MALICHI 23-29, 2026
NYIMBO NA. 18 Tukuyamichila Ligongo Lyakutuwombola
Ana Mpaka Alosye Uli Kuyamichila Mbopesi Jakutuwombola?
“Chinonyelo chakwete Klistu chikusatulimbikasya.”—2 AKOLI. 5:14.
CHAKULINGA CHA NGANIJI
Chitulijiganye yampaka tutende wosopewe pakulosya kuyamichila mbopesi jakutuwombola.
1-2. Ana mbopesi ja Yesu jikusatulimbikasya kutenda chichi, soni ligongo chichi? (2 Akolinto 5:14, 15) (Alolesoni chiwulili.)
NAGA mundu jwine jwakulupwisye wawojo nyumba pijagwilile, ana nganaŵa alosisye kuyamichila? Atamose yili mkuti ŵandu ŵane nombenawo ŵakulupwisye, nambope wawojo pajika mpaka asache kuyamichila kwa mundu juŵakamwile masengo gakwakulupusyajo.
2 Mpela mutwayiwonele mu ngani jipite jila, nganiyiŵa yikomboleche kulikulupusya achimsyewe ku ulemwa utwajigalile kutyochela kwa achinangolo ŵetu. Nambope mbopesi jakutuwombola jikusatukulupusya mwakutukamuchisya kuti (1) tukululuchidweje yakulemwa yetu, (2) tukole chembecheyo chakuŵa ŵamlama, soni (3) kuti tuŵe pa unasi wambone ni Yehofa. Mwamti ligongo lya yeleyi tukwete upile wakuŵa ni umi mpaka kalakala m’chilambo chasambano. Kusala yisyene, mbopesiji jikusalosya chinonyelo chakwete Yesu pa ŵandu. Sonitu jwalakwe jwanonyelagape ŵandu atamose mkanaŵe kwika pachilambopa. (Mis. 8:30, 31) Ndumetume Paulo jwalembile kuti, “chinonyelo chakwete Klistu chikusatulimbikasya.” (Aŵalanje 2 Akolinto 5:14, 15.) Yeleyi yikugopolela kuti tukusosekwa kulosya kuyamichila chinonyelo chiŵalosisye Yesuchi soni kukumbuchilaga ya chinonyelochi ndaŵi syosope.
Naga mundu jwine ŵakulupwisye umi wawo mpaka asosekwe kumyamichila. Nombewe, tukusasosekwa kumyamichilaga mnope Yehofa soni Yesu ligongo lyakutukulupusya ku ulemwa wetu (Alole ndime 1-2)
3. Ligongo chichi yampaka atende mundu jwine pakuyamichila mbopesi ja Klistu mpaka yilekangane ni yampaka atende jwine?
3 Ana chinonyelo cha Klistu mpaka chalimbikasye kutenda chichi? Yampaka ajanje wawojo mpaka yilekangane ni yampaka ajanje jwine. Kuti tupikanichisye yeleyi, tuwanichisye kuti ŵandu ŵatatu akwawula kumalo gakulandana nambo ŵanduwo akusatama kumadela gakulekangana. Matala gampaka akamulichisye masengo mpaka gaŵe gakulekangana. Mwakulandana ni yeleyi, “litala” kapena chakulinga champaka akole pakusaka kulosya kuyamichila mbopesi ja Klistu mpaka yijigalile ni mwawuŵelele unasi wawo ni Yehofa apano. Myoyo, munganiji chitukambilane magulu gatatu ga ŵandu, (1) ŵakulijiganya Baibulo, (2) Aklistu ŵabatisidwe, soni (3) ŵandu ŵiŵalesile mkutumichila Yehofa.
ŴAKULIJIGANYA BAIBULO
4. Ana Yehofa akusiŵawona chamti uli ŵakulijiganya Baibulo?
4 Naga akulijiganya Baibulo, akusosekwa kumanyilila kuti yakutenda pakupikanila ngani syambone yikulosya kuti wawojo ali jumo mwa ŵandu ŵele Yehofa ŵawutile kwa jwalakwejo. (Yoh. 6:44; Mase. 13:48) “Yehofa ni jwakusawungunya yayili m’mitima ja ŵandu.” Yeleyi yikugopolela kuti Yehofa akusakuwona kulingalinga kwawo pakusaka kummanyilila jwalakwe, soni akusasangalala pakutenda yakomboleka kuti amsangalasyeje. (Mis. 17:3; 27:11) Mbopesi ja Yesu jatendekasisye kuti yiŵe yakomboleka kuti wawojo aŵe pa unasi wambone ni Yehofa. (Alo. 5:10, 11) Myoyo ngakusosekwa kujiwonaga mbopesiji mwa uwanache.
