Xiñee caquiiñeʼ quixe Jehová pur laanu

1, 2. ¿Xiñee caquiiñeʼ gulácabe laanu? (Romanos 7:22-24; laaca zanda gúʼyaluʼ imagen ca).

GUINÍʼ íquenu bixá ti edificiu ne biaana ti binni lade ca escombro stini. Peru qué ganda guireebe ne caquiiñebe tu cuee laabe para guilabe. Ni zanda si gúnibe nga gucaabe ridxi gacanécabe laabe ne cuézabe chuʼ tu gacané laabe.

² Zacagá nga nuu cada tobi de laanu. ¿Xiñee yaʼ? Purtiʼ dxi maʼ qué nuzuubaʼ Adán stiidxaʼ Dios ni bizáʼ laa, gúcabe ti binni ruchee. Ne cumu guiranu zanu de laabe la? nga runi guiranu nácanu binni ruchee. Casi ñaca nuunu lade ca escombro stiʼ donda ni bisaanané Adán laanu ne caquiiñeʼ chuʼ tu cuee laanu de raqué. Lu Carta ni bicaa apóstol Pablo ra nuu ca xpinni Cristu de Roma, guniʼbe ximodo nga nuunu lu náʼ pecadu (biindaʼ Romanos 7:22-24). Racá gunábabe gulá tuuxa laabe de cuerpu stibe ni cayati. Nánnabe nuube lu náʼ pecadu ni bisaanané Adán laanu ne pur laani zátibe (Rom. 6:23). Ne zaqueca nga nuunu laanu: caquíʼñenu tu gulá laanu.

3. ¿Xi zanda guni Jehová pur ni biaxa pur laanu?

³ Ora bizeeteʼ Pablo guendanagana ni napa, guniʼbe de ti esperanza. Despué si de gunabadiidxabe «¿Tuu ndiʼ zanda gulá naa de cuerpu ni cayati riʼ yaʼ?», né stale stipa guniʼbe: «¡Rudieeʼ xquixe peʼ Dios pur Jesucristu Señor stinu!» (Rom. 7:25). Ni caníʼ Pablo nga ni gudixea Jehová pur laanu ne laani nga sacrificiu stiʼ Jesús. Pur ni biaxa pur laanu zanda, primé, gaca perdonar ca pecadu stinu, guiropa, cueeni guendahuará ni runiná cuerpu stinu ne zaqueca ni runiná xquendabiaaninu ne ladxidoʼno, ne guionna, guibiguetaʼ chuʼnu tobi si né Dios ni bizáʼ laanu. Ra guidúʼndanu ni maʼ bizéʼtenu riʼ zaroobaʼ guendarannaxhii ni nápanu «Dios ni rudii esperanza binni» ne jma zudiʼnu xquixe peʼ Jesús, purtiʼ gudixe pur laanu para gácanu libre (Rom. 15:13; Col. 1:14).

ZANDA GACA PERDONAR CA PECADU STINU

4, 5. ¿Xiñee caquiiñeʼ guiaxa pur laanu? (Eclesiastés 7:20).

⁴ Caquíʼñenu ni biaxa pur laanu para guni perdonar Jehová ca pecadu stinu. Cumu guiranu nácanu binni ruchee la? rucheʼnu pur ni rininu o pur ni rúninu (biindaʼ Eclesiastés 7:20). Nuu pecadu nabé grave. Lu Ley stiʼ Moisés que riete pa tuuxa chuʼné ni cadi xheelaʼ o guuti naquiiñeʼ gatiʼ (Lev. 20:10; Núm. 35:30, 31). Neca nuu pecadu cadi tan grave cani, peru qué rusaana de gácacani ti pecadu. David guníʼ: «Zapaʼ ca neza stinneʼ para cadi gucheeʼ né ludxeʼ» (Sal. 39:1). Casi cadúʼyanu, pur ni guininu zanda gucheʼnu (Sant. 3:2).

