MALICHI 30–EPULO 5, 2026
NYIMBO NA. 76 Ana Akusapikana Uli Mumtima?
Tuŵecheteje Maloŵe Gambone Patukwiganya Yisyesyene
“ Yehofa, Mlungu jwakusaŵecheta yisyesyene.”—SAL. 31:5.
CHAKULINGA CHA NGANIJI
Chitulijiganye mwampaka tuŵechetele yisyesyene ya m’Baibulo mwakusamala soni mulitala lyakuti yakamuchisye ŵane.
1. Ana tukusosekwa kutenda chichi kuti tuŵe m’liŵasa lya Yehofa?
PATUSIMENE kandanda ni Mklistu mjetu, tukusakangala kuwusyana kuti, “Ana mwalijiganyisye chamti uli yisyesyene?” Ŵane akusajanga kuti “achinangolo ŵawo ni ŵaŵajiganyisye yisyesyene.” Pele ŵane mpaka asale kuti “alijiganyisye yisyesyene” pachangakaŵapa. Tukusajanga myoyo ligongo lyakuti yisyesyene ya m’Maloŵe ga Mlungu yikusatukamuchisya kumanyilila litala lyambone. Tukuŵecheta yeleyi ligongo tukusamanyilila kuti mpaka tuŵe m’liŵasa lya Yehofa naga tukusanonyela yisyesyene soni kutendaga yindu mwakamulana ni yisyesyeneyo. Yeleyi yikupwatikapo kuŵa ŵakuwona mtima mu kaŵechete soni katende ketu ka yindu.—Sal. 15:1-3.
2. (a) Ana Yesu jwakwete mbili jamti uli? (b) Ana yisyesyene yaŵajiganyaga Yesu yakwayaga chamti uli ŵandu?
2 Yesu jwaŵechetaga yisyesyene ndaŵi syosope. Mwamti achimmagongo ŵakwe ŵamanyililaga kuti jwalakwe chaŵechetepe yisyesyene atamose kuti yijwaŵechetagayo nganiyasangalasyaga ndaŵi sine. (Mat. 22:16) Yesu jwajiganyaga ŵakulijiganya ŵakwe mwampaka yijile pakwakwayila ŵandu yisyesyene yijwajiganyaga. Jwalakwe jwatite, “Unetu nayiche kukulekanganya mwanache jwamlume ni babagwe, mwanache jwamkongwe ni mamagwe, soni jwamkongwe ni akwegwe ŵakwe ŵakongwe.” (Mat. 10:35) Nambotu yeleyi ngaŵa ni yiŵasakaga Yesu, nambope jwagambaga kusala yampaka yitendekwe. (Mat. 23:37) Jwalakwe jwamanyililaga kuti ŵandu chawupochele utenga wakwe mwakulekanganalekangana. Mwamti jwamanyililaga kuti ŵane chayinonyele yisyesyene ya m’Baibulo pele ŵane ngayinonyela.—2 Ates. 2:9-11.
3. Ana chitukambilane chichi mu nganiji?
3 M’wejisoni tukusasosekwa kuŵechetaga yisyesyene ndaŵi syosope mpela muŵatendele Yesu atamose yili mkuti ŵane nganiyiŵa yasangalesye. Nambosoni tukusasosekwa kulalichila soni kwiganya yisyesyene ya m’Baibulo atamose kuti ŵandu ŵane nganaŵa asangalele nayo. Ana yeleyi yikugopolela kuti ngatukusasosekwa kuganichisyaga ya ndaŵi jampaka tuŵechetele yisyesyene soni mwampaka tuyiŵechetele? Iyayi. Mungani ajino chitulongole kwanga chiwusyo chakusosekwa mnope chakuti, ana yisyesyene yakwamba Yehofa mpaka tuyipate kwapi? Kaneko chitujanje chiwusyo achi, ana mpaka twasalile ŵane yisyesyene ya m’Baibulo pa ndaŵi japi nambosoni mpaka tutende chamti uli yeleyi soni ligongo chichi mpaka tusosekwe kutenda myoyo? Kwanga kwa yiwusyoyi chikutukamuchisye kuti tukomboleje kwasalila ŵane ngani syambone nambosoni kuŵechetaga yisyesyene mwachinonyelo soni pandaŵi jambone.
