Tusyasyeje Kulinandiya kwa Yehofa

1. Ana ni chichi chachikusichatesya chidwi ni kulinandiya kwa Yehofa?

ANA masiku agano ŵandu ŵakwete machili soni ulamusi winewakwe akusakola ndamo ja kulinandiya? Iyayi. Nambotu Yehofa ali jwakulinandiya atamose kuti jwalakwe ali jwamachili gosope. (Sal. 113:​5-8) Pangali mundu jwali jwakulinandiya mpela Yehofa soni jwalakwe nganaŵa jwakupoka. Mungani ajino chitukambilane ndamo mcheche syakusalosya Yehofa soni mwele ndamo syakwesi sikusalosya kuti jwalakwe ali jwakulinandiya. Chitukambilanesoni yaŵatesile Yesu pakusyasya kulinandiya kwa Atati ŵakwe. Yindu yeleyi chiyitukamuchisye kuti tumŵandichile mnope Yehofa soni kuti tuŵeje ŵakulinandiya mnope.

YEHOFA AKUSAŴA JWAKOSEKA KUTUPIKANILA

2. Ana lilemba lya Salimo 62:8 likusasala yamti uli pakwamba ya Yehofa? (Alolesoni chapachikuto.)

² Ŵandu ŵakupoka akusaŵaga ŵakusawusya kwayichila. Jemanjaji akusatenda yindu mwangali chinonyelo ni ŵandu ŵane pakuliwona kuŵa ŵakusosekwa mnope mwamti ŵandu ŵajinji akusiŵaŵambalaga. Nambotu Yehofa nganaŵa myoyo. Ligongo lyakuti Atati ŵetu ŵakwinani ali ŵakulinandiya, jwalakwe akusatusalila kuti mpaka tumsalile yiliyose yayikutulagasya nganisyo. (Aŵalanje Salimo 62:8.) Mpela mwayikusaŵela ni mtati jwakusaŵaga jwakoseka kwapikanila ŵanache ŵakwe, myoyosoni Yehofa akusaŵa jwakoseka kupikanila mapopelo ga ŵakutumichila ŵakwe. Mwamti m’Baibulo mukusasimanikwa yisyasyo ya ŵandu ŵaŵapopesile kwa Yehofa. Yeleyi yikulosya kuti jwalakwe akusaŵa jwakoseka kupikanila mapopelo getu. (Yos. 10:​12-14; 1 Sam. 1:​10-18) Nambotu ndaŵi sine mpaka tuyiwoneje kuŵa yakusawusya kupopela kwa Yehofa ligongo lya yindu yine yatukusalemwesyaga.

3. Ligongo chichi mpaka aŵe ŵakusimichisya kuti Yehofa akusasaka kuti wawojo apopeleje ndaŵi syosope kwa jwalakwe?

³ Mpaka tuŵechetane ni Yehofa mu lipopelo atamose patukuyiwona kuti Yehofa nganaŵa atunonyelesoni. Ligongo chichi tukuŵecheta yeleyi? Mu chiwanichisyo cha Yesu cha mwanache jwamsokonechele, jwalakwe jwam’wanichisye Yehofa kuti ali mpela mtati jwachinonyelo. Mtatiju jwakwete mwanache juŵaliwonaga kuti nganaŵa jwakusosekwa kuwujila ku liŵasa lya babagwe atamose kuti jwagalawiche mtima. Ana mtatiju jwatesile chichi mwanacheju ali awujile? Yesu jwaŵechete kuti mtatijo paŵagambile kumwona mwanacheju, “ŵamwutuchile ni kumkumbatila mwachinonyelo.” (Luk. 15:​17-20) Yehofa ali mpela mtatiju. Jwalakwe pagambile kupikana mapopelo ga ŵandu ŵakusalijimba magambo kapena kusalagasika nganisyo ligongo lya maulemwa gaŵatesile, kulinandiya kwakwe kukusamtendekasya kuŵa jwakusachilila kwapikanila. (Mal. 3:​19, 20) Yehofa akusatutendela mnope chanasa soni mpela muyaŵelele ni mtati jwachanasa jula, jwalakwe akusatuwutuchila soni kutulimbikasya mwakutusalila kuti akusatunonyela. (Yes. 57:15) Ana Yehofa ‘akusatuwutuchila’ chamti uli masiku agano? Akusatenda yeleyi kupitila mwa achakulungwa ŵa mumpingo, ŵachinasi ŵetu ŵali ŵa Mboni sya Yehofa soni ŵakulupilila achimjetu. (Yak. 5:​14, 15) Yehofa akusatenda yeleyi ligongo akusasaka kuti tuŵe najo paunasi.

