LIJIGANYO 23

Ana Mabuku Getu Akusagalemba ni Kugagopolela Catuli?

Mundu akukamula masengo ku Depatimenti jakulemba mabuku ku U.S.A — Dipatimenti Jakulemba, U.S.A.

Kakuga ka ŵagopolela mabuku ku South Korea — South Korea

Jwamlume ajigele buku jajigopoleledwe ni Mboni sya Yehofa ku Armenia — Armenia

Msikana jwa ku Burundi ajigele buku jajigopoleledwe ni Mboni sya Yehofa — Burundi

Jwamkongwe jwa ku Sri Lanka ajigele buku jajigopoleledwe ni Mboni sya Yehofa — Sri Lanka

Pakusaka kuti tutende yiliyose yakomboleka kuti tulalicile “ngani syambone” kwa “ŵangosyo silisyose, ni mipingo, nipo soni ŵandimi syosope,” tukusakoposya mabuku mu yiŵeceto yakupunda 600. (Ciunukuko 14:6) Ana tukusakombola catuli kutenda masengo gakusawusyaga? Tukusagakombola ni cikamucisyo ca ŵakulemba ŵakutyocela m’yilambo yakulekanganalekangana, soni ŵagopolela ŵakwana 3,000, wosopeŵa ali ŵa Mboni sya Yehofa.

Ngani syakwe akusasilemba mu cisungu. Likuga Lyakulongolela likusalolela masengo ga Dipatimenti Jakulemba ku likulu lyetu lya pacilambo cosope. Dipatimentiji jikusalinganya masengo ga ŵakulemba ŵakutumicila ku likulu lyetu, soni ku maofesi ga nyambi gane. Kola ŵakulemba ŵakulekanganalekangana kukusatukamucisya kulemba ngani syasikusakwaya ndamilo syakulekanganalekangana yayikusatendekasya kuti mabuku getu gaŵe gakusangalasya kwa ŵandu m’yilambo yosope.

Ngani syasilembilesyo akusasitumisya kwa ŵagopolela. Panyuma pakuti ngani syalembile asijiticisye, akusasitumisya pakompyuta ku makuga ga ŵagopolela pacilambo cosope, ŵakusagopolela, kulola naga agopolele cenene, soni kusiŵalanga. Akusalingalinga kusagula “maloŵe gakuŵajilwa ga usyesyene” gampaka gatagulile cenene mu ciŵeceto cawo yayili ku Cisungu.—Mlaliki 12:10.

Makompyuta gakusakamucisya kuti masengoga gajendeje mwacitema. Makompyuta ngaŵa mkukamula masengo ga ŵandu ŵakulemba ni ŵakugopolela. Nambope, masengo gawo komboleka kwenda mwacitema pakamulicisya masengo mabuku gagopolela maloŵe, mapologalamu, soni mabuku gakuwungunyila ngani ga pa kompyuta. Mboni sya Yehofa syalinganyisye pologalamu ja pakompyuta jakolanjikwa kuti Multilanguage Electronic Publishing System (MEPS). Mu pologalamuji akusajinjisyamo ngani sya yiŵeceto yejinji, kulumbikanya ngani ni yiwilili yakwe, soni kusilinganya kuti apanganye cenene mabuku.

Ana ligongo cici tukusalingalinga kutenda yosopeyi, atamose mu yiŵeceto yakusaŵeceta ŵandu ŵamnono? Ligongo lili lisosa lya Yehofa kuti “ŵandu wosope akulupuce ni ayicile pakumanyilila usyesyene.”—1 Timoteo 2:3, 4.

Ana mabuku getu akusagalemba catuli?
Ligongo cici tukusagopolela mabuku getu mu yiŵeceto yejinji?