Amkulupilileje Jwakulamulila Jwamkulungwa

1. Ana Yobu jwasimene ni yakusawusya yapi?

MUNDU jwakulupichika Yobu, jwasimene ni yindu yejinji yakutesya chanasa. Ŵanache ŵakwe wosope ŵawile, yilango yakwe yine yajiŵidwe soni yine yawulajidwe, ŵamasengo ŵakwe ŵawulajidwe. Nambosoni jwalakwe jwalwasile ulwele wakupweteka mnope. Konjechesya pelepa ŵandu ŵalesile kumchimbichisya. “Achimjakwe” ŵamŵechetele maloŵe gangalimbikasya. Chakutesya chanasasoni chili chakuti ŵamkwakwe ŵaŵanonyelaga mnope, ŵamlimbikasisye kuti “agambe kumtukana Mlungu kuti awe.” (Yob. 2:9; 15:​4, 5; 19:​1-3) Yindu yaŵasimene nayo Yobuyi, yikamtendekasisye jwalakwe kuti aleche kumdalila Mlungu. Mundu pakusimana ni yakusawusya mpela yaŵasimene nayo Yobu, mpaka atande kukayichila naga Yehofa mpaka akombole kwachenjela soni kwakulupusya ŵakutumichila ŵakwe.

2-3. Ana ŵandu ŵane akusakayichila ya chichi? Soni chitulijiganye chichi m’buku ja Yobu?

² Mwakulandana ni Yobu, m’wejisoni ndaŵi sine mpaka tusimane ni yakusawusya yampaka yilinje chikulupi chetu ni kulepela kumkulupilila Yehofa. Yili myoyo ligongo lyakuti tukutama mu “ndaŵi jakusawusya soni jakogoya.” (2 Tim. 3:1) Myoyo, patukusimana ni yakusawusya yakulekanganalekangana, mpaka tutande kulagasika nganisyo ni kuyiwonaga kuti nganituŵa tukombwele kupilila. Yakutendekwa mpela yeleyi, yitendekasisye ŵane kutanda kukayichila naga Yehofa akusasamala ya jemanjajo.

³ Ana wawojo pakwete payatendechele yeleyi? Naga yili myoyo, ngakusosekwa kudandawula mnope. Yobu jwamanyilile kuti Yehofa akusiŵakulupusya ŵandu ŵali ŵakulupichika kwa jwalakwe. Mwejisoni mpaka tukombole kwakulupilila mnope Atati ŵetu ŵakwinani. Kuti tukombole kutenda yeleyi, kwende tulijiganye yindu yiŵili kutyochela m’buku ja Yobu. Chindu chandanda, chitulole kuti Yehofa ali Jwakulamulila Jwamkulungwa mnope. Soni chaŵili, chituyiwone kuti Mlungu Jwamachiligosope akwete machili gakukwanilisya yindu yasasile. Nambosoni akusiŵachenjela ŵakutumichila ŵakwe mwakwapa yindu yakwakamuchisya kuti apitilisye kuŵa paunasi wambone ni jwalakwe.

SATANA ŴAYICHE PASIKATI PA JEMANJAJO

4. Ana ŵani ŵaŵasimanikwe pa msongano wawatendekwe kwinani wakusawusala m’buku ja Yobu?

⁴ Lisiku line “ŵanache ŵa Mlungu jusyesyene” ŵasongene kwinani pameso pa Yehofa. Baibulo jikusatusalila kuti nombenajo “Satana ŵayiche pasikati pa jemanjajo.” (Yob. 1:6) Keleka kali kandanda m’Baibulo kusala lina lyakuti Satana. Jwalakwe ŵampele lina lyeleli ligongo lyakuti akusamsisya Yehofa. Yehofa ŵamkundile Satana kusimanikwa pa yakambilanayi, atamose kuti jwalakwejo pandaŵiji nganaŵa mwanache jwakwe jwakulupichika. Jwalakwe jwaŵele mdani jwa Yehofa, soni jwa malayika ni ŵakutumichila ŵa Yehofa ŵakulupichika pachilambopa. Yehofa jwalosisye kuti Satana nganaŵasoni mbali ja liŵasa lyakwe lya kwinani pandaŵi jaŵaŵechete maloŵe ga pa Genesesi 3:15. Yayikugopolela kuti Satana nganaŵa mbali ja “jwamkongwe” gagali malayika gakulupichika ga Yehofa gele galiji gakuti gachiŵeleka “mwanache.”

