Yampaka Yakamuchisye Ŵandu Ŵangalola
Ŵandu chiŵandika 43 miliyoni pachilambo chosope ali ŵangalola, soni chiŵandika 295 miliyoni ali ŵangalolechesya.a Nambo chakutesya chanasa chili chakuti ŵandu ŵane akusiŵatendela jemanjaji yangasa kapena yangali chilungamo.
Ana Mlungu akusiŵawona chamti uli ŵandu ŵangalola? Ana Baibulo jikusasala yamti uli pakwamba ya jemanjaji? Soni ana ŵa Mboni sya Yehofa masiku agano akwakamuchisya chamti uli jemanjaji?
Mwakusiŵawonela Mlungu ŵandu ŵangalola
Baibulo jikusasala kuti Yehofab akusiŵaganichisya mnope ŵandu ŵangalola. Jwalakwe akusasaka kuti jemanjaji atendeledweje yindu yachilungamo soni kuti apinduleje ni majiganyo gakusapeleka jwalakwe. Nambosoni, Yehofa akwasimichisya jemanjaji ya yindu yambone yachachatendela kusogoloku.
Lilemba: “Jwamlweseche ali mundu jwakumtendekasya mundu jwangalola kusokonechela litala.”—Detulonomo 27:18.
Ngopolelo jakwe: Kalakala, Chilamusi cha Mlungu chaŵapeleche kwa ŵandu ŵakwe chachenjelaga ŵandu ŵangalola kuti akatendeledwaga yindu yangasa.
Lilemba: “Mlungu jwangali lusagu.”—Masengo 10:34.
Ngopolelo jakwe: Mlungu akusiŵawona ŵandu ŵangalola kuŵa ŵakusosekwa mnope mpela yakusati pakwawona ŵandu ŵakusalola chenene.
Lilemba: Yesu “ŵakamuchisye ŵangalola ŵajinji kuti atande kulola.”—Luka 7:21.
Ngopolelo jakwe: Yesu pajwaliji pa chilambo chapasi jwakamuchisye ŵandu ŵangalola kutanda kulola, yeleyi yalosisye kuti Uchimwene wa Mlungu uchitendasoni yeleyi kusogoloku.
Lilemba: “Meso ga ŵandu ŵangalola gachilola.”—Yesaya 35:5.
Ngopolelo jakwe: Yehofa jwasasile kuti, Uchimwene wakwe pachiwutande kulamulila chilambo chapasi pachangakaŵapa, ŵandu ŵangalola chachilola.
Yakutenda ŵa Mboni sya Yehofa pakwakamuchisya ŵangalola
Pachilambo chosope, m’weji ŵa Mboni sya Yehofa tukusalalichila utenga wakutyochela kwa Mlungu wawukusapeleka chembecheyo kwa ŵandu ŵangalola. Ana tukusatenda chamti uli yeleyi?
Tukusakoposya Baibulo soni mabuku gakulondesya Baibulo nambosoni mafidiyo mulitala lyakuti ŵandu ŵangalola soni ŵangalolechesya akakombole kukamulichisya masengo. Yeleyi yikupwatikapo mabuku ga ŵandu ŵangalola, mabuku ga yilembo yekulungwa, soni mabuku gakwamba kupikanila.
Ndaŵi syejinji tukusakola misongano ja Chiklistu jele jwalijose mpaka asimanikwepo, kupwatikapo ŵandu ŵangalola.
Jwalijose akwete upile wakulijiganya Baibulo ni jwamboni.c
Yosopeyi yikusatendekwa mwangalipisya kalikose. Ligongo chichi tukusatenda yeleyi? Yili myoyo ligongo lyakuti Yesu jwatulamwile kuti, “Mwapochele mwalulele, mpelechejesoni mwalulele.”—Mateyu 10:8.
