guininu la? Coʼ, cadi nga diʼ nga nuunu guininu. Lu artículo riʼ zadúʼyanu xiñee, ximodo ne pora naquiiñeʼ guininu ni dxandíʼ ne gusíʼdinu ni dxandíʼ. Ra gánnanu ni zacaneni laanu gusíʼdinu jma jneza ne gúninu ni né diidxaʼ ni guiaba binni.

PARAA GUIDXÉLANU NI DXANDÍʼ

4. ¿Xiñee rininu de Jehová nga zeeda ni dxandíʼ?

⁴ De Jehová nga zeeda ni dxandíʼ. Guiráʼ ni riniʼbe dxandíʼ ni, casi ora riniʼbe gunáʼ nga ni jneza ne gunáʼ nga ni cadi jneza (Sal. 19:9; 119:142, 151). Ora riniʼbe xi chiguizaaca despué siempre raca cumplir ni (Is. 55:10, 11). Qué rusaana de gúnibe ni maʼ biʼniʼ prometerbe (Núm. 23:19). Ne qué ziuu dxi gusiguiibe (Heb. 6:18). Nga runi Biblia ruzeeteʼ nácabe «Dios ni riníʼ ni dxandíʼ» (Sal. 31:5).

5. ¿Xiñee cadi nagana gunibiaʼnu «Dios ni riníʼ ni dxandíʼ»? (Hechos 17:27).

⁵ Nuu binni riníʼ nagana nga gunibiaʼcaʼ Jehová, «Dios ni riníʼ ni dxandíʼ». Peru cadi zacádini. Ne ridúʼyanu nuu prueba ni rusihuinni dxandíʼ nuube ne ximodo laabe (Rom. 1:20). Dxi nuu apóstol Pablo ndaaniʼ guidxi Atenas ne guniʼné ti grupu de griegu ni nabé runi estudiar, gúdxibe laacaʼ racalaʼdxiʼ Dios gunibiaʼnu laa ne «cadi zitu diʼ nuube de cada tobi de laanu» (biindaʼ Hechos 17:27). Ruchiña Jehová ca binni ni naca humilde ra nuu, ca ni cuyubi gánnacaʼ ni dxandíʼ (Juan 6:44).

6. ¿Gunáʼ nga caadxi cosa ni maʼ nánnanu ni rusiidiʼ Biblia, ne xiñee naquiiñeʼ gudiʼnu xquixe peʼ pur laacani?

⁶ Ti modo gunibiaʼnu Jehová nga ra guni estudiarnu Biblia. Ca hombre ni bicaa Biblia bicaacaʼ ni pur espíritu santu (2 Ped. 1:20, 21). Dxandíʼ guiráʼ ni zeeda luni ne zanda gápanu confianza cani. Guzéʼtenu ti ejemplu, zanda guni crenu ni riniʼni de modo guyáʼ guibáʼ ne guidxilayú ne modo guyuu guendanabani lu guidxilayú riʼ (Gén. 1:1, 26). Ne laaca zanda chuʼnu seguru dxandíʼ ni riniʼni ora ruzeeteni xi pur nuu guendaruchee, xiñee racananu ne xiñee rátinu (Rom. 5:12; 6:23). Ne laaca zanda chuʼnu seguru, casi ná Biblia, zaquiiñeʼ Jehová Xiiñiʼ para guni chaahuiʼ guiráʼ ra maʼ bininá Binidxabaʼ, «bixhoze guiráʼ ni rusiguii» (Juan 8:44; Rom. 16:20). Ne laaca zanda guni crenu zuni Jesús guiráʼ ni maʼ guníʼ, zunduuxe ca binni malu, zandísabe ca ni maʼ guti, zúnibe guidxilayú riʼ ti paraísu ne zacanebe laanu gácanu binni sin donda (Juan 11:25, 26; 1 Juan 3:8). Maʼ bisiidiʼ Jehová laanu ni dxandíʼ ne caquiiñebe laanu para gusíʼdinu ni xcaadxi binni (Mat. 28:19, 20). ¡Guizáʼ naroʼbaʼ ndaayaʼ ca, ¿njaʼ?!