5. Ana tukulijiganya chichi pamsongano wawatendekwe kwinani?

⁵ Yehofa jwatesile yakuti yaŵakambilene pamsonganowu, yilembedwe m’Baibulo ni chakulinga chakuti m’weji tuyimanyilile. Maloŵe gaŵaŵechete Satana gakusalosya kuti jwalakwe ali jwakusakala soni akusaŵengana mnope ni ŵakutumichila ŵa Yehofa. (Yob. 1:9; alole Chiwunukuko 12:10) Pana chindu chine chatukulijiganya pa yindu yaŵakambilene pamsonganowu. Yehofa pakukamulichisya masengo machili gakwe gangali malile, akusagakamulichisya masengo mwakuŵajilwa soni mwakwaganichisya ŵakutumichila ŵakwe. Tukulijiganyasoni kuti Mlungu Jwamachiligosope mpaka ŵaŵichile ŵandu malile gakatende kawo ka yindu.

YEHOFA AKUSAŴIKA MALILE

6. Ana Yehofa jwalosisye chamti uli kuti ni juŵalongolelaga msongano wuwatendekwe kwinani? (Yobu 1:​7, 8)

⁶ Aŵalanje Yobu 1:​7, 8. Yehofa ni juŵalongolelaga yakutendekwa pamsonganowu. Jwalakwe ŵamwusisye Satana kuti, “Ana mtima wenu uli pa jwakutumichila jwangu Yobu?” Yehofa ŵamanyililaga chenene kuti Satana jwasakaga kulimbana ni jwakutumichila jwakwe jwakulupichika Yobu. Kwende sambano tulole yaŵatesile Yehofa pakukamulichisya masengo machili gakwe pakumkamuchisya Yobu.

7. Mwakamulana ni Yobu 1:​10, 11, ana Satana jwasasile kuti ŵandu akusamtumichila Yehofa pa ligongo lyapi?

⁷ Aŵalanje Yobu 1:​10, 11. Yehofa ali jwakulamulila Jwamkulungwa mnope kumpunda jwalijose. Jwalakwe akusakamulichisya masengo machili gakwe mu litala lyakuliwona kuti lili lyakuŵajilwa. (Yel. 32:17; Dan. 4:35) Atamose yili myoyo, Satana jwasasile kuti Yehofa akusakamulichisya masengo machili gakwe mwakulemwecheka. Jwalakwe jwasasilesoni kuti Mlungu ali jwachinyengo ligongo lyakuti akusiŵapa ŵandu yindu yambone mpela muyaŵelele ni Yobu ni chakulinga chakuti amtumichileje jwalakwejo. Satana jwasasilesoni kuti ŵandu ali ŵakutunduka ligongo lyakuti akusamtumichila Yehofa pakusaka kupata yindu yambone kutyochela kwa jwalakwejo. Nambo ana Yehofa ŵamjanjile yamti uli Satana?

8-9. Ana Yehofa ŵamŵichile malile gamti uli Satana soni ligongo chichi? (Yobu 1:12) (Alolesoni chiwulili.)

⁸ Aŵalanje Yobu 1:12. Yehofa ŵamkundile Satana kuti amlinje Yobu. Nambope ŵampele malile gakatende kakwe ka yindu. Mlungu ŵamsalile jwalakwe kuti, “Mkono wenu ukamkwaya jwalakwejo.” Malayika gosope gagasongene palisikuli, gampikene Yehofa ali mkulamula yeleyi Satana. Satana nganakola machili gakutenda yindu yejinji kupunda yaŵamkundile Yehofa kuti atende. Jwalakwe jwasosekwaga kupikanila soni kukuya yaŵamlamwile Yehofa. Atamosesoni masiku agano, Satana mpaka akombole kutenda yindu yamkundile Yehofa kuti atende. Yehofa jwakamulichisye masengo machili gakwe pakumchenjela Yobu. Soni jwalosisye kuti jwalakwe ali Mlungu jwachinonyelo soni jwachilungamo.

⁹ Yindu nganiyimjendela Satana ligongo yindu yaŵatesile pakumlinga Yobu, yajinjile mmesi. Yobu jwapitilisye kuŵa jwakulupichika kwa Atati ŵakwe ŵakwinani. (Yob. 1:22) Atamose yaliji myoyo, Satana jwasakaga kupata pulani jine pakusaka kumtendekasya Yobu kuti aŵe jwangakulupichika kwa Yehofa.

