Yampaka Tulijiganye kwa Mlungu “Jwakusatulimbisya mu Yosope”

1. Ligongo chichi tukusasosekwa kwalimbikasya ŵane?

WOSOPEWE “tukusalinjidwa ni yakusawusya yakulekanganalekangana.” Myoyo ndaŵi sine tukusasosekwa kuti ŵandu ŵane atulimbikasye. (1 Pet. 1:6) Tukusaŵa ŵakusangalala mnope ŵandu ŵane patulimbikasisye. Myoyo, achimjetu pakusimana ni yakusawusya tukusasosekwasoni kwalimbikasya mwachitema. (Mat. 7:12) Yehofa ali “Mlungu . . . jwakusatulimbisya mu yosope.” Jwalakwe akusatukamuchisya kumanyilila yatukusosekwa kutenda “kuti m’wejisoni tukombole kwalimbikasya ŵane ŵakusimana ni yakusawusya.” Tukusosekwa kujigalila chisyasyo cha Yehofa cha “kwalimbikasya” ŵane. (2 Akoli. 1:​3, 4; 1 Ates. 4:18) Tukusasosekwa kwalimbikasya abale ni alongo ŵetu ligongo lyakuti tukusitwanonyela ngaŵaga ligongo lyakuti uli udindo wetu kutenda yeleyi. Myoyo munganiji chitukambilane (1) yajikusagopolela Baibulo pajikusala yakwalimbikasya ŵane, (2) yampaka tutende kuti twalimbikasye ŵane, soni (3) yatukusosekwa kutenda naga tukusaka kuti ŵane atulimbikasye.

ANA BAIBULO JIKUSAGOPOLELA CHICHI PAJIKUSALA YAKWALIMBIKASYA ŴANE?

2. Ana Baibulo pajikusala kuti “twalimbikasye ŵane” jikusaŵa kuti jikugopolela chichi?

² Liloŵe lya Chigiliki lyaŵaligopolele m’Baibulo kuti “kulimbikasya” likwete ngopolelo jakulekanganalekangana pakujigalila ni yatite pakulikamulichisya masengo. Mwachisyasyo, liloŵeli mpaka ligopolele kuŵecheta yindu yampaka yimsangalasye mundu kapena kumsalila kuti atende yindu yine yakwe. (Alo. 12:8) Nambope ngopolelo jisyesyene ja liloŵe lya Chigiliki lyakuti “kulimbikasya” jili kuŵa yimpepe ni mundu jwine pakusaka kumkamuchisya. Pelepa mpaka tuganichisye ya mundu jwakutenda yindu mwachitema mnope pakusaka kumkamuchisya mjakwe jwakusimana ni yakusawusya. Mundujo mpaka amkamuchisye mjakwejo m’matala gakulekanganalekangana. Atamose yili myoyo, yampaka atendeyo mpaka yimlimbikasye soni kumpa machili mjakwejo.

3. Ana Balanaba jwalimbikasisye chamti uli ŵane? (Alolesoni chiwulili.)

³ Kwende tuganichisye chisyasyo achi cha m’Baibulo. Mklistu jwine lina lyakwe Yosefe, ndaŵi syejinji jwalimbikasyaga soni kwakamuchisya ŵandu ŵane. Yeleyi yatendekasisye ŵandumetume kumpa lina lyakuti Balanaba lyalikusagopolela “Jwakwalimbikasya wane.” (Mase. 4:36) Yaŵatendaga Balanaba yakamulanaga ni lina lyakweli mwamti Baibulo ngajikusamkolangasoni ni lina lyakuti Yosefe. Ndaŵi syejinji, Balanaba jwakamuchisyaga Aklistu achimjakwe ŵakusosechela chikamuchisyo. Mwachisyasyo, Saulo ali agambile kuŵa kwene Mklistu, jwapite ku Yelusalemu soni ŵasakaga kusimana ni ŵakulijiganya kweleko. Nambo ŵakulijiganyawo ŵamjogopaga ligongo ŵamanyililaga kuti ŵalagasisye mnope abale ni alongo. Nambope, Balanaba ŵamkulupilile mnope Saulo mwamti ŵamjigele ni kwawula najo kwa ŵandumetume.—Mase. 9:​26-28.

