Ana Mpaka Tukamulicisye Masengo Catuli Yindu Yakwamba Kupikanila
1. Kupwatika pa mabuku getu, ana tukwetesoni cici cakamucisya?
1 Ŵandu ŵajinji akusangalala kamulicisya masengo webusayiti jetu ja jw.org pakuŵalanga maloŵe ga usyesyene. (Mlal. 12:10) Nambo, ana pakwete pakamulicisye masengo yindu yakwamba kupikanila? Yindu yeleyi yikusakamucisya kuti apikanile yindu yejinji pa webusayiti. Ana yindu yakwamba kupikanila mpaka yitukamucisye catuli?
2. Ana mpaka tukamulicisye masengo catuli yindu yakwamba kupikanila pa lijiganyo lyapajika soni lyapeŵasa?
2 Yakutukamucisya pa Lijiganyo Lyetu Lyapajika Soni Lyapeŵasa: Kupikanila maloŵe ga ngani sya m’Baibulo, m’magasini, kapena m’mabuku getu patuli paulendo kapena patukutenda yindu ya lisiku ni lisiku, mpaka kutukamucisye kuti tukamulicisye masengo ndaŵi jetu mwakuŵajilwa. (Aef. 5:15, 16) Kombolekasoni kupikanilaga patukutenda kulambila kwetu kwa peŵasa nikuyaga yatukupikanilayo m’mabuku getu. Kamulicisya masengo yindu yakwamba kupikanila palijiganyo lyapajika kuli kwakamucisya naga tukusaka kuti tumanyilile mnope kuŵalanga kapena kulijiganya ciŵeceto.
3. Ana yindu yakwamba kupikanila mpaka yakamucisye ŵani mumkuli wawo?
3 Mu Undumetume wa Mumgunda: Ŵandu wa mumkuli wetu ŵajikusasoŵa ndaŵi jakuŵalanga, komboleka kuti mpaka aŵe ŵakusacilila kupikanila yindu yakwamba kupikanila. Mwine mpaka tusimane ni ŵandu ŵampaka asacilile kupikana utenga wa Ucimwene “m’ciŵeceto cawo.” (Mase. 2:6-8) M’mikuli jine, kupikanila yindu kuli ndamo jakusosekwa mnope. Mwambone, ŵandu ŵa Cimong’i akusasalila ŵanace ŵawo mbili ja mtundu wawo, soni ŵanacewo akusakumbucila cenene yapikeneyo. Ŵandu ŵajinji mu Africa akusanonyela kulijiganya mwa kupikanila ngani kutyocela kwa acimjawo.
4. Ana mpaka tuliwusye yiwusyo yatuli patukwakamucisya ŵandu mumkuli wetu?
4 Ana mumkuli wawo mpaka yiŵe yakamucisya kwawugulila acimsyenenyumba yindu yakwamba kupikanila m’ciŵeceto cawo? Ana kwa ŵane, mpaka yiŵe yakamucisya kwatumicisya yindu yakwamba kupikanila kupitila pa imelo? Ana mpaka yikombolece kujigala yindu yakwamba kupikanila pa intaneti ni kuyiŵika pa CD, ni kuja kumpa msyenenyumba jwalung’wanu pampepe ni yakuŵalanga yakwe? Yindu yakwamba kupikanila yiliyose yatugaŵile mu undumetume mpelaga buku, kabuku, magasini kapena kapepala komboleka kuyitendela lipoti. Yindu yakwamba kupikanila ŵayipangenye kuti tuyikamulicisyeje masengo palijiganyo lyapajika soni pakupanda mbeju sya Ucimwene sya usyesyene.—1 Akoli. 3:6.