10. Ligongo chichi Yehofa jwakundile kuti Satana apitilisye kumlinga Yobu? (Yobu 2:​2-6)

¹⁰ Aŵalanje Yobu 2:​2-6. Pandaŵi aji sano, Satana jwaganichisye yakumtendela Yobu chindu chakusakala mnope. Jwalakwe jwasasile kuti Yobu chakunde kumtukana Mlungu ni chakulinga chakuti akulupusye umi wakwe. Pakusaka kumasya nganiji, Yehofa jwakundile kuti Satana amtendekasye Yobu kulwala ulwele wakupweteka mnope. Nambope pandaŵi ajisoni, Yehofa ŵamŵichile malile Satana. Ŵamsalile kuti, “Nambo mkasimumwulaga.” Satana jwasosekwaga kupikanila yaŵamsalile Mlunguyi. Jwalakwe nganakola machili gakumwulaga Yobu. Apasoni Yehofa jwalosisye kuti ali Jwakulamulila Jwamachiligosope. Yili myoyo ligongo lyakuti Satana ngamkanakombola kutenda yindu yejinji kwa Yobu kupunda yaŵamkundile Yehofa kuti atende.

YEHOFA ŴAMASISYE YAKUSAWUSYA YA YOBU

11. Ana Yehofa ŵampele upile wamtuli Yobu panyuma pakumasya yipwetesi yakwe? (Yobu 42:​10-13)

¹¹ Aŵalanje Yobu 42:​10-13. Yaliji yachimanyichile kuti Yobu chapitilisye kuŵa jwakulupichika. Mwamti Yehofa nganakundasoni kuti Satana apitilisye kumlinga Yobu. Jwalakwe jwamasisye yipwetesi yaŵasimene nayo Yobu. Pandaŵi ajisoni Satana nganakola machili gakumlekasya Yehofa kumchenjela soni kumpa upile Yobu.

12. Asale chisyasyo chakulosya yindu yayikusatendekwa ligongo lyakukulupilila kuti Yehofa mpaka atukulupusye.

¹² Yehofa aŵele ali mkukamulichisya masengo machili gakwe, pakwakamuchisya ŵakutumichila ŵakwe m’masiku gakumalisya gano. Mwachisyasyo, mu 1945 asilikali ŵajigele ŵa Mboni sya Yehofa ŵakwana 230 ŵaŵaliji ku kampu jakwalagachisya ŵandu ku Germany, ni kwenda nawo ulendo welewu soni wakogoya wakwawula ku nyasa kuti akawulaje. Atamose kuti yaliji myoyo, ŵa Mboni wosopeŵa ŵakulupwiche. Pakusala yayatendecheleyi, jemanjaji ŵasasile kuti, Yehofa ŵakulupwisye mpela yaŵatesile pakwakulupusya anyamata ŵatatu ŵa chihebeli ŵaŵaponyisye mu ng’aso ja moto. Anyamataŵa paŵakopokaga mu ng’asomu nganapikanikaga ata kaliwungo ka lyosi. Mwakulandana ni yeleyi ŵa Mboniŵa ŵasimenetu ni yakusawusya yakogoya mnope. Nambope chikulupi chawo chalimbile kulekangana ni muyaŵelele pandanda. Yehofa ŵapele machili jemanjaji. Jemanjaji ŵayiwonagasoni kuti Yehofa ŵakulupwisye mpela yaŵatesile pakumkulupusya Danieli mu lisimbo lya masimba. Myoyo, kutyochela pandaŵi jeleji jemanjaji ŵaliji ŵakusimichisya kumtumichila Yehofa kwa umi wawo wosope. Soni ŵaŵechete kuti kumtumichila Yehofa kwa umi wawo wosope, chili chindu chambone mnope champaka atende pakumyamichila jwalakwe.—Alole Daniyele 3:27; 6:22.

13. Ana tukusosekwa kulupililaga chichi patukusimana ni yakusawusya? (Alolesoni yiwulili)

¹³ Mwejisoni ndaŵi sine mpaka tusimaneje ni yakusawusya yampaka yitutendekasyeje kuliwona kuti atuponyisye mu lisimbo lya masimba. (1 Pet. 5:​8-10) Payitendekwe yeleyi, mpaka tutenguche ni kuyiwonaga kuti yakusawusya yetuyo, nganiyiŵa yimasile. Nambotu, kuganichisya ya chisyasyo cha Yobu mpaka kutukamuchisye mnope. Tukulupilileje kuti Yehofa akwete machili gakumasya yakusawusya yetuyo. Jwalakwe mpaka amasye yakusawusyayo apanopano kapena m’chilambo chasambano. Yehofatu jwaŵisile chile ndaŵi jakuti chamasye yakusawusya yayikutendekwa pachilambopa. Pachachigamba kumasya yakusawusyayi, ngasiwujilasoni mpaka kalakala.