XIÑEE RININU NI DXANDÍʼ NE RUSÍʼDINU NI DXANDÍʼ

7, 8. ¿Xi rucaa laanu guininu ni dxandíʼ? Bizeeteʼ ti ejemplu (Marcos 3:11, 12; laaca zanda gúʼyaluʼ ca imagen ca).

⁷ Casi maʼ bidúʼyanu, naquiiñeʼ gácanu binni ni runi ni jneza ne ni riníʼ ni dxandíʼ pa racaláʼdxinu chuʼnu ndaaniʼ familia stiʼ Jehová. Peru para chuulaʼdxiʼ Dios ni gúninu la? cadi caquiiñeʼ si guininu ni dxandíʼ. Laaca risaca para laabe xiñee cayúninu ni. Guiníʼ íquenu xiixa ni bizaaca tiempu biʼniʼ Jesús xhiiñaʼ Dios lu guidxilayú riʼ (biindaʼ Marcos 3:11, 12). Laga cayuni predicarbe gaxha de nisadóʼ stiʼ Galilea, bidxiña stale binni ra nuube. Lade ca binni que nuu binni ni nuu demonio luguiacaʼ ne biábacaʼ xañeebe ne bicaacaʼ ridxi: «¡Lii nga Xiiñiʼ Dios!». ¿Xiñee guníʼ ca demonio ti cosa ni dxandíʼ de Jesús yaʼ? Zándaca ni racaláʼdxicabe nga guni cré ca binni ni nuu raqué laacabe ne chaahuiʼ chaahuiʼ guixélecaʼ de Jehová. Neca guníʼcabe ni dxandíʼ, bíʼnicabe ni purtiʼ racaláʼdxicabe cueendúcabe xiixa. Peru qué nusiguiicabe Jesús. Nin ti guisihuiiniʼ qué ñuulaʼdxiʼ ni bíʼnicabe ne gudxi laacabe cadi gábicaʼ guirutiʼ tu laabe.

⁸ ¿Xi rusiidiʼ relatu riʼ laanu? Rusiidini laanu risaca para Jehová xii ndiʼ rucaa laanu guininu ni dxandíʼ. Nga runi, naquiiñeʼ gusíʼdinu ni dxandíʼ purtiʼ nadxiinu Jehová ne naquiiñeʼ gusisácanu Jehová ora chuʼ tuuxa gusisaca dxiiñaʼ ni rúninu o gudii xquixe peʼ laanu pur ni rusíʼdinu (Mat. 5:16; bichaaga ni né Hechos 14:12-15).

9. ¿Xi cadi naquiiñeʼ gúninu, ne xiñee?

⁹ Guiníʼ íquenu ni zándaca guizaaca pa chuʼ ora chuuláʼdxinu gusisaca xcaadxi binni laanu. Guiníʼ íquenu málasi gudxi ti ancianu laanu xiixa confidencial ne despué rábinu ni xcaadxi binni. Pa gudii ca binni ca cuenta dxandíʼ ni gúdxinu laacaʼ, zándaca dede zadxagayaacaʼ ne zaníʼ íquecaʼ nánnanu stale cosa confidencia. Zándaca gusisácabe laanu pur nga, peru qué riuulaʼdxiʼ diʼ Jehová gácanu zacá (Prov. 11:13). ¿Xiñee yaʼ? Neca ni guininu que dxandíʼ ni, peru qué gápanu derechu guzéʼtenu de laani nezalú xcaadxi binni ne cadi jneza ni cucaa laanu guininu ni dxandíʼ.

XIMODO GUININU NI DXANDÍʼ NE GUSÍʼDINU NI DXANDÍʼ

10. ¿Ximodo nga guininu «diidxaʼ ni guiaba binni» casi ruzeeteʼ Colosenses 4:6?