KWAMPAKA TUYIPATE YISYESYENE
4. Ligongo chichi mpaka tujile kuti Yehofa ali Msyene yisyesyene?
4 Yehofa ali Msyene yisyesyene. Yiliyose yakusaŵecheta yikusaŵa yisyene. Mwachisyasyo, yakusaŵecheta pakwamba ya yindu yayili yakuŵajilwa soni yakusakala yikusaŵa yisyene. (Sal. 19:9; 119:142, 151) Mwamti yiliyose yakusasala pakwamba ya kusogolo yikusakwanilichikwa. (Yes. 55:10, 11) Jwalakwe akusakwanilisya yosope yakusasala. (Num. 23:19) Kusala yisyene, Yehofa nganaŵa alambwisye. (Aheb. 6:18) Mwamti ni ligongo lyakwe Yehofa akusamanyika kuti ali “Mlungu jwakusaŵecheta yisyesyene.”—Sal. 31:5.
5. Ligongo chichi nganiyiŵa yakusawusya kummanyilila “Mlungu jwakusaŵecheta yisyesyene”? Alondesye. (Masengo 17:27)
5 Atamose kuti ŵandu akusaŵecheta kuti yili yakusawusya kummanyilila “Mlungu jwakusaŵecheta yisyesyene,”nambo yisyesyene yakwe yili yakuti nganiyiŵa yakusawusya kummanyilila. Mwamti yindu yosope yayitusyungulile yikusalosya kuti jwalakwe apali nditu. (Alo. 1:20) Paulo piŵaŵechetanaga ni Agiliki ŵaŵalijiganyisye mnope ŵaŵaliji ku atene, jwasasile kuti Mlungu akusaka kuti ‘tumpate’ soni kuti “nganaŵa kwakutalikangana ni jwalijose jwa m’weji.” (Aŵalanje Masengo 17:27.) Mwamtitu Yehofa akusiŵaŵandichila ŵandu ŵakulinandiya ŵakusasosasosa yisyesyene yakwamba jwalakwe.—Yoh. 6:44.
6. Ana ni yisyesyene yine yapi yayili m’Baibulo, soni ligongo chichi akusayamichila kuyimanyilila yisyesyeneyo?
6 Litala limo lyampaka tukamulichisye masengo kuti tummanyilile Yehofa lili kulijiganya Baibulo. Achalume ŵaŵalembile bukuji ŵasalilidwe ni msimu weswela. (2 Pet. 1:20, 21) Myoyo yindu yosope yayili m’Baibulo yili yisyesyene soni tukusosekwa kuyikulupililaga. Mwachisyasyo, mpaka tukulupilile yajikusasala pakwamba ya ndandililo ja yakupanganyikwa yosope soni muwatandile umi pa chilambopa. (Gen. 1:1, 26) Baibulo jikusasalasoni ligongo lyakwe wosope tuli ŵakulemwa, tukusasasimanaga ni yakusawusya yejinji soni tukusawaga mwamti yeleyi mpaka tuyikulupilile. (Alo. 5:12; 6:23) Mwamti mpaka tukulupililesoni yajasasile Baibulo kuti Yehofa kupitila mwa Mwanache jwakwe, chachilinganyasoni yindu yayijonasile Satana jwali “msyene unami.” (Yoh. 8:44; Alo. 16:20) Nambosoni mpaka tukulupilile yajasasile Baibulo yakuti Yesu chachajonanga ŵakusakala, kwajimusya ŵawe, kuchilinganya chilambo soni kutukamuchisya kuti tuŵe ŵamlama. (Yoh. 11:25, 26; 1 Yoh. 3:8) Kusala yisyene, welewu uli upile wekulungwa watupele Yehofa. Jwalakwe atujiganyisye yisyesyene yakwamba jwalakwe soni atupele upile wakuti twajiganyeje ŵane yisyesyeneyi.—Mat. 28:19, 20.
LIGONGO LYAKWE TUKUSAŴECHETA YISYESYENE
7-8. Ana tusasosekwa kuŵechetaga yisyesyene tuli tukwete yakulinga yamti uli? Apeleche chisyasyo. (Maliko 3:11, 12) (Alolesoni yiwulili.)
