Gácanu humilde casi Jehová

1. ¿Xiñee ridxagayaanu guiníʼ íquenu naca Jehová humilde?

ORA riníʼ íquenu ca xaíque stiʼ ca guidxi ca, ¿ñee riníʼ íquenu nácacabe humilde la? Zándaca coʼ, ¿njaʼ? Peru Jehová, Dios ni jma napa poder, naca humilde (Sal. 113:5-8). Guirutiʼ zanda guchaaganu naca humilde cásica Jehová purtiʼ laa qué rudxiibaʼ laca laa. Lu artículo riʼ zadúʼyanu tapa modo rusihuinni Jehová naca humilde. Ne laaca zadúʼyanu ximodo yenanda Jesús ejemplu stiʼ Bixhoze ra bisihuinni naca humilde. Zacanécani laanu guidxíñanu jma gaxha de Jehová ne gúninu stipa gusihuínninu cualidad riʼ.

NUU JEHOVÁ LISTU PARA GUCAADIAGA LAANU

2. ¿Xi rusiidiʼ Salmo 62:8 laanu de Jehová? (Laaca zanda gúʼyaluʼ imagen ca).

² Ca binni ni rudxiibaʼ laca laa huaxiéʼ ridxiña binni laacaʼ. Riníʼ íquecaʼ jma risácacaʼ que xcaadxi binni, nga runi stale binni qué riná guidxiña laacabe ne dede rucaanacaʼ laacabe. ¡Peru maʼ gadxé si Jehová de laacabe! Cumu nácabe humilde la? cayábibe laanu guidxíñanu laabe ne gábinu laabe guiráʼ ni runi sentirnu ne ni riníʼ íquenu (biindaʼ Salmo 62:8). Cásica runi ti hombre ni guizáʼ nadxii ca xiiñiʼ, rucaadiaga chaahuiʼ xi riguu xizaa laacabe, zacaca nga Bixhózenu ni nuu guibáʼ, rucaadiaga chaahuibe ca oración stiʼ ca xpínnibe. Nga runi, bidiibe lugar guicá stale de ca oración ca lu Biblia, ndiʼ rusihuinni cadi nagana nga guinínenu laabe ne nuucabe listu para gucaadiágabe laanu (Jos. 10:12-14; 1 Sam. 1:10-18). Neca zacá, zándaca ziuu biaje zaca nagana para laanu guni orarnu purtiʼ runi sentirnu qué runi merecernu ni. ¿Xi zacané laanu cadi guni sentirnu zacá yaʼ?

3. ¿Xiñee nuunu seguru qué racalaʼdxiʼ Jehová gusaana de guni orarnu laa?

³ Zanda guni orarnu Jehová neca runi sentirnu cadi naquiiñeʼ gannaxhiibe laanu. ¿Ximodo nánnanu ni yaʼ? Pur historia ni riete lu Biblia stiʼ hijo pródigo que. Luni bizeeteʼ Jesús de ti hombre ni riá ni napa ti xiiñiʼ ni nabé bicheené laa ne bicheené familia stiʼ, ne biʼniʼ sentir xiiñibe qué zanda guibiguetaʼ chuʼ ndaaniʼ familia stiʼ. Yanna, ¿xi biʼniʼ bixhózebe ora bibiguétabe ra lidxi yaʼ? Casi biʼyaʼ bixhózebe laabe, «bixooñeʼ ne gudiidxi laabe ne bidii bixiduʼ laabe» (Luc. 15:17-20). Naca Jehová casi hombre bizéʼtenu riʼ. Cumu naca Jehová humilde la? nga rucaa laabe gucaadiaga chaahuiʼ ti binni ni naná nuu ladxidóʼ pur guiráʼ ni riguu xizaa laa o pur cayuni sentir napa donda (Lam. 3:19, 20). Ne cumu naca Jehová ti Dios ni riá la? nagueendaca riguixhedxibe ladxidóʼ, rusihuínnibe nadxiibe laa ne runi perdonarbe laa (Is. 57:15). ¿Ximodo rúnibe ni yaʼ? Stale biaje riquiiñebe ca ancianu, ca familia stinu ni naca Testigu ne xcaadxi hermanu (Sant. 5:14, 15). Racané Jehová laanu purtiʼ racalaʼdxiʼ chuʼnu gaxha de laa.

4. ¿Ximodo bisihuinni Jesús zanda guidxíñacabe laa?

