“Mlungu Jwakusaŵecheta Yisyesyene” Akusatenda Yasasile

1. Mwakamulana ni Salimo 31:​2-5, ligongo chichi tukusosekwa kumkulupililaga mnope Yehofa?

TUKUTAMA m’chilambo chakulamulidwa ni Satana soni unami uwandile mnope. Pane yikuŵaga yakusawusya kwamanyilila ŵampaka twakulupilile. Ŵamalonda ŵajinji akusatenda yindu yachinyengo soni akusaŵecheta yaunami pakwamba yindu yakwete pakusaka kuti ŵandu agambe kwasuma basi. Ŵandu ŵanesoni akusayiwona kuti nganaŵa ŵakulupilile achimjawo ŵapamtima. Nambope, yili yakusangalasya kumanyilila kuti m’weji mpaka tumkulupilile mnope Yehofa, “Mlungu jwakusaŵecheta yisyesyene.” (Aŵalanje Salimo 31:​2-5) Yehofa jwangalambusya soni yosope yakusaŵecheta yikusaŵa yisyesyene. Myoyo, mpaka tukulupilile kuti chachitenda yosope yaŵaŵechete.

2. Ana munganiji chitulijiganye chichi?

² Mungani ajino, chitukambilane magongo gane gampaka gatutendekasye kuti tumkulupilileje mnope Yehofa ni mtima wetu wosope. Kaneko, chitukambilane yachachitenda Mlungu jwakusaŵecheta yisyesyene pakumasya chilambo cha Satanachi. Soni chitulole yakutenda apano kuti akwanilisye chakulinga chakwe. Kukambilana yeleyi, chikutukamuchisye kuti tulalichileje mwakulimba mtima yakwamba Yehofa.

LIGONGO CHICHI TUKUSOSEKWA KUMKULUPILILA MLUNGU?

3. Ligongo chichi mpaka tumkulupilile mnope Yehofa?

³ Mpaka tumkulupilile Yehofa ligongo ni juŵapanganyisye yindu yosope. Jwalakwe jwapanganyisye kwinani soni chilambo chapasi pampepe ni yindu yosope ya umi yayili mwelemo. (Gen. 1:1; Sal. 36:9; Chiw. 4:11) Kupwatika pelepa, jwapanganyisyesoni yindu yakutukamuchisya kuŵa ni umi mpela mpweya soni mesi. Yehofa akwete machili gakulolechesya kuti yindu ngayikutendekwa mwakupundanganya malile pachilambopa. Ngatukusosekwa kukayichila kuti Jwalakwe chatulongoleleje chenene soni kuti chachitupa umi wambone kusogoloku. Yili myoyo ligongo lyakuti jwalakwe ni juŵatupanganyisye, akusamanyilila chilichose, soni akwete machili gangamala.

4. Ana tukumanyilila chamti uli kuti Yehofa akusatunonyela?

⁴ Mpaka tumkulupilile Yehofa ligongo lyakuti akusatunonyela. Yehofa jwapanganyisye ŵandu ni kwapa mtuka wa umi ligongo jwasakaga kuti asangalaleje mpela jwalakwe. Paŵapanganyaga ŵandu, Jwalakwe jwasasile ya chakulinga chakwe pajwatite, “Kwende tupanganye mundu m’chiwanichisyo chetu kuti aŵe jwakulandana ni m’weji.” (Gen. 1:26) Jwalakwe jwatupele ufulu wakusagula yakutenda, soni jwapanganyisye chilambo chakusalalachi kuti chiŵe malo getu gakutama. (Sal. 115:16) Yehofa jwajaliwe achinangolo ŵetu ŵandanda mwakwapa masengo gakuti achilinganye chilambochi kuŵa Paladaiso. (Gen. 1:28; 2:15) Kupwatika pelepa, ŵapele yakulya yakulekanganalekangana, yisogosi, yinyama ni yindu yine yejinji kuti asangalaleje nayo. Yaŵatesileyi, yalosisye kuti “chinonyelo chakulupichika cha Yehofa chichiŵa mpaka kalakala.”—Sal. 103:17.

5. (a) Ana Yehofa ŵatesile chichi Adamu ni Hawa paŵamjimuchile? (b) Ana ni yindu yine yapi yaŵasasile Mlungu yele yakwanilichikwe? (Alole libokosi lyakuti “Ndaŵi Syosope Mlungu Akusasala Yisyesyene.”)

