Ana pa Ofesi ja Nyambi Pakusatendekwa Cici?

Ŵandu ŵa mu liŵasa lya Beteli akusatumicila m’madipatimenti gakulekanganalekangana, pakamucisya masengo gakulalicila m’cilambo cawo kapena m’yilambo yine. Ŵane akusatumicila m’makuga gakugopolela mabuku, kupanganya magasini, kupanganya mabuku, kusunga mabuku, kupanganya yindu yakupikanila ni yakulolela, kapena kusamalila ngani sine syakwaya dini.

Komiti ja Nyambi jikusalolela yakutendekwa pa nyambipo. Likuga Lyakulongolela likusapeleka masengo gakulolela yakutendekwa pa ofesi ja nyambi jilijose kwa Komiti ja Nyambi jajikusakola acakulungwa ŵakuŵajilwa ŵatatu kapena kupunda pelepo. Komitiji jikusamanyisya Likuga Lyakulongolela mwagakwendela masengo m’cilambo cakucilolela, soni kwasalila yakusawusya yiliyose yayipagwile. Yeleyi yikusakamucisya Likuga Lyakulongolela kumanyilila ngani syampaka sikopoce m’mabuku, m’misongano ja mpingo, soni m’misongano jekulungwa. Jwakwimila Likuga Lyakulongolela jwakolanjikwa jwakulolela nyambi akusamtumisyaga ndaŵi ni katema kukwendela nyambi, soni kwakamucisya ŵa Komiti ja Nyambi kuti akamuleje cenene masengo gawo. (Miyambo 11:14) Pakusaŵasoni msongano wapajika wawukusakola ngani ja jwakwendela nyambi jajikusalimbikasya ŵandu ŵa mumkuli wa nyambijo.

Jikusakamucisya mipingo ja kumaloko. Abale ŵakuŵajilwa ŵa ku ofesi ja nyambi akusajiticisya kuti kupagwe mipingo jasambano, soni kwiticisya abale kuŵa acakulungwa ŵa mumpingo ni ŵakutumicila ŵakamucisya. Abaleŵa akusalolelasoni masengo ga Apayiniya, amishonale, ŵakulolela ŵakwendela ŵakutumicila mumkuli wa nyambijo. Akusalinganya misongano jekulungwa, kulolela masengo gakutaŵa Nyumba sya Ucimwene syasambano, soni kulolecesya kuti mabuku gakwawula kumipingo kuti jikoleje yajikusosekwa. Yiliyose yayikusatendekwa pa nyambi yikusakamucisya kuti masengo gakulalicila gajendeje cenene, soni mwakuŵajilwa.—1 Akolinto 14:33, 40.

• Ana Komiti ja Nyambi jikusakamucisya catuli Likuga Lyakulongolela?

• Ana pa ofesi ja nyambi pakusaŵa masengo gatuli?