¹⁰ (Biindaʼ Colosenses 4:6). Bisietenalaʼdxiʼ apóstol Pablo ca xpinni Cristu de Colosas naquiiñeʼ guiniʼcaʼ «diidxaʼ ni guiaba binni». Diidxaʼ griegu ni biquiiñebe raríʼ rusihuínnini caquiiñeʼ gacanenu xcaadxi né ni guininu, gácanu nachaʼhuiʼ ne guininu diidxaʼ ni chuulaʼdxiʼ binni.

11, 12. ¿Xiñee naquiiñeʼ guyúbinu modo guinínenu binni ora gusíʼdinu laa ni dxandíʼ zeeda lu Biblia? Bizeeteʼ ti ejemplu (laaca zanda gúʼyaluʼ ca imagen ca).

¹¹ Nabé risaca nga chinándanu conseju ni bidii Pablo ra iquíʼñenu diidxaʼ ni guiaba binni ora gusíʼdinu laacaʼ ni zeeda lu Biblia. Lu Hebreos 4:12 riete naca Stiidxaʼ Dios casi ti espada naduxhuʼ ne ruxhéleni alma de espíritu, ni caninu raríʼ nga rusihuínnini xi peʼ runi sentir ti binni ne xi rucaa laa guni xiixa. Peru pa qué iquíʼñenu Stiidxaʼ Dios jneza zándaca guninanu tuuxa pur ni gábinu laa o guzulú tinde diidxanenu laa. Guzéʼtenu ti ejemplu.

¹² Guiníʼ íquenu ora cayuni predicarnu bidxélanu ti binni ni racalaʼdxiʼ guiziidiʼ de lu Biblia ne riquiiñebe bidóʼ para guni adorarbe Dios ne riuuláʼdxibe gúnibe Navidad ne Nabaana. Zándaca quixhe íquenu guluinu laabe ni rusiidiʼ Biblia ra ná cadi naquiiñeʼ guni orarnu xiixa ni bizáʼ hombre ne zeeda gaca Navidad ne Nabaana saa ni qué riuulaʼdxiʼ Dios (Is. 44:14-20; 2 Cor. 6:14-17). Pa gúninu ni bizéʼtenu riʼ primé biaje chigánnanu binni la? caninu ni dxandíʼ peru cadi caquíʼñenu Stiidxaʼ Dios jneza.

13. ¿Ximodo nga casi ñaca nusábanu zidi lu ca diidxaʼ ni rininu?

¹³ Guníʼ Pablo «cásica riaba zidi lu guendaró para gaca nanixe» zacaca nga gúninu né ca diidxaʼ gábinu binni. Ndiʼ qué riníʼ diʼ naquiiñeʼ guchanu ni dxandíʼ o gucáʼchinu ni. Ni nani nga guyúbinu ti modo chuulaʼdxiʼ binni guiziidiʼ ni dxandíʼ, cásixa ñaca nudiʼnu laabe ñobe ti guendaró nanixe (Job 12:11). Peru zanda gácani nagana. Cásica ti guendaró stale tu laa rusaba zidi ni biaʼ riuulaʼdxiʼ, zaqueca nga zeeda gaca ora rusíʼdinu ti binni ni ná Stiidxaʼ Dios, zándaca cadi guiráʼ diʼ ziuulaʼdxiʼ modo gúninu ni. Guzéʼtenu ti ejemplu, ndaaniʼ caadxi guidxi gastiʼ naca gábicabe tuuxa ni riníʼ íquecabe dede né ora guiniʼnécabe ti binni ni maʼ huaniisi. Peru ndaaniʼ xcaadxi guidxi la? cadi galán diʼ rihuínnini o qué rusihuínnini respetu. Sicaríʼ guníʼ Pablo: «Ti gánnatu ximodo guicábitu cada binni». Nga runi naquiiñeʼ cuʼnu zidi ca diidxaʼ guininu cadi biaʼ riuuláʼdxinu, sínuque biaʼ riuulaʼdxiʼ binni ni caninenu ca.