Ŵa Mboni sya Yehofa akusasamala mnope ya ŵandu ŵangalola. Jwalijose jwakusaka kumlambila Mlungu yimpepe ni m’weji, chachipata achimjakwe ŵambone soni ŵachinonyelo. Aganichisye ya mbili ja ŵa Mboni sya Yehofa ŵangalola ŵali mwiŵandamu.
Talita Alnashi, jwa ku Sweden, jwapali juli jwangalolechesya. Alole yiŵatite achinangolo ŵakwe pakumjiganya jwalakwe pakwamba ya Baibulo soni mwele mlongoju ni liŵasa lyakwe ŵapatile chikamuchisyo soni chinonyelo kutyochela kwa achimjawo.
James Ryan, jwa ku United States, jwapali ni ulwele wangapikana soni kaneko jwaŵele jwangalola. Alole chachamkamuchisye jwalakwe kuti aŵeje jwakusangalala.
Cynthia Pablo, jwa ku Philippines, ali jwangalola soni ngakusapikana. Ana Aklistu achimjakwe ŵamkamuchisye chamti uli mu ndaŵi jakusawusya mnope ja mlili wa COVID-19? Alole ngani ja Chisungu jakuti, “Congregation Supports Deaf and Blind Sister During Pandemic.”
Ana ni mabuku gapi gakulijiganyila gatukusapeleka?
Mabuku ga ŵandu ŵangalola. Tukusapeleka Baibulo ja ŵandu ŵangalola, josope kapena kambali kakwe mu yiŵecheto yejinji. (Kuti alole yiŵecheto yayikwete Baibuloji, alole libokosi lyakuti “Baibulo ja Chilambo Chasambano ja ŵandu ŵangalola.”) Tukusakoposyasoni mabuku gejinji gakulondesya Baibulo ga ŵandu ŵangalola. Kwa ŵakusaka kulijiganya kuŵalanga mabuku ga ŵandu ŵangalola, twakopwesye buku ja Chichewa jakuti, Phunzirani Kuwerenga Zilembo za Anthu Osaona. Bukuji japanganyidwe pakusaka kwakamuchisya ŵandu ŵangalola kuti akomboleje kuŵalanga buku ja ŵandu ŵangalola ni chikamuchisyo cha mundu jwakulola.
Apate mabuku ga ŵandu ŵangalola gepulinte mwakuŵechetana ni jwa Mboni sya Yehofa jwalijose kapena kuŵenda kuti ŵajendele.
Atende dawunilodi pa jw.org, yindu yampaka akamulichisye masengo pachipangiso chakulemba manosi.d
Mabuku ga yilembo yekulungwa soni yilembo yayikusakomboleka kuyikusya pa webusayiti jetu. Mabuku getu gejinji ga yilembo yekulungwa ŵagalinganyisye kuti gakamuchisyeje ŵandu ŵangalolechesya. Webusayiti jetu ja jw.org jalinganyidwe mulitala lyakuti jiwonechejepe chenene atamose pawukulisye yilembo. Yili yakombolekasoni kukusya yilembo ya mabuku getu pa JW Library.
Aŵechetane ni jwa Mboni sya Yehofa jwalijose kuti ŵape mabuku ga yilembo yekulungwa kapena aŵende pa webusayiti jetu kuti ŵajendele.
Atende dawunilodi mabuku ga yilembo yekulungwa pa jw.org gagakulandana ni mabuku ga yilembo yekulungwa gepulinte.
Mabuku gakwamba kupikanila. Tukopwesye ma Baibulo gakwamba kupikanila mu yiŵecheto yakupunda 200. Konjechesya pelepa, tukopwesyesoni mabuku gejinji gakwamba kupikanila gakulondesya ya Baibulo. Yindu yakwamba kupikanilayi ndaŵi syejinji yikusapwatikapo maloŵe gakulondesya yiwulili.
Apikanile kapena kutenda dawunilodi buku jakupikanila pa jw.org soni pa JW Library.