5. Ana ŵakulijiganya Baibulo mpaka akamulichisye masengo chamti uli malangiso gagali pa Afilipi 3:16?
5 Naga ali jwakulijiganya Baibulo, ana mpaka alosye chamti uli kuyamichila mbopesi jakutuwombola? Litala limo lyampaka atendele yeleyi lili kukamulichisya masengo malangiso giŵapeleche Paulo ku mpingo wa Afilipi. Jwalakwe jwatite, “mulimose mwatujawulile pasogolo, kwende tupitilisye kwenda chenene m’litala lilyolyo.” (Afil. 3:16) Baibulo jine jagopolele ndimeji kuti, “Tukusosekwa kupitilisya kukuya litala lyatukwenda apanoli.” Myoyo pakukuya malangiso gaŵapeleche Pauloga, ngakusosekwa kunda chilichonse kwalepelekasya kwenda pa litala lya ku umili.—Mat. 7:14; Luk. 9:62.
6. Ana ŵakulijiganya Baibulo mpaka atende uli naga yikwasawusya kuchenga yindu yine pa umi wawo? (Detulonomo 30:11-14) (Alolesoni chiwulili.)
6 Ana mpaka atende chichi naga yikwasawusya kukulupilila yijiganyo ya m’Baibulo yalijiganyisye pachangakaŵapa? Akusosekwa kuwungunya soni kumŵenda Yehofa kuti ŵakamuchisye. (Sal. 86:11) Naga panyuma pakuwungunya yikwasawusyape kupikanichisya, akusosekwa kujileka kaje nganijo nambo ngakusosekwa kuleka kulijiganya Baibulo. Nambi uli naga yikwasawusya kuleka ndamo jinejakwe jajikusatindana ni mfundo sya m’Baibulo? Akusosekwa kukumbuchila kuti Yehofa nganaŵa atuŵendile kutenda yindu yanganituŵa tukombwele. Mwamti mpaka akombole kutenda yindu yakumsangalasya jwalakwe. (Aŵalanje Detulonomo 30:11-14.) Sonitu Yehofa jwasasile kuti chachakamuchisya. (Yes. 41:10, 13; 1 Akoli. 10:13) Myoyo ngakusosekwa kuwujila munyuma. Mmalo mwakuganichisya ya chakusawusya chakusimana nacho, nganisyo syawo siŵeje pakuyamichila yindu yosope yatupele Yehofa kupwatikapo mbopesi ja Mwanache jwakwe. Mwamti chinonyelo chawo pa Yehofa pachikukula chachiyiwona kuti “malamusi gakwego nganigaŵa gakusitopesya.”—1 Yoh. 5:3.a
Yehofa nganaŵa atuŵendile kutenda yindu yanganituŵa tukombwele. Jwalakwe chachitukamuchisya kuti tukombole kutenda yindu mwakamulana ni yakusasaka (Alole ndime 6)
7. Ana ŵachinyamata ŵele achinangolo ŵawo ali ŵamboni akusosekwa kuganichisya chichi?
7 Nambi uli jemanja ŵachinyamata ŵele achinangolo ŵenu ali ŵa Mboni? Jemanjasoni mli ŵakulijiganya Baibulo. Kusala yisyene, jemanja mli majiganyo ga Baibulo gakusosekwa mnope ga achinangolo ŵenu. Baibulo jikusati, “Mumŵandichile Mlungu, soni jwalakwe chachimŵandichila jemanja.” (Yak. 4:8; 1 Mbi. 28:9) Pamkulingalinga kuti muŵandichile Yehofa, nombe jwalakwe chachimŵandichila jemanja. Yehofa akusammanyilila jemanja pajikapajika. Jwalakwe akusamwuta mundu jwalijose kupwatikapo mundu jwapagwile m’liŵasa lya Mboni sya Yehofa. Ana ni chichi chachatendekasisye kuti yikombolecheje kuŵa pa unasi wambone ni Yehofa? Mbopesi jakutuwombola ni jajatendekasisye kuti yeleyi yikombolecheje mwamti ngakusosekwa kujiwonaga mbopesiji mwa uwanache. (Alo. 5:1, 2) Myoyo mkanaŵe kusimanikwa pa Chikumbuchilo cha chaka achino, wuli aganichisye yakwamba yiŵatendele Yehofa soni Yesu. Nambosoni akusosekwa kuganichisya yakuliŵichila yakulinga yampaka yakamuchisye kulosya kuti akuyamichila yaŵatendele Yehofa pakwapa Mwanache jwakwe kuti aŵe mbopesi jakutuwombola.b