4. Ligongo chichi yaliji yangasawusya kwa ŵandu kuŵechetana ni Yesu?

⁴ Yesu akusiŵasyasya Atati ŵakwe. Mwakulandana ni Atati ŵakwe, nombenajo Yesu ali jwakulinandiya. Yeleyi yatendekasisye kuti ali pachilambopa ŵandu amyichileje mwangasawusya. Jemanjaji ŵaŵaga ŵagopoka kumwusya yiwusyo. (Maliko 4:​10, 11) Yesu paŵawusisye jemanjaji nganisyo syawo ŵaŵaga ŵagopoka kulondesya mwakupikanila. (Mat. 16:​13-16) Nambosoni jemanjaji palemwisye yine yakwe nganajogopaga kuti Yesu chatumbile mnope, ligongo ŵamanyililaga kuti Yesu jwaliji jwachinonyelo, jwachanasa soni jwakuwusimana mtima. (Mat. 17:​24-27) Ligongo lyakuti Yesu ŵajigalile chisyasyo cha Atati ŵakwe, yakamuchisye kuti ŵakulijiganya ŵakwe ammanyilile chenene Yehofa. (Yoh. 14:9) Ŵakulijiganya ŵa Yesuŵa ŵalijiganyisye kuti Yehofa ali jwachinonyelo soni nganaŵa jwakupoka mpela muyaŵelele ni achimlongola ŵa dini ŵa mundaŵi jelejo. Mmalomwakwe, jwaliji jwakulinandiya soni ŵandu ŵaŵaga ŵagopoka kuŵechetana najo.

5. Ana kulinandiya mpaka kutukamuchisye chamti uli kuti ŵandu atuyichileje mwangasawusya?

⁵ Ana mpaka tumsyasye chamti uli Yehofa? Patukukusya ndamo jakulinandiya, ŵandu akusaŵa ŵagopoka kuŵechetana ni m’weji. Kulinandiya kukusatukamuchisya kuti tuŵambale ndamo ja jelasi, kupoka soni ngakululuchila ŵane ndamo syele mpaka syatendekasye ŵane kuti akaŵaga ŵagopoka kuŵechetana ni m’weji. Nambo ndamo jakulinandiya jichitukamuchisya kuti tuŵeje ŵachinonyelo, ŵakuwusimana mtima soni ŵakululuka, yele yichatendekasya ŵandu kuti atugopocheleje. (Akolo. 3:​12-14) Achakulungwa ŵa mumpingo ni ŵakusosekwa kuŵa pamalo gandanda kuti ŵandu ŵagopocheleje. Kuti yeleyi yikomboleche jemanjaji akusosekwa kungulukaga ni abale ni alongo ndaŵi ni katema. Naga yili yakomboleka, achakulungwaŵa akusosekwa kusimanikwaga pamisongano ja mpingo pameso ni pameso atamose yili mkuti mpaka yikomboleche kutenda misonganoji pa fidiyokonfelesi. Nambosoni naga ndamo jikwakunda, mpaka atende chenene kulalichilaga ku nyumba ni nyumba yimpepe ni abale ni alongo. Yeleyi yichakamuchisya ŵandu ŵa mumpingo kuti ŵamanyilile chenene achakulungwaŵa, yayichikamuchisyasoni kuti aŵeje ŵagopoka kuŵechetana nawo ndaŵi jilijose pakusaka chikamuchisyo.

