Pachilambo Chosope Pachiŵa Mtendele

Jwalijose akusasaka ali mkutama m’chilambo chamtendele. Kwa yaka yejinji ŵakulamulila aŵele ali mkulingalinga kutamilikasya mtendele pachilambopa mwakumasya ngondo. Ndaŵi sine yeleyi yikusagamba kamuchisya kwakandaŵi kamnono. Ligongo mkupita kwandaŵi ngondosi sikusatandilasoni. Nambo ana yili yakomboleka chilambochi kuŵa pamtendele? Elo yili yakomboleka. Kwende tulole yampaka tulijiganye kutyochela kwa Yesu.

Yachachitenda Yesu

Baibulo jikusasala yachatende Yesu pachangakaŵapa kuti pachilambopa paŵe mtendele.

• “[Yesu] tachimpa lina lyakuti . . . Mwenye jwa Mtendele.” Machili ga ulamusi wakwe tigachiŵa gangali mbesi, uchimwene wakwe tiwuchiŵa wa mtendele ndaŵi syosope.” (Yesaya 9:6, 7) Pakuŵa Yesu chachiŵa mwenye jwa Uchimwene wa Mlungu, jwalakwe chachitamilikasya mtendele pachilambo chosope mwamti ngasiwumalasoni.

• “Jwalakwe chachakulupusya ŵakulaga ŵele akulila pakuŵenda kuti ŵakamuchisye . . . nambosoni jwalijose jwakusoŵa ŵakumkamuchisya.” (Salimo 72:12-14) Yesu chachikamulichisya masengo ulamusi wakwe pakutamilikasya chilungamo chisyesyene, kumasya ngondo syosope, yachiwawa, soni yakupweteka.

• “Mitundu ja ŵandu ngasijijimuchilana ni mawupanga, soni ngasijilijiganyasoni kuputa ngondo.” (Yesaya 2:4) Mu ulamusi wa Yesu, ŵandu wosope chachilijiganya kutama mwamtendele mmalo mwakulijiganya ngondo.

Kuti amanyilile mwachachitendela Yesu pakuyikasya mtendele pachilambopa soni mwampaka ujile pakwakamuchisya, alolele kafidiyo kakuti Ana Uchimwene wa Mlungu Uli Chichi?

Yaŵajiganyisye Yesu

Masiku aganosoni, yaŵajiganyisye Yesu yikwakamuchisya ŵandu ŵajinji kutama mwamtendele. Pa Ulaliki wakwe wakumanyika mnope wa Petumbi, Yesu ŵajiganyisye mfundo syampaka situkamuchisye kuti tutameje mwamtendele ni ŵane lisiku lililyose. Kwende tulole yisyasyo yakuyichisyayi.

• “Ŵana upile ŵandu ŵakusayikasya mtendele.” (Mateyu 5:9) Yesu ŵalimbikasisye ŵakumkuya ŵakwe kuti aŵambaleje yakangana nambosoni kuti atameje mwamtendele.

• “Mjawule, mkajilane kaje ni mlongo mjenujo, kaneko myichesoni ni kupeleka mtuka wenuwo.” (Mateyu 5:23, 24) Yesu jwalimbikasisye ŵandu ŵaŵampikanilaga kuti amasyeje ungapikangana wawo mwachitema. Jwalakwe jwajiganyisye kuti tukusosekwa kutamaga mwamtendele ni ŵandu ŵane ni chakulinga chakuti tuŵe paunasi wambone ni Mlungu.

• “Mleche kwawelusya ŵane kuti nombe jemanja Mlungu akam’welusya.” (Mateyu 7:1) Yesu wasasile kuti ngatukusosekwa kwawelusya ŵane mwangali chilungamo, ligongo kutenda yeleyo mpaka kutandisye ukangani. Jwalakwe jwasalilesoni ŵakumkuya ŵakwe kuti ‘apitilisye kwakululuchila ŵane’ mmalo mwakwapatila magongo.—Luka 6:37.

Kusyungulila pa chilambo chosope ŵandu akukamulichisya masengo yaŵajiganyisye Yesuyi. Atamosesoni m’madela mwele mwana yachiwawa soni kugaŵikangana, ŵandu akulijiganya kumasya ungapikangana mwamtemdele, kwakululuchila ŵane, soni kwanonyela ŵane atamose paŵatendele yindu mwangali chinonyelo.

Kuti amanyilile mwele yaŵajiganyise Yesuyi yatite pakwakamuchisya ŵandu ŵane kuti awupate mtendele, aŵalanje ngani jakuti “Mpaka Tuŵe Pamtendele Atamose Tuli Mkulaga ni Ngondo soni Yachiwawa .”