⁵ Mpaka tumkulupilile Yehofa ligongo lyakuti akusatenda yaŵechete. Yehofa “nganachipanganya chilambochi kuti chiŵe changali kandu, nambo kuti chiŵe malo gakutama ŵandu.” (Yes. 45:​18, 19) Adamu ni Hawa paŵagambile kumjimuchila Yehofa, ŵasosekwaga kuwulajidwa. Yikaŵe kuti yeleyi yitendekwe yikaŵele mpela kuti chakulinga cha Mlungu chilepechekwe. Nambotu paja Yehofa akusatenda yindu yasasile. (Yes. 46:​10, 11) Myoyo, chakulinga chakwe chakuti chilambo chapasi chigumbale ni ŵandu ŵakutenda yambone nganichichenga. Ni ligongo lyakwe jwakundile kuti Adamu ni Hawa, aŵeleche ŵanache. Kaneko, Jwalakwe jwampeleche Mwanache Jwakwe kuti aŵe mbopesi jakwawombola ŵanache ŵa Adamu. Yeleyi yakamuchisye jemanjaji kuti akolesoni chembecheyo chakutama ni umi mpaka kalakala.—Yoh. 3:16.

YAŴELE ALI MKUTENDA YEHOFA PAKUSAKA KWANILISYA CHAKULINGA CHAKWE

6. Adamu ni Hawa ali amjimuchile Yehofa, ana jwasasile kuti chichitendekwa chichi?

⁶ Satana ni juŵamtendekasisye Adamu ni Hawa kuti amjimuchile Mlungu. Jwalakwe ali ‘lijoka lyakalakala lila, lyalikusamanyikasoni kuti Satana soni Jwakulambusya.’a (Chiw. 12:9; Gen. 3:​4, 5; Yoh. 8:44) Ligongo lya yindu yaŵatesileyi, Yehofa jwasasile kuti Satana chachijonanjidwa. (Gen. 3:15) Nambope yeleyi mkanitendekwe, ŵajinji chachiŵa ku mbali ja Satana soni chachitendaga yindu mpela jwalakwejo. Atamose yili myoyo, pachisimanikwasoni ŵane ŵachachipitilisya kuŵa ŵakulupichika kwa Yehofa.

7. Ana ŵani ŵali ku mbali ja Satana soni chachisimana ni yamti uli?

⁷ Malayika gane gamjimuchile Yehofa ni kuŵa ku mbali ja Satana. Kupwatika pelepa, panasoni ŵandu ŵajinji ŵele ngakusasaka kumpikanila Mlungu. Jemanjaji ali ŵanache ŵa Satana ligongo lyakuti akusamsisya Yehofa. Nambo pandaŵi jaŵasagwile Mlungu, Satana soni wosope ŵali ku mbali jakwe chachijonanjidwa.—Dan. 2:44; Alo. 16:20.

8. Ana Yesu jwatesile chichi mu 1914? (Alolesoni yiwulili.)

⁸ Ligongo chichi tukusosekwa kulupilila kuti Yehofa chachimjonanga Satana pampepe ni wosope ŵali ku mbali jakwe? Mu 1914, Yesu jwaputile ngondo jakulimbana ni Satana soni yiŵanda yakwe mwamti ŵagwichisye pachilambo chapasi. (Chiw. 12:​7-9) Atamose kuti ngondoji jatendekwe kwinani, nambope yakuyichisya yakwe yikusatukwaya m’weji. Ni ligongo lyakwe Baibulo jikusati, “likungu pachilambo chapasi ni nyasa, ligongo Satana juyiche kweleko. Jwalakwe ali jwakutumbila mnope ligongo akumanyilila kuti jimsigalile ndaŵi japanandi.” (Chiw. 12:12) Myoyo kutandila mu 1914, Satana aŵele ali mkulimbana ni ŵandu pachilambopa mwamti yindu yiŵele yili mkusakala mnope. Kusala yisyene yili yakupikanika kuŵecheta kuti “likungu pachilambo chapasi.” Nambope, pachangakaŵapa Yesu ‘chachimalisya kumgomeka’ Satana yalumo ni wosope ŵali ku mbali jakwe mwamti chachiwulajidwa. (Chiw. 6:2) Yesu pachachitenda yeleyi, chachilosya kuti Satana ali jwakusakala soni jwaunami. (Sal. 45:​4-6) Mwamti jwalijose chachimanyilila kuti Yehofa ali Mlungu jwakusaŵecheta yisyesyene.—Esek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

