Ajongolele Kajiganye Kawo Pali mu Utumiki

1. Ana tukusosekwa kulijiganya kutenda chichi, soni ligongo chichi? (2 Timoteyo 4:2) (Alolesoni chiwulili.)

YESU jwasalile ŵakumkuya ŵakwe kuti, “Mkajiganye ŵandu . . . kuti aŵe ŵakulijiganya ŵangu . . . , mkajiganyeje kuti apikanileje yindu yosope yanamlamwile jemanja.” (Mat. 28:​19, 20) Yiŵaŵecheteyi, yikusalosya kuti Mklistu jwalijose akusasosekwa kwajiganya ŵane. Yisyene kuti Yehofa ni jwakusawuta ŵandu ‘ŵakwete nganisyo syambone,’ soni malayika gakusatulongolela kwa ŵandu ŵeleŵa. (Mase. 13:48; Yoh. 6:44; Chiw. 14:6) Nambope, tukusosekwa kutenda mbali jetu. Aganichisye ya chisyasyo cha ndumetume Paulo soni Balanaba. Baibulo jikusasala kuti jemanjaji paŵalalichilaga mu sunagoge ku Ikoniyo, “ŵaŵechete mwakwayika ŵandu pamtima mwamti Ayuda ŵajinji soni Agiliki ŵaŵele ŵakulupilila.” (Mase. 14:1) Mwangakayichila, Paulo ni Balanaba ŵalijiganyisye yampaka atende pakwajiganya ŵandu mwakwayika pamtima. (Aŵalanje 2 Timoteyo 4:2.) Mwamti Mklistu jwalijose akusosekwa kulijiganya yampaka atende kuti ŵajiganyeje ŵandu mwakwayika pamtima.

2. Ligongo chichi Aklistu ŵane akusayiwona kuti nganaŵa akombwele kongolela kajiganye kawo pali mu utumiki?

² Ŵane akusaliwona kuti nganaŵa akombwele kwajiganya ŵandu mwakwayika pamtima ligongo lyakuti ngakusamanyilila yejinji soni kuti nganajawula pasogolo ni majiganyo ga ku chilamboku. Mwamti achalume ŵane ŵakusiŵakolanga m’Baibulo ŵalipikanaga myoyo. (Eks. 4:10; Yel. 1:6) Komboleka kuti ŵane ŵatengwiche ni muŵatendelaga pakwiganya ligongo nganipaŵaga yakuyichisya yambone mpela muyaŵelaga ni ŵane. Nambope, ngaŵa kuti wosope ŵatukusitwalalichila kapena kusimana nawo mpaka apikanile ngani syambone. Soni yakuyichisya ya masengo gatukusakamula yangayikaga ligongo lyakulimbichila kwetupe. Mpela mwatuŵechetele kala, Yehofa soni malayika akusatenda yakomboleka kuti ŵandu ŵakwete nganisyo syambone apatikane. Nambope, tukusasosekwa kutenda mbali jetu kuti twalalichileje ŵandu ngani syambone mwakwayika pamtima. Myoyo munganiji, chitukambilane matala gatatu gampaka gatukamuchisye kuti tujongolele kajiganye ketu patuli mu utumiki.

ŴAGANICHISYEJE ŴANDU

3. Ligongo chichi Yesu jwakombolaga kwajiganya ŵandu mwakwayika pamtima?

³ Baibulo jikusasala kuti Yesu akusamanyilila “yayili mumtima mwa mundu jwalijose.” (Yoh. 2:25) Yeleyi yikulosya kuti akusamanyilila yakusaganisya ŵandu soni yayikusatendekasya kutenda yindu m’litala line lyakwe. Yesu jwakombolaga kwajiganya ŵandu mwakwayika pamtima ligongo lyakuti jwamanyililaga yaŵasosechelaga. Jwalakwe jwawonaga ŵandu ali mkulaga mwausimu soni ali mkulaga ni malamusi gaŵapanganyisye achimlongola ŵa dini. (Mat. 9:36; 23:4) Mwamti pakusaka kwakamuchisya ŵanduŵa, Yesu jwajiganyisye yindu yampaka yakamuchisye pa Ulaliki ŵakwe ŵa Petumbi. Yakuyichisya yakwe, ŵandu ŵajinji ŵasangalalaga kumpikanila Yesu ligongo jwasalaga yindu yayakwayaga jemanjajo.

