LIJIGANYO 21

Ana Beteli ni Cici?

Ŵamboni sya Yehofa ŵaŵili ŵakusakamula masengo mu Depatimenti Jakwambula pa Beteli — Depatimenti Jakwambula ku U.S.A.

Jwamboni sya Yehofa akukamula masengo kwakupanganya mabuku ku Beteli ja ku Germany — Germany

Jwamboni sya Yehofa akukamula masengo kwakucapa yakuwala ku Beteli ja ku Kenya — Kenya

Ŵakutumicila kukicini akulinganya matebulo m’cipinda cakulila ku Beteli ja ku Colombia — Colombia

Maloŵe gakuti Beteli gali gakutyocela ku Cihebeli gagakusagopolela kuti “Nyumba ja Mlungu.” (Genesis 28:17, 19) Maloŵega gali gakuŵajilwa ligongo Beteli gali malo gakola nyumba syataŵile ŵa Mboni sya Yehofa pacilambo cosope gagakusakamucisyaga kuti masengo gakulalicila galongolelegwe, soni gajendeje cenene. Likuga Lyakulongolela likusatumicila ku malikulu ku New York m’cilambo ca U.S.A, kweleko ni kwakusalolela masengo gagakutendekwa m’maofesi ga nyambi m’yilambo yakulekanganalekangana. Ŵakusatumicila m’maofesiga akusakolanjikwa liŵasa lya Beteli. Mpela mwalikusaŵela liŵasa, jemanjaji akusatamaga ni kamula masengo yimpepe, akusalila pampepe yakulya, soni kulijiganya Baibulo yalumo mwakamulana.—Masalimo 133:1.

Gali malo gapajika gele ŵandu ŵakwe ali mpela liŵasa lya ŵandu ŵakulipeleka. Pa nyumba sya Beteli syosope, pakusaŵa acalume ni acakongwe ŵa Ciklistu ŵakulipeleka kutenda lisosa lya Mlungu, soni kamucisya yindu ya Ucimwene ndaŵi syosope. (Matayo 6:33) Jemanjaji ngakusapocela malipilo, nambo akusiŵapaga malo gakugona, yakulya ni tumbiya twakuti twakamucisyeje kusumila yindu yine yakusosekwa pa umi wawo. Jwalijose pa Beteli akwete yakutenda, ŵane ya mu ofesi, kuteleka yakulya, kapena kulinganya m’cipinda cakulila yakulya. Ŵane akusatumicila kwakupanganyila mabuku, kusamalila nyumba syagona, kucapa ni kusita yakuwala, kulinganya yakonasika, kapena kutenda yine yakulekanganalekangana.

Malo gayakutendekwa yejinji yakamucisya masengo gakulalicila ya Ucimwene. Lisosa lyekulungwa lya Beteli lili kuwandisya usyesyene wa m’Baibulo kwa ŵandu ŵajinji. Mwambone, kabukuka ŵakalembile mwakulongolelegwa ni Likuga Lyakulongolela, ni ŵakatumisye pakompyuta kwa makuga ga ŵagopolela mabuku pacilambo cosope. Ŵakapanganyisye pa makina gakuwutuka mnope gagakusimanikwa m’nyumba syakulekanganalekangana sya Beteli, ni kukatumisya ku mipingo jakupunda 100,000. Pamasengo galigose gagakusapagwa pakulinganya mabuku, liŵasa lya Beteli likusakamucisya mnope pamasengo gakusosekwa mnope gakulalicila ngani syambone.—Maliko 13:10.

Ana ŵani ŵakusatumicila pa Beteli, soni akusasamalila catuli?
Ana masengo gakusosekwa gatuli gakusakamucisya ŵandu ŵa pa Beteli jilijose?