Ana Baibulo Jikusasala Yatuli?

Ana Mlungu akusajanga mapopelo ga ŵandu wosope?

ANA MPAKA AJILE KUTI AKUSAJANGA MAPOPELO GA  . . .

• Jwalijose

• Ŵandu ŵane

• Jwangamjanga jwalijose

YAJIKUSASALA BAIBULO

“Yehofa ali ciŵandika wosope . . . ŵakusam’ŵilanga mu usyesyene.”—Salimo 145:18.

ANA CINE CAPI CAMPAKA TULIJIGANYE M’BAIBULO?

• Mlungu jwangajanga mapopelo ga ŵandu ŵangampikanila. (Yesaya 1:15) Atamose yili m’yoyo, ŵanduŵa komboleka kucenga ndamo syawo ni “kamulanasoni” ni Mlungujo.—Yesaya 1:18.

• Kuti Mlungu ajanje mapopelo getu, gakusosekwa kuŵa gakamulana ni yakusasaka jwalakwe yayikusimanikwa m’Baibulo.—1 Yohane 5:14.

Ana tukusosekwa kutama kapena kwima m’litala line lyakwe pakupopela?

ŴANDU ŴANE AKUSAKULUPILILA kuti tukusosekwa kutindiŵala, kotimisya mtwe, kapena kuŵika makono pampepe pakupopela. Ana wawojo akuganisya yatuli panganiji?

YAJIKUSASALA BAIBULO

Mlungu akusapikana mapopelo ga ŵandu ŵakusapopela ali ‘atemi,’ ‘ajimi,’ ‘agonile pasi,’ soni ŵane ali ‘atindiŵele.’ (1 Mbiri 17:16; 2 Mbiri 30:27; Ezara 10:1; Masengo 9:40) Mlungu jwangasaka kuti tupopeleje tuli tutemi kapena kwima m’litala line lyakwe.

ANA CINE CAPI CAMPAKA TULIJIGANYE M’BAIBULO?

• Mlungu akusapikanila mapopelo ga ŵandu ŵakulinandiya.—Salimo 38:6.

• Mpaka apopele m’ciŵeceto cilicose, kapenasoni kupopela camumtima.—2 Mbiri 6:32, 33; Nehemiya 2:1-6.