YAMPAKA TUTENDE PAKWALIMBIKASYA ŴANE

4. Ana ni litala lyambone lyapi lyakwalimbikasya ŵane? (Aloma 1:​11, 12)

⁴ Naga yakomboleka ŵajendeleje ku nyumba syawo. Yehofa akusakamulichisya masengo ŵakutumichila ŵakwe kuti ŵalimbikasyeje ŵane. Mwachisyasyo, jwakulochesya Eliya paŵalagasikaga nganisyo, Yehofa jwakamulichisye masengo lilayika kuti likamlimbikasye. (1 Ayi. 19:​4-7) Nombenajo ndumetume Paulo, jwasachililaga mnope kwajendela abale ni alongo ni chakulinga chakuti akalimbikasyane. (Aŵalanje Aloma 1:​11, 12.) Pamjendele mundu jwine akusosekwa kukunguluka najo kwakandaŵi nditu ni chakulinga chakuti akombole kumlimbikasya. (1 Akoli. 16:7) Nambo naga nganaŵa akombwele kumjendela mundu, akusosekwape kumlimbikasya mwakumjimbila foni, kumlembela chikalata, kadi, kapena kumtumichisya utenga pa foni jakwe. Yehofa mpaka ŵakamulichisye masengo wawojo kuti ŵalimbikasye ŵane. Ana chakunde kuti Yehofa ŵakamulichisye masengo mwa litala lyeleli?

5. Ligongo chichi ndaŵi sine mpaka yiŵe yakusawusya kwalimbikasya abale ni alongo ŵetu?

⁵ Yindu masiku gambesi gano payikupitilisya kusakala mnope, chiyiŵeje yakusawusya kuti twajendeleje abale ni alongo ŵetu ni chakulinga chakuti tukalimbikasye. Pandaŵi jele Paulo ŵamwugalile mundende ku Loma, Onesifolo juŵatamaga ku Efeso ŵamsosilesosile jwalakwe kuti amlimbikasye. Kutenda yeleyi kwaliji kwakogoya ligongo lyakuti akagambe kumkamula, nombenajo akamŵisile mundende kapena kumwulaga. (2 Tim. 1:16-18) Mwakulandana ni Onesifolo, abale ni alongo ŵetu ku Russia akupitilisya kwalimbikasya achimjawo ŵakulagasidwa ligongo lya chikulupi chawo. Naga jumo mwa jemanaji akwimbidwa magambo, abale ni alongo akusampechesya ku koti ni chakulinga chakuti akamlimbikasye. Akusatenda yeleyi atamose ali mkumanyilila kuti nombenawo mpaka ataŵidwe. Mwakulandana ni jemanjaji, ana wawojo mpaka atende chichi kuti akombole kwalimbikasya abale ni alongo? Chindu chakusosekwa kutenda chili kulijiganya yaŵatesile ŵakutumichila ŵa Yehofa ŵakala soni ŵamasiku agano pakwalimbikasya ŵane. Nambosoni kulola yindu yayakamuchisye kuti apitilisye kuŵa ŵakusangalala atamose kuti ŵalagasidwaga.

6. Ana mpaka tumsyasye chamti uli Yehofa patukwalimbikasya ŵane? (Alolesoni chiwulili.)

⁶ Ŵapikanileje pakuŵecheta. Pandaŵi jele jwakulochesya Eliya jwajogopaga kuti chawulajidwe, ŵamkusulile Yehofa yindu yayamlagasyaga nganisyo. Mlungu jwetu jwachinonyelo, ŵampikanile Eliya pandaŵi jaŵasalaga yindu yayamlagasyaga nganisyo. Jwalakwe ŵatesile yeleyi atamose kuti ŵamanyililaga kala yakusawusya yaŵasimanaga nayo. Yehofa ŵapitilisye kumpikanila Eliya mwakuwusimana mtima atamose kuti jwagambaga kusala ngani jijojo mwakuwilisyawilisya. (1 Ayi. 19:​9, 10, 14) Yehofa ŵampikanilesoni Habakuku paŵalondesyaga muŵapikanilaga ligongo lya yakusawusya soni yakusakala yaŵayiwonaga yili mkutendekwa. Jwalakwe ŵampikanile Habakuku mwakuwusimana mtima atamose kuti jwaŵechetaga mwakulosya kuti Yehofa ngayikumkwaya yayatendekwaga pandaŵijo. (Hab. 1:​2, 3) Masiku aganosoni, Yehofa akusapikanila mapopelo getu mwakuwusimana mtima atamose kuti akusamanyilila kala yatukusosechela. Mpaka tumsyasye Yehofa mwakwapikanila mwakuwusimana mtima abale ni alongo ŵetu pakutusalila yakusawusya yakusimana nayo. Pakuŵecheta ‘tuŵeje ŵakwanguya kupikana,’ tuŵambaleje kwakata maloŵe, kapena kutumbila naga aŵechete yindu yakutukuŵasya kapena naga akutusalila yindu yakulandanayo mwakuwilisyawilisya.—Yak. 1:19; Jwak. 7:9.