YEHOFA ALI JWAKUNDILILA

6-7. Apeleche yisyasyo yakulosya kuti Yehofa jwakundile kuchenga ŵakutumichila ŵakwe paŵapopesille kwa jwalakwe.

⁶ Ŵandu ŵakupoka akusaganisya kuti akumanyilila chilichose yayikusatendekasya kuti akapikanaga ya ŵane. Nambo ligongo lyakuti Yehofa ali jwakulinandiya, akusaŵa jwakundilila soni jwakoseka kuchenga atamose kuti jwalakwe akusamanyililaga chilichose. Aganichisye muŵatendele yindu ni Miliyamu juŵaliji mchemwaligwe Mose. Jwalakwe yimpepe ni Aloni, ŵadandawulaga pakwamba ya Mose juŵaŵechetaga mmalo mwa Yehofa. Pelepatu yiŵatesile Miliyamuyi yalosisye kuti nganamchimbichisyaga Yehofa. Yakuyichisya yakwe Yehofa ŵatumbile mwamti ŵamkang’andile Miliyamu ni ulwele wa matana. Nambo Aloni jwamŵendile Mose kuti amkamuchisye Miliyamuju, mwamti kaneko Mose jwamŵendile Yehofa kuti amposye jwalakwe. Ana Mlungu jwatesile uli? Mlungu nganatenda yindu mwakupoka pakakamila chilango chiŵapeleche kwa Miliyamu. Ligongo lyakuti Yehofa ali jwakulinandiya, jwachenjile chilango chiŵampele Miliyamu mwamti ŵamposisye.—Num. 12:​1-15.

⁷ Muŵatendele yindu ni Mwenye Hesekiya, Yehofa jwalosisyesoni kuti ali jwakulinandiya. Yehofa jwakamulichisye masengo jwakulochesya jwakwe pakumsalila Hesekiya kuti chawe. Ali apikene yeleyi, Hesekiya jwamŵendile Yehofa kuti amposye. Ligongo lya chanasa, Yehofa ŵamjanjile jwalakwe mwakumjonjechesya yaka yine 15. (2 Ayi. 20:​1, 5, 6) Kusala yisyene, kulinandiya kukusamtendekasya Yehofa kuŵa jwachanasa soni jwakoseka kuchenga.

8. Apeleche yisyasyo yakulosya kuti Yesu ali jwakundilila. (Maliko 3:​1-6)

⁸ Yesu akusiŵasyasya Atati ŵakwe. Paŵaliji pachilambopa, Yesu nganalepelaga kwatendela ŵandu ŵane yindu yambone naga pakusosechela kutenda yeleyo. Mwachisyasyo, jwaposyaga ŵandu ŵakulwala pa lisiku lya Sabata atamose kuti achimlongola ŵa dini ŵayiwonaga kuti nganiyiŵa yakuŵajilwa kutenda yeleyi pa lisikuli. (Aŵalanje Maliko 3:​1-6.) Yesu ali mtwe wa mpingo mwamti akupitilisyape kuŵa jwakundilila. Mwachisyasyo, naga jwine mumpingo atesile ulemwa wekulungwa, Yesu akusatenda yindu mwakuwusimana mtima ni jwalakwejo mwakumpa upile wakulinganya yakulemwayo.—Chiw. 2:​2-5.

9. Ana mpaka tutende chichi kuti tukole ndamo jakundilila, soni ana mpaka tulosye chamti uli ndamoji? (Alolesoni yiwulili.)