⁴ Rinanda Jesús ejemplu stiʼ Bixhoze. Naca Jesús humilde, cásica Jehová. Nga runi, ora guyuube lu guidxilayú riʼ, biʼniʼ sentir binni zanda guidxiñaʼ laabe né stale confianza. Bíʼnicabe laabe pregunta sin nituí lúcabe (Mar. 4:10, 11). Ne ora rinabadiidxabe laacaʼ xi riníʼ íquecaʼ de xiixa cosa la? riniʼcaʼ xi riníʼ íquecaʼ de laani sin guidxíbicaʼ (Mat. 16:13-16). Ne pa gucheecaʼ, qué racadíticaʼ de dxiibi purtiʼ nánnacaʼ nachaʼhuiʼ Jesús, riá binni ne napa paciencia (Mat. 17:24-27). Pur yenanda Jesús ejemplu stiʼ Bixhoze, gunda binibiáʼ chaahuiʼ ca ni yenanda laabe Jehová (Juan 14:9). Biziidicabe maʼ gadxé modo naca Jehová de ca xaíque stiʼ ca yuʼduʼ ni guyuu dxiqué purtiʼ bidxiibacaʼ laca laacaʼ, qué ñénecaʼ binni ne qué nusihuínnicaʼ guendarannaxhii. Peru Jehová naca humilde ne zanda guidxiña binni laa.

5. Pa nácanu humilde, ¿xiñee qué zaca nagana para binni guidxiña laanu?

⁵ ¿Ximodo zanda chinándanu ejemplu stiʼ Jehová? Pa nácanu humilde qué zaca nagana para binni guidxiña laanu. ¿Xiñee yaʼ? Purtiʼ pa nácanu humilde qué zudxíʼbanu laca laanu, qué zachelunu gápanu stiʼ sti binni ne qué zadaʼnu xiana. Ne laaca racaneni laanu gápanu cualidad ni riuulaʼdxiʼ xcaadxi binni, casi gácanu nachaʼhuiʼ, gápanu paciencia ne guni perdonarnu (Col. 3:12-14). Guiranu nga naquiiñeʼ gúninu stipa para guʼyaʼ binni laanu casi ti binni ni zanda guidxíñacabe laa, peru jmaruʼ si naquiiñeʼ guni ca ancianu stipa para guʼyaʼ binni laacaʼ zacá. Para gapa ca hermanu ne ca hermana confianza guidxíñacaʼ laacabe la? naquiiñeʼ chúʼcabe gaxha de laacaʼ. Ndiʼ riníʼ, risaca guni ca ancianu stipa checaʼ reunión ra Yoo stiʼ Reinu lugar de gaca conectarcaʼ pur videollamada. Ne rúnicaʼ stipa guni predicarnecaʼ ca hermanu ne ca hermana de yoo pur yoo. Zacá runibiáʼ chaahuicaʼ laacabe ne runi sentircaʼ nuu confianza para guidxíñacaʼ laacabe ora caquiiñecaʼ ni.

NACA JEHOVÁ TI DIOS NI RIUU RAZÓN

6, 7. Bizeeteʼ xiixa ejemplu ni rusihuinni biʼniʼ Jehová ni gunabaʼ ca xpinni laa.

⁶ Ca binni ni rudxiibaʼ laca laa gatigá riníʼ íquecaʼ laacaʼ nga jma nánnacaʼ xii nga ni jma jneza ne qué rinacaʼ guchaacaʼ modo riníʼ íquecaʼ. Peru Jehová naca humilde ne nuu listu guchaa neca siempre napa razón ne guizáʼ nuu xpiaaniʼ. Guzéʼtenu ti ejemplu, guiníʼ íquenu ora bizulú Míriam ne Aarón caniʼcaʼ mal de Moisés, ni naca representante stibe. Guizáʼ bidxiichiné Jehová Míriam purtiʼ cadi Moisés si nga ni cadi cayuni respetarbe, sínuque laaca cadi cayuni respetarbe Jehová. Ngue runi biʼniʼ castigarbe laa né lepra. Gunabaʼ Aarón Moisés gacané Míriam, despué gunabaʼ Moisés Jehová gusianda laabe. ¿Xi biʼniʼ Dios yaʼ? ¿Ñee guníʼ íquebe maʼ qué zuchaabe ni maʼ gudixhe íquebe gúnibe né Míriam la? Nga nga ñuni ti binni ni rudxiibaʼ laca laa. Peru cumu humilde Jehová la? bíʼnibe ni canabaʼ Moisés laabe ne bisiándabe Míriam (Núm. 12:1-15).

