“Chimchipikana Masegwe ga Ngondo Chapakuŵandika”

“Kutandila panaŵele jwakugulusya ngani mu1960, mbele ndili mkugulusya ngani syakwamba ngondo chiŵandika 40 kusyungulila pa chilambo chosope chapasi. Nawuweni ukangani uwapali pasikati pa United States ni Soviet Union uli uyiche pakusawusya mnope soni mpaka pawamalile pakwe. Nambo chaka cha 2025 chandendekasyaga kudandawula mnope ligongo lyakuti mu chakachi mwatendekwaga ngondo syejinji. Nambosoni mbali jekulungwa jachilambochi jikakwayidwe mnope ni yakuyichisya yakogoya ya ngondosi mulitala lyakuti nganiyitendekweje chitandilile.”—John Simpson, jwamkulungwa jwa ŵakulokota ngani ku BBC, maloŵega tugombelechesye m’weji.

Ŵandu ŵajinji akudandawula mnope ligongo lya ngondo syasikutendekwa pachilambopa. Mwamti ŵajinji akusakayichila naga yindu yichiŵasoni chenene kusogoloku. Ana Yesu jwasasile yamti uli?

Yaŵasasile Yesu

Yesu jwasasile kala ya yindu yatukuyiwona mu ndaŵi jetu jino. Jwalakwe jwasalile ŵakulijiganya ŵakwe kuti, “Chimchipikana masegwe ga ngondo chapakuŵandika soni ngani syakwamba ngondo.”—Mateyu 24:6.

Atamose kuti yachiwawa soni ngondo syasikutendekwa masiku agano sikusatutendekasya kulagasika nganisyo, nambope tukwete chembecheyo chambone. Yeleyi yili myoyo ligongo lyakuti Yesu jwasasile kala kuti ngondo syasikwakwaya ŵandu ŵajinji nambosoni yakutendekwa yine ni ndamo sya ŵandu yili “chimanyisyo” cha “kumala kwa ndaŵi ajino.” (Mateyu 24:3; Luka 21:7) Yeleyi yikugopolela kuti ndaŵi jichiyika jele Yesu chachimasya ngondo pachilambopa. Ana chachitenda yeleyi chamti uli?

Yachachitenda Yesu

Pachangakaŵapa, Yesu jwali Mwenye jwa Uchimwene wa Mlungu, ‘chamasye ngondo pachilambo chosope chapasi.’—Salimo 46:9.

Kuti amanyilile yejinji pakwamba ya mtendele watuchikola kusogoloku, mwawuchiyichila, nambosoni mwawuchijila pakwakwaya wawojo, aŵalanjanje ngani jakuti, “Mwasichimalila Ngondo soni Yachiwawa.”