⁹ Ana mpaka tumsyasye chamti uli Yehofa? Mwakulinandiya tukusosekwa kutenda yakomboleka kuti tujigalile chisyasyo cha Yehofa chakuŵa ŵakundilila. (Yak. 3:17) Mwachisyasyo, achinangolo ŵali ŵakundilila ngakusajembecheya kuti ŵanache ŵawo chatendeje yindu yanganaŵa akombwele. Yeleyitu ni yaŵatesile Yakobo mwamti ngani jakwe jikusasimanikwa pa Genesesi 33:​12-14. Achinangolo ŵakulinandiya soni ŵakundilila akusaŵambala kwalandanya ŵanache ŵawo. Nombe nawo achakulungwa ŵa mumpingo akusosekwasoni kuŵa ŵakundilila. Mwachisyasyo, mpaka asosekwe kwitichisya nganisyo syakamulene achakulungwa ŵa mu mpingo ŵajinji naga kutenda yeleyo ngakukutindana ni mfundo sya m’Baibulo. (1 Tim. 3:​2, 3) Nambosoni wosopewe tukusosekwa kundilila nganisyo sya ŵane atamose kuti tukusayiwona yindu mwakulekangana. (Alo. 14:1) Kusala yisyene wosope mumpingo tukusasosekwa kulimbichila kuti ‘ŵandu wosope amanyilileje kuti tukusapikana ya ŵane.’—Afil. 4:5.

YEHOFA ALI JWAKUWUSIMANA MTIMA

10. Ana Yehofa jwalosisye kuwusimana mtima m’matala gapi?

¹⁰ Mwangakayichila, wawojo akumanyilila kuti ŵandu ŵakupoka akusasaka yindu yachitema. Mwamti kupokaku kukusikwatendekasya kuŵa ŵangawusimana mtima. Mwakulekangana ni jemanjaji, Yehofa ali jwakuwusimana mtima kupunda mundu jwalijose. Mwachisyasyo, m’masiku ga Nowa, Yehofa jwasasile kuti chajembecheye kwa yaka 120 mkaniŵajonanje ŵandu ŵakusakala. (Gen. 6:3) Yeleyi yakamuchisye kuti Nowa akole ndaŵi jakwalela ŵanache ŵakwe soni jakuti ataŵe chombo pampepe ni liŵasa lyakwe. Pali papitile yaka, lilayika lyalyamjimilaga Yehofa lyampikanile Abulahamu mwakuwusimana mtima paŵawusyaga yiwusyo yakwamba konanjidwa kwa Sodomu ni Gomola. Komboleka mundu jwakupoka akaŵechete kuti, ‘Ana m’mwe ŵani kuti mumbusyeje une yiwusyo yeleyi.’ Nambo pakusaka kumsyasya Yehofa, lilayikalyo lyatesile yindu mwakuwusimana mtima ni Abulahamu.—Gen. 18:​20-33.

11. Mwakamulana ni lilemba lya 2 Petulo 3:​9, ligongo chichi masiku agano Yehofa akulosya kuwusimana mtima?

¹¹ Masiku aganosoni Yehofa akulosya kuwusimana mtima. Jwalakwe akwembecheya ndaŵi jwakwe kuti chajonanje chilambochi. Ligongo chichi jwalakwe ali jwakuwusimana mtima? “Ligongo ngakusaka kuti jwine jwalijose ajonasiche nambo akusaka kuti wosope agalawuche mtima.” (Aŵalanje 2 Petulo 3:9.) Nambo ana kuwusimana mtima kwa Yehofa kugambile kuŵa kwangali mate? Iyayi. Kuwusimana mtima kwakweku kukamuchisye kuti ŵandu mamiliyoni gejinji ŵakwete mitima jambone aŵe najo pa unasi. Mwamti ngatukukayichila kuti ŵandu mamiliyoni ganesoni chatende yakulandanayo. Atamose yili myoyo, kuwusimana mtima kwa Yehofa kukwete malile. Yili yisyene kuti Yehofa akusiŵanonyela ŵandu, nambo jwalakwe ngasakunda kuti ŵanduwo atendeje yiliyose yakusaka. Sonitu jwalakwe ngasakunda kuti ŵandu ŵakusakala atameje mpaka kalakala.—Hab. 2:3.