⁷ Guidúʼyanu sti ejemplu ni rusihuinni naca Jehová humilde. Dxi maʼ huará rey Ezequías biquiiñebe ti profeta para gábibe laa zati. Ngue runi dede cayuunaʼ rey que gunabaʼ Jehová gusianda laa. ¿Xi biʼniʼ Dios yaʼ? Cumu guizáʼ biabe Ezequías la? bidiibe laa sti quince iza para guibani (2 Rey. 20:1, 5, 6). Casi ridúʼyanu, cumu naca Jehová humilde la? nga rucaa laa guchaa ni maʼ gudixhe ique guni ne guiá binni.

8. ¿Ximodo rusihuinni Jesús naca binni riuu razón? (Marcos 3:1-6).

⁸ Rinanda Jesús ejemplu stiʼ Bixhoze. Dxi guyuu Jesús lu guidxilayú riʼ, gúcabe ti binni ni guyuu razón ne gucanebe binni ora bíʼyabe zanda gúnibe ni. Bisianda Jesús binni dxi sábadu neca riníʼ ique ca xaíque yuʼduʼ que cadi naquiiñeʼ gácani, maʼ gadxé si Jesús de laacabe purtiʼ riá binni ne riuu razón (biindaʼ Marcos 3:1-6). Ne dede yanna rusihuínnibe nácabe binni riuu razón casi xaíque stiʼ congregación. Guzéʼtenu ti ejemplu, ora runi tuuxa ti pecadu grave, rapa Jesús paciencia binni ca ne racanebe laa guchaa (Apoc. 2:2-5).

9. ¿Ximodo zanda chinándanu ejemplu stiʼ Jehová ne gácanu binni riuu razón? (Laaca zanda gúʼyaluʼ ca imagen ca).

⁹ ¿Ximodo zanda chinándanu ejemplu stiʼ Jehová? Para ganda gácanu binni riuu razón cásica Jehová ne guiníʼ íquenu ne gúninu ca cosa ca modo rúnibe cani la? naquiiñeʼ gácanu humilde (Sant. 3:17). Ca ni napa xiiñiʼ rinándacaʼ ejemplu stiʼ Jehová, nácacaʼ binni riuu razón ne qué ribézacaʼ guni ca xiiñicaʼ xiixa ni que zanda gúnicaʼ. Ne zacá peʼ rusihuinni historia ni zeeda lu Génesis 33:12-14 ni, luni riete guca Jacob nachaʼhuiʼ né ca xiiñiʼ. Ne ca ni napa xiiñiʼ rusihuínnicaʼ nácacaʼ binni riuu razón ne humilde ra qué ruchaagacaʼ ca xiiñicaʼ. Laaca naquiiñeʼ gaca ca ancianu binni ni riuu razón. Lugar de guyúbicaʼ gaca puru si ni nacaʼ, rúnicaʼ stipa guni apoyarcaʼ decisión ni maʼ gucuaa restu ancianu pa cadi cucheeneni xiixa principiu ni zeeda lu Biblia (1 Tim. 3:2, 3). Ne guiranu naquiiñeʼ gúninu stipa pur guiénenu modo riníʼ ique xcaadxi neca maʼ gadxé ni de modo riníʼ íquenu (Rom. 14:1). Cada tobi de laanu rúninu stipa chinándanu conseju riʼ: «Guiráʼ binni naquiiñeʼ gunibiáʼ laatu casi binni riuu razón» (Filip. 4:5).

NAPA JEHOVÁ PACIENCIA

10. ¿Ximodo maʼ bisihuinni Jehová napa paciencia?

¹⁰ Zándaca huadúʼyanu huaxiéʼ napa ca binni ni rudxiibaʼ laca laa paciencia; qué riuuláʼdxicaʼ cuézacaʼ. ¡Peru maʼ gadxé modo naca Jehová! Gastiʼ stobi ni jma napa paciencia casi laabe. Ca dxi bibani Noé, guniʼbe zabézabe ti gayuaa gande iza para gunduuxebe ca binni malu (Gén. 6:3). Gupa Noé tiempu para gusiniisi ca xiiñiʼ ne gucané familia stibe laabe para gaca arca que. Despué, né stale paciencia bicaadiaga Jehová Abrahán laga cayuni laabe caadxi pregunta purtiʼ gudixhe íquebe gunduuxebe Sodoma ne Gomorra. Ti binni ni rudxiibaʼ laca laa la? ñándaca ñabi Abrahán: «Qué gápaluʼ derechu gúniluʼ naa ca pregunta ca, ¿ñee riníʼ íqueluʼ qué gannaʼ xi cayuneʼ la?». Peru qué ñuni diʼ Jehová nga purtiʼ naca humilde ne napa paciencia (Gén. 18:20-33).

