Kwanga kwa Yiwusyo ya m’Baibulo /Lipopelo /Ana Mlungu Akusapikana Mapopelo Gangu?
Kwanga kwakutyochela m’Baibulo
Elo. Kupitila m’Baibulo soni yakusasimana nayo ŵandu yikusalosya kuti Mlungu akusapikana mapopelo. Baibulo jikusati, “Akusiŵapa yakusaka yawo, akusapikana soni kulila kwawo, ni kwakulupusya.” (Salimo 145:19) Nambotu kuti Mlungu apikane mapopelo gawo yikwegamila yakutenda wawojo pakupopela kwa jwalakwe.
Yakusosekwa kutenda pakupopela kwa Mlungu
Apopeleje kwa Mlungu ngaŵaga kwa Yesu, Maliya, ŵaswela mtima, malayika kapena yakusepa. Yehofa Mlungupe ni jwali ‘jwakupikana lipopelo.’—Salimo 65:2.
Apopeleje mwakamulana ni chakulinga cha Mlungu kapena yakusasaka jwalakwe yayikusasimanikwa m’Baibulo.—1 Yohane 5:14.
Kuti Mlungu ajanjeje mapopelo gawo akusosekwa kupopelaga mu lina lya Yesu. Yesu jwasasile kuti, “Pangali mundu jwakwawula kwa atati akaŵe kupitila mwa une basi.”—Yohane 14:6.
Pakupopela akakayichilaga soni amŵendeje Mlungu kuti ŵape chikulupi.—Mateyu 21:22; Luka 17:5.
Aŵeje ŵakulinandiya soni ŵakulupichika. Baibulo jikusati, “AMBUJE ali ŵapenani mnope, akwasamalila ŵandu ŵakulitimalika.”—Salimo 138:6.
Aŵeje ŵakulimbichila. Yesu jwatite, “Mŵende nipo Mlungu tachimpa yimkusaka.”—Luka 11:9.
Nganisyo sya Mlungu pangani ja lipopelo
Mlungu jwangalola mtundu wawo kapena kwakutyochela. Baibulo jikusati, “Mlungu jwangali lusagu, jwalijose jwakusamjogopa jwalakwe ni kutenda yambone akumpochela.”—Masengo 10:34, 35.
Mlungu jwangalola katame kawo pakupopela. Mpaka asagule kupopela kwa Mlungu ali atemi, ajineme, atindiŵele kapena ali ajimi.—1 Mbili 17:16; Salimo 95:6; Daniele 6:10; Maliko 11:25, NWT.
Mpaka apopele mwakwesya maloŵe kapena chamumtima. Mlungu akusajanga mapopelo gosope atamose gele ŵandu ŵane nganaŵa apikene.—Nehemiya 2:1-6.
Naga yakusawusya yawo yikuwoneka kuŵa yawusito kapena yangasosekwa, Mlungu akutulimbikasya kuti, “mtule pa jwalakwejo yidandawulo yenu yosope, pakuti jwalakwejo ni jwakusamsamalila jemanja.”—1 Petulo 5:7.