PORA NGA GUININU NI DXANDÍʼ NE GUSÍʼDINU NI DXANDÍʼ

14. Dxi guyuu Jesús lu guidxilayú riʼ, ¿ñee bisiidibe guirá ni nánnabe ca discípulo stibe la?

¹⁴ Guizáʼ galán modo guniné Jesús ca discípulo stiʼ ne bisiidibe laacaʼ stale cosa né stale cariñu (Mar. 6:34). Neca nuu stale cosa ni naquiiñeʼ guiziidicaʼ, peru qué nicá diʼ Jesús tema nusiidiʼ laacabe guiráʼ ni nanna. Gúcabe nachaʼhui né laacaʼ, gúnnabe nuu cosa ni qué zanda gúnicaʼ o nuu cosa ni qué zanda gánnacaʼ. Nánnabe cadi óraque diʼ nga naquiiñeʼ guiziidicaʼ guiráʼ ni ná Stiidxaʼ Dios. Dede gúdxibe laacaʼ, «qué zanda guiénetu ni yanna» (Juan 16:12). ¿Xi rusiidiʼ ni laanu yaʼ?

15. ¿Ñee caquiiñeʼ gusíʼdinu ca estudiante stinu guiráʼ ni nánnanu tobi si tiru la? (Proverbios 25:11; laaca zanda gúʼyaluʼ imagen ca).

¹⁵ Rusiidiʼ ejemplu stiʼ Jesús laanu, neca nánnanu ni dxandíʼ la? qué riníʼ diʼ nga naquiiñeʼ gusíʼdinu guiráʼ ni nánnanu tobi si tiru. Ni jma galán gúninu nga gácanu nachaʼhui cásica Jesús. Guiníʼ íquenu xa hombre ni riuulaʼdxiʼ guni Navidad ne Nabaana que, nánnanu paraa biasastí ca saa ca ne qué riuulaʼdxiʼ Jehová cani, peru guiníʼ íquenu guzulú gudiʼnu estudiu laabe, chupa semana o ti semana ante gúnicabe saa stiʼ Navidad. ¿Ñee caninu diidxaʼ ni guiaba binni ne cusábanu zidi lu ni dxandíʼ pa guluinu laabe ni ruzeeteʼ Biblia de ca saa ni qué riuulaʼdxiʼ Jehová para si gusaana de gúnibe Navidad nagueendaca la? Coʼ, ¿njaʼ? Neca nuu estudiante nagueendaca rúnicaʼ ni caziidicaʼ, nuu xcaadxi la? riné tiempu laacaʼ guchaacaʼ modo riníʼ íquecaʼ ne gúnicaʼ ni ná Biblia. Para ganda gacanenu ti estudiante guni ni ná Stiidxaʼ Dios la? cadi naquiiñeʼ si gábinu laabe ni ná Biblia ora caquiiñeʼ gucaadiágabe ni, sínuque ora maʼ zanda guiénebe ni (biindaʼ Proverbios 25:11).

16. ¿Ximodo zanda gacanenu ca estudiante cadi gusaana de sacaʼ lu ni dxandíʼ?

¹⁶ Gusíʼdinu tuuxa ni dxandíʼ de Jehová, laani nga tobi de ca cosa ni nabé rusiecheʼ ladxidoʼno. Para gacanenu ti binni cadi gusaana ni dxandíʼ la? naquiiñeʼ gusihuínninu canazanu lu ni dxandíʼ ne nuunu seguru pur ca cosa ni rúninu lu xquendanabáninu runi crenu guirá ca promesa ni zeeda lu Biblia (3 Juan 3, 4). Ne casi maʼ bidúʼyanu, naquiiñeʼ guininu ni dxandíʼ purtiʼ nadxiinu Jehová, ne iquíʼñenu diidxaʼ ni guiaba binni, diidxaʼ nachaʼhui ne diidxaʼ ni peʼ caquiiñeʼ binni ne laaca naquiiñeʼ gusisácanu Jehová ora chuʼ tu gusisacaʼ laanu. Zacá zusihuinnuʼ rúninu ni ná Jehová, Dios ni riníʼ ni dxandíʼ.