11. Casi ruzeeteʼ 2 Pedro 3:9, ¿xiñee cusihuinni Jehová napa paciencia tiempu riʼ?

¹¹ Tiempu riʼ, laaca cusihuinni Jehová napa paciencia. Cabézabe gueeda tiempu ni maʼ gudíxhebe para gunduuxebe guidxilayú malu riʼ. ¿Xiñee nabé nápabe paciencia binni yaʼ? «Purtiʼ qué racaláʼdxibe guinitilú nin tobi, ni racaláʼdxibe nga gaca arrepentir guiráʼ binni» (biindaʼ 2 Pedro 3:9). Ne pur paciencia stiʼ Jehová, stale binni maʼ bidxiña gaxha de laabe ne maʼ guca xhamígucaʼ laabe. Peru neca napa Jehová paciencia ne nadxii binni, qué rudiidibe lugar gúnicaʼ ni racaláʼdxicaʼ. Ne qué zudiidibe lugar gaca cosa malu lu guidxilayú riʼ para siempre (Hab. 2:3).

12. ¿Ximodo rusihuinni Jesús napa paciencia cásica Jehová?

¹² Rinanda Jesús ejemplu stiʼ Bixhoze. Maʼ xadxí rusihuínnibe nápabe paciencia cásica Bixhózebe. Maʼ biiyabe ximodo maʼ guníʼ Binidxabaʼ cosa ni cadi dxandíʼ de Dios ne de ca binni ni qué rixeleʼ de Jehová (Gén. 3:4, 5; Job 1:11; Apoc. 12:10). Laaca maʼ biiyabe modo cayacaná binni. ¿Ñee riníʼ íquenu pabiáʼ maʼ nápabe gana gunitilube «guiráʼ ni cayuni Binidxabaʼ» la? (1 Juan 3:8). ¿Xi racané laabe cuézabe né stale paciencia dede ora guiníʼ Jehová maʼ bedandá hora para gunitilube guiráʼ xixé ni cayuni Binidxabaʼ yaʼ? Tobi de ca razón risaca ni rusihuinni nápabe paciencia nga, purtiʼ nácabe humilde ne nánnabe Jehová nga naquiiñeʼ guiníʼ pora nga jma galán gácani (Hech. 1:7).

13. ¿Ximodo bisihuinni Jesús napa paciencia ca apóstol stiʼ, ne xiiñeʼ?

¹³ Dxi guyuu Jesús lu guidxilayú riʼ, laaca gúpabe paciencia ca apóstol stibe. Ora bíʼyabe gatigá ridinde diidxacaʼ para gánnacaʼ tuu nga ni jma risaca ládecaʼ, qué nidxiichinebe laacaʼ ne qué niníʼ íquebe qué ziuu dxi guchaacaʼ, sínuque gúpabe paciencia laacaʼ (Luc. 9:46; 22:24-27). Nanna dxíchibe zaziidicaʼ gácacaʼ humilde ne zinándacaʼ ejemplu stibe. ¿Laanu yaʼ? ¿Ñee maʼ bicheʼnu pur ngueca cosa stale biaje la? Pa zacá ni, nabé rudiʼnu xquixe peʼ Dios purtiʼ nápanu ti Rey ni naca humilde ne napa paciencia.

14. ¿Xi zacané laanu gápanu jma paciencia?

¹⁴ ¿Ximodo zanda chinándanu ejemplu stiʼ Jehová? Para gusihuínninu nácanu cásica Jehová, naquiiñeʼ gusihuínninu riníʼ íquenu modo «riníʼ ique Cristu» (1 Cor. 2:16). ¿Xi zacané laanu guiníʼ íquenu cásica riníʼ ique Jesús yaʼ? Caquiiñeʼ guidúʼndanu ca Evangeliu ne guiníʼ íquenu lu ca cosa ni biʼniʼ Jesús ni rusihuinni ximodo riníʼ ique. Ne laaca risaca guinábanu Jehová gacané laanu gácanu humilde cásica Xiiñiʼ. Ra jma guizíʼdinu guiníʼ íquenu casi Jesús, jma zanda chinándanu ejemplu stiʼ Jehová, jma zápanu paciencia ca hermanu stinu ne laaca ziénenu cadi nagueendaca zazíʼdinu guiníʼ íquenu ne gúninu ca cosa ca modo runi Jehová cani (Mat. 18:26-30, 35).

RUSISACA JEHOVÁ CA BINNI HUMILDE

15. ¿Ximodo huayuni cumplir Jehová ca diidxaʼ ni zeeda lu Salmo 138:6?

¹⁵ (Biindaʼ Salmo 138:6). Ti ndaayaʼ naroʼbaʼ nga gusisaca Dios ni jma risaca ni nuu guibáʼ ne lu guidxilayú ca binni ni naca humilde. Guidúʼyanu ximodo huayúnibe ni biaʼ dxi huabani binni lu guidxilayú riʼ. Zándaca qué gánnanu stale cosa de laacaʼ, peru biʼniʼ Jehová guicá lácabe lu Biblia. Guzéʼtenu ti ejemplu. Débora nga ti gunaa ni qué nixeleʼ de familia stiʼ Isaac ne Jacob ne bíʼnibe ni ti gayuaa veinticinco iza. Qué gánnapenu stale de gunaa riʼ, peru biquiiñeʼ Jehová espíritu santu stiʼ para gabi Moisés gucaa labe ne gucaa ti cosa ni rusihuinni xiñee nabé gunnaxhiicabe gunaa riʼ (Gén. 24:59; 35:8, nota). Gayuaa iza despué, gulí Jehová David, ti hombrehuiiniʼ ni rapa dendxuʼ, para gaca rey stiʼ guidxi Israel (2 Sam. 22:1, 36). Despué de gule Jesús, biquiiñeʼ Jehová ti ángel para gabi caadxi pastor maʼ gule Mesías ndaaniʼ guidxi Belén (Luc. 2:8-11). Ne ora yené José ne María Jesús ra templu, bisisaca Jehová Simeón ne Ana, chupa binni ni maʼ huaniisi, ra bidiibe lugar gúʼyacaʼ Xiiñibe (Luc. 2:25-30, 36-38). Rihuinni dxíchica, «neca risaca Jehová, rizaalaʼdxiʼ ti binni humilde».

16. ¿Ximodo yenanda Jesús ejemplu stiʼ Bixhoze?

¹⁶ Rinanda Jesús ejemplu stiʼ Bixhoze. Cásica Jehová, Jesús laaca bisisaca ca binni humilde. Bisiidibe ca binni ni qué nizá scuela ne ca ni huaxiéʼ risaca de Reinu stiʼ Dios (Hech. 4:13; Mat. 11:25). Laaca bisiándabe binni huará ne pur modo bíʼnibe ni bisihuínnibe runi respetarbe ne rusisácabe laacaʼ (Luc. 5:13). Gueelaʼ ante gátibe bíʼnibe ti dxiiñaʼ ni runi ti mozo, gudiibibe ñee ca apóstol stibe (Juan 13:5). Ne ante chebe guibáʼ, bidiibe ti dxiiñaʼ nabé risaca ca xpínnibe, ládecaʼ nuunu laanu, gacanenu xcaadxi binni guicaacaʼ guendanabani ni qué zaluxe (Mat. 28:19, 20).

17. ¿Ximodo zanda chinándanu ejemplu stiʼ Jehová? (Laaca zanda gúʼyaluʼ imagen ca).

¹⁷ ¿Ximodo rinándanu ejemplu stiʼ Jehová? Rúninu ni ora runi predicarnu. Rusisácanu binni ora rinínenu laacaʼ de ca noticia galán, gastiʼ naca padé laacaʼ, modo nabánicaʼ nin pa guzacaʼ o qué nizacaʼ scuela. Laaca rinándanu ejemplu stibe pur modo runi tratarnu ca hermanu. Ridúʼyanu jma risácacabe que laanu, gastiʼ naca xi gracia o xi responsabilidad nápanu ndaaniʼ xquidxi Dios (Filip. 2:3). Nabé riecheʼ Jehová ora ruuyaʼ nácanu humilde ne ora ruyúbinu gusisácanu xcaadxi binni ra rúninu ca ni maʼ bizéʼtenu riʼ (Sof. 3:12; Rom. 12:10).

18. ¿Xiñee racaláʼdxinu gácanu humilde cásica Jehová?

¹⁸ Ra gúninu guiráʼ ni nuu lu nanu para gácanu humilde cásica naca Bixhózenu ni nuu guibáʼ ni nadxii laanu, zácanu binni ni zanda guidxíñacabe laa, zácanu binni riuu razón ne ni napa paciencia. Laaca zusisácanu binni ra guni tratarnu laacaʼ jneza, cásica runi Jehová ni. Cadi guiaandaʼ laanu risácanu jma nezalú Jehová ora rúninu stipa gácanu humilde cásica laabe (Is. 43:4).