Apateje Ndaŵi Jakummanyilila Mlungu

Chachikola umi wakusangalala naga akupata ndaŵi jakuti ammanyilile Mlungu. Pakutenda myoyo, nikuti akusaka kuti Mlungu ŵalongoleleje. Aganichisye yindu yiŵajiganyisye Yesu panganiji.

Yajwasasile Yesu

“Ŵana upile ŵandu ŵakusamanyilila kuti akusosekwa Mlungu kuti ŵalongoleleje.”—Mateyu 5:3.

• Wosopewe tukusasaka kupata kwanga kwa yiwusyo mpela ayi; Ana chakulinga cha umi ni chichi? Ligongo chichi ŵandu ŵajinji akusalagaga? Ana chichi chachikusatendekwa mundu pawile? Mpaka tuŵe ŵakusangalala naga tukupata kwanga kwa yiwusyo yeleyi.

“Mundu ngaŵa mkutama ni umi ni chakulyape, nambo ni maloŵe gosope gakutyochela mkamwa mwa Yehofaa.”—Mateyu 4:4.

• Mpela mwayikusaŵela kuti tukusasosechela chakulya chisyesyene, ŵanduwe tukusasosechelasoni chakulya chausimu. Yesu jwasasile mwakupikanika chenene kuti ndaŵi syosope tukusasosekwa kumsosasosa Mlungu kuti tumkunde kuti atulongoleleje.

“Maloŵe gawo gali gakuwona.”—Yohane 17:17.

• Yesu jwasasile litala lyakusosekwa mnope lyele Mlungu akusakamulichisya masengo pakutulongolela, lyalili kupitila m’Baibulo gagali Maloŵe gakwe.

Tukwalimbikasya kuti apate chisangalalo changamala mwakupata ndaŵi jakulijiganya ya Mlungu kuti ŵalongoleleje. Matala gakuyichisyaga gali gane mwamatala gampaka gakamuchisye:

• Aŵalanje Baibulo mwalulele.

• Aŵende mundu jwakuti ŵajiganyeje Baibulo mwalulele.