7. Ana mpaka tumanyilile chamti uli yindu yakusosechela mjetu?

⁷ Amanyilileje yampaka atende pakumkamuchisya mjawo. Yehofa akusamanyilila yatukuganisya soni yayili mu mtima mwetu pele m’weji nganituŵa tumanyilile yakuganisya mjetu. Nambo kuti tumanyilile yatukusosekwa kutenda kuti tumlimbikasye mjetu, tukusasosekwa kumpikanila mwakusamala pakutusalila yayikumlagasya nganisyo. Akawutuchilaga kuganisya kuti akumanyilila yakusosechela mjawo ligongo lyakuti akumanyilila yakatesile wawojo yikaŵe kuti ali mu ndamo jali mjawojo. Ŵanduwe tuli ŵakulekangana. Myoyo ampikanileje mwakusamala mjawo pakuŵecheta, atendeje najo yindu mwachinonyelo soni amwusyeje yiwusyo yampaka yakamuchisye kumanyilila yakusosechela mjawojo.—Mis. 20:5.

8. Lasalo paŵawile, ana Yesu ŵamlimbikasisye chamti uli Malita soni Maliya? (Alolesoni yiwulili.)

⁸ Aganichisye yaŵatesile Yesu pakumlimbikasya Malita soni Maliya mlumbugwawo Lasalo ali awile. Achakongwe ŵaŵiliŵa ŵadandawulaga mnope ligongo lyakuti mlumbugwawoju ŵawile. Nambope, Yesu jwalimbikasisye jemanjajo mwakulekangana. Yesu ali aŵechetene ni Malita, ŵamsalile kuti Lasalo chajimuche soni ŵamkamuchisye kuti akulupilileje mnope yeleyi. Nambo Maliya paŵayiche ali mkulila, Yesu nganaŵecheta chilichose chakwamba kwimuka ku chiwa. Mmalomwakwe, jwalakwe jwalisile yimpepe ni Maliya soni ŵawusisye kuŵamsichile Lasalo. (Yoh. 11:​20-35) Ana tukulijiganya chichi pelepa? Patukwalimbikasya ŵandu ŵakusimana ni yakusawusya, tukusosekwa tumanyilileje yakusosechela ŵanduwo mmalo mwakumlimbikasya jwalijose mu litala lyakulandana.

9. Ana mpaka tukamulichisye masengo mwamti uli Baibulo pakwalimbikasya ŵane? (Aloma 15:​4, 5)

⁹ Akamulichisyeje masengo Baibulo. Pakumŵalanjila mundu ‘Malemba gakumlimbikasya,’ yikusaŵa kuti akumkamuchisya kuti akole chembecheyo. (Aŵalanje Aloma 15:​4, 5.) Chembecheyo chelechi, mpaka chimkamuchisye kumanyilila kuti Yehofa akusamnonyela mnope soni kuti chapitilisye kumsamalila. (Yes. 40:31) Nambo ana mpaka apate mwamti uli Malemba gampaka gamlimbikasye mundu jwine? Abale ni alongo ŵane ayiweni kuti yikusaŵa yakamuchisya kulemba malemba gampaka agakamulichisye masengo pakwalimbikasya ŵane. Mpaka apate malemba gelega mu buku jakuti Malemba Gakamuchisya pa Umi wa Chiklistu pakamtwe kakuti “Kwamyalasya Ŵane.” Amŵendeje Yehofa kuti ŵakamuchisyeje ni chakulinga chakuti akomboleje kukamulichisya masengo chenene Maloŵe gakwe pakwalimbikasya ŵane. Msimu wakwe weswela mpaka wakamuchisye kukumbuchila malembaga pandaŵi jakusosekwa kwalimbikasya ŵane.—Yoh. 14:26.

10. Ligongo chichi tukusasosekwa kuŵecheta mwachinonyelo patukusaka kumlimbikasya mundu?

¹⁰ Aŵecheteje mwachinonyelo. Ndaŵi sine mpaka tusosekwe kumlimbikasya mjetu kuti achenje mwakuyiwonela yakusawusya yakusimana nayo. Naga akusosekwa kumkamuchisya mwa litala lyeleli, akusosekwa kuganichisya mwakusamala yampaka akaŵechete ni chakulinga chakuti maloŵe gawo gakaŵe gakuposya mmalomwakuti gakaŵe gakusoma. (Mis. 12:18) Yaŵatesile Yehofa pakumkamuchisya Eliya, mpaka yitukamuchisyesoni m’weji. Eliya jwaliwonaga kuti ali jika jwakumtumichila Yehofa soni kuti masengo gakwe mpela jwakulochesya ngagakwakamuchisya ŵandu. Mwachinonyelo, Yehofa ŵamkamuchisye Eliya kuti achenje mwaŵayiwonelaga yindu. Nambope nganamsalila kuti jwalemwesyaga kukola nganisyo syelesi. (1 Ayi. 19:​15-18) Wawojosoni mpaka ŵakamuchisye Aklistu achimjawo naga akusiŵalosya umbone mtima soni kuganichisya mwakusamala yindu yakusaka kuŵecheta. Pakuŵecheta ngani ku nyumba ja Uchimwene kapena pakupeleka ndemanga aŵecheteje yindu yakulosya kwaganichisya abale ni alongo ŵawo soni yampaka yalimbikasye.

11. Ana ŵandu ŵakusasimana ni yakusawusya akusasaka chichi? (1 Yohane 3:18)

¹¹ Ŵapeje yindu yakusosechela. Mpaka tusosekwe kwapa achimjetu ŵakusimana ni yakusawusya yindu yakusosechela mmalo mwakwamba kwalimbikasya. (Aŵalanje 1 Yohane 3:18.) Balanaba ali chisyasyo chambone panganiji. Jwalakwe paŵayiweni kuti Aklistu ŵaŵagambile kubatisidwa kwene akulaga ni usawuchi, jwasumisye mgunda wakwe ni kupeleka mbiyasyo kuti syakamuchisye jemanjaji. (Mase. 4:​36, 37) Aklistu ŵajinji masiku agano, akusajigalila chisyasyo chambone cha Balanaba mwakwakamuchisya Aklistu achimjawo ŵakusosechela chikamuchisyo. Gabriela jwa ku Poland, jwasoŵile chitela chakamula pandaŵi jele mesi gakusewuchila gajonasile nyumba jakwe. Jwalakwe jwasasile kuti, “Uneji pampepe ni achinangolo ŵangu, twadandawulaga mnope ni yayatutendecheleyi. Nganitumanyililaga yampaka tutende kuti tulinganyesoni nyumba jetu. Nambo abale ni alongo ŵakuŵandikana nawo mpingo, ŵayiche kukutukamuchisya kulinganya nyumba jetu soni ŵamalisisye kukamula masengoga kwa lisiku limo. Yayandendecheleyi yangamuchisye kuti ngakayichilaga kuti Yehofa akwakamuchisya ŵandu ŵakwe kuti ŵalimbikasye Aklistu achimjawo ŵakusimana ni yakusawusya.”

12. Ana mpaka ŵalimbikasye chamti uli Aklistu achimjawo pakupitilisya kuŵa ŵakulupichika kwa Yehofa atamose ali mkusimana ni yakusawusya?

¹² Aŵeje ŵakulupichika kwa Yehofa. Paulo jwasalile Aklistu ŵa ku Tesalonika kuti yamlimbikasisye mnope paŵapikene kuti jemanjajo akupitilisya kupilila soni kuŵa ŵakulupichika kwa Yehofa atamose kuti akulagasidwa. Jwalakwe jwamanyililaga kuti masengo gaŵakamwile pakwakamuchisya jemanjaji nganigajawula mmesi. (1 Ates. 3:​5-8) Nombenajo Paulo jwamanyililaga kuti naga akupitilisya kuŵa jwakulupichika kwa Yehofa pandaŵi jaŵasimanaga ni yakusawusya, chiyalimbikasye abale ni alongo kuti nombenawo aŵeje ŵakulupichika. (Akolo. 2:​1, 2) Mwakulandanamo, Aklistu achimjetu payiweni kuti Yehofa atukamuchisye kuti tukombole kupilila yakusawusya yetu, nombenawo ngasakayichila ata panandi kuti chachakamuchisya pandaŵi jasimene ni yakusawusya.

