Ngondo Jajikutendekwa Pasikati pa Chilambo cha Israel ni Yilambo Yakuŵandikana Nayo—Ana Baibulo Jikusaŵecheta Yamti Uli?

Ŵandu akogopa yindu yampaka yitendekwe ligongo lya ngondo jajipali pasikati pa chilambo cha United States, Israel, nambosoni Iran. Ana yeleyi mpaka yitendekasye kuti yikwayesoni yilambo yine? Ana maboma mpaka gakombole kumasya yachiwawa soni kuyikasya mtendele?

Ŵandu ŵaŵalasile yakulochesya ya m’Baibulo mpaka aganisyeje kuti mwine kweleku kuli kutanda kwa ngondo ja Alamagedo jakusajisala m’buku ja Chiwunukuko.

Ana Baibulo jikusasala yamti uli?

Ana maboma mpaka gakombole kumasya ngondo jajili ku Israel ni yilambo yakuŵandikana nayo?

Baibulo jikusati, “Mkadalilaga ŵandu ŵakuchimbichika Kapena mwanache jwa mundu jwalijose, jwele nganaŵa ayikasisye chikulupusyo.”—Masalimo 146:3.

Ngatukumanyilila kuti maboma mpaka gakombole kuyikasya mtendele pasikati pa yilambo yayikumenyanayi. Nambope Baibulo jikusatusalila mwakupikanika kuti, pangali mundu kapena uchimwene wa ŵandu wampaka umasye ngondo ni kuyikasya mtendele wangamala. Nambo Mlungupe ni jwampaka akombole ‘kumasya ngondo pachilambo chosope chapasi.’—Masalimo 46:9.

• Kuti alijiganye yejinji, aŵalanje Nsanja ja Mlonda ja mtwe wakuti “Ana Ngondo Soni Yachiwawa—Yichimala?”

Ana ngondoji jikukwanilisya yakulochesya ya m’Baibulo?

Baibulo jikusati, “Chimchipikana masegwe ga ngondo. . . . Pakuŵa mtundu uchijimuchilana ni mtundu ujakwe soni uchimwene ni uchimwene ujakwe.”—Mateyu 24:6, 7.

Ukangani wawupali pasikati pa chilambo cha Israel ni yilambo yakuŵandikana nayo uli umboni wakuti kuli “kumala kwa ndaŵi” ajino soni yikulosya kuti tuli ‘m’masiku gakumalisya.’ (Mateyu 24:3; 2 Timoteyo 3:1.) Ngondo syasikutendekwa masiku agano uli umboni wakuti Mlungu asigele panandi kumasya ngondo pachilambopa soni chatyosye yakusawusya yosope.

• Kuti alijiganye yejinji, aŵalanje ngani ja Chicheŵa ja mtwe wakuti “Kodi Chizindikiro cha “Masiku Otsiriza” Kapena Kuti Nthawi “ya Mapeto” N’chiyani?”

Ana ngondo ja Alamagedo jichitandila ku yilambo ya Amwenye?

Baibulo jikusati, “ŵagasongangenye pampepe mamwenyego ku malo gele m’Chihebeli akusati Alamagedo.”—Chiwunukuko 16:16.

Ngondo ja Alamagedo nganijiŵa ngondo ja pasikati pa maboma ga ŵandu jajitandite ku chilambo cha Israel ni yilambo yakuŵandikana nayo. Nambo jili ngondo ja pachilambo chosope pasikati pa maboma ga ŵandu ni Mlungu.

• Kuti alijiganye yejinji, aŵalanje ngani ja mtwe wakuti “Ana Ngondo ja Alimagedo ni Chichi?”

Ana ni chichi champaka chitukamuchisye kuti tukoleje mtendele wa mu mtima mu ndaŵi jakusawusyaji?

Baibulo jikusati, “Mkadandawulaga ni kandu kane kalikose. Nambo pa chilichose mumsalileje Mlungu yakuŵenda yenu yosope mwipopelo, soni mpopeleje kwa jwalakwejo mwakuchondelela soni mwakuyamichila.”—Afilipi 4:6.

Yehofaa Mlungu akusatusalila kuti tupopeleje kwa jwalakwe. Ligongo lyakuti Mlungu akusasamala mnope ya m’weji, jwalakwe chachipikanila mapopelo getu soni kutukamuchisya kuti tukombole kumalana ni kulagasika nganisyo. (1 Petulo 5:7) Litala limo lyakusatendela yeleyi lili kutukamuchisya kupikanichisya ligongo lyakwe ngondo sikutendekwa, yachachijila pakusimasya soni yachachitenda pakutyosya yakupweteka yatukusimana nayo.—Chiwunukuko 21:3, 4.

• Kuti alijiganye yejinji mwachachijla Mlungu pakutukamuchisya, aŵalanje ngani ja Chicheŵa jakuti “Kodi M’Baibulo Mungapezeke Mawu Omwe Angandilimbikitse?.”