AKLISTU ŴABATISIDWE
8. Ana Aklistu ŵabatisidwe akusalosya chamti uli kuti akusayamichila mbopesi jakutuwombola?
8 Naga ali Mklistu jwam’batisidwe, nikuti alosisye kala kuti akusayamichila mbopesi jakutuwombola m’matala gejinji. Mwachisyasyo, achenjile yindu yine paumi wawo kuti amsangalasyeje Yehofa soni kuŵa najo paunasi. Nambosoni akusapikanila lilamusi lya Yesu mwakwasalila ŵane yakusakulupilila. Konjechesya pelepa, ŵalipeleche kwa Yehofa soni kubatisidwa. Komboleka kuti ŵane akusiŵalagasya ligongo lyakuti ŵasagwile kumtumichila Yehofa. (2 Tim. 3:12) Kupilila kwawo mwakulupichika kukulosya chinonyelo chakwete pa Yehofa soni kuti akusayamichila mbopesi jakutuwombola.—Aheb. 12:2, 3.
9. Ana Aklistu ŵabatisidwe akusosekwa kusamala ni chichi?
9 Pana chindu chele Aklistu ŵabatisidwe akusosekwa kusamala nacho. Chindu chakwe chili kutanda kuleka mwapanandipanandi kuyamichila mbopesi jakutuwombola. Ana yeleyi mpaka yitendekwe mwamti uli? Aganichisye yayatendechele Aklistu ŵa mu yaka 100 yandanda ŵa ku Efeso. Yesu jwayamichile jemanjaji ligongo lya kupilila kwawo. Nambope, jwalakwe jwasalile jemanjajo kuti, “Namsimene ni magambo gakuti, mlesile chinonyelo chimwakwete pandanda.” (Chiw. 2:3, 4) Myoyo maloŵe ga Yesuga gakulosya kuti mwapanandipanandi Mklistu mpaka atande kutenda yindu ya usimu mwamwambo basi. Mklistu jweleju mpaka apopeleje, kwawula kumisongano soni kukamulaga nawo masengo gakulalichila nambo pakwamba kujigalila mwakutendela ŵane ngaŵaga chinonyelo chakwete pa Yehofa. Ana mpaka atende wuli naga akuyiwona kuti chinonyelo chawo pa Yehofa nganichiŵasoni mpela muchaŵelele pandanda?
10. Ana mpaka ‘aganichisye’ soni ‘kulipeleka mnope’ chamti uli payakutendekwa yausimu? (1 Timoteyo 4:13, 15)
10 Ndumetume Paulo ŵamsalile Timoteyo kuti ‘aganichisyeje’ soni ‘alipelecheje mnope’ payakutendekwa yausimu. (Aŵalanje 1 Timoteyo 4:13, 15.) Mwakamulana ni malangiso gelega, wawojosoni akusosekwa kuganichisya yampaka atende kuti ‘akundeje kuti msimu weswela wapeje machili.’ (Alo. 12:11) Mwachisyasyo, kukosechela misongano mpaka kwakamuchisye kupindula mnope. Nambosoni kutenda lijiganyo lyapajika pa malo pele pangali chakusokonasya, mpaka kwakamuchisye kuti akomboleje kuganichisya yakuŵalangayo. Mpela mwayikusaŵela ni moto kuti tukusasosekwa kuwukwisilila kuti ukasima, myoyosoni akusasosekwa kupitilisya kulijiganya kuti alosyeje kuyamichila yindu yatupele Yehofa kupwatikapo mbopesi jakutuwombola. Myoyo, kuli kusigele mawiki gamnono kuti Chikumbuchilo chitendekwe, mpaka aganichisye yindu yambone yakupata ligongo lyakuŵa jwa Mboni sya Yehofa. Ngatukukayichila kuti kutenda yeleyi kuchakamuchisya kuti ayamichileje mnope mbopesi jakutuwombola jajatendekasisye kuti yiŵeje yakomboleka kuŵa pa unasi ni Yehofa.
11-12. Naga twalesile kulipeleka, ana yikugopolela kuti msimu wa Mlungu ulesile kutulongolela? Alondesye. (Alolesoni chiwulili.)
11 Naga apano ngakulipeleka mnope mpela muŵatendelaga munyumamu, akatengukaga kapena kuganisya kuti msimu wa Mlungu ulesile kwalongolela. Akumbuchileje yaŵalembile ndumetume Paulo kwa Aklistu ŵa ku Kolinto pakwamba ya utumiki wakwe. Jwalakwe jwatite, “Atamose ngamuleje ndili ngangusaka, nambo udindo wanapochele wakuŵa jwakulolela nganiwuŵa umasile.” (1 Akoli. 9:17) Ana jwalakwe jwagopolelaga chichi pelepa?
