Aganichisyeje Ngani sya M’Baibulo

M’Baibulo mwana ngani syejinji syasikusasala yakutendekwa yisyesyene syampaka situjiganye yindu yakusosekwa mnope. Naga tukuganichisya nganisi mpaka yitukamuchisye kuti tupikanichisyeje yatukuŵalangayo soni kupata maumbone gejinji kutyochela pa nganisi. Kwende tulole yindu yine yampaka atende kuti aganichisyeje ngani sya m’Baibulo.

• Aŵalanjeje mwakwesya maloŵe. Kuŵalanga Baibulo mwakwesya maloŵe mpaka kwakamuchisye kuti apikanichisyeje yakuyilondesya mu nganijo. Pakuŵalanga Baibulo mpela liŵasa mpaka aliwanichisyeje ni yakuyilondesya mu nganijo naga jwalijose mwiŵasamo akuŵalanga mbali jakwimila mundu jwine jwakwimila mu nganijo.

• Aganichisyeje nganijo. Atendeje yakomboleka kuti amanyilila mwele mundu jwaliji munganijo mwakuganichisya soni mwakupikanila. Mwachisyasyo, aliwusye kuti, ‘Ligongo chichi mundu jwali mu nganiji akuŵecheta soni kutenda yindu yeleyi? Ngaŵe mu chakutendekwachi, ana ngaganichisye soni kupikana uli?’

• Alembeje kapena kwambula chiwulili. Kwambula chiwulili cha yakutendekwa ya m’Baibulo, mpaka kwakamuchisye kuti akumbuchileje nganisyo chenene atamose kuti nganakola luso lwakwambula chiwulili.