12. Ana Yesu akusasyasya chamti uli kuwusimana mtima kwa Yehofa?

¹² Yesu akusiŵasyasya Atati ŵakwe. Yesu aŵele ali mkusyasya kuwusimana mtima kwa Yehofa kwa yaka masawusande gejinji. Yesu ŵam’weni Satana ali mkusala yaunami yakwamba Yehofa nambosoni ŵandu ŵakulupichika. (Gen. 3:​4, 5; Yob. 1:11; Chiw. 12:10) Jwalakwe aŵele ali mkwawonasoni ŵandu ŵajinji ali mkulaga ni yakusawusya. Agambe ganichisya yakuti jwalakwejo pakusachilila ‘konanga masengo ga Jwaunamijo.’ (1 Yoh. 3:8) Ana ni chichi chachikumkamuchisya Yesu kwembecheya mwakuwusimana mtima mpaka Yehofa ali amsalile kuti ajonanje masengo galigose ga Jwaunamiju? Ligongo limo lili lyakuti jwalakwe ali jwakulinandiya. Mwamti akusamanyilila kuti Yehofape ni jwakumanyilila ndaŵi jambone jakuchijonanga chilambochi.—Mase. 1:7.

13. Ana Yesu jwalosisye chamti uli kuwusimana mtima ni ŵandumetume ŵakwe soni ligongo chichi?

¹³ Paŵaliji pachilambopa, Yesu jwalijisoni jwakuwusimana mtima ni ŵandumetume ŵakwe. Mwachisyasyo, jemanjaji piŵakanganaga mwakuwilisyawilisya yakuti ŵani jwali jwamkulungwa pasikati pawo, Yesu nganiŵatumbilila mnope ni kwamba kwaleka. Mmalomwakwe, jwalakwe jwapitilisye kuŵa jwakuwusimana mtima. (Luk. 9:46; 22:​24-27) Jwalakwe jwakulupililaga kuti jemanjaji chachilijiganya kuŵa ŵakulinandiya. Ana wawojo pakwete piyatendechelesoni yeleyi? Naga yili myoyo, ana ngakuyamichila kola Mwenye jwakulinandiya soni jwakuwusimana mtimaju?

14. Ana mpaka tutende chichi kuti tuŵe ŵakuwusimana mtima?

¹⁴ Ana mpaka tumsyasye chamti uli Yehofa? Patukukola “nganisyo sya Klistu,” tukusaŵa kuti tuli pamalo gambone mnope kuti tuganisyeje soni kutenda yindu mpela Yehofa. (1 Akoli. 2:16) Ana mpaka tutende yamti uli kuti tukole nganisyo sya Klistu? Pangalitu litala lyakata lyampaka tutendele yeleyi. Tukusosekwa kuŵalangaga mabuku ga Ngani Syambone. Kaneko tukusosekwa kupata ndaŵi jakuganichisya yaŵatesile Yesu soni ligongo lyakwe ŵatesile yeleyi. Kusala yisyene, tukusosekwasoni kupopelaga kwa Yehofa kuti atukamuchisyeje kulosya ndamo jakulinandiya mpela muŵatendelaga Yesu. Myoyo patukulingalinga kola nganisyo sya Klistusi, tuchitendaga yindu mwakuwusimana mtima soni yichiŵa yangasawusya kwalosya ŵane ndamoji mpela mwakusatendela Yehofa.—Mat. 18:​26-30, 35.