12 Ndaŵi sine Paulo nganasakaga kulalichila. Atamose yaliji myoyo jwalakwe jwalingagalingaga kukusya kamtima kakusaka kulalichila. Jemanjasoni mpaka atende yeleyi mwakulingalinga kutenda yindu yakuŵajilwa atamose pandaŵi jangakusaka. Myoyo apopeleje kuti ‘aŵeje ŵakusachilila kutenda yindu yakumsangalasya’ Mlungu. (Afil. 2:13) Konjechesya pelepa, akusosekwa kupitilisya kutenda yindu ya usimu. Mwamti naga akutenda yeleyi, mkupita kwandaŵi chachiyiwona kuti atandilesoni kumnonyela mnope Yehofa soni kukola mtima wakulipeleka.
Apitilisyeje kutenda yindu yausimu atamose pangakusaka (Alole ndime 11-12)
13. Ana mpaka tupitilisye chamti uli kulilinga kuti tulole naga ‘tukwendape m’chikulupi’?
13 Ndaŵi ni ndaŵi tukusasosekwa kuliwungunya mpela mwalikusaŵechetela lilemba lya 2 Akolinto 13:5. Lilembali likusati, “Mpitilisye kulilinga kuti mlole naga mkwendape m’chikulupi. Mpitilisye kulilinga kuti mmanyilile kuti mli mundu jwamtuli.” Mwachisyasyo mpaka tuliwusyeje kuti, ‘Ana ngusaŵika yindu ya Uchimwene pamalo gandanda paumi wangu?’ (Mat. 6:33) ‘Ana yakusangalasya yangusasagula yikusalosya kuti ngusaŵengana ni yakusakala?’ (Sal. 97:10) ‘Ana ngusalimbikasya mtendele soni mkamulano pasikati pa Aklistu achimjangu?’ (Aef. 4:2, 3) Mwamti ndaŵi ja chikumbuchilo jajikusatupa ndaŵi jakuganichisya ya mbopesi jakutuwombola, jikusatupasoni upile wakuliwungunya soni kulolechesya kuti tukutama umi wakumsangalasya Klistu ngaŵaga achimsyewe.c
ŴANDU ŴAŴALESILE KUMTUMICHILA YEHOFA
14. Ligongo chichi abale ni alongo ŵane akusaleka kusongana?
14 Abale ni alongo ŵane akusaleka kusongana ni mpingo atamose ali amtumichile Yehofa mwakulupichika kwa yaka yejinji. Ligongo chichi akusetendaga myoyo? Ŵane mwa jemanjaji akusatenguka ligongo lya “yakudandawulisya ya pa umi.” (Luk. 21:34) Pele ŵane akusawujila munyuma ligongo lyakuti ŵakulupilila achimjawo ŵaŵechetele kapena kwatendela yindu yineyakwe. (Yak. 3:2) Nambope ŵane ŵalesile kusongana ligongo lyakuti ŵatesile yakulemwa yekulungwa soni nganajawula kukwasalila achakulungwa ŵa mpingo kuti ŵakamuchisye. Mwangasamala kandu ni yindu yayatendekasisye kuti awujile munyuma, ana mpaka atenda chichi naga ŵalesile kusongana? Ana mbopesi jakutuwombola soni chinonyelo chakusiŵalosyaga Yehofa ni Yesu chikusichalimbikasya wawojo kutenda chichi?
15. Ana Yehofa akusalosya chamti uli kuti akusasamala ya ŵandu ŵaŵalesile kusongana? (Esekiyele 34:11, 12, 16)
15 Aganichisye mwakusapikanila Yehofa pakwamba ya ŵandu ŵaŵalesile kusongana. Jwalakwe ngakusiŵaliŵalila jemanjaji. Mmalomwakwe jwalakwe akusasiwungunya jemanjaji mpela ngondolo syasisokonechele. Nambosoni akusiŵakamuchisya kuti awujile kwa jwalakwe. (Aŵalanje Esekiyele 34:11, 12, 16.) Ana Yehofa akutendasoni yeleyi kwa wawojo? Ngatukukayichila ata panandi. Naga akuŵalanga nganiji, yigamba kulosya kuti wawojo ali ŵakusachilila kutenda yindu yakumsangalasya Yehofa. Mpela yiŵatite jwalakwe pakuwuwona mtima wawo wambone nikwawutila mu gulu jakwe, ngatukukayichilasoni kuti apano akwakamuchisyasoni wawojo kuti awujilesoni.
