Ana Kuŵa Mklistu Kukusagopolelaga Chichi?—Nambi Baibulo Jikusasalaga Yamtuli?

Masiku agano ŵandu ŵajinji akusasalaga mwakupochela kuti ali Aklistu, nambo yitendo yikusaŵaga yangalwe. Ŵane mwa jemanjaji akusaŵaga ŵakulinonyela, ŵachinyengo, kapena ŵangali chanasa. Ŵane akusaŵaga ŵangakulupichika kwa achiŵamkwawo. Mwamti ŵandu ŵane ayikene pakuliwusya kuti, ‘Ana Mklistu jusyesyene akusaŵaga jwamtuli?’

Ana Mklistu Jusyesyene Akusaŵaga Jwamtuli?

Yili yangasawusya mundu kulikolanga Mklistu. Nambo ngani ngaŵa kwamba kulikolanga kuŵa Mklistu. Mwakamulana ni Baibulo, Mklistu ali mundu jwakusamkuyaga Yesu Klistu. (Masengo 11:26) Panganiji Yesu jwatite: “Naga jemanja mkupitilisya kusunga maloŵe gangu, nikuti mli ŵakulijiganya ŵangu ŵasyesyene.” (Yohane 8:31) Yili yisyene kuti pangali mundu jwampaka akombole kukuya maloŵe ga Yesu mwangalemwesya chilichose. Nambo Mklistu jusyesyene ni jwakusalingalinga kukuya yaŵajiganyisye Yesu, mwamti lisiku lililyose yitendo yakwe yikusalosyaga kuti akusakuyaga Yesu. Alole yisyasyo yakuyichisyayi.

Aklistu akusalosyaga chinonyelo chisyesyene

Yaŵaŵechete Yesu: “Ngumpa jemanja lilamusi lyasambano, lyakuti mnonyelaneje. Mpela yandite une pakumnonyela jemanja, jemanjasoni mnonyelaneje. Wosope chachimanyilila kuti mli ŵakulijiganya ŵangu naga mkunonyelana.”—Yohane 13:34, 35.

Yaŵatesile Yesu: Yesu ŵalosyaga ŵandu wosope chinonyelo chisyesyene. Jwalakwe nganiŵanonyelaga ŵandu pakujigalila kapate kawo kapena kwakutyochela. Ŵaposyaga ŵakulwala, ŵapaga yakulya soni jwayikene pakupeleka umi wakwe pakusaka kwawombola ŵandu.—Mateyu 14:14-21; 20:28.

Yakusatenda Aklistu: Aklistu alosyeje chinonyelo chisyesyene, mwakuŵa ŵakoloŵa magasa, ŵangali lusagu, soni ŵakululuka. Akusiŵakamuchisyaga ŵandu ŵakulaga soni akusatendaga yiliyose yampaka akombole pakusaka kwakamuchisya ŵane.—1 Yohane 3:16.

Aklistu akusaŵaga ŵachilungamo

Yaŵaŵechete Yesu “Une ndili . . . yisyesyene.”—Yohane 14:6.

Yaŵatesile Yesu: Yesu ŵatendaga yindu yayaliji yisyesyene, nganatendaga yaunami. Jwalakwe nganiŵaloŵesyaga ŵandu pakusaka kuti apate yindu, kapena kwatendekasyaga ŵandu kuti akulupilileje yaunami. Yesu jwamanyikaga kuti ali mundu jwachilungamo atamose pandaŵi jele kutenda yeleyi kwaliji kwakusyawusya.—Mateyu 22:16; 26:63-67.

Yakusatenda Aklistu: Nombe nawo Aklistu ŵangalambusya. Akusakomaga misongo, ŵangajiŵaga soni akusakamulaga masengo mwachilungamo mwakamulana ni malipilo gakusapochela. (Aloma 13:5-7; Aefeso 4:28) Akusaŵambalasoni kwakalamuchila ŵane pakusaka kwajiŵila. Ŵangajiŵilagasoni mayeso kapena kusala yaunami mu yipepala yakuwuchisya masengo.—Ahebeli 13:18.

Aklistu akusaŵaga ŵachanasa

Yaŵaŵechete Yesu: “Myiche kwa une, jemanja wosope ŵamkukamula masengo gakupesya soni ŵamkusitopelwa, ni chinjimpumusya. Mtwichile likongwa lyangu soni mlijiganye kutyochela kwa une, ligongo une ndili jwakufasa soni jwakulinandiya, ni chimchikola mtendele wamumtima. Pakuŵa likongwa lyangu lili lyangasawusya kutwichila soni katundu jwangu ali jwangasitopa”—Mateyu 11:28-30.

Yaŵatesile Yesu: Yesu jwaliji mundu jwakunguluchika soni jwachanasa. Jwakungulukaga ni ŵanache soni ŵalimbikasyaga ŵandu ŵali pa yipwetesi. Konjechesya pelepa ŵachimbichisyagasoni ŵane.—Maliko 10:13-15; Luka 9:11.

Yakusatenda Aklistu: Yakusaŵecheta yikusalosyaga kuti akusiŵapikanichisyaga ŵane. Ŵangaŵecheta yachipongwe kepena yamwano. (Aefeso 4:29, 31, 32) Akusasamalaga ya ŵane soni akusalolaga yampaka atende kuti ŵakamuchisye.—Agalatiya 6:10.

Mklistu akusaŵaga jwakulupichika kwa ŵamkwakwe

Yaŵaŵechete Yesu: “Yayilumbikenye Mlungu pampepe, mundu jwine akayilekanganya.”—Maliko 10:9.

Yaŵaŵechete Yesu: Atamose kuti Yesu nganalombela, nambope jwalakwe ŵalimbikasisye ŵalombane kuti aŵeje ŵakulupichika kwa jwine ni mjakwe. (Mateyu 19:9) Yesu ŵasasilesoni yindu yampaka yijonanje ulombela.—Mateyu 5:28.

Yakusatenda Aklistu: Aklistu akusaŵambala kutenda yindu yakulosya kuti ngakuchimbichisya ulombela (Ahebeli 13:4) Ŵalombane akusosekwa kunonyelana soni kuchimbichisyana.—Aefeso 5:28, 33.