YEHOFA AKWASONGANGANYA ŴANDU ŴAKUSANONYELA YISYESYENE

9. Ana Yehofa akwasonganganya ŵani masiku agano?

⁹ Yehofa aŵele ali “kuyisonganganya yindu yosope pampepe mwa Klistu, yindu yakwinani soni yindu ya pachilambo chapasi.” (Aef. 1:10) “Yindu yakwinani,” yikwimila Aklistu ŵasagulwe ŵachachilamulila yimpepe ni Klistu kwinani. “Yindu ya pachilambo chapasi” yikwimila ŵandu ŵachachitama kwangamala m’Paladaiso pachilambopa. Ŵakutumichila ŵa Yehofaŵa akulipeleka mnope pakwakamuchisya ŵandu ŵakwete nganisyo syambone kuti amanyilile yisyesyene yakwamba Yehofa soni kwalosya kuti Satana ali jwaunami.

10. Ana Yehofa akwakamuchisya chamti uli ŵandu kumanyilila yisyesyene? (Chiwunukuko 14:​6, 7)

¹⁰ Yehofa ŵatumile ŵandu ŵakwe kuti akamuleje masengo gakulalichila ni chakulinga chakuti ŵasonganganye ŵandu ŵa mitima jambone. Masengoga gakukamulidwa mnope masiku agano kulekangana ni kala kose. (Aŵalanje Chiwunukuko 14:​6, 7) Yisyene kuti Yehofa akukamulichisya masengo ŵandu pakwasalila ŵane ngani syambone. Nambope, malayika gakusakamula nawo masengo gakwasonganganya mumpingo wa Chiklistu ŵandu ŵakwete nganisyo syambone. Kwa yaka yejinji, Satana aŵele ali mkukamulichisya masengo Babulo jwamkulungwa jwali dini syosope syaunami pakuwandisya yindu yaunami yakwamba Yehofa. Myoyo, masengo gakulalichilaga gakusalosya peswela kuti yasikusajiganya dinisi yili yaunami. (Chiw. 18:​2, 4) Pachangakaŵapa, dini syosope syaunami chisijonanjidwe mwamti Mlungu jwakusaŵecheta yisyesyene chachipochela uchimbichimbi wakusasochela jwalakwe.—Chiw. 17:16.

11. Ana mpaka twamanyilile chamti uli ŵakutumichila ŵa Yehofa ŵasyesyene?

¹¹ Yehofa akwasonganganya ŵandu ŵakulekanganalekangana pachilambopa kuti aŵe m’liŵasa lyakwe. (Chiw. 7:​9, 10) Ŵanduŵa papikene “ngani syambone” akusamanyilila kuti apatile yijiganyo yisyesyene soni akusasaka kuŵa mu gulu ja ŵandu ŵa Yehofa. (Mak. 13:10) Masiku agano, yili yangasawusya kwamanyilila ŵandu ŵakusamtumichila Yehofa m’litala lyakuŵajilwa. Jwakulochesya Malaki jwasasile kala kuti, “Timchilekanganya pasikati pa ŵandu ŵakulungama ni ŵangalumbana, pasikati pa ŵandu ŵakutumichila Mlungu ni ŵangamtumichila.” (Mala. 3:18) Ŵakutumichila ŵa Yehofa, akusalosya kuti akusatumichila Mlungu jusyesyene kupitila mu ndamo syawo syambone soni masengo gawo gakulalichila.

12. Ana masengo gakulalichila gakusakamuchisya chamti uli kuti chakulinga cha Yehofa chikwanilichikwe?

¹² Patukukamula masengo gakulalichila “ngani syambone . . . syakwamba ya uchimwene,” yikusaŵa kuti tukupikanila yaŵatulamwile Yesu soni pandaŵi jakulandanajo tukusaŵa kuti tukukwanilisya yakulochesya. (Mat. 24:14; 28:​18-20) Yakuyichisya yakwe, ŵandu ŵajinji pachilambopa akuŵa ŵakulijiganya ŵa Klistu soni jemanjaji akusakola chembecheyo chakumtumichila Mlungu jwakusaŵecheta yisyesyene mpaka kalakala. Kusala yisyene, uli upile wekulungwa kukamula nawo masengo gakukamuchisya kuti chakulinga cha Yehofa chikwanilichikwe.

TUKAKAYICHILAGA KUTI YEHOFA CHACHITENDA YAŴASASILE

13. Ana Satana akusalimbana mnope ni ŵani soni ligongo chichi?

¹³ Satana ali jwakutumbila mnope ligongo akumanyilila kuti “jimsigalile ndaŵi japanandi” kuti chilambo chakwechi chijonanjidwe. (Chiw. 12:​12, 13) Myoyo, jwalakwe akulimbana mnope ni ŵasagulwe “ŵakusapikanila malamusi ga Mlungu soni ŵakwete masengo gakutendela umboni yakwamba Yesu.” (Chiw. 12:17; 14:12) Kupwatika pelepa, jwalakwe akusalimbanasoni ni wosope ŵakusiŵakamuchisya ŵasagulwe pamasengo gawo.

14. Ana chichitendekwa chichi Satana pachachajimuchila ŵandu ŵa Yehofa? (Alolesoni chiwulili.)

¹⁴ Panyuma pakuti Babulo jwamkulungwa ajonanjidwe, ŵandu ŵali ku mbali ja Satana chachajimuchila ŵandu ŵa Yehofa. Kwimuchila kweleku kuchitandikasya ngondo ja Alamagedo. (Chiw. 16:​13, 14, 16) Nambope, Yesu pampepe ni gulu ja ngondo jakwinani, chachakulupusya ŵandu ŵa Yehofa soni chachijonanga ŵandu wosope ŵali ku mbali ja Satana. (Chiw. 19:​19-21) Payichitendekwa yeleyi, ngasipasimanikwa ŵandu ŵakusakala soni ŵakuŵecheta yindu yaunami. (Chiw. 21:8) Ŵandu wosope chachimchimbichisya mnope Mlungu jwakusaŵecheta yisyesyene soni jwachilungamo.

15. Ligongo chichi ngatukusosekwa kukayichila kuti yaŵatusalile Yehofa chitendekwe kusogoloku? (Yesaya 65:​16, 17) (Alolesoni chiwulili.)

¹⁵ Masiku agano, ŵandu ŵajinji pachilambopa ali ŵagaŵikangana. Nambo Yehofa akwakamuchisya ŵandu ŵakwe mwamti ali ŵakamulana mnope. Yehofa akupitilisya kukamula masengo gakwasonganganya ŵandu m’liŵasa lyakwe. Pangali chilichose champaka chimlepelekasye kwapa upile ŵandu ŵakwe soni kwakamuchisya pa masengo gakukamula. (Aŵalanje Yesaya 65:​16, 17) Ngatukukayichila amta panandi kuti yaŵasasile Yehofa, chiyitendekwe kusogoloku. Ligongo chichi tukuŵecheta yeleyi? Yili myoyo ligongo lyakuti maloŵe gaŵasasile ndumetume Paulo pa Aloma 8:​38, 39 gakusatulimbikasya kuti, “Chinga chiwa kapena umi, chinga malayika, chinga maboma, chinga yindu yayipali, chinga yindu yayikwika, chinga machili, chinga yapenani kapena yapasi, kapena chakupanganyidwa chine chilichose, nganichiŵa chitulekangenye ni chinonyelo chakusatulosya Mlungu kupitila mwa Ambuje ŵetu Klistu Yesu.”

16. Ligongo chichi akusosekwa kumkulupilila Yehofa ni mtima wawo wosope?

¹⁶ Tukwete magongo gambone gakututendekasya kumkulupilila mnope Yehofa, Mlungu jwakusaŵecheta yisyesyene. Jwalakwe ni juŵatupanganyisye soni akusatunonyela mnope. Yehofa akwasonganganya ŵandu ŵajinji kuti aŵe m’liŵasa lyakwe ni chakulinga chakuti amtumichileje jwalakwejo. (Yes. 60:22; Sak. 8:23) Tukumanyilila kuti jwalakwe akusakwanilisya yiliyose yasasile soni tukumanyilila kuti pachangakaŵapa, chachimjonanga Satana yayichitendekasya kuti pachilambopa pakasimanikwa jwalijose jwakuŵecheta yaunami. Lipopelo lyetu lili lyakulandana ni lya Daudi juŵapopesile kuti, “Achimbichikwe Yehofa Mlungu, . . . Jwalakwejo jika ni jwakusatenda yakusimonjesya. Lina lyakwe lyakuchimbichika, lichimbichiche mpaka kalakala. Uchimbichimbi wa jwalakwejo ugumbale pachilambo chosope chapasi.”—Sal. 72:​18, 19.