Masengo Gakutaŵa Gajesile Chenene Ulwele wa Kolona Mkaniwutande

Chaka chilichose ŵandu ŵajinji akusabatisidwa. Myoyo tukusosekwa malo gejinji gakuti tukamulichisyeje masengo pakumlambila Yehofa. Pa ligongo lyeleli, Dipatimenti ja Mapulani soni Yakutaŵataŵa japachilambo chosope jaliganyisye yakuti ataŵe soni kulinganya malo gakulambilila gakupunda 2,700 m’chaka cha utumiki cha 2020.a

Mwangajembecheya, mapulaniga gajimi ligongo lya mlili wa COVID-19. Pakusaka kwateteya abale ni alongo soni kukuya malamusi ga boma, Komiti Jakuwandisya ja Likuga Lyakulongolela jajimiche masengo ga pachilambo chosope. Atamose kuti yaliji myoyo nambope chaka cha utumiki cha 2020 twataŵile soni kulinganya malo gakulambilila gakupunda 1,700 mliliwu mkaniwutande. Konjechesya pelepa twataŵilesoni nyambi syakupunda 100. Kwende tulole mwele kutaŵidwa kwa nyambi siŵili mwasitite kwakamuchisya abale ni alongo ŵetu.

Nyambi ja ku Cameroon. Nyambi jandanda ja Cameroon jaliji ku Douala. Nyambiji jaliji jamwana mwamti jasosekwaga kujikusya. Myoyo Komiti Jakuwandisya jaganichisye yakuti nyambiji ajilinganyesoni. Nambope kuti ajilinganye nyambiji pasosechelaga mbiya syejinji kulekangana ni kutaŵa jine. Jemanjaji ŵaganichisyesoni yakuti agambe kutaŵa nyambi jasambano kapena kusuma nyumba ni kulinganya, nambo yosopeyo yalepeleche.

Pali papitile kandaŵi abaleŵa ŵapikene yakuti ŵa boma akusaka kulinganya msewu wawaliji kumpoto kwa msinda wa Douala. Msewuwu waliji chiŵandika ni Malo Getu ga Msongano. Abaleŵa ŵayiweni kuti msewuwu chiwutendekasye kuti yindu yakusosechela yiyicheje mwangasawusya pamaloga. Ligongo lya yeleyi twayiweni kuti maloga mpaka gaŵe gambone kutaŵa nyambi. Myoyo Likuga Lyakulongolela lyajitichisye kuti mbali jine ja Malo ga Msonganoga ataŵepo nyambi jasambano.

Abale ni alongo ŵatandite kamula masengo gakutaŵa mwakamusyangana ni mamkapani gane. Yeleyi yakamuchisye kuti tukajonanga mbiya syejinji. Mwamti mbiya syatwakamulichisye masengo pakutaŵa nyambiji nganisipunda madola 2 miliyoni ga ku America. Liŵasa lya Beteli lyasamile ku maloga mlili wa kolona mkaniwutande.

Abale ni alongo ŵakusatumichila pa Beteli ja Cameroon akusangalala ligongo lyakola malo gambone gakutama soni kamula masengo. Jemanjaji akusawuwona kuŵa upile kola nyambi jasambano ligongo uli mtuka wakutyochela kwa Yehofa. Liŵasa line lyasasile kuti, “Ligongo lyakuti uli mtuka wakutyochela kwa Yehofa, tukusaka kuti tukamuleje masengo mwakulimbichila.”

Ofesi Jagopolela Mabuku M’chiŵecheto cha Chitojolabo ku Mexico. Kwa yaka yejinji timu jagopolela mabuku mchiŵecheto cha Tojalabo jakamulaga masengo gawo ku nyambi ja Central America jajaliji chiŵandika ni Msinda wa Mexixo. Nambope ŵandu ŵaŵaŵechetaga chiŵecheto cha Tojalabo, ŵatamaga ku Altamirano soni ku Las Margaritas. Dela jeleji jaliji pa lutando lwa makilomita 1,000 kutyochela kujaliji nyambi ja Central America. Ligongo lya yeleyi yaliji yakusawusya kwa ŵagopolela kuti amanyilile mwakuŵechetela ŵandu. Konjechesya pelepa yaliji yakusawusya kuti ŵapate abale ni alongo ŵakuti wakamulichisye masengo pandaŵi jakusaka kuti ajambule fidiyo.

Pa magongo gelega Komiti Jakulemba ja Likuga Lyakulongolela jaganichisye yakuti timu jagopolelaji jikaŵe kumalo kwakusaŵecheta chiŵechetochi. Kuti yeleyi yikomboleche nyambiji jaganichisye kuti asume nyumba ni kujilinganya. Kutenda yeleyi kwakamuchisye kuti akajonanga mbiya syejinji pakulandanya ni kutaŵa nyumba jasambano kapena kutenda lendi.

Jumo mwa ŵagopolelaŵa jwasasile umbone wawapali ligongo lyakusamila ku maloku. Jwalakwe jwatite, “Kwa yaka 10 yambele ndili mkukamula masengo gagopolela, nganisimaneje ni liŵasa lili mkuŵecheta chiŵecheto chatukusagopolela. Apano nyambi jetu jili ku malo kwele ŵandu akusaŵecheta chiŵecheto cha Tojolabo. Lisiku lililyose ngusasimana ni ŵandu ŵakusaŵecheta chiŵechetochi. Yeleyi yingamuchisye kuti manyilileje mwakusaŵechetela ŵandu soni ngopoleleje yindu mwakupikanika chenene.”

Masengo Gakutaŵa M’chaka cha Utumiki cha 2021

Naga ndamo jichiŵa chenene, tukwete chakulinga chakuti m’chaka cha utumiki cha 2021 chitutaŵe malo gagopolela mabuku gakwana 75 soni masukulu gakwiganyila Baibulo. Nambosoni masengo gekulungwakulungwa gakwana 8 gakutaŵa nyambi gachipitilila. Gagakupwatikapo masengo gakutaŵa ofesi ja Nyambi ku Ramapo, ku New York soni gakusamisya maofesi ga nyambi ga ku Argentina soni Italy. Konjechesya pelepa pakusosechela Nyumba sya Uchimwene syasambano syakwana 1,000. Malo gakutendela misongano gakwana 6,000 nganigaŵa gambone mwamti gakusosekwa kugalinganya. Nambosoni Nyumba sya Uchimwene syakwana 4,000 sikusosekwa kusilinganyasoni.

Ana mbiya syatukusakamulichisya masengo pakutaŵa soni kulinganyasoni yindu tukusasipata kwapi? M’bale Lázaro González jwa mu Komiti ja Nyambi ku Central America, jwajajile chiwusyo chelechi paŵasalaga yakwayana ni masengo gagapali gakutaŵa Ofesi Jagopolela Mabuku ja Tojolabal. Jwalakwe jwatite, “Mu dela ja nyambi jetu nganitukola yipangiso yakwanila. Myoyo yikaŵe kuti abale ni alongo ganatukamuchisya yikaliji yakusawusya kuti tutaŵe ofesi jagopolela mabuku. Mbiya syakusapeleka abale ni alongo ŵa pachilambo chosope ni syasikamuchisye kuti tukole ofesi jagopolela mabuku mu dela jetu. Myoyo tukwayamichila abale ni alongo pachilambo chosope chapasi ligongo lya koloŵa magasa kwawo pakukamuchisya.” Kusala yisyene masengoga gakusajenda chenene ligongo lya yakupeleka yawo ya pachilambo chosope. Ŵajinji mwa jemanja akusapeleka kupitila pa donate.jw.org.