YEHOFA AKUSIŴACHIMBICHISYA ŴANDU ŴAKULINANDIYA

15. Ana Yehofa jwakwanilisye chamti uli maloŵe ga pa Salimo 138:6?

¹⁵ Aŵalanje Salimo 138:6. Uli upile wekulungwa mnope kwa ŵandu ŵakulinandiya kumanyika kwa Jwakulamulila jwa chilengedwe chosope. Aganichisye yisyasyo yakuŵalanjikape ya ŵandu ŵakuwoneka ŵakutuluka ŵele Yehofa ŵachimbichisye. Komboleka ŵane mwa jemanjaji ngatukwamanyilila, nambope mbili jawo jalembedwe m’Baibulo. Mwachisyasyo, Debola jwaliji jwamasengo jwakulupichika ku liŵasa lya Isaki soni lya Yakobo kwa yaka 125. Atamose kuti ngani jakwe jangamanyikaga chenene, nambope Yehofa ŵamsalile Mose kulemba yindu yine yiyalosyaga kuti ŵandu ŵamnonyelaga jwalakwe. (Gen. 24:59; 35:​8, malowe gamwiŵanda.) Pali pamasile yaka, Yehofa ŵamsagwile Daudi juŵaliji m’busa kuti aŵe mwenye jwa mtundu wa Isalayeli. (2 Sam. 22:​1, 36) Yesu ali agambile kupagwa kwene, Mlungu ŵagatumisye malayika kwa abusa ŵane kukwasalila kuti ku Betelehemu kupagwile Mesiya. Mlungutu jwachimbichisye jemanjaji mwakukunda kuti aŵe ŵandanda kumanyilila ngani jeleji. (Luk. 2:​8-11) Soni pele Yosefe ni Maliya ŵayiche najo Yesu ku nyumba ja Mlungu, Yehofa ŵamchimbichisye Simiyoni soni Ana ŵaŵaliji ŵakalambale mwakwalosya Mwanache Jwakwe. (Luk. 2:​25-30, 36-38) Kusala yisyene, “Atamose kuti Yehofa akusatama kwinani, jwalakwe akusiŵaganichisya ŵandu ŵakulinandiya.”

16. Ana Yesu jwasyasyaga chamti uli Atati ŵakŵe paŵatendaga yindu ni ŵandu?

¹⁶ Yesu akusiŵasyasya Atati ŵakwe. Yesu jwachimbichisyaga ŵandu ŵakulinandiya mpela muŵatendelaga Atati ŵakwe. Jwalakwe jwajiganyaga yisyesyene yakwamba uchimwene wa Mlungu ŵandu “ŵangalijiganya . . . soni ŵandu wamba.” (Mase. 4:13; Mat. 11:25) Yesu nganagambaga kwaposya ŵakulwala nambo jwatendagasoni yakuti ŵandu atandilesoni kwachimbichisya. (Luk. 5:13) Chilo chakumalisya mkanaŵe kuwulajidwa, jwalakwe jwakamwile masengo gajwasosekwaga kukamula kapolo mwakojesya sajo sya ŵandumetume ŵakwe. (Yoh. 13:5) Nambosoni jwalakwe mkanajawule kwinani jwachimbichisye ŵakulijiganya ŵakwe kupwatikapo m’weji, mwakutupa masengo gakusosekwa mnope ga kwakamuchisya ŵandu kuti chapate umi wangamala.—Mat. 28:​19, 20.

17. Ana mpaka twachimbichisye chamti uli ŵane? (Alolesoni chiwulili.)

¹⁷ Ana mpaka tumsyasye chamti uli Yehofa? Mpaka tulosye kwachimbichisya ŵandu mwakulalichila ngani syambone kwa jwalijose mwangajigalila kawoneche kawo, mtundu wawo, kwatyochele kapena majiganyo gawo. Tukusitwachimbichisyasoni abale ni alongo mwakwawona jemanjajo kuŵa ŵakutupunda, mwangajigalila udindo watukwete kapena yindu yatukusakombola kutenda. (Afil. 2:3) Yehofa akusasangalala naga tukutenda yindu mwakulinandiya mwakuŵa “ŵandanda” pakwachimbichisya ŵane m’litalali soni m’matala gane.—Alo. 12:10; Sef. 3:12.

18. Ligongo chichi akusaka kusyasya kulinandiya kwa Yehofa?

¹⁸ Patukulingalinga kusyasya kulinandiya kwa Atati ŵetu ŵakwinani, ni payichiŵa yