Ŵasayasi Anandiye Ndaŵi Jajikulosya Ndaŵi ja Kumala kwa Chilambo Kuti Jiŵandichile 12 Koloko Chilo

Pa Januwale 27, 2026, ŵasayasi ŵanandiye ndaŵi ja Wochia jawo jakulosya ndaŵi ja kumala kwa chilambo kuti jiŵandichile pa 12 koloko ja chilo. Wochiji, ndaŵi ja 12 koloko chilo jikwimila kumala kwa chilambochi ligongo lya yakutenda ya ŵandu.

• Bungwe jine jakolanjidwa kuti, “The Bulletin of the Atomic Scientists Science and Security Board, jiwutile Wochi Jakulosya Ndaŵi Jajisigele kuti chilambocho chijonanjidwe, mwamti kusigele ni masekondi 85 kuti 12 koloko ja chilo jikwane. Jeleji jili ndaŵi jejipi mnope, sonitu yeleyi nganiyitendekwejepo.”—Bulletin of the Atomic Scientists.

• Ŵasayasi akusakamulichisya masengo wochiji pakusaka kutukamuchisya kupikanichisya yineyakwe. Yindu yiyiche pakusakala mnope, ŵandu akulepela kukamulana kuti amasye yakusawusyayi mwamti yiyiche pakusawusya mnope. Ŵandu akusosekwa kuchenga mnope kuti yeleyi yikomboleche. Akusosekwa kwakamuchisya achimlongola ŵawo kuti atende yindu mwachitema.”—Alexandra Bell, president and CEO, Bulletin of the Atomic Scientists.

Ana chilambochi soni ŵandu chijonanjidwe pamkaŵapa? Ana tukusosekwa kogopaga yachiyitendekwe kusogoloku? Ana Baibulo jikusasala yamtuli?

Ana kusogoloku kutendekwe yamtuli?

Baibulo jikusasala kuti “chilambo chapasi chichitama mpaka kalakala” soni ŵandu “chachitamaga mwelemo mpaka kalakala.” (Jwakulalichila 1:4; Masalimo 37:29) Yeleyi yikulosya kuti ŵandu ngasajonanga chilambochi kapena kutendekasya kuti yaumi yikasimanikwamo.

Nambope, Baibulo jikusasala ya kumala kwa chilambo. Mwachisyasyo, jikusasala kuti “chilambo chikwawula.”—1 Yohane 2:17.

• Kuti amanyilile yajikusagopolela Baibulo pajikusala ya kumala kwa chilambo, aŵalanje ngani ja Chichewa jakuti “Kodi Dzikoli Lidzatha? Kodi Baibulo Limanena Kuti Zinthu Zonse Zidzawonongedwa?”

• Kuti amanyilile yajikusasala Baibulo yakwamba yindu yachiyitendekwe kusogoloku, aŵalanje ngani jakuti, “Ana Mbesi ja Chilambochi Jichiyika Chakachi?”

Ayiwoneje yindu mwakuŵajilwa

Baibulo mpaka jitukamuchisye kuti tuŵeje ŵaganisya chenene atamose kuti tukusimana ni yakusawusya. Chamtuli?

• Baibulo jikusatusalila yindu yakamuchisya. (2 Timoteyo 3:16, 17) Mwachisyasyo, aŵalanje ngani ja Chichewa jakuti, “Kodi Tingatani Kuti Tisamade Nkhawa Kwambiri” kuti amanyilile yampaka jijile Baibulo pakutukamuchisya kuti tukajasaga mtima patusimene ni yakusawusya.

• Baibulo jikusatukamuchisya kuti tujembecheyeje kuti yindu yichiŵa chenene msogolo muno. (Aloma 15:4) Jikusasalasoni yindu yachiyitendekwe pamkaŵapa soni msogolo. Yeleyi yikusatukamuchisya kuti tukatendaga woga ni yayikutendekwa pachilambopa.

Kuti ajimanyilile chenene Baibulo, tukwaŵenda kuti atande kulijiganya Baibulo mwalulele ni ŵa Mboni sya Yehofa.