7 Mpela mwatuyiwonele kundanda kula, tukusosekwa kuŵechetaga yisyesyene naga tukusaka kuŵa mu liŵasa lya Yehofa. Nambope, kuti tumsangalasyeje jwalakwe tukusasosekwa kutenda yejinji. Yindu yayikusatutendekasya kuti tuŵecheteje yisyesyene yikusaŵa yakusosekwa kwa Yehofa. Agambe ganichisya yayatendekwe pa utumiki wa Yesu ali pachilambopa. (Aŵalanje Maliko 3:11, 12.) Yesu ali mkulalichila mumbali mwa nyasa ja Galileya, ŵandu ŵajinji ŵamsyungulile jwalakwe. Pagulu ja ŵanduji papali ŵane ŵaŵakwete misimu jakusakala ŵaŵagwile pameso pakwe ni kugumilaga kuti, “Wawo ali Mwanache jwa Mlungu.” Ligongo chichi misimu jakusakala jaŵechete yisyesyene yakwamba Yesu? Jemanjaji ŵasakaga kuti ŵandu ŵaŵapikanilagawo atande kwakulupilila ni kwatendekasya kuti aleche kumtumichila Yehofa. Yili yisyene kuti misimu jakusakalaji jaŵechetaga yisyesyene, nambope jaŵechete yeleyi ligongo lyakulinonyela. Yeleyitu nganiyimsangalasya Yesu ligongo jwamanyililaga yakulinga yawo. Mwamti jwalakwe jwajilekasisye misimujo kuti jikalalichilaga yakwamba jwalakwe.
8 Ana yeleyi yikutujiganya chichi? Chindu chachikusatutendekasya kuŵecheta yisyesyene chikusaŵa chakusosekwa mnope kwa Yehofa. Myoyo tukusosekwa kwiganyaga yisyesyene ya m’Baibulo tuli tukwete yakulinga yambone soni tukusasosekwa kupeleka uchimbichimbi watukusapochela kwa Yehofa ngaŵaga kwa m’weji.—Mat. 5:16; alole Masengo 14:12-15.
Pakwiganya yisyesyene ya m’Baibulo, ana akusasaka kuti mundu jwakumjiganyajo aganichisyeje ya ŵani? (Alole ndime 7-8)
9. Ana tukusosekwa kuŵambala kutenda chichi, soni ligongo chichi?
9 Kwende tulole chakutendekwa chine champaka tusosekwe kuŵambala kuliyikachisya uchimbichimbi achimsyewe. Tuwanichisye kuti m’bale jwa udindo atusalile ngani jachimsisi ni m’weji tukwasalila ŵane nganijo. Kaneko naga ŵanduwo akuyikopochela kuti yitwasalileyo yili yisyesyene, jemanjaji mpaka atuchimbichisyeje ligongo lya yeleyi pakuganisya kuti ŵandu akusatusalila yindu yejinji yachimsisi. Atamose kuti yeleyi mpaka yitendekasye kuti ŵandu atuchimbichisyeje mnope nambope Yehofa nganaŵa asangalele nayo. (Mis. 11:13) Ligongo chichi tukuŵecheta yeleyi? Tukuŵecheta yeleyi ligongo lyakuti welewu nganiŵa udindo wetu soni mpaka yiŵe kuti nganituyiŵecheta ni chakulinga chambone.
MWAMPAKA TWASALILILE ŴANE YISYESYENE
10. Ana maloŵe “gambone” gakugasala pa Akolose 4:6 gakusagopolela chichi?
10 Aŵalanje Akolose 4:6. Ndumetume Paulo jwakumbwisye Aklistu ŵa ku Kolose kuti ndaŵi syosope maloŵe gawo “gaŵeje gambone.” Ana pelepa Paulo jwagopolelaga chichi? Liloŵe lya Chigiliki lyaŵalikamulichisye masengo pelepa likusagopolela kuti yatukusaŵecheta yikusasosekwa kuŵa yakamuchisya soni yakulimbikasya kwa ŵane.
11-12. Ligongo chichi tukusosekwa kwiganya yisyesyene mwakusamala? Apeleche chisyasyo. (Alolesoni yiwulili.)
11 Tukusasosekwa kukuya malangiso ga Paulo mwakuŵecheta maloŵe gambone patukwajiganya ŵane yisyesyene ya m’Baibulo. Baibulo jikusalandanya yisyesyene ni upanga wakutema mnope wampaka ulekanganye umi ni msimu. Kasale kane, Baibulo mpaka jitukamuchisye kumanyilila mwatuŵelele soni yakulinga yatukwete. (Aheb. 4:12) Nambo naga ngatukukamulichisya masengo chenene Baibulo, mpaka yatendekasye ŵane kutenguka kapena kusaka kangana ni m’weji. Ana yeleyi mpaka yitendekwe chamti uli?
12 Aganichisye chakutendekwa achi. Tuwanichisye kuti pali mu utumiki asimene ni jwamlume jwine jwakusakamulichisya masengo yiwanichisyo pakupopela soni akusatenda Kilisimasi ni Isitala pampepe ni liŵasa lyakwe. Mwine mpaka tukamulichisye masengo Baibulo pakumsalila jwamlumejo kuti kuyipopolela yiwanichisyo yayili yangali umi uli ungali lunda soni mpaka tumlosye kuti yisangalalo ya Kilisimasi ni Isitala yili yachikusa. (Yes. 44:14-20; 2 Akoli. 6:14-17) Naga tukutenda yeleyi pa ulendo wetu wandanda, mpaka yiŵe kuti tukumsalila yisyesyene nditu, nambope yisyesyene yakwe mpaka yiŵe yakuti nganitukamulichisya masengo maloŵe ga Mlungu mu litala lyakuŵajilwa.
Ana mpaka amjiganye chamti uli mundu yisyesyene ya m’Baibulo mwalunda? (Alole ndime 11-12)a
13. Ana maloŵe getu mpaka gaŵe gakunong’a mpela kuti tugatasile njete chamti uli?
13 Paulo jwasasilesoni kuti patukuŵecheta, maloŵe getu gaŵeje gambone mpela kuti tugatasile njete. Pelepatu Paulo nganagopolelaga kuti tukusosekwa kusisa yindu yayili yisyesyene. Mmalomwakwe, jwalakwe jwatulimbikasyaga kuti patukuŵecheta yisyesyene ya m’Baibulo tukusosekwa kuŵechetaga maloŵe ‘gakunong’a mpela kuti tugatasile njete’ soni kuti ŵakugapikana “pakupasya” agapikaneje chenene. (Yob. 12:11) Nambotu kutenda yeleyi mpaka kuŵe kwakusawusya. Mwachisyasyo, mpaka tuganisyeje kuti chakulya chatukusachinonyela m’weji ŵanesoni mpaka achinonyele. Mwakulandanamo, mpaka tuganisyeje kuti yakuŵecheta yetu mpaka yimsangalasye jwalijose. Nambotu mwelemu ngaŵa ni mwayikusaŵela. Mwachisyasyo, ŵandu ŵakutyochela ku madela gane akusasala nganisyo syawo atamose yili mkuti akuŵechetana ni ŵandu ŵali ŵakulungwa kulekangana ni jemanjajo. Nambotu kutenda yeleyi m’madela gane kuli kwangaŵajilwa soni mpaka uŵe mpela mwano. Mwamtitu ni ligongo lyakwe Paulo jwasasile kuti tukusosekwa kumanyilila ‘mwampaka tumjanjile mundu jwalijose.’ Yeleyi yikugopolela kuti maloŵe getu gaŵeje gakunong’a mwakamulana ni ŵandu ŵakugapikana maloŵe getugo ngaŵaga mwakamulana ni kwatukutyochela kapena mwatukupikanila m’weji.
NDAŴI JATUKUSASOSEKWA KUŴECHETA YISYESYENE
14. Ana Yesu paŵaliji pachilambopa jwajiganyisye ŵakulijiganya ŵakwe yindu yosope yiŵayimanyililaga? Alondesye.
14 Ndaŵi syosope, Yesu jwaŵechetaga maloŵe gambone kwa ŵakumkuya ŵakwe, soni jwalakwe jwajiganyaga yindu yejinji mwachinonyelo. (Maliko 6:34) Atamose kuti yaliji myoyo, papali yindu yejinji yiŵasosekwaga kwajiganya. Nambo Yesu nganiŵajiganya jemanjaji yindu yosope yijwayimanyililaga. Jwalakwe jwamanyililaga kuti ŵakumkuya ŵakwe nganaŵa ayipikanichisye yindu yosope pandaŵi jimo. Jwalakwe jwamanyililagasoni kuti jeleji nganijiŵa ndaŵi jambone kwa jemanjaji kuti amanyilile yisyesyene yine. Mwamti Yesu jwasalile kuti nganaŵa ayipikanichisye yisyesyene yeleyo pandaŵi jelejo. (Yoh. 16:12) Ana tukulijiganya chichi pelepa?