⁵ Guiníʼ íquenu ca diidxaʼ o ca cosa ni maʼ bíninu dxiqué. ¿Ñee huaninu o huayúninu xiixa ne despué guiníʼ íquenu jma galán pa qué ñuneʼ ni? Ni dxandíʼ la? guiranu huazaacanu ni. Ne Biblia peʼ cusiene laanu: «Pa guininu “Qué rucheʼnu”, caguítenu laca laanu ne gastiʼ ni dxandíʼ luguianu» (1 Juan 1:8).

6, 7. ¿Xi base napa Jehová para guni perdonar ca pecadu stinu? (Laaca zanda gúʼyaluʼ imagen ca).

⁶ Cumu naca Jehová ti Dios ni runi ni jneza caquiiñebe ti base para guni perdonarbe ca pecadu stinu. Ne laapebe bidiibe base ca ra biseendabe Jesús gati para gulá laanu (Efes. 1:7). Yanna, ¿ñee riníʼ nga cumu runi perdonar Jehová laanu, ngueca si rudii laabe pa gucheʼnu o pa coʼ la? Coʼ, riuubaʼ ladxidoʼbe pa gucheʼnu (Is. 59:2).

⁷ Lu Ley stiʼ Moisés riete caquiiñeʼ gudii ca israelita que ti maniʼ para guixiá ca pecadu sticaʼ (Lev. 4:27-31; 17:11). Bisihuinni ca sacrificiu que caquiiñeʼ ti sacrificiu jma risaca: laani nga sacrificiu stiʼ Jesús ne ca ndaayaʼ ni chigueedaneni para binni. Guendaguti stiʼ Jesús nga base o derechu ni napa Jehová para guni perdonar ca pecadu stinu. Lu tobi de ca carta bicaa Pablo ra nuu ca xpinni Cristu de Corinto gúdxibe laacaʼ pabiáʼ risaca sacrificiu stiʼ Jesús. Despué de bizeetebe caadxi cosa malu ni bíʼnicaʼ dxiqué, gúdxibe laacaʼ: «Peru yanna maʼ nayá nuutu, maʼ guleechú Dios laatu, maʼ ruuyabe laatu casi binni nachaʼhuiʼ de lu lá Jesucristu Señor stinu, ne pur espíritu stiʼ Dios stinu» (1 Cor. 6:9-11).

8. ¿Xi zanda guiníʼ íquenu ante chuunu Conmemoración iza riʼ?

⁸ Ante chuunu Conmemoración iza riʼ, galán cueenu tiempu para guiníʼ íquenu xi ndaayaʼ ricaanu ra gánnanu runi perdonar Jehová ca pecadu stinu. Ni biaxa pur laanu ca racaneni laanu cadi guiníʼ íquenu náparunu donda pur ca pecadu ni bíninu dxiqué pa maʼ guca arrepentirnu. Yanna, ¿pa raca nagana para laanu guni sentirnu maʼ biʼniʼ perdonar Jehová laanu yaʼ? Zándaca gucaani laanu guiníʼ íquenu: «Neca maʼ biʼniʼ perdonar Jehová naa, naa qué zanda guneʼ perdonar laca naa». Peru cadi guiaandaʼ laanu, Jehová nga runi perdonar ne maʼ bidiibe autoridad Xiiñibe para guni juzgar laanu. Ne qué nudiibe nin tobi de laanu derechu para guiníʼ tu guiabe. Biblia ná: «Pa canazanu lu biaaniʼ, [ . . . ] rusiá rini stiʼ Jesús, Xiiñibe, guiráʼ pecadu stinu» (1 Juan 1:6, 7). Zanda guni crenu ca diidxaʼ riʼ cásica runi crenu guiráʼ ni rusiidiʼ Biblia. Ni biaxa pur laanu ca rudiini Jehová derechu para gusihuinni riá laanu, ne rusiidiʼ Stiidxabe, nuube listu para guni perdonarbe laanu (Sal. 86:5).