YEHOFA AKUSIŴANONYELA ŴAKUTUMICHILA ŴAKWE ŴAKULUPICHIKA

14-15. Ana Yehofa akusaka kwatendela chichi ŵakutumichila ŵakwe ŵakulupichika soni ligongo chichi? (Yobu 14:15) (Alolesoni chapachikuto.)

¹⁴ Aŵalanje Yobu 14:15. Atati ŵetu ŵakwinani ali ŵakulupichika kwa ŵandu ŵali ŵakulupichika kwa jwalakwe. Jwalakwe akusiŵanonyela mnope jemanjaji mwamti atamose ali awile, chachajimusya. Myoyo, pachachigamba kwajimusya jemamjaji m’chilambo chasambano, jwalijose chachiŵa jwakusangalala mnope.—Yes. 65:17

¹⁵ Panyuma pakuti Yehofa amasisye yipwetesi yaŵasimanaga nayo Yobu, jwalakwe jwapitilisye kutama mchilambo chakulamulilidwa ni Satanachi. Atamose yaliji myoyo, Baibulo jikusatusalila kuti Yehofa ŵampele Yobu upile wekulungwa. Ŵamposisye ku ulwele wawalwalaga ula, soni ŵampele yindu yine yejinji kupunda yaŵakwete pandanda. Yindu yaŵampeleyitu, yagambile kulosya kuti Yehofa chachimtendela Yobu yindu yekulungwa kusogoloku. Yehofa jwalosisye kuti akusasaka kuti ŵakutumichila ŵakwe ŵakulupichika asangalaleje ni umi. Yehofa chachapa upile ŵandu wosope ŵakusamtumichila jwalakwejo mwakulupichika. Soni chachakunda kuti atame ni umi wamlama mu Paladaiso pachilambopa (Chiw. 21:​3, 4) Mpela Jwakulamulila Jwamkulungwa mnope, Yehofa ali jwakusachilila kutenda yeleyi. Kuganichisya yindu yambone yachachitutendela Yehofa kusogoloku, mpaka kutukamuchisye kuti tukomboleje kupilila yakusawusya yatukusimana nayo.

16. Ana ni ligongo line lyapi lyakututendekasya kulupilila kuti Yehofa ali Jwakulamulila Jwamkulungwa mnope?

¹⁶ Panyuma pakuti Yobu atemi ni umi kwa yaka yejinji, kaneko jwawile. Nambope pakuŵapo Yehofa ali Jwakulamulila Jwamkulungwa mnope, akwete machili gakumjimusya jwalakwe ku chiwa. (Det. 32:39) Yehofa jwasagwile chile ndaŵi jakuti chiŵajimusye ŵandu wosope ŵakusiŵanonyela. Sonitu pangali jwampaka amlepelekasye jwalakwe kutenda yeleyi.—Alo. 8:​38, 39.

AMKULUPILILEJE MNOPE YEHOFA

17. Ana ni chichi chachikulosya kuti Satana alepele kwajonanga ŵandu ŵa Yehofa?

¹⁷ Ngani ja Yobu, jikusatupa magongo gambone mnope gakututendekasya kumkulupilila Yehofa. Tukumyamichila mnope Yehofa ligongo lyakuti nganakunda kuti Satana ŵajonanje ŵandu ŵakwe. Masiku agano, tukusayiwona kuti Yehofa ali Jwakulamulila Jwamachiligosope ligongo lyakuti pana ŵandu ŵakupunda 9 miliyoni ŵakumtumichila jwalakwe mwakulupichika. Mwakuwilisyawilisya tuŵele tuli mkuyiwona kuti pangali chida chilichose champaka apanganye ŵandu champaka chipunde pakulimbana ni ŵakutumichila ŵa Yehofa. (Yes. 54:17) Maboma gamachili mnope soni achimlongola ŵa dini aŵele ali mkulingalinga kutulekasya kulalichila soni kumlambila Yehofa. Nambope yeleyi nganiyikomboleka ligongo Yehofa aŵele ali mkutukamuchisya. Pangali jwalijose jwampaka akombole kutulekasya kwajiganya ŵane yisyesyene yakwamba Yehofa soni kwasalila kuti Satana ali jwa unami soni jwakuwulaga. Mwamti atamose tuli tuwile ligongo lyakumtumichila Yehofa, tukusamanyilila kuti chachajimusya wosope ŵaŵawile ali ŵakulupichika kwa jwalakwe.—Hos. 13:14.

18. Ligongo chichi ngatukusosekwa kogopa yachitusimane nayo kusogoloku?

¹⁸ Kuŵalanga soni kuganichisya mnope ngani ja Yobu, mpaka kulimbisye chikulupi chetu. Soni mpaka kutukamuchisye kuti tukatendaga woga patukukosechela yindu yampaka tusimane nayo kusogoloku. Pandaŵi ja yakusawusya yekulungwa, Satana soni ŵandu ŵali ku mbali jakwe chachiwona kuti ŵandu ŵa Yehofawe tuli ŵangasawusya kutujimuchila. Nambo mpela muyaŵelele ni Yobu, Yehofa chachilosya kuti ali Jwakulamulila Jwamkulungwa soni jwamachili mwamti ngasakunda kuti Satana atujonanje. Yindu yeleyitu chiyitendekwe pachangakaŵapa. Yehofa chachimasya yakusawusya yosope yaŵayitandikasisye Satana. Yesu chachimwugalila Satana yimpepe ni yiŵanda yakwe mwisimbo kwa yaka 1000. (Luk. 8:31; Chiw. 20:​1-3) Mpela muŵaŵechetele Yehofa, payichigamba kumala yaka 1000 yeleyi, Satana pampepe ni wosope ŵakusamjimuchila Yehofa, chachijonanjidwa.—Gen. 3:15; Alo. 16:20; Chiw. 20:10.

19. Ana ni yindu yambone yapi yakwembecheya ŵandu ŵakusamkulupilila Yehofa? (Alolesoni chiwulili.)

¹⁹ Tukwembecheya mwachidwi chilambo chasambano pandaŵi jele tuchikola yilu yamlama ni kusangalalaga ni umi. Umiwu uchiŵa wakusangalasya mnope. Paja Yehofa jwatusalile kuti, “Alole. Ngupanganya yindu yosope kuti yiŵe yasambano.” (Chiw. 21:5) Ana yeleyi yikugopolela chichi? Kwa ndaŵi jandanda kutyochela pele Satana ŵasokonasisye ŵandu mu mgunda wa Edeni, jwalakwejo pampepe ni yiŵanda yakwe ngasakombolasoni kwawulasya ŵandu kapena kwatendekasya kuti atendeje yakusakala. Kusala yisyene tuchiŵa ŵakusangalala mnope ligongo tuchigonaga lugono lwambone soni ngasitulagasikaga nganisyo ni yindu yatukulaga nayo m’chilambo cha Satanachi. Ŵandu ŵachachikulupuka pa Alamagedo, chachiyiwona yakusimonjesya yejinji. Ŵakulwala, chachipola ku yilwele yawo. Kupwatika pelepa, tuchawonasoni ŵakunonyelwa ŵetu ŵaŵawile ali mkwimuka ku chiwa ni kuŵasoni chijumi. Tuchisangalalatu ni umi mpela muŵasachilaga Atati ŵetu ŵakwinani.

20. Ana wawojo ali ŵakusachilila kutenda chichi?

²⁰ Masiku gakumalisya agano, chitupitilisyeje kusimana ni yakusawusya. Myoyo tukusosekwa kuŵa ŵakulimba mtima kuti tukombole kuŵa ŵakulupichika. Kwende tupitilisye kumkulupilila mnope Yehofa soni kumpikanila ligongo ali jwakulamulila jwetu. Tutendeje yindu yakulosya kuti tukusitwanonyela mnope Atati ŵetu ŵakwinani soni yakulosya kuti Satana ali jwa unami. Tukusosekwa tukulupilileje kuti naga tukupitilisya kuŵa ŵakulupichika kwa Yehofa, tuchikola sogolo jambone. Yehofa ali jwakusachilila kwapa ŵakutumichila ŵakwe ŵakulupichika yindu yambone. Sonitu jwalakwe ngasalepela kutenda yeleyi.