Aŵeje Paujakwe Wambone ni Ŵamkwawo

1. Ligongo chichi achimjetu ŵambone ali mtuka wakutyochela kwa Yehofa?

ACHIMJETU ŵambone ali mtuka wakutyochela kwa Yehofa. (Yak. 1:17) Jemanjaji akusamnonyela Mlungu soni m’weji. Nambosoni akusaŵa ŵakusangalala m’weji patukusangalala. Jemanjaji akusatulimbikasya patutengwiche soni naga pakusosechela akusatupa malangiso gangapita mumbali. Mjetu jwambone akusaŵa jwakulupichika soni mpaka tumdalileje mnope. Kusala yisyene, achimjetu mpela ŵeleŵa ‘akusasangalasya mtima’ ŵetu.—Mis. 27:9.

2. Ligongo chichi yili yakusosekwa kuti ŵalombane aŵeje paujakwe wambone? (Mateyu 19:6)

² Yili yakusosekwa kuti ŵalombane ŵawoneje ŵamkwawo kuti ali mjawo jwapamtima. Kuti yeleyi yikomboleche, akusosekwa kutendaga yampaka akombole kuti alimbisye ujakwe welewu. Nambo naga akuwuwona ujakwewu mwachanache, yakuyichisya yakwe mpaka atendeje lipowo, kutumbila soni mpaka aŵeje ŵangasangalala. Nambo naga akutenda yakomboleka kuti aŵeje paujakwe wambone ni ŵamkwawo, mpaka aŵe ŵakamulana mnope. (Aŵalanje Mateyu 19:6.) Myoyo munganiji, chitulole yampaka atende ŵalombane kuti aŵeje paujakwe wambone mnope ni ŵamkwawo. Nambo chandanda, kwende tulole yampaka atende Aklistu ŵele nganaŵe kulombela pakusagula mundu jwele chachiŵa mjawo jwambone mnope mpaka kalakala.

ANA MPAKA ASAGULE CHAMTI ULI MUNDU JWELE CHACHIŴA MJAWO JWAPAMTIMA?

3-4. Ana chichi champaka chimkamuchisye mundu kupata mundu jwakuŵajilwa kulombana najo? (Misyungu 18:22)

³ Patukusaka kusagula yindu yakusosekwa mnope, tukusosekwa tuganichisyeje yakuyichisya yambone soni yakusawusya yampaka yipagwe ligongo lya yindu yatukusaka kusagulayo. Yindu yampaka tusagule mpaka yitendekasye kuti kwa umi wetu wosope tusimaneje ni yakusawusya kapena yambone. Myoyo, yili yakusosekwa kuganichisya mwakusamala mkanituŵe kusagula yindu yakusosekwa mnope.

⁴ Kusagula mundu jwakulombana najo chili chindu chakusosekwa mnope champaka asagule Mklistu paumi wakwe. Yili myoyo ligongo lyakuti yikusaŵa kuti akusagula mundu jwachachitama najo kwa umi wawo wosope. Pakuŵapo Yehofa ni juŵalinganyisye kuti ŵandu alombeleje, yili yakupikanika kuti pakusaka mundu jwakulombana najo amŵendeje jwalakwejo kuti ŵalongolele. Yehofa akusasaka kuti jwamlume apate jwamkongwe jwambone. Soni akusasaka kuti jwamkongwe apate jwamlume jwambone. Jwalakwe akusamanyilila yindu yampaka yiŵe yambone mnope kwa m’weji. (Aŵalanje Misyungu 18:22; Yes. 48:​17, 18) Myoyo, yajikusasala Baibulo mpaka yimkamuchisye Mklistu kupata mundu jwakuŵajilwa kulombana najo.

5. Ligongo chichi yili yakusosekwa mnope kulombana ni mundu juŵabatisidwe?

⁵ Patwagambile kubatisidwa, twaŵele achimjakwe ŵa Yehofa. (Mis. 25:14) Myoyo naga akusaka kulombela, akusosekwa kulombelasoni mundu jwali mjakwe jwa Yehofa. (1 Akoli. 7:39) Naga akutenda yeleyi chachilosya kuti akusachimbichisya malamusi ga Yehofa soni chachawona ŵamkwawo kuŵa mtuka wakutyochela kwa Yehofa. (Mis. 19:14) Konjechesya pelepa chachiŵambala yakusawusya yayikusayika ligongo lyakulombela mundu jwangakulupilila. (2 Akoli. 6:14) Kusala yisyene uli ungali lunda kuŵa pachitomelo ni mundu jwangakulupilila tuli mkuganisya kuti mumpingo wa Chiklistu pangali mundu jwampaka tuŵajilane najo. Nambosoni kuli kupwambwana kuganisya kuti naga akuŵa pachitomelo ni mundu jwangakulupilila chachimkamuchisya jwalakwejo kuti alijiganye yisyesyene.

6-7. Ana akusosekwa kuliwusya yiwusyo yapi pali pachitomelo?

⁶ Akusosekwa kumanyilila kuti ngaŵa kuti Mklistu jwalijose juŵabatisidwe mpaka aŵe jwakuŵajilwa kulombana najo. Myoyo akusosekwa kuliwusya yiwusyo naga pana mundu jwakumwona kuti mpaka aŵajilane najo.a Akusosekwa kuliwusya kuti: ‘Ana akusatenda chamti uli yindu ni ŵandu ŵa m’liŵasa lyakwe? Ana akusiŵaganichisya soni kwachimbichisya ŵane? Ana achimjakwe ali ŵamti uli? Ana akusatenda yamti uli palekangene nganisyo ni ŵane? Ana akusakunda kukamulichisya masengo nganisyo sya ŵane kapena akusagamba kukakamila nganisyo syakwe naga yakusaka kutendayo ngayikutindana ni mfundo sya m’Malemba? Ana akusakamulichisya masengo chamti uli mbiya?’

⁷ Akusosekwa kuliwusyasoni kuti: ‘Ana mjanguju akusamnonyela mnope Yehofa? Ana jwalakwe akuwala “umundu wasambano”? Ana chachingamuchisyaga kuti namtumichileje chenene Yehofa? Ana tukwete yakulinga yausimu yakulandana? Ana yili mkuti tulombene, chachimbonaga kuti ndili mjakwe jwapamtima?’ (Akolo. 3:​9, 10) Naga wawojo ali mlongo, ana m’bale jwali najo pachitomelo chachiŵa mjawo jwambone soni mtwe wa liŵasa wambone? (1 Akoli. 11:3) Naga wawojo ali m’bale, ana mlongo jwali najo pachitomelo chachakamuchisyaga soni kwachimbichisya mpela mtwe wa liŵasa atamose kuti akusalemwesyaga yindu yine? Mpaka pasosekwe ndaŵi jakwanila kuti apate kwanga kwa yiwusyo yeleyi. Myoyo, akusosekwa kukamulichisya masengo mwalunda ndaŵi jali pachitomelo kuti amanyigane chenene ni mundu jwakusaka kulombana najo.

8-9. Ana mundu jwali pachitomelo mpaka atende chichi kuti asagule yindu mwalunda? (Alolesoni chiwulili.)

⁸ Kuti akombole kusagula yindu mwalunda pandaŵi jali pachitomelo, akusosekwa kutenda yampaka akombole kuti ammanyilile chenene mjawojo. Akusosekwa kwawusya ŵane kuti ŵasalile mwakusamwonela mjawojo. Mpaka ŵawusye jemanjaji yakwamba mbili jakwe soni ndamo syambone syakwete. Mwachisyasyo, ana jwalakwe akusamanyika kuti ali jwakulinandiya, jwakwaganichisya ŵane soni akusatenda yindu mwalunda? Mlongo Sarah, jwakusatama ku French Guiana jwalombedwe ni m’bale Daniel. Mlongoju jwasasile kuti: “Kuti nammanyilile chenene Daniel namwusisye mjakwe juŵatamaga najo soni juŵatendaga najo upayiniya, jwamkulungwa jwa mumpingo wakwe, achimjetu ŵatwakungulukaga nawo, soni alongo ŵa mumpingo wakwe.” Mpaka asosekwesoni kumwusya mundu jwali najo pachitomelo naga pana yindu yine yayatendekwe kalakala kapena yayikumtendechela apanopano yampaka asosekwe kuyimanyilila. Kumanyilila yeleyi kuli kwakusosekwa mnope ligongo yindu yine mpaka yitendekasye kuti chasimaneje ni yakusawusya mu ulombela wawo.

⁹ Naga ayiweni yindu yine yayikwakayikasya kapena naga achimjawo ŵasalile ndamo sine syangaŵajilwa syakwete mundu jwali najo pachitomelo, ngakusosekwa kuyijigala yindu yeleyi mwachanache. Naga akuyiganichisya mwalunda yindu yeleyi, yichakamuchisya kuti asagule kupitilisya chitomelocho kapena kuchimasya.b Sambano, kwende tukambilane yampaka atende ŵandu ŵaŵalombele kala kuti apitilisye kuŵa paujakwe wambone mnope ni ŵamkwawo.

ATENDELEJE YIMPEPE YINDU YAMPAKA YILIMBISYE UNASI WAWO

10. Ligongo chichi ŵalombane akusasosekwa kupata ndaŵi jakutendela yindu yimpepe?

¹⁰ Kuti ŵalombane apitilisye kukola liŵasa lyakulimba soni kuti akamulaneje mnope, akusasosekwa kupataga ndaŵi jakutendela yindu yimpepe atamose kuti yakutenda yikusiyatupilaga mnope. Kutenda yeleyi mpaka kwakamuchisye kuti akambilane yindu yayitendekwe palisikulyo, kuŵechetana yakulukosi, kulosyana chinonyelo, soni kutendela yimpepe yakusangalasya.

11. Ana chichi champaka chisokonasye mkamulano wa ŵandu ŵalombane?

¹¹ Ŵalombane ŵakusakamulana mnope akusasangalala kuŵa yimpepe ni ŵamkwawo mmalo mwakuŵa jika. Yili yisyene kuti ndaŵi sine jemanjaji nganaŵa atemi malo gampepe. Nambope kutama kwakulekangana kwa ndaŵi jelewu mpaka kukole yakuyichisya yakogoya mnope. Mwachisyasyo, ŵandu ŵane akusajitichisya kukamula masengo ku chilambo chine yayikusatendekasya kuti alekangane ni liŵasa lyawo kwa myesi jejinji. Yisyene kuti yeleyi mpaka yakamuchisye kuti apate mbiya syejinji. Nambo kulekangana ni ŵamkwawo kwa ndaŵi jelewu chamti myiyi, mpaka kusokonasye ulombela wawo.

12-13. (a) Ana maŵasa gane gatesile yamti uli kuti gapateje ndaŵi jakutenda yindu yimpepe? (Alolesoni chiwulili.) (b) Ana ŵamkwawo ali ŵakusosekwa chamti uli kwa wawojo? (Alole libokosi lyakuti “Ŵamkwawo Ali Ŵakusosekwa Paumi Wawo.”)

¹² Kwende tulole yagatesile maŵasa gane kuti ndaŵi syosope apateje ndaŵi jakutendela yindu yimpepe. Leah, jwa ku Guam, jwasasile kuti: “Une ni ŵamkwangu tukusanonyela kutenda yimpepe yindu yakulekanganalekangana. Nambope ndaŵi sine jwalijose jwetuwe, akusajawula kukukunguluka ni achimjakwe.” Roxanne, jwa ku United States, jwatite: “Ligongo lyakuti yakutenda yikusatutupila mnope, une ni ŵamkwangu twalinganyisye yakuti tupateje ndaŵi jakutendela yindu yine yimpepe mpela mwatukusatendela ni yindu yine yakusosekwa mnope.” (Awanichisye ni Amosi 3:3.) Damien, jwa ku France, jwasasile kuti: “Nalijiganyisye kusangalala ni yindu yakusayinonyela ŵamkwangu mwamti yeleyi yikamuchisye kuti wosope tusangalaleje nayo.” (Mat. 7:12) Nombe najo Katie, jwa ku United States, jwatite: “Ndaŵi sine tukusaŵika mafoni getu kwakutalikangana ni m’weji kuti gakatusokonasya.”

¹³ Nambope, kutendela yindu yausimu yimpepe chili chindu chakusosekwa mnope champaka atende ŵalombane. Myriam, jwa ku France, jwasasile kuti “Tukusalitanda lisiku ni kuŵalanga Baibulo soni kukambilana mfundo syakusangalasya syatukusaka kusikamulichisya masengo paumi wetu. Ndaŵi jeleji ngusajinonyela mnope.” Jwalakwe jwasasilesoni kuti: “Ngusasangalala mnope patukupopela yimpepe soni pangwapikana ŵamkwangu ali mkupeleka lipopelo lyakulosya yakusati pakumnonyela mnope Yehofa.” Katie, jwatumsasile jula jwaŵechete kuti: “Ngusasangalala mnope pangulalichila yimpepe ni ŵamkwangu. Patukwasalila ŵane yakwamba chikulupi chetu, yikusatukamuchisya kuti tukamulaneje mnope soni yikusatukamuchisya kuti tupitilisye kulijiganya yindu yasambano kutyochela kwa jwine ni mjakwe.”—Mis. 27:17.

ATENDEJE YINDU MWAKAMULANA PASIMENE NI YAKUSAWUSYA

14-15. Ligongo chichi ŵalombane akusasosekwa kutenda yampaka akombole kuti amalane ni yakusawusya yakusimana nayo? Apeleche chisyasyo.

¹⁴ Pakuŵapo tuli ŵangali umlama, tujembecheyeje kuti mpaka tusimaneje ni yakusawusya mu ulombela wetu. Sonitu paja Baibulo jasasile kala kuti ŵalombane “chachikola yakusawusya m’chilu mwawo.” (1 Akoli. 7:28) Maloŵe gelega gakugopolela yakusawusya yakusasimana nayo wosope ŵali peŵasa. Naga asimene ni yakusawusya yeleyi m’liŵasa lyawo, ligongo chichi akusosekwa kutenda yindu mwakamulana kuti amalane ni yakusawusyayo?

¹⁵ Aganichisye chisyasyo achi. Tuwanichisye kuti pana nyumba jakumanyika mnope kapena chindu chine chakusosekwa mnope. Naga yindu yeleyi yijonasiche msyenejo mpaka atende yakomboleka kuti ayilinganyesoni. Jwalakwe mpaka akamulichisye masengo ndaŵi soni mbiya syejinji kuti alinganye yinduyi. Kupwatika pelepa nganaŵa ajimiche makono atamose masengogo gali gajigele yaka yejinji. Ligongo chichi mpaka atende yeleyi? Yili myoyo ligongo lyakuti akusayiwona yinduyo kuŵa yakusosekwa mnope. Mwakulandana ni yeleyi, liŵasa lililyose lili lyakusosekwa mnope. Amanyilileje kuti atamose ŵalombane ŵele akusakamulana mnope ndaŵi sine akusasimana ni yakusawusya soni akusalekangana nganisyo. Nambope, mpela mwayikusaŵela kuti nyumba kapena chindu chakusosekwa mnope chachajonasiche mpaka yikomboleche kuyilinganyasoni, nombe nalyo liŵasa lyalikusimana ni yakusawusya yili yakomboleka kulikulupusya. Kuti yeleyi yikomboleche mpaka pasosekwe kulimbichila mnope soni ndaŵi jakwanila. Nambope, Yehofa mpaka aŵe jwakusangalala mnope naga ŵalombane akutenda yakuti aŵe ŵakamulana mnope soni kupitilisya kuŵa yimpepe. (Mala. 2:16) Naga jemanjaji akutenda yeleyi mpaka alosye kuti akusamnonyela soni kumchimbichisya mnope Yehofa juŵatandisye liŵasa.

16. Mwakamulana ni 1 Akolinto 13:​4-8a, ana ni chichi champaka chikamuchisye maŵasa gagakusimana ni yakusawusya? (Alolesoni chiwulili soni libokosi lyakuti “Yampaka Atende Kuti Alimbisye Unasi Wawo.”)

¹⁶ Naga akusimana ni yakusawusya m’liŵasa lyawo akawutuchilaga kumasya ulombelawo. (1 Akoli. 7:​10, 11) Mmalomwakwe, aliwusyeje kuti, ‘Ana ni yindu yine yapi yangusosekwa kutenda kuti ngamulaneje mnope ni ŵamkwangu?’ Akusosekwasoni kuŵalanga yajikusasala Baibulo pakwamba yakulosyana chinonyelo. Kaneko, aganichisyeje yampaka atende kuti ŵanonyeleje mnope ŵamkwawo mwakamulana ni yakuyisala pa 1 Akolinto 13:​4-8a. (Aŵalanje.) Mmalo mwakupata matala gakuti alekangane ni ŵamkwawo, aloleje yampaka atende kuti akamulaneje mnope mpela mwaŵatendelaga pandanda. Aganichisyeje mnope yakusosekwa kutenda wawojo kuti akamulaneje mnope ni ŵamkwawo. Amŵendeje Yehofa kuti ŵalongolele. Nambosoni aŵalanjeje mabuku soni kulolela mafidiyo getu gampaka gakamuchisye kumanyilila yakusosekwa kutenda. Kupwatika pelepa, mpaka aŵendesoni malangiso kwa achakulungwa ŵa mumpingo kapena kwa Aklistu ŵakulimba mwausimu ŵele maŵasa gawo gakwenda chenene. Naga akumdalila mnope Yehofa, liŵasa lyawo lichiŵa lyakulimba mnope mpela ‘lukonji lwepote ni ngonji sitatu [lwele] ngalukusakutuka chitema.’—Jwak. 4:12.

17. Ana ŵandu ŵakusaka kulombela soni ŵaŵalombele kala mpaka atendeje chichi kuti aŵeje ŵakusangalala?

¹⁷ Yehofa akusasaka kuti ŵakutumichila ŵakwe wosope aŵe ŵakusangalala kupwatikapo ŵakusaka kulombela soni ŵaŵalombele kala. Myoyo, naga wawojo nganaŵe kulombela soni akusaka kupata mundu jwakuti chalombane najo, akusosekwa kusagula chenene mundu jwachachitama najo kwa umi wawo wosope. Nambo naga ŵalombele kala, apitilisye kutenda yampaka akombole kuti alimbisyeje mkamulano wawo ni ŵamkwawo. Atendeleje yindu yimpepe pakumasya yakusawusya yampaka asimane nayo mu liŵasa lyawo soni amdalileje mnope Yehofa kuti ŵakamuchisye. Naga akutenda yeleyi ‘chachisangalala ni umi’ pampepe ni ŵamkwawo ŵakusiŵanonyela mnope.—Jwak. 9:9.