16. Ana chichi champaka chakamuchisye ŵandu ŵaŵalesile kusongana kuti awujilesoni kwa Yehofa? (Alolesoni chiwulili.)
16 M’kabuku kakuti Awujile kwa Yehofa mwana maloŵe gakulimbikasya. Maloŵega gakusati, “Yehofa akwasimichisya kuti chachakamuchisya kuti awujilesoni kwa jwalakwe. Chachakamuchisya kumalana ni kulagasika nganisyo, yindu yayatumbilikasisye, soni chachakamuchisya kola mtendele wa mumtima ligongo lyakuŵa ni chikumbumtima chambone. Kaneko, chachitandilasoni kumtumichila Yehofa ni ŵakulambila achimjawo.” Akumbuchilejesoni kuti achakulungwa ŵa mumpingo ali ŵakusachilila kwakamuchisya wawojo. Jemanjaji mpaka aŵe “malo gakutilila mbepo soni gakulijuŵisya ku chimbungo.” (Yes. 32:2) Pakusaka kulosya kuyamichila mbopesi jakutuwombola, mpaka aliwusye kuti, ‘Ana mpaka ndende chichi kuti mbujilesoni kwa Yehofa?’ (Yes. 1:18; 1 Pet. 2:25) Mwachisyasyo, ana mpaka akatende nawo misongano ku Nyumba ja Uchimwene? Ana mpaka amŵende jwamkulungwa jwa mumpingo kuti ŵakamuchisye mwa usimu yayikupwatikapo kwapatila mundu jwakuti ŵajiganyeje Baibulo? Ngatukukayichila kuti Yehofa chachapa upile wawojo pakulingalinga kuwujila kwa jwalakwe soni kulosya kuti akuyamichila mbopesi ja Mwanache jwakwe.
Aliwusye kuti, ‘Ana mpaka ndende chichi kuti mbujilesoni kwa Yehofa?’ (Alole ndime 16)
ANA MPAKA ATENDE WULI PAKULOSYA KUYAMICHILA?
17-18. Ana mpaka tukamulichisye masengo chamti uli ndaŵi jetu mwalunda mkanitutende Chikumbuchilo cha chaka achino?
17 Yesu jwasasile kuti mbopesi jakutuwombola japelechedwe ni “chakulinga chakuti jwalijose jwakumkulupilila jwalakwe akajonanjidwa nambo akole umi wangamala.” (Yoh. 3:16) Mbopesi jakutuwombolaji jili litala liŵakamulichisye masengo Yehofa kuti atukulupusye ku ulemwa ni chiwa. Myoyo, tukajiwonaga mbopesiji mwa uwanache. (Alo. 3:23, 24; 2 Akoli. 6:1) Kuli kusigele mawiki gamnono kuti Chikumbuchilo chitendekwe, tukusakola upile wakuganichisya ya chinonyelo chaŵatulosisye Yehofa soni Yesu. Mwamti chinonyelo chelechi chitulimbikasyeje kuyamichila yaŵatutendeleyi.
18 Ana wawojo mpaka alosye chamti uli kuyamichila? Yampaka ajanje mpaka yilekangane ni yampaka ajanje ŵane. Atamose yili myoyo, ngatukukayichila kuti Yehofa chachapa upile pakutenda yiliyose yampaka akombole kuti aŵe mugulu ja ŵandu ŵangaŵalanjika ‘ŵangakusatama umi wakulisangalasya achimsyene, nambo ŵakusatama umi wakumsangalasya jwele juŵawilile ni kwimuka.’—2 Akoli. 5:15.
NYIMBO NA. 14 Amjimbile Mwenye Jwasambano jwa Chilambo Chapasi
a Kuti akamulichisyeje masengo yakulijiganya m’Baibulo, akuye yayili m’libokosi lyakuti “Akole Chakulinga Achi” lyalili kumbesi kwa lijiganyo lililyose m’buku jakuti Asangalaleje Mpaka Kalakala!
b Kuti amanyilile yampaka atende kuti apitilisye kuŵa paunasi wambone ni Yehofa, aŵalanje ngani jamtwe wakuti, “Ŵachinyamata—‘Mjendelechele Kulinganya Chikulupusyo Chenu’” jajikusimanikwa mu Sanja ja Mlonda ja Disemba 2017.
c Kuti amanyilile yampaka atende kuti apitilisye kumyamichila Yehofa, aŵalanje ngani ja Chichewa jamtwe wakuti “Kodi Nchiyani Chimakusonkhezerani Kutumikira Mulungu?” jajikusimanikwa mu Sanja ja Mlonda ja Juni 15, 1995.