Ana Baibulo Jikusasala Yamtuli Yakwamba Kilisimasi?

Kwanga kwa m’Baibulo

Baibulo jangasalaga lisiku lyaŵapagwile Yesu nambosoni jangatusalila kuti tusangalalileje lisiku lyakupagwa kwakwe. Buku jine (McClintock and Strong’s Cyclopedia) jikusati: “Mlungu nganatulamula kuti tutendeje Kilisimasi nambosoni Malemba ga Chigiliki gangasalaga yakwamba Kilisimasi.”

Mwamti kujiganichisya mwakusamala mbili ja Kilisimasi mpaka kumkamuchisye mundu kumanyilila kuti jatyochele ku misyungu jachikusa. Baibulo jikusalosya kuti tukusamtumbilikasya Mlungu naga tukusamlambila jwalakwe m’litala lyangakusalijitichisya.—Ekisodo 32:5-7.

Mbili ja Misyungu ja Kilisimasi

1. Kusangalalila kupagwa kwa Yesu: Buku jine (The World Book Encyclopedia) jikusati: “Aklistu ŵandanda nganasangalalilaga lisiku lyakupagwa kwa Yesu, ligongo ŵayiwonaga kuti kutenda mwambo wakusangalalila lisiku lyakupagwa kwa mundu jwalijose kwaliji kwachikusa.”

2. Disemba 25: Pangali umboni wakulosya kuti Yesu jwapagwile pa lisiku lyeleli. Komboleka kuti Achimlongola ŵa Dini ŵasagwile lisikuli kuti liŵeje lyakulandana ni yisangalalo yachikusa yaŵatendaga mu ndaŵi jakusisima.

3. Kupelegana mbaso, kulya yakulya yalumo, kuŵina: Buku jine (The Encyclopedia Americana) jikusati: “Ŵandu akusasangalalila Kilisimasi pakujigalila mwambo wa Chiloma wawukusakolanjidwa kuti Saturnalia, wawatendekwaga pasikati pa mwesi wa Disemba. Mwachisyasyo, pachisangalalopa ŵandu ŵalyaga yakulya yalumo, ŵapeleganaga mbaso nambosoni ŵakolesyaga makandulo.” Buku jine (Encyclopædia Britannica) jatitesoni kuti pandaŵi ja Saturnalia “ŵandu nganakundidwaga kusumisya malonda kapena kukamula masengo.”

4. Magesi ga Kilisimasi: Buku jine (The Encyclopedia of Religion) jikusati ŵandu ŵa ku Ulaya akusasalalisya nyumba syawo “ni magesi gagilini” pakusangalalila nyengo jakusisima nambosoni pakusaka kujitoposya misimu jakusakala.

5. Yitela yagilini: Buku jine (The Encyclopedia Americana) jikusati: “Ŵandu ŵane ŵakulupililaga kuti chitela chinechakwe chagilini chakamuchisyaga ŵandu mwamasenga. Ŵandu ŵachipopelelaga chitelachi nichakulinga chakuti lyuŵa liŵale.”

6. Chitela cha Kilisimasi: Buku jine (Encyclopædia Britannica) jikusati: “Ŵandu ŵachikusya ŵa ku Ulaya ŵaŵayipopelelaga yitela, ŵapitilisye kuyipopelela yitelayi mpaka pandaŵi jiŵajinjile Chiklistu.” Jemanjaji “ŵachipopelelaga chitela chakolanjidwa kuti Yule chaŵachiŵikaga pamlango kapena mkati mwa nyumba syawo, pa ŵatendaga maholide ga mundaŵi jakusisima.