15. Ana tukusosekwa kwajiganya ŵakulijiganya Baibulo ŵetu yindu yosope yatukuyimanyilila pandaŵi jimo? Alondesye. (Misyungu 25:11) (Alolesoni chiwulili.)
15 Chisyasyo cha Yesuchi chikulosya kuti kumanyilila yisyesyene ya m’Baibulo ngakukusagopolela kuti tukusosekwa kwajiganya ŵane yosope yatukuyimanyilila pa ndaŵi jimo. Ana mpaka tumsyasye chamti uli Yesu? Tukusosekwa kuganichisyaga mwayiŵelele yindu pa umi wa ŵandu. Aganichisyesoni ya jwamlume jwakusasangalalila Kilisimasi soni Isitala jula. Tukumanyilila kuti yisangalalo yeleyi yili yachikusa soni kuti Mlungu ngakusayijitichisyaga. Ni agambe ganichisya kuti atandite kulijiganya Baibulo ni jwamlumeju kuli kusigele wiki jimo kapena ma wiki gaŵili kuti Kilisimasi jitendekwe. Ana mpaka yiŵe kuti tukuŵecheta maloŵe gambone naga tukumsalila yajikusasala Baibulo pakwamba ya yisangalalo yachikusa ni kwembecheyaga kuti chaleche kusangalalila Kilisimasi ndaŵi jijojo? Yili yisyene kuti ŵakulijiganya ŵane mpaka akuye mwachitema yindu yalijiganyisye kutyochela m’Baibulo. Nambope ŵane yikusiyajigalila ndaŵi kuti achenje kaganisye soni ndamo syawo. Myoyo, mpaka twakamuchisye ŵakulijiganya Baibulo ŵetu kuchenga yindu yine mwakwasalila yindu yakusosechela pandaŵi jakuŵajilwa soni pandaŵi jampaka ayipikanichisye.—Aŵalanje Misyungu 25:11.
Akuyeje chisyasyo cha Yesu mwakuganichisya ndaŵi jakusaka kuŵecheta yisyesyene ya m’Baibulo soni winji wa yindu yampaka aŵechete (Alole ndime 15)
16. Ana mpaka twakamuchisye chamti uli ŵakulijiganya Baibulo ŵetu kuti ‘akuyejepe yijiganyo yisyesyene’?
16 Pana yindu yine yayikusatutendekasyaga kuŵa ŵakusangalala mnope soni chimo mwa yindu yeleyi chili kwakamuchisya ŵane kulijiganya yisyesyene yakwamba Yehofa. Mpaka twakamuchisye jemanjaji kuti ‘akuyejepe yijiganyo yisyesyene’ naga tukupitilisya kuŵa chisyasyo chambone kwa jemanjaji. (3 Yoh. 3, 4) Myoyo, yakusatenda yilosyeje kuti akusakulupilila yindu yajasasile Baibulo pakwamba ya msogolo. Aŵecheteje yisyesyene ya m’Baibulo ni chakulinga chambone. Pakwiganya yisyesyene ya m’Baibulo, akamulichisyeje masengo maloŵe gambone soni gachinonyelo nambo pandaŵi jakuŵajilwa. Soni ŵatendekasyeje ŵandu kuti amchimbichisyeje Yehofa m’malo mwakwachimbichisya wawojo. Naga akutenda yeleyi chachilosya kuti akusamtumichila Yehofa jwali Mlungu jwa yisyesyene.
NYIMBO NA. 160 “Ngani Syambone”!
a KULONDESYA CHIWULILI : Chiwulili chandanda, m’bale achiweni chitela cha maluŵa cha pa Kilisimasi m’nyumba mwa mundu jwakumlalichila soni akumlosya jwalakwe ngani jakwamba muchatandile chisangalalo chachikusa cha Kilisimasi. Chiwulili chaŵili, m’bale akumlosya msyene nyumbajo ngani jajikwete mfundo syakamuchisya kwa achalume ŵakwete ŵanache. Ana pa matala gaŵiliga ni litala lyapi lyampaka liŵe lyakamuchisya mnope?