Atende dawunilodi pa jw.org yindu yampaka ayikamulichisye masengo pa mapologalamu gakuŵalanga yayili pa sikilini, mpela pologalamu jakuŵalanga mwakwesya maloŵe yayili pa sikilini, soni pologalamu jakupikanila mabuku.e
Maloŵe gakulondechesya fidiyo.f Ŵa Mboni sya Yehofa akopwesye mafidiyo gakulondesya ya Baibulo gakola maloŵe gakulondechesya m’yiŵecheto yakupunda 100. Mafidiyoga gakusigakamuchisya ŵandu kupikanichisya soni kamulichisya masengo malangiso gagakusasimanikwa m’Baibulo.
Mpaka apikanile yisyasyo ya maloŵe gakulondechesya fidiyo mu mafidiyo ga Chichewa gakuyichisyaga:
Misongano soni yakutendekwa. Wiki jilijose tukusasongana m’mipingo jajikusasimanikwa pa chilambo chosope kwatukusalijiganya soni kulambila. Chaka chilichose tukusatendasoni misongano jekulungwakulungwa. Pa misongano jajikusapagwa mafidiyo, tukusatenda yampaka tukombole kuti papagwe mafidiyo gakola maloŵe gakulondechesya mafidiyogo. Naga yili yakomboleka tukusitwakamuchisya ŵandu ŵangalola ŵalisoni ŵangapikana pa misongano jetu mwakwapatila ŵandu ŵampaka ŵagopoleleje mchiŵecheto chamakono. Mwamti tukusitwapochela ŵandu wosope mwangali lusagu.
Amanyilile yakwamba misongano jetu jajikusatendekwa chaka chilichose.
Atende nawo chikumbuchilo cha chiwa cha Yesu, chachili chakutendekwa chakusosekwa mnope chachikusatendekwa pa chaka.
José Luis Ayala akusatama ku Mexico. Jwalakwe jwapagwile jwangapikana soni kaneko ali ni yaka 29 jwaŵele jwangalola. Alole mwakusajiwonela misongano kuŵa jakusosekwa mnope soni yajitite pakumkamuchisya kuŵa jwakwiganya Baibulo jwambone.
a “Ŵandu ŵangalolechesya” ali ŵandu ŵakwete ulwele wa meso mwamti yikusaŵa yangakomboleka kwaposya, soni yeleyi yikusakwaya umi wawo wa lisiku ni lisiku. Mu ngani ajino, “ungalola” ukwimila ya ungalola usyesyenewo soni ungalolechesya.
b Yehofa lili lina lisyesyene lya Mlungu. (Salimo 83:18) Alole ngani jakuti “Ana Yehofa Ali Ŵani?”
c Mpaka aŵende kuti alole mwalikusatendechela lijiganyo lya Baibulo lyaluleleli.
d Chipangiso chakulemba manosi chili chipangiso chachikusakola yindu yakwakamuchisya ŵangalola kuŵalanga, kulemba soni kusunga manosi, nambosoni chikusaŵalanga yayilembedwe mwakwesya maloŵe. Yindu yakwakamuchisya ŵangalolayi yikusakamula masengo mu litala lyakuti yikusakola tuyindu twine twatukusakwela soni kutuluka kuti tupanganye yilembo ya ŵandu ŵangalola. Naga mundu akwete chipangiso chakulemba manosichi yikusamkamuchisya kuti akakola mabuku gejinji ga ŵandu ŵangalola.
e Pologalamu jakuŵalanga mwakwesya maloŵe yayili pa sikilini, soni pologalamu jakupikanila mabuku jikusaŵalanga mwakwesya maloŵe ga pa kompyuta kapena maloŵe gejambulidwe kala. Yeleyi yikusamkamuchisya mundu kupata peji jisyesyene jakusaka kuŵalanga.
f Maloŵe gakulondechesya fidiyo gali maloŵe gakusagapwatika mu fidiyo pakulondesya yayikutendekwa mu fidiyojo.