4. Ana mpaka tulosye chamti uli kuti tukusitwaganichisya ŵandu? (Alolesoni yiwulili.)

⁴ Mpaka tulosye kuti tukusitwaganichisya ŵandu naga tukumanyilila yindu yayikwalagasya nganisyo. Mundu jwalijose jwatukusamlalichila yikusaŵa kuti akwayidwe ni yakutendekwa yangali chilungamo ya m’chilambo cha Satanachi. Kukumbuchila mfundo jeleji, mpaka kutukamuchisye kuti tutendeje yakomboleka pakwakamuchisya ŵandu. Mwachisyasyo, mpaka yisimanikwe kuti mudela jawo mutendekwe yindu yayikwalagasya ŵandu nganisyo. Mwinesoni achinangolo akudandawula kuti ŵandu ŵane mpaka ŵatendele ŵanache ŵawo yindu yakusakala pali ku sukulu. Kapenasoni, yikusaŵa yakusawusya kuti ŵandu ŵajinji mudela jawo apate masengo. Akumbuchileje kuti mu ‘ndaŵi jakusawusyaji,’ ŵanduŵa nganakola chembecheyo ligongo ngakumanyilila yindu yambone yajasasile Baibulo kuti chiyitendekwe kusogoloku.—2 Tim. 3:1; Yes. 65:​13, 14.

5. Ana Yesu jwalekanganaga chamti uli ni achimlongola ŵa dini? (Mateyu 11:​28-30)

⁵ Yesu jwaganichisyaga ŵandu mwamti umboni wakwe uli muŵatendelaga yindu ni jemanjaji. Muŵatendelaga Yesu yindu ni ŵandu, yaliji yakulekangana mnope ni yaŵatendaga achimlongola ŵa dini. Achimlongola ŵa diniŵa ŵaliwonaga kuŵa ŵapenani mnope kulekangana ni ŵane mwamti ndaŵi syejinji ŵatendelaga ŵandu yindu yangali chilungamo. (Mat. 23:13; Yoh. 7:49) Nambo Yesu jwanonyelaga soni jwachimbichisyaga ŵandu. Jwalakwe jwaliji “jwakufasa soni jwakulinandiya,” mwamti yeleyi yakamuchisye kuti aŵe jwakwiganya jwambone. (Aŵalanje Mateyu 11:​28-30.) M’wejisoni, tukusosekwa kwachimbichisya soni kwanonyelaga ŵandu ŵatukusitwalalichila.

6. Ana mpaka tulosye chamti uli kwachimbichisya soni kwanonyela ŵandu ŵakusakana kwalalichila kapena ŵakusatusisya?

⁶ Ŵandu ŵane akusakana kapena kutusisya kwene patukulalichila. Ana tukusosekwa kwajanga mwamti uli? Yesu jwatusalile kuti ngatukusosekwa kulimbana ni ŵandu ŵakusasisya utenga wetu. Nambope, jwatusalilesoni yatukusosekwa kutenda. Jwatite, ‘mtendeje yambone kwa ŵandu ŵakusamŵenga,’ “mpitilisye kwasosela yambone ŵandu ŵakusamtembelela,” soni “kwapopelela ŵandu ŵakusamnyosya.” (Luk. 6:​27, 28) Mpaka yiŵe ngangasawusya kwalosya chinonyelo ŵandu ŵakusakana kwalalichila, naga tukumanyilila kuti pana ligongo lyalikwatendekasya kuti akane. Yili yisyene kuti ŵandu ŵane akusasaka kutulekasya kulalichila. Nambope, ŵane akusakana utenga wetu ligongo lyakuti akusalagasika nganisyo ni yakusawusya ya m’liŵasa lyawo kapena yindu yine. Mwinesoni mpaka yiŵe yakuti tuyiche panyumbajo pandaŵi jakulemwecheka. Myoyo payakutendekwa yosopeyi, tukusosekwa kukuya mfundo jakuti ‘ndaŵi syosope maloŵe [getu] gaŵeje gambone, gakunong’a mpela kuti tugatasile njete, kuti [tumanyilile] mwampaka tumjanjile mundu jwalijose.’ (Akolo. 4:6) Naga tukwaganichisya ŵandu soni tukumanyilila kuti pana yakusawusya yakusimana nayo, tuchilingalinga kupata mfundo jinejakwe jampaka jalimbikasye.

AKAMULICHISYEJE MASENGO MALOŴE GA MLUNGU

7. Ana Yesu jwakamulichisyaga masengo chichi pakwiganya? (Yohane 7:​14-16)

⁷ Yesu nganadalilaga lunda lwakwe. Mmalomwakwe, yaŵajiganyaga yatyochelaga m’Maloŵe ga Mlungu. Nambosoni, jwasalilaga ŵandu mu litala lyakuti apikanichisye chenene soni kukumbuchila yaŵajiganyagayo. Baibulo jikusatusalila kuti Yesu jwajiganyaga “mpela mundu jwakola ulamusi wakutyochela kwa Mlungu, ngaŵaga mpela alembi.” Mwamti ŵandu “ŵasimonjile mnope” ni yeleyi. (Mak. 1:22) Yindu yaŵakamulichisyaga masengo Alembi ŵa mundaŵi ja Yesu pakwajiganya ŵandu, yatyochelaga pa yindu yaŵaŵechetaga achimlongola ŵane ŵa dini ŵakumanyika. Mwakulekangana ni jemanjaji, Yesu pakwiganya jwakamulichisyaga masengo Malemba. Ligongo lyakuti jwaliji Mwanache jwa Mlungu, yikakomboleche kukamulichisya masengo lunda luŵakwete mkanayiche pachilambopa pakusaka kuti ŵandu amlapilileje. Nambo jwalakwe nganatenda yeleyi. Mmalomwakwe, jwakamulichisyaga masengo Maloŵe ga Mlungu pakwajiganya ŵandu yaŵasakaga Mlungu kuti jemanjajo atendeje. (Aŵalanje Yohane 7:​14-16.) Chelechitu chili chisyasyo chambone mnope kwa wosopewe.

8. Ana ndumetume Petulo jwajigalile mwamti uli chisyasyo cha Yesu?

⁸ Nombenawo ŵakulijiganya ŵa Yesu ŵakamulichisyaga masengo Maloŵe ga Mlungu pakwiganya. Mwachisyasyo, aganichisye maloŵe gaŵaŵechete ndumetume Petulo pa lisiku lya Pentekosite mu 33 C.E. Petulo nganaŵa jwamlijiganye mnope. Nambope, yaŵajiganyisye ŵandu palisikuli, yakamwile mnope mtima. Yaliji myoyo ligongo lyakuti jwakamulichisye masengo Malemba pakulondesya yakwamba yakulochesya yayakwanilichikwe kupitila mwa Yesu. (Mase. 2:​14-37) Ana yakuyichisya yakwe yaliji yamti uli? “Ŵandu wosope ŵaŵagapochele mwakusangalala maloŵe gakwego ŵabatisidwe, mwamti palisiku lyelelyo ŵandu ŵakwana 3,000 ŵajonjechekwe pagulu ja ŵakulijiganyawo.”—Mase. 2:41.

9. Ligongo chichi tukusosekwa kukamulichisya masengo Maloŵe ga Mlungu patukwajiganya ŵandu?

⁹ Baibulo ni jajikwete machili gakwakamuchisya ŵandu kuchenga umi wawo ni kutendaga yakusasaka Mlungu. (Aheb. 4:12) Myoyo, tukusosekwa tujikamulichisyeje masengo patukwajiganya ŵandu. Tukusosekwa ‘kulalichilaga maloŵe,’ ngaŵaga ya mumtwe mwetu. (2 Tim. 4:2) Pa Misyungu 2:6 pakusati, “Yehofa ni jwakusapeleka lunda. Kumanyilila yindu soni kupikanichisya yindu kukusatyochela mkamwa mwakwe.” Myoyo, patukamulichisya masengo Malemba pandaŵi jatukwajiganya ŵandu, yikusaŵa mpela kuti tukumkunda Yehofa kuti aŵecheteje. (Mala. 2:7) Chakulinga chetu chiŵeje kwakamuchisya ŵandu kumanyilila kuti m’Baibulo mwana yindu yakusosekwa mnope kupunda lunda lwa ŵandu. Yajikusasala Baibulo yikusatyochela kwa Mlungu mwamti yikusatukamuchisya kuti tumchimbichisyeje jwalakwe soni tuŵeje ŵakusangalala.—2 Tim. 3:​16, 17.

10. Ana tukusosekwa kutenda chichi kuti tumkamuchisye jwakulijiganya Baibulo kumanyilila kuti yakulijiganya yili yakutyochela m’Maloŵe ga Mlungu?

¹⁰ Pakukosechela kutendesya lijiganyo lya Baibulo, akusosekwa kuganichisya yampaka atende pakumkamuchisya jwakulijiganya jwawo kuti nganisyo syakwe siŵeje pa yajikusasala Baibulo. Yili yisyene kuti yiwulili soni mafidiyo gakusatukamuchisya kupikanichisya yatukulijiganya, nambope pakumjiganya mundu ndaŵi syosope agombelechesyeje mnope yajikusasala Baibulo. Paŵalasile lilemba, aloleje mfundo syekulungwa palilembalyo kaneko amkamuchisyeje jwakulijiganyajo kuganichisya mwampaka akamulichisye masengo mfundosyo. Atamose pakukamulichisya masengo yiwulili soni mafidiyo, akusosekwa kumkamuchisya jwakulijiganya jwawo kulola mfundo sya m’Baibulo syakulijiganya kupitila mu yindu yeleyi. Kuti akombole kutenda yeleyi, ngakusosekwa kulondesya yindu yejinji kapena kuŵalanga malemba gejinji. Mmalomwakwe, paŵalasile lilemba akusosekwa kumpa ndaŵi jwakulijiganyajo kuti aganichisye soni amanyilile yalikugopolela lilembalyo. Ndaŵi sine mpaka asosekwe kuliŵalangasoni lilembalyo. Kutenda yeleyi, kuchilosya kuti tukumjiganya yajikusala Baibulo ngaŵaga yayili m’buku, m’yiwulili kapena m’mafidiyo.—1 Akoli. 2:13.

11-12. (a) Ana mpaka tulosye chamti uli kuti tuli ŵakuwusimana mtima ni ŵakulijiganya Baibulo ŵetu? (Masengo 17:​1-4) (Alolesoni chiwulili.) (b) Ana ni chichi champaka chatendekasye ŵandu ŵane kusaka kulijiganya Baibulo soni ana mpaka twakamuchisye chamti uli?

¹¹ Naga pana mfundo jele jwakulijiganya jwawo ngakukamulana najo, akusosekwa kupitilisya kumjiganya “mwakuwusimana mtima.” Akumbuchileje kuti ŵanduwe tukusajawula pasogolo mwakulekangana. Yindu yine yatukusalijiganya yikusaŵa yangasawusya kuyipikanichisya m’weji. Nambope, mpaka yajigalile ndaŵi ŵakulijiganya ŵetu kuti ayipikanichisye chenene. Akusosekwasoni kukumbuchila kuti kwa maulendo gejinji, Paulo jwakambilanaga Malemba ni Ayuda ŵa ku Tesalonika. Nambo ŵane mwa jemanjaji yajigalile ndaŵi kuti apikanichisye yaŵaŵechetaga Paulo.—Aŵalanje Masengo 17:​1-4.

¹² Mpaka tulosyesoni kuti tukutenda yindu mwakuwusimana mtima ni ŵakulijiganya ŵetu naga patwawusisye yiwusyo tukusajembecheya kuti ajanje. Mpaka tusosekwe kwapikanila chenene pakuŵecheta soni kutenda yakuti tumanyilile ligongo lyakwe akuŵecheta yeleyo. Kaneko, aŵalanje soni kukambilana nawo malemba kuti ŵakamuchisye kumanyilila nganisyo sya Mlungu panganijo. Akusosekwasoni kumanyilila ayi: Ŵandu ŵane ŵangajimanyilila Baibulo soni ngakusamanyilila yajikusasala. Myoyo, mpaka atende chenene kwalosya Baibulo jepulinte soni kwalondechesya yindu yambone soni yakusimonjesya yayili mwelemo. Mpaka ŵasalilesoni yayili mkati mwa peji jandanda japachikuto m’buku ja Asangalaleje Mpaka Kalakala pa kamtwe kakuti “Atande Kuŵalanga Baibulo.” Kaneko, mpaka ŵalosye ngani syasili pelepa soni kwaŵalanjila lilemba limo kapena gaŵili pambali jakuti “Lunda Lwakutukamuchisya Paumi.” Malembaga mpaka gakamuchisye kumanyilila kuti Baibulo mpaka jitukamuchisye kuŵa ŵakusangalala. Mwakata mpaka tuŵechete kuti, naga jwakulijiganya jwawo akumsalila machili ga Maloŵe ga Mlungu, nikuti yakwiganya yawo yichiŵa yakumyika pamtima.

ŴAKAMUCHISYEJE KUTI AMMANYILILE YEHOFA

13. Ana patukwajiganya ŵandu Baibulo, tukusosekwa kutenda yakuti aganichisyeje mnope yakwamba ŵani? Apeleche chisyasyo.

¹³ Chakulinga chetu chili kwakamuchisya ŵakulijiganya Baibulo ŵetu kuti ammanyilile Yehofa soni kuŵa najo paunasi. (Yak. 4:8) Myoyo, masengo gatukusakamula mpaka tugalandanye ni mundu jwapambile tochi ni chakulinga chakuti ammulichileje mundu jwine jwakusosasosa chindu m’chipi. Jwalakwe papambile tochi ngakusalimuchila msyene nambo akusammulichila mjakwejo. M’wejisoni tutendeje yakulandanayi. Patukwajiganya ŵandu tutendeje yakuti jemanjajo aganichisyeje yakwamba Yehofa ngaŵa yakwamba m’wejo.

14. Ana mpaka tumkamuchisye chamti uli jwakulijiganya jwetu kuti amsangalasyeje Yehofa?

¹⁴ Patukumjiganya mundu Baibulo, tumkamuchisyeje kuti akole chakulinga chakumsangalasya Yehofa. (Mis. 27:11) Amkamuchisyeje kumanyilila kuti chakulinga chakusosekwa kukola pakuŵambala kutenda yindu yakusakala chiŵeje kusaka kumsangalasya Yehofa ngaŵaga gamba kusaka kuŵa jwa Mboni. Mwachisyasyo, naga yikumsawusya kumalana ni ndamo jinejakwe jakusakala, akusosekwa kumwusya kuti, “Ligongo chichi Yehofa jangamsangalasyaga ndamoji? Ligongo chichi Yehofa akusasaka kuti mleche kutenda yineyakwe atamose kuti mkusayinonyela? Ana yakusasaka Yehofa kuti mtendeyi yikulosya chamti uli kuti akusamnonyela?” Pakumkamuchisya jwakulijiganya jwawo kuti aganichisyeje mnope yakwamba Yehofa, yichimkamuchisya kumanyilila kuti Yehofa ali Atati ŵetu ŵachinonyelo. Yeleyi yichimtendekasya jwakulijiganyajo kusaka kumsangalasya Yehofa.

APITILISYE KONGOLELA KAJIGANYE KAWO

15. Ana mpaka tutende chichi kuti tupitilisye kongolela kajiganye patuli mu utumiki?

¹⁵ Tukusosekwa kumŵenda Yehofa kuti atukamuchisyeje kumanyilila patukusosekwa kongolela pa ngani jakajiganye ketu. (1 Yoh. 5:14) Kaneko tutendeje yindu mwakamulana ni mapopelo getu. Patuli pamisongano ja mpingo, tupikanileje mwachidwi ligongo Yehofa akusatujiganya yampaka tutende kuti twajiganyeje ŵane mwakwayika pamtima. Mpakasoni ŵaŵende ŵandu ŵakusajiganya chenene kuti ŵapechesye ku lijiganyo lyawo lya Baibulo. Kaneko, ŵaŵendeje kuti ŵasalile yakusosekwa kongolela. Akumbuchilejesoni kuti wawojo ni ŵakujimanyilila chenene ngani jakusaka kwiganya, nambo jwakulijiganya jwawo yikusaŵa kuti ngakujimanyilila. Myoyo, alinjeje kuganichisya mwampaka apikanile jwakulijiganya jwawo pa ngani jakusaka kulijiganyajo. Kaneko, amkamuchisyeje kumanyilila kuti utenga wetu uli ngani syambone. Kutenda yeleyi mpaka kumkamuchisye kuti aŵe pa unasi wambone ni Yehofa soni aŵeje jwakusangalala.—Sal. 1:​1-3.

16. Ana pakusaŵa umbone wamti uli patukupitilisya kongolela kajiganye ketu?

¹⁶ Chindu chimo champaka chitutendekasye kuŵa ŵakusangalala chili kwajiganya ŵane yakwamba Yehofa. Sonitu m’chilambo chasambano, ŵandu ŵajinji chachisosekwa kwajiganya. Myoyo, patukulalichila ngani syambone, kwende tupitilisye kwaganichisya ŵandu ŵatukusitwajiganyaga, tukamulichisyeje masengo Maloŵe ga Mlungu, soni twakamuchisyeje kuti ammanyilile Yehofa. Naga tukutenda yeleyi ni kuti tuchikombola kongolela kajiganye ketu patuli mu utumiki.