ZANDA CUEENI GUENDAHUARÁ NI RUNINÁ CUERPU STINU NE ZAQUECA NI RUNINÁ XQUENDABIAANINU NE LADXIDOʼNO

9. ¿Xi riníʼ diidxaʼ pecadu? (Salmo 51:5 ne nota stini).

⁹ Ora riete lu Biblia diidxaʼ pecadu, cadi caníʼ si ni de xiixa cosa malu ni rúninu, sínuque laaca caniʼni de xiixa ni gulenenu, ni bisaanané Adán ne Eva laanu: laani nga guendaruchee (biindaʼ Salmo 51:5 ne nota stini). Rucaa guendaruchee riʼ laanu gúninu cosa malu, ne zaqueca rucaani laanu gaca huaranu, guiooxhoʼno ne gátinu. Ndiʼ racané laanu guiénenu xiñee dede ti baʼduhuiiniʼ zanda gaca huará ne gatiʼ neca caʼruʼ guni cosa malu, ne xiñee racaná ne rati binni cásica binni malu ne zaqueca binni nachaʼhuiʼ. Ne nabáninu zacá purtiʼ zanu de Adán ne Eva.

10. ¿Xi biʼniʼ sentir Adán ne Eva ora bicheecaʼ ne gúcacaʼ binni napa donda?

¹⁰ Guiníʼ íquenu ximodo biʼniʼ sentir Adán ne Eva ora bicheecaʼ ne beeda gácacaʼ binni ni napa donda. Cumu qué ninándacabe ley stiʼ Dios, ni nuu ndaaniʼ ladxidóʼcabe, bizulú gucanácabe pur ni bíʼnicabe (Rom. 2:15). Biʼniʼ sentírcabe xiixa ni qué huayuu dxi guni sentírcabe. Biyúbicabe guchiicabe laacabe ne bicachilúcabe de Dios ni bizáʼ laacabe casi ñácacabe ti binni malu (Gén. 3:7, 8). Ndiʼ nga primé biaje biʼniʼ sentírcabe nápacabe donda, qué guidxélacabe xi gúnicabe, bidxíbicabe, gucanácabe ne bituí lúcabe. Ne napa xidé guni sentírcabe zacá dede dxi gáticabe (Gén. 3:16-19).

11. Pur nácanu binni ruchee, ¿ximodo runinani laanu?

¹¹ Cumu guiranu nácanu binni ruchee la? laaca runi sentirnu ni biʼniʼ sentir Adán ne Eva. Pur guendaruchee ca raca huará xquendabiaaninu ne racaná ladxidoʼno. Neca gacaláʼdxinu chuʼnu nazaaca ne cadi gápanu guendanagana la? záparunu guendanagana ne zaca huaranu. Biblia ná: «Biliibi creación para cadi iquiiñeʼ ni» ne ladeni zeeda binni guidxilayú (Rom. 8:20). Huayuni ca gobiernu ca stale cosa para gusaana binni de guniná guidxilayú, qué chuʼ guendaquéiquiiñeʼ, qué chuʼ guendapobre ne guerra. ¿Xi huabeendúcabe yaʼ? Neca huayúnicabe stipa qué huayanda cueecabe ca guendanagana riʼ. Peru pur ni biaxa pur laanu ca cudii Jehová laanu ti esperanza.

12. ¿Xi esperanza nápanu pur ni biaxa pur laanu?

¹² Pur ni biaxa pur laanu ca, «zedandá dxi maʼ qué zaca creación esclavu stiʼ pecadu ne guendaguti» (Rom. 8:21). Ndiʼ riníʼ, ora maʼ nuunu ndaaniʼ guidxilayú cubi ca ne maʼ nácanu binni sin donda, maʼ qué zaca huaranu, maʼ qué zuniná ca guendahuará ca cuerpu stinu, xquendabiaaninu o ladxidoʼno, laaca maʼ qué zuniná ca cosa ni bíninu dxiqué laanu, maʼ qué ziuʼnu xizaa, maʼ qué zadxíbinu, maʼ qué zápanu yuubaʼ ne maʼ qué zatuí lunu. Ne ora maʼ guni mandar Jesucristu «Príncipe ni rudii Paz», ni bilá laanu, jneza modo zápanu guidxilayú riʼ ne zabáninu ne guendariuudxi (Is. 9:6, 7).

13. ¿Xiruʼ zanda guiníʼ íquenu ante chuunu Conmemoración iza riʼ?

¹³ Guiníʼ íquenu ora maʼ nuunu ndaaniʼ guidxilayú cubi ca. Guiráʼ dxi zuni sentirnu galán, maʼ qué ziuʼnu xizaa pa cayaadxaʼ guendaró laanu o familia stinu, pa gaca huaranu o gaca huarácabe, pa gátinu o gáticabe. Dede nagasi zanda guni sentirnu paz pa «guinaaze dxiichinu esperanza ni nápanu», purtiʼ nánnanu «naaze dxiichiʼ esperanza riʼ xpídanu, cásica rinaaze dxiichiʼ ti ancla barcu» (Heb. 6:18, 19). Cásica racané ti ancla guzuhuaa chaahuiʼ ti barcu, ra guiníʼ íquenu esperanza ni nápanu, racaneni laanu guzuhuaa chaahuinu lu ni runi crenu ne racaneni laanu guni huantarnu intiica guendanagana. Nuunu seguru rudii Jehová premiu ca ni ruyubi laabe sin guiree gana.

RACANENI LAANU CHUʼNU TOBI SI NÉ DIOS

14. Dede dxi bichee Adán ne Eva, ¿ximodo nuu binni guidxilayú né Dios, ne xiñee?

¹⁴ Dede dxi bichee Adán ne Eva nuu binni zitu de Dios (Col. 1:21). Ruzeeteʼ Biblia zeeda gaca binni guidxilayú enemigu stiʼ Dios ni bizáʼ laacaʼ (Rom. 8:7, 8). ¿Xiñee yaʼ? Purtiʼ perfectu Jehová ne cumu jneza ca Ley stibe la? qué riuuláʼdxibe guchee binni. Tobi de ca hombre ni bicaa Biblia gudxi Jehová: «Guizáʼ nayá guieluluʼ para guyadxiluʼ cosa malu; ne qué zudiiluʼ lugar chuʼ cosa malu» (Hab. 1:13). Cumu ruxheleʼ pecadu ca laanu de Dios la? nin tobi de laanu qué zanda chuʼ gaxha de Jehová. Peru pur ni biaxa pur laanu, zanda chuʼnu tobi si né Dios.

15. ¿Ximodo nga gudixhedxí ni biaxa pur laanu ca ladxidóʼ Jehová?

¹⁵ Lu Biblia riete Jesús nga «sacrificiu ni caquiiñeʼ para chuʼnu tobi si né Dios sti biaje ne para guixá ca pecadu stinu» (1 Juan 2:2). Diidxaʼ griegu ni guca traducir «sacrificiu ni caquiiñeʼ para chuʼnu tobi si né Dios sti biaje» laca laani nga «sacrificiu ni caquiiñeʼ para chúʼnenu Dios tobi si» ne laca laani nga «xiixa para quixhedxí», ¿ximodo gudixhedxí ni biaxa pur laanu ca Jehová yaʼ? Qué riníʼ diʼ ndiʼ gutadxí ladxidoʼbe o guyuube tranquilu ora guti Xiiñibe, sínuque gutadxí ladxidoʼbe purtiʼ guca ni jneza. Yanna maʼ napa Jehová ti base para ganda gaca xhamígucabe laabe sti biaje (Rom. 3:23-26). Pur rescate ca maʼ zanda gúʼyabe guiráʼ ca xpínnibe ni bizuubaʼ stiidxabe ante gati Jesús casi binni nachaʼhui (Gén. 15:1, 6). ¿Xiñee yaʼ? Purtiʼ nanna dxiichiʼ Jehová zudii Xiiñiʼ xquendanabani para guiaxa pur laanu (Is. 46:10). Casi ridúʼyanu, ni biaxa pur laanu ca bixheleni ti neza para ganda chuʼ binni guidxilayú tobi si né Dios sti biaje.

16. ¿Gunáʼ nga sti cosa ni zanda guiníʼ íquenu ante chuunu Conmemoración iza riʼ? (Laaca zanda gúʼyaluʼ imagen ca).

¹⁶ Guiníʼ íquenu pabiáʼ galán nabáninu ra nuunu gaxha de Dios. Zanda gábinu laabe Bixhózenu, casi bisiidiʼ Jesús ni laanu (Mat. 6:9). Ne gatigá zanda guininu xhamígunu laabe, peru naquiiñeʼ gácanu humilde ora gúninu ni ne gusihuínninu stale respetu. ¿Xiñee yaʼ? Purtiʼ nácanu binni ruchee. Zanda guni sentirnu nuunu gaxha de Jehová ne nácabe xhamígunu cadi pur runi merecernu ni, sínuque pur ni biaxa pur laanu. Ne pur mediu de Jesús bidxiguetaʼ Jehová «guiráʼ cosa ra nuu, [ . . . ] gunda bidxiguetaʼ Dios guiráʼ ni ra nuu pur rini ni bixhii Xiiñiʼ dxi gucuá lu yaga que» (Col. 1:19, 20). Nga runi, zanda chuʼnu gaxha de Jehová neca nácanu binni ruchee.

RUSIHUÍNNINI RIÁ JEHOVÁ BINNI

17. ¿Ximodo rusihuinni ni biaxa pur laanu ca nabé riá Jehová laanu? (Efesios 2:4, 5).

¹⁷ Ni biaxa pur laanu ca rusihuínnini «nabé riá» Jehová laanu, «bisibani laanu […] dxi nuurunu casi gueʼtuʼ pur guiráʼ ni cadi jneza ni bíninu» (biindaʼ Efesios 2:4, 5). «Ca ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» nánnacaʼ nuucaʼ lade ca escombro stiʼ pecadu ni bisaanané Adán ne Eva laacaʼ ne caquiiñeʼ chuʼ tu gulá laacaʼ (Hech. 13:48). Nga runi cucaacaʼ ridxi gacanécabe laacaʼ, ne nagueendaca racané Jehová laacabe né mensaje stiʼ Reinu para ganda gunibiáʼcabe laa ne Xiiñiʼ (Juan 17:3). Zácaxa Binidxabaʼ ra bichee Adán né Eva nucueezani ni maʼ gudixhe ique Jehová guni, peru cadi zacá diʼ ni.

18. Ora guiníʼ íquenu ni biaxa pur laanu, ¿xi cadi naquiiñeʼ guiaandaʼ laanu?

¹⁸ Ora guiníʼ íquenu ca ndaayaʼ ni rápanu pur ni biaxa pur laanu, galán cadi guiaandaʼ laanu razón jma risaca pur gudixe Jehová pur laanu. Cadi bidii si Jehová laanu regalu riʼ para gulá xquendanabáninu, sínuque para guicábibe Binidxabaʼ purtiʼ bicaalú laabe ndaaniʼ jardín de Edén que (Gén. 3:1-5, 15). Pur ni biaxa pur laanu ca, rusisaca ne rusiá Jehová lá. Laaca rulabe laanu de lu náʼ pecadu ne guendaguti, ne zaca rusihuínnibe nácabe ti Dios de guendarannaxhii. Ne pur guendanachaʼhuiʼ stiʼ Jehová, rudiibe lugar neca nácanu binni ruchee, gacanenu laabe guicábibe Binidxabaʼ (Prov. 27:11). ¡Guizáʼ rudiʼnu xquixe peʼ Jehová pur gudixe pur laanu! ¿Ximodo zanda gusihuínninu rudiʼnu xquixe peʼ laabe yaʼ? Zadúʼyanu ni lu sti artículo ca.