13. Ana tukusosekwa kutendasoni chichi patukwalimbikasya ŵane?

¹³ Aŵeje ŵakuwusimana mtima. Patumlimbikasisye m’bale kapena mlongo jwakusimana ni yakusawusya, tukajembecheyaga kuti yindu mpaka yichenje paumi wakwe ndaŵi jijojo. Ni ligongo lyakwe malemba gakusatusalila kuti “mpitilisye kulimbikasyana.” Yeleyitu yikugopolela kuti tukusasosekwa kwalimbikasya ŵane mwakuwilisyawilisya. (1 Ates. 5:11) Myoyo, aŵeje ŵakuwusimana mtima pakupitilisya kwalimbikasya ŵandu ŵakusimana ni yakusawusya. (1 Ates. 5:14) Nambope, ndaŵi sine mpaka tusache ŵandu ŵane kuti atulimbikasye. Ana mpaka tusosekwe kutenda chichi?

YATUKUSOSEKWA KUTENDA NAGA TUKUSAKA KUTI ŴANE ATULIMBIKASYE

14-15. Ana tukusosekwa kutenda chichi patukulagasika nganisyo?

¹⁴ Apopeleje kwa Yehofa. Pandaŵi jakulagasika nganisyo kapena kudandawula ni yindu yine, amŵendeje Yehofa kuti ŵatamiche mtima pasi. (Sal. 94:19) Amkusulileje Yehofa yayili mu mtima mwawo mwakumsalila mwakupikanika chenene yayikwatendechela. (Sal. 62:8) Yili yisyene kuti Yehofa akusamanyilila mwakupikanila atamose mkanaŵe kupopela kwa jwalakwe. Nambo pakumkusulila yayili mu mtima mwawo akusalosya kuti akusamdalila soni kumkulupilila. Sonitu Yehofa akusajanga mapopelo ga ŵandu ŵakusamdalila soni kumkulupilila jwalakwe. Mwamti akusajanga lipopelolyo mu litala lyakuti mundujo nganajembecheyaga. (Mak. 11:24) Pa Afilipi 4:​6, 7 pakusatusalila kuti, “Mumsalileje Mlungu yakuŵenda yenu yosope . . . . Pambesi pakwe, mtendele wa Mlungu wele ukusapunda kupikanichisya yindu kulikose wuchichenjela mitima jenu soni nganisyo syenu.”

¹⁵ Ŵaŵendeje ŵane kuti ŵakamuchisye. Amsalileje mjawo kapena jwamkulungwa jwa mumpingo jwakusamdalila yindu yakusimana nayo. Abale ni alongo ŵawo akusaŵa ŵakoseka kuti ŵalimbikasye. Nambo naga ngakwasalila yakusawusya yakusimana nayo soni yindu yakusaka, jemanjaji nganaŵa amanyilile yampaka atende pakwakamuchisya. (Mis. 14:10) Mpaka ŵaŵende jemanjaji kuti ŵapikanile mwakuwusimana mtima pakwasalila yakusawusya yawo kapenasoni ŵaŵalanjile lilemba kapena ngani jinejakwe jakujiwona kuti mpaka jalimbikasye.

16. Ana mpaka chitendekwe chichi ŵane pakwalimbikasya? Soni ana akusosekwa kukumbuchilaga chichi?

¹⁶ Aŵeje ŵakuwusimana mtima soni ŵakululuchileje ŵane. Abale ni alongo pakwalimbikasya wawojo, mpaka atende yindu yine yampaka yakuŵasye. Mwachisyasyo, jemanjaji mpaka aŵechete kapena kutenda yindu yine yampaka yatumbilikasye. Payitendekwe yeleyi, aŵeje ŵakuwusimana mtima ni jemanjajo. (1 Akoli. 13:​4, 7) Nambosoni akumbuchileje lilemba lya Yakobo 3:2 lyalikusati, “Naga jwine jwangalemwesya pakuŵecheta, jwelejo ali mundu jwamlama.” Amanyilileje kuti chakulinga chakwete abale ni alongo ŵawo chili kwalimbikasya wawojo basi. Akumbuchilejesoni kuti “mtima uli wakusachilila, nambo chilu chili changali machili.”—Mat. 26:41.

17. Ana ali ŵakusimichisya kutenda chichi?

¹⁷ Pakuŵapo tukutama m’masiku gambesi, wosopewe tukusasosechela ŵandu ŵane kutulimbikasya. Tujembecheyejesoni kuti yindu chipitilisye kusakala soni adani ŵa Mlungu chapitilisye kutulagasya. Paligongo lyeleli chitusosekweje nditu kuti ŵane atulimbikasyeje. Myoyo, kwende tuŵe ŵakusimichisya mmitima jetu kupitilisya kulimbikasyana.