Kuŵambala Kulya Nyama—Ana Baibulo Jikusasala Yamtuli Panganiji?

Pachilambo chosope chapasi, ŵandu ŵajinji atandite kuŵambala kulya nyama kapena chilichose chaumi.

• Bungwe ja Vegan Society jatite “Kuŵambala kulya nyama kwa mtundu welewu kuyiche pakuŵa chijiganyo. Ŵandu ŵakusakulupilila yeleyi akusaŵengana ni kulya nyama ja mtundu uliwose, mpela kuyitendela ngalwe, kulya nyama, kuwala mapende ga nyama, kapena kuyilagasya mwa mtundu uliwose.”

Konjechesya pa kusaka kuchenjela yinyama, ŵandu ŵane akusaŵambala kulya nyama pakusaka kusamalila chilengedwe, chilu chawo, nambosoni pa magongo gane ga dini.

• Britannica Academic jatite “Mwakulekangana ni mundu jwasagwile kuŵambala kulya yakulya yine, ŵandu ŵajinji akusayiwona kuti kuŵambala kulya nyama jili ngani jakwayana ni yakusakulupilila nambosoni ndamo syambone. Akusayiwonasoni kuti lili litala lyele mundu jwalijose mpaka akamuchisye kuti chilambo chiŵe chambone.”

Ana kuŵambala kulya nyama lili litala lyakumachisya yakusawusya pachilambo? Ana Baibulo jikusasala yamtuli panganiji?

Mwele Mkupanganya jwetu akusiŵawonela ŵandu soni yinyama

Baibulo jikusalosya kuti Mkupanganya jwetu jwali Yehofa,a akusiŵawona ŵandu kuŵa ŵakusosekwa mnope kupunda yinyama mwamti ŵapele machili gakulamulila yinyamayo. (Genesesi 1:27, 28) M’kupita kwandaŵi, Mlungu jwakundile ŵandu kutanda kulya nyama. (Genesesi 9:3) Atamose kuti yili m’yoyo, jwalakwe jwangakundaga ŵandu kuti ayilagasyeje yinyama.—Misyungu 12:10.

Mwakamulana ni Baibulo kulya nyama kapena ngalya kuli kusagula kwa mundu msyene.b Yakusagula yetu yangamtendekasya mundu kuŵa jwakusosekwa pameso pa Mlungu. (1 Akolinto 8:8) Pangali mundu jwakusosekwa kumjimba magambo mjakwe pa yindu yasagwile kulya.—Aloma 14:3.

Litala lyakupatila umi wambone

Baibulo jikusalosya kuti yatukusasagula paumi wetu nganiyiŵa yimasisye yakusawusya ya mchilambomu. Yakusawusya yejinji yikusatanda ligongo lya ndale, ndamo sya ŵandu, soni kajendesye ka chipanje mchilambo, mwamti pangali jwampaka ayilinganye. Baibulo jikusati:

• “Ngaŵa mkomboleka kuchijongola soni chindu chepindiche.”—Jwakulalichila 1:15.

Mkupanganya jwetu chachimasya yakusawusya yatukusasimana nayo. Baibulo jikusasala mwakwamba kuwanichisya yindu yachachitenda Mlungu.

• “Kaneko nakuweni kwinani kwasambano soni chilambo chapasi chasambano, pakuŵa kwinani kwakala soni chilambo chapasi chakala yaliji yili yityosile, nambosoni nyasa nganijisimanikwasoni.”—Chiwunukuko 21:1.

Maboma ga ŵandu, kapena “kwinani kwakala,” gachijinjilidwa mmalo ni “kwinani kwasambano,” kapena kuti boma ja Kwinani ja Mlungu. Uchimwene wakwe uchityosya “chilambo chapasi chakala,” ŵali ŵandu ŵakusakala, soni uchilamulila “chilambo chasambano”, kapena kuti ŵandu ŵachachipikanila ulamusi wakwe.

Ŵandu chachitama mwamtendele ni yinyama soni yachilengedwe mu ulamusi wa Uchimwene wa Mlungu.—Yesaya 11:6-9.