Buku ja Yobu Mpaka Jakamuchisye Pakusimana ni Yakusawusya

1-2. Ligongo chichi yili yakusosekwa mnope kuŵalangaga buku ja Yobu?

ANA pachangakaŵapa aŵalasile buku ja Yobu? Atamose kuti bukuji jalembedwe yaka 3,500 yipiteyo, nambope ŵandu ŵajinji akusajiwona kuti bukuji jili jimo mwa mabuku gambone mnope. Ŵandu akusamchimbichisya mundu juŵalembile bukuji ligongo lyakuti jwakamulichisye masengo maloŵe gangasawusya kugapikanichisya soni gamachili. Atamose kuti Mose ni juŵalembile bukuji, nambope Yehofa ni juŵamsalile yakuti alembe.—2 Tim. 3:16.

² Buku ja Yobu jili jimo mwa mabuku gakusosekwa mnope m’Baibulo. Ligongo chichi tukuŵecheta yeleyi? Jikusatukamuchisya kupikanichisya kuti malayika soni ŵandu, akwete ufulu wakusagula kumtumichila Yehofa soni kulichimbichisya lina lyakwe. Bukuji jikusasalasoni ya ndamo syejinji syakwete Yehofa mpela chinonyelo, lunda, chilungamo soni machili. Mwachisyasyo, buku ja Yobu jikusamkolanga Yehofa kuti ali “Jwamachiligosope” maulendo gakupunda 31. Mwamti bukuji ni jajikusamkolanga Yehofa ni linali kwa maulendo gejinji. Buku ja Yobu jikusajangasoni yiwusyo yatukusakola paumi wetu kupwatikapo chimo chachikusichalagasyaga ŵandu ŵajinji. Chiwusyo chakwe chili chakuti, ligongo chichi Mlungu akundile kuti tusimaneje ni yakusawusya?

3. Ana ni yindu yine yapi yambone yampaka tupate patukulijiganya buku ja Yobu?

³ Mundu pajimi penani pa litumbi yikusamkamuchisya kuti akomboleje kulola yindu chenene. Myoyosoni buku ja Yobu jikusatukamuchisya kuti tuyiwoneje yakusawusya yatukusimana nayo mpela mwakusayiwonela Yehofa. Kwende tulole mwele buku ja Yobu mpaka jitukamuchisye patukusimana ni yakusawusya. Chitulijiganye mwajikatite ngani ja Yobu pakwakamuchisya Ayisalayeli soni mwampaka jijile pakutukamuchisya m’weji masiku agano. Chitulijiganyesoni mwampaka tukamulichisye masengo nganiji pakwakamuchisya ŵane.

MLUNGU ŴAKUNDILE KUTI YOBU ASIMANE NI YAKUSAWUSYA

4. Ana Yobu jwalekanganaga mwamti uli ni Ayisalayeli paŵaliji ku Iguputo?

⁴ Pandaŵi jele Ayisalayeli ŵasimanaga ni yakusawusya ligongo lyakuti ŵaliji achikapolo ku Iguputo, Yobu jwatamaga m’chilambo cha Usi. Komboleka kuti chilambochi chaliji cha ku ngopokolyuŵa kwa chilambo chele Yehofa jwasalile Ayisalayeli kuti chachapa chiŵandika ni kumpoto kwa Arabia. Mwakulekangana ni Ayisalayeli ŵaŵatandite kujitumichila milungu jakusepa ku Iguputo, Yobu ŵamtumichilaga Yehofa mwakulupichika. (Yos. 24:14; Esek. 20:8) Pakwamba ya Yobu Yehofa ŵatite, “Jwalakwe ngakusatenda yakulemwa.”a (Yob. 1:8) Yobu jwaliji jwakusichila mnope soni m’chilambo chiŵatamaga, ŵandu ŵamchimbichisyaga mnope. (Yob. 1:3) Kusala yisyene, Satana nganasangalalaga paŵamwonaga Yobu mundu jwele ŵandu ŵajinji ŵammanyililaga soni kumchimbichisya ali mkutumichila Mlungu mwakulupichika.

5. Ligongo chichi Mlungu ŵakundile kuti Yobu asimane ni yakusawusya? (Yobu 1:​20-22; 2:​9, 10)

⁵ Satana jwasasile kuti Yobu mpaka aleche kumtumichila Mlungu naga ali asimene ni yakusawusya. (Yob. 1:​7-11; 2:​2-5) Yehofa ŵamnonyelaga mnope Yobu. Nambope ŵamkundile Satana kulosya kuti yiŵasalaga pakwamba ya Yobu yaliji yisyesyene. (Yob. 1:​12-19; 2:​6-8) Satana jwatendekasisye kuti yilango ya Yobu yiwe, ŵawuleje ŵanache ŵakwe ŵakwana 10 soni jwatendekasisye kuti Yobu akole yilonda yakupweteka mnope kutandila kumtwe mpaka kusajo. Atamose kuti Satana ŵatendekasisye kuti Yobu asimane ni yakusawusyayi, nambope jwalakwe jwapitilisye kuŵa jwakulupichika kwa Yehofa. (Aŵalanje Yobu 1:​20-22; 2:​9, 10.) Mwamti mkupita kwa ndaŵi, Yehofa ŵamposisye Yobu mwamti chilu chakwe chawujile mmangwakwe, ŵakwete chipanje soni ŵampele ŵanache ŵane 10. Konjechesya pelepa Yehofa ŵampelesoni Yobu umi welewu. Jwalakwe jwatemi ni umi kwa yaka yine yakwana 140 yayatendekasisye kuti akuyiwone yisukulu ya ŵanache ŵakwe soni ŵanachewo yisukulu yawo. (Yob. 42:​10-13, 16) Ana ngani jeleji jikakamuchisye mwamti uli Ayisalayeli soni mpaka jitukamuchisye mwamti uli m’weji masiku agano?

6. Ana ngani jakwamba Yobu jikakamuchisye mwamti uli Ayisalayeli? (Alolesoni chiwulili.)

⁶ Mwajikatite nganiji pakwakamuchisya Ayisalayeli. Ngani ja Yobu jikakamuchisye Ayisalayeli ŵaŵasimanaga ni yakusawusya ku Iguputo. Mwachisyasyo, Yoswa ni Kalebi ŵatemi mpela achikapolo kwa yaka yejinji. Kaneko jemanjaji ŵasosekwaga kutama mchipululu kwa yaka 40 ligongo lyakuti Ayisalayeli ŵane nganampikanila Mlungu. Yikaŵe kuti Ayisalayeliŵa ŵamanyililaga yakusawusya yaŵasimene nayo Yobu soni yakuyichisya yayapali, yikakamuchisye jemanjaji soni Ayisalayeli ŵane ŵaŵapagwaga kumanyilila jwakusatandikasya yakusawusya. Jikakamuchisyesoni kumanyilila ligongo lyakwe Mlungu ayikundile yakusawusyayi soni mwakusiŵawonela ŵandu ŵakusaŵa ŵakulupichika kwa jwalakwe.

7-8. Ana buku ja Yobu mpaka jitukamuchisye chamti uli wosopewe patukusimana ni yakusawusya? Asale chisyasyo.

⁷ Yampaka jijile nganiji pakutukamuchisya. Chakutesya chanasa chili chakuti ŵandu ŵajinji masiku agano, ŵangamkulupililaga Mlungu ligongo lyakuti ŵangamanyililaga chachikusatendekasyaga kuti ŵandu ŵambone asimaneje ni yakusawusya. Chisyasyo pa nganiji ali Hazelb jwakusatama ku Rwanda. Jwalakwe paŵaliji jwachinandipile jwamkulupililaga Mlungu. Nambo kaneko yindu yachenjile paumi wakwe. Achinangolo ŵakwe ŵalekangene ulombela mwamti yakuyichisya yakwe mamagweŵa ŵalombedwe ni ŵalume ŵane ŵele ŵamtendelaga yindu yangasa jwalakwe. Kaneko jwamlume jwine ŵamkamulile jwalakwe. Hazel jwaganichisye yakuti ajawule ku chalichi kuti akapate chilimbikasyo nambo ali ayiche kweleku nganalimbikasidwa. Kaneko, Hazel ŵamsalile Mlungu mu lipopelo kuti, “Napopelaga kwa wawojo soni kulingalinga kutenda yindu yambone nambo wawojo akutendekasya kuti simaneje ni yakusawusya. Sambano apano ngusaka leche kwatumichila wawojo, mmalomwakwe chindendeje yampaka yingamuchisye kuŵa jwakusangalala.” Mpela mwayaŵelele ni Hazel, ŵandu ŵajinji pakwete pasalilidwe yindu yaunami yakwamba Mlungu mwamti akusakulupilila kuti Mlungujo ni jwakutendekasya yakusawusya. Yikusatukwaya mnope kuti jemanjaji ŵangamanyilila yisyesyene yakwamba Mlungu mwamti tukusosekwa kwakamuchisya.

⁸ Nambope kutyochela m’buku ja Yobu tulijiganyisye kuti Mlungu jwangatendekasyaga yakusawusya nambo Satana. Tulijiganyisyesoni kuti patukusimana ni yakusawusya ngatukusosekwa kuganisya kuti yakusawusyayo yikwika ligongo lyakuti tulemwisye yineyakwe. Malemba gakusatusalila kuti “yindu yangayijembecheya” mpaka yimgwile jwalijose pandaŵi jilijose. (Jwak. 9:11; Yob. 4:1 8) Konjechesya pelepa, tulijiganyisye kuti patukupilila yakusawusya, yikusatendekasya kuti Yehofa akole chakumjanga Satana. Yeleyi yikusakamuchisya kuswejesya lina lyakwe. (Yob. 2:3; Mis. 27:11) Yili yakulimbikasya kuti tulijiganyisye yindu yeleyi kupitila m’Baibulo. Yindu yeleyi yitukamuchisye kumanyilila ligongo lyakwe ŵandu ŵambone akusasimana ni yakusawusya. Mkupita kwa ndaŵi Hazel, jwatandite kulijiganya Baibulo ni ŵa Mboni sya Yehofa mwamti jwamanyilile kuti Mlungu jwangatendekasyaga yakusawusya. Jwalakwe jwatite, “Napopesilesoni kwa Yehofa ni kumsalila mwangupikanila mumtima. Namsalile jwalakwe kuti panasalaga kuti ngusaka kuleka kumtumichila, nganisalaga ni mtima wosope. Naŵechete yeleyi ligongo lyakuti nganinammanyililaga chenene jwalakwejo. Apano mbikanichisye kuti Yehofa akusanonyela mnope une. Mwamti ndili jwakusangalala mnope.” Yilitu yakusangalasya kumanyilila ligongo lyakwe Mlungu akundile kuti tusimaneje ni yakusawusya. Sambano kwende tulole mwele chisyasyo cha Yobu mpaka chitukamuchisye patukusimana ni yakusawusya.

NGANI JA YOBU MPAKA JITUKAMUCHISYE KUŴA ŴAKUPILILA

9. Ana Yobu ŵatesile yamti uli paŵasimanaga ni yakusawusya? (Yakobo 5:11)

⁹ Aganichisye yakwamba yakusawusya yaŵasimene nayo Yobu. Jwalakwe jwatamaga pa liwu mwamti chilu chakwe chosope chakwete yilonda soni jwapikanaga kupweteka mnope. Mwamti ligongo lya yeleyi jwagandile soni nganakola machili gakutenda yindu yejinji. Jwalakwe jwatamilaga kulimwaga ni mapale. Mwamti jwadandawulaga mnope ligongo lya kupweteka kuŵapikanaga. Nambotu Yobu nganagambaga kupilila yakusawusya yakwe nambo jwapitilisyesoni kumdalila Yehofa. (Aŵalanje Yakobo 5:11.) Ana ni chichi chachamkamuchisye jwalakwe kuti apilile?

10. Ana ni yindu yapi yayikulosya kuti Yobu jwaliji pa unasi wambone ni Yehofa?

¹⁰ Yobu ŵamsalile Yehofa muŵapikanilaga mumtima. (Yob. 10:​1, 2; 16:20) Mwachisyasyo, chaputala 3 chikusasala kuti Yobu jwalondesisye ya chanasa chiŵakwete ni yindu yayamtendechele. Yobu jwaganisyaga kuti Yehofa ni juŵatendekasya yakusawusya yosope yaŵasimanaga nayo. Kaneko achimjakwe ŵatatu ŵa Yobu ŵaŵechete mwakuwilisyawilisya kuti Mlungu akumpa chilango ligongo lya yakulemwa yaŵatesile. Nambo Yobu jwapitilisye kuŵecheta kuti chaŵe jwakulupichika kwa Yehofa. Yindu yine yaŵaŵechete Yobu yalosisye kuti jwaliwonaga kuti jwaliji jwakulungama kumpunda Mlungu. (Yob. 10:​1-3; 32:​1, 2; 35:​1, 2) Yobu jwasasilesoni kuti jwalakwe ndaŵi sine jwaŵechetaga yindu yangali mate ligongo lyakuti jwasakaga kulosya kuti chapitilisye kuŵa jwakulupichika kwa Mlungu. (Yob. 6:​3, 26) Mu chaputala 31, Yobu ŵasakaga kuti Mlungu amjanje mwamti jwalakwe jwasasile kuti nganaŵa jwakuŵajilwa kupochela chilango. (Yob. 31:35) Nambotu Yobu nganalemwa pakumwusya Mlungu ligongo lyakwe jwasimanaga ni yakusawusya.

11. Ana Yehofa ŵatesile yamti uli ni yaŵaŵechete Yobu yakwamba kulupichika kwakwe?

¹¹ Pakwikanaga apano tupikanichisye kuti muŵaŵechetele Yobu kwa Yehofa yalosisye kuti jwalakwe jwaliji paunasi wambone ni Yehofajo soni jwakulupililaga kuti jwalakwe chajimasye nganijo mwachilungamo. Kaneko Yehofa jwatendekasisye kuti kupagwe mbungo jamachili mwamti ŵatandite kuŵechetana ni Yobu. Nambo Yehofa nganasala ligongo lyakwe Yobu ŵasimanaga ni yakusawusya. Mwamtitu Yehofajo nganampa chilango Yobu ligongo lyakuŵecheta muŵapikanilaga mumtima soni ligongo lyakuŵecheta kuti nganatenda chilichose chakulemwa. Mmalomwakwe mpela mwakusatendela mtati jwambone, Yehofa wamkamuchisye Yobu mwachinonyelo kuti ayiwoneje yindu mwakuŵajilwa. Sonitu lyeleli lyaliji litala lyambone. Yakuyichisya yakwe, Yobu mwakulinandiya jwajitichisye kuti nganammanyililaga mnope Yehofa mwamti jwamŵendile kuti amkululuchile pa maloŵe gangaŵajilwa gaŵaŵechete. (Yob. 31:6; 40:​4, 5; 42:​1-6) Ana nganiji jikakamuchisye mwamti uli Ayisalayeli soni mpaka jitukamuchisye mwamti uli m’weji masiku agano?

12. Ana ngani jakwamba Yobu jikakamuchisye mwamti uli Ayisalayeli?

¹² Mwajikatite nganiji pakwakamuchisya Ayisalayeli. Yindu yayamtendelechele Yobu yikakamuchisye Ayisalayeli. Aganichisye chisyasyo cha Mose. Nganijiŵatu ngani jamasanje kuti Mose awulongolele mtundu wa Ayisalayeli. Kwa maulendo gejinji, Ayisalayeli nganampikanilaga Mlungu soni nganampikanilaga Mosejo. Mwakulekangana ni Ayisalayeli ŵangapikanilaŵa ŵele ndaŵi syejinji ŵamjimuchilaga Yehofa, Mose ŵamsalilaga Yehofa yayili munganisyo mwakwe. (Eks. 16:​6-8; Num. 11:​10-14; 14:​1-4, 11; 16:​41, 49; 17:5) Chisyasyo cha Yobu chikamkamuchisyesoni Mose pandaŵi jele Yehofa ŵampele malangiso Mosejo. Mwachisyasyo, Ayisalayeli ali asigele panandi kwinjila m’chilambo chele Mlungu ŵasalile kuti chachapa, Mose ŵatumbilile Ayisalayeli, mwamti “jwalakwe ŵaŵechete mwangaganisya chenene ni pakamwa pakwe.” Yaŵatesile Mose nganiyilosya kuti ŵamchimbichisyaga Yehofa. (Sal. 106:​32, 33) Yakuyichisya yakwe, Yehofa nganamkunda Mose kuti ajinjile m’chilambo chele Mlungu ŵasalile kuti chachapa. (Det. 32:​50-52) Atamose kuti yaliji yakupweteka mnope kwa Mose, nambope mwakulinandiya jwakamulene ni yaŵaŵechete Yehofayi. Ngani jakwamba Mose jikakamuchisyesoni Ayisalayeli ŵaŵapali panyuma pa Mose. Mwakuganichisya nganiji, Ayisalayeli ŵakulupichikaŵa akalijiganyisye kusosekwa kwakumsalila Yehofa mwakupikanila mumtima soni kuŵambala kuliwona kuŵa ŵakulungama kumpunda Mlungu. Soni akalijiganyisye kuti mwakulinandiya akusosekwa kwitichisyaga Yehofa paŵajamwiche.

13. Ana ngani jakwamba Yobu mpaka jitukamuchisye mwamti uli kuŵa ŵakupilila? (Ahebeli 10:36)

¹³ Yampaka jijile nganiji pakutukamuchisya. Aklistuwe tukusasosekwa kuŵa ŵakupilila. (Aŵalanje Ahebeli 10:36.) Mwachisyasyo, ŵane mwa m’weji tukulwala ulwele winewakwe, tukulagasika mnope nganisyo, tukusimana ni yakusawusya ya mwiŵasa, chiwa cha jwakunonyelwa jwetu kapenasoni yakusawusya yine. Soni ndaŵi sine yakuŵecheta soni yakutenda ya ŵane mpaka yitendekasye kuti yiŵeje yakusawusya kupilila yakusawusya yetuyo. (Mis. 12:18) Nambope buku ja Yobu jikusatujiganya kuti mpaka tumsalile Yehofa mwatukupikanila mumtima, tuli tukwete chikulupi chakuti jwalakwe chatukamuchisye. (1 Yoh. 5:14) Yehofa ngasatutumbilila naga tukumsalila mwatukupikanila mumtima atamose kuti ndaŵi sine yampaka tuŵecheteyo mpaka yiŵe ‘yangaŵajilwa’ mpela muyaŵelele ni Yobu. Mmalomwakwe, jwalakwe chachitupa machili soni lunda kuti tukombole kupilila. (2 Mbi. 16:9; Yak. 1:5) Jwalakwe mpaka atupesoni malangiso gatukusosechela mpela muyaŵelele ni Yobu. Kusala yisyene, buku ja Yobu jikutukamuchisyasoni kulola yampaka tutende pakulosya kupilila patupochele chamuko kutyochela M’maloŵe ga Mlungu, gulu jakwe soni kwa Aklistu ŵakumanyilila yejinji. (Aheb. 12:​5-7) Mpela muyaŵelele ni Yobu kuti jwapochele chamuko mwakulinandiya soni yakwete yakuyichisya yambone, m’wejisoni mpaka papagwe yakuyichisya yambone naga tukukunda kuti ŵane atujongoleleje. (2 Akoli. 13:11) Panatu yindu yejinji yampaka tulijiganye kutyochela kwa Yobu. Sambano kwende tulole mwampaka tukamulichisye masengo ngani ja Yobuji pakwakamuchisya ŵane.

AKAMULICHISYEJE MASENGO BUKU JA YOBU PAKWAKAMUCHISYA ŴANE

14. Ana mpaka tumlondechesye chamti uli mundu pakwamba ligongo lyakwe tukusasimana ni yakusawusya?

¹⁴ Ana pakwete pasimene ni mundu mu utumiki ni kwawusyaga ligongo lyakwe tukusimana ni yakusawusya? Ana ŵamjanjile yamti uli? Ndaŵi syejinji patukwanga chiwusyochi tukusitwasalilaga yajikusasala Baibulo pakwamba yayatendekwe mu mgunda wa Edeni. Mwinesoni ŵatandite mwakuŵecheta kuti Satana jwali msimu wakusakala jwasalile Adamu ni Hawa yindu yaunami yayatendekasisye kuti jemanjajo amjimuchile Mlungu. (Gen. 3:​1-6) Kaneko ŵamsalile kuti panyuma pakuti Adamu ni Hawa amjimuchile Mlungu chilambo chosope chagumbele ni yakusawusya soni chiwa. (Alo. 5:12) Pakumalisya komboleka ŵamsalile kuti Mlungu akundile kuti papite ndaŵi kuti unami wa Satana uwonechele soni kuti ngani syambone silalichidwe syakuti kusogoloku ŵandu chachiŵasoni ŵamlama. (Chiw. 21:​3, 4) Kwelekutu kuli kulondesya chenene kwa chiwusyochi mwamti yakuyichisya yakwe mpaka yiŵe yambone.

15. Ana mpaka tukamulichisye masengo chamti uli yayili m’buku ja Yobu pakumkamuchisya mundu jwakusaka kumanyilila ligongo lyakwe tukusimana ni yakusawusya? (Alolesoni yiwulili.)

¹⁵ Litala line lyampaka twalondechesye ŵandu ligongo lyakwe tukusasimana ni yakusawusya lili kwasalila yakwamba Yobu. Mpaka atande mwakumyamichila kaje mundujo ligongo lyakuwusya chiwusyo chakusosekwa mnopechi. Kaneko mpaka amsalile kuti nombenajo Yobu juŵaliji jwakulupichika, pandaŵi jiŵasimene ni yakusawusya yekulungwa jwawusisye chiwusyo mpela chelechi. Mwamti jwayikene pakuganisya kuti Mlungu ni jwaŵatendekasyisye kuti jwalakwe asimane ni yakusawusya. (Yob. 7:​17-21) Mundu jwakuŵechetana najojo mpaka atende chidwi mnope pamanyilile kuti ŵandu ŵane munyumamu ŵasakaga kumanyilila ligongo lyakwe akusimana ni yakusawusya. Kaneko mpaka aŵechete kuti nganaŵa Mlungu juŵatendekasiseye kuti Yobu asimane ni yakusawusya nambo jwaliji Satana. Satana jwaŵechete kuti ŵandu akusamtumichila Mlungu ligongo lya yindu yele Mlungujo akusiŵapa ŵandu. Nambo naga ali asimene ni yakusawusya mpaka aleche kumtumichila jwalakwe. Mpaka ajonjechesyesoni kuti Mlungu nganatendekasya kuti Yobu asimane ni yakusawusya, nambo jwagambile kunda kuti asimane ni yakusawusyayi. Yeleyi yalosisye kuti jwalakwe akusiŵakulupilila ŵakutumichila ŵakwe kuti mpaka alosye kuti Satana ali jwa unami. Pakumalisya mpaka amsalile kuti mkupita kwa ndaŵi Mlungu ŵampele Yobu yindu yambone ligongo lyakupitilisya kuŵa jwakulupichika. Mwamti mpaka twalimbikasye ŵane mwakwasimichisya kuti yakusawusya yiliyose yatukusasimana nayo ngayikutyochela kwa Yehofa.

16. Asale chisyasyo chakulosya kuti buku ja Yobu mpaka jimkamuchisye mundu jwakusimana ni yakusawusya.

¹⁶ Kwende tulole mujatite buku ja Yobu pakumkamuchisya Mario. Lisiku line m’chaka cha 2021, mlongo jwine jwalalichilaga pakamulichisya masengo foni. Mundu jwandanda juŵamjimbile jwaliji Mario. jwalakwe jwamŵalanjile lilemba lyalikusasala kuti Mlungu chachitupa yindu yambone kusogolo soni kuti jwalakwe akusapikana mapopelo getu. Paŵamŵendile kuti asale nganisyo syakwe, Mario jwamsalile mlongojo kuti jwaliji ali alembile chikalata chakusaka kuliwulaga. Jwalakwe jwatite, “Ngusamkulupilila Mlungu nambo kundaŵiku nakwete nganisyo syakuti jwalakwe anjasile.” Kaneko lisiku line mlongo jula ŵamsalile yakwamba Yobu soni yakusawusya yaŵasimene nayo. Myoyo Mario jwaganisisye yakuŵalanga buku josope ja Yobu. Mwamti mlongo jula ŵamtumichisye linki kuti apate Baibulo pa jw.org. Ana yakuyichisya yakwe yaliji yamti uli? Mario jwakundile kulijiganya Baibulo mwamti akusangalala ligongo lyakulijiganya yejinji yakwamba Mlungu jwakusamlosya chinonyelo soni kumganichisya jwalakwe.

17. Ligongo chichi akumyamichila Yehofa pakunda kuti buku ja Yobu jisimanikwe m’Baibulo? (Yobu 34:12)

¹⁷ Kusala yisyene Maloŵe ga Mlungu gakwete machili gakwakamuchisya ŵandu kupwatikapo ŵakusimana ni yakusawusya. (Aheb. 4:12) Yili yakusangalasya kumanyilila kuti Yehofa jwatesile yakuti ngani jakwamba Yobu jisimanikwe m’Baibulo. (Yob. 19:​23, 24) Buku ja Yobu jikusatusimichisya kuti “nditu, Mlungu jwangatendekasya yakusakala.” (Aŵalanje Yobu 34:12.) Bukuji jikusatusalila ligongo lyakwe Mlungu jwakundile kuti tusimaneje ni yakusawusya soni yampaka tutende kuti tupilile. Soni jikusatukamuchisya kulola yampaka tutende pakwakamuchisya ŵandu ŵakusimana ni yakuwusya. Mungani jakuyichisya tuchikambilana mwele buku ja Yobu mpaka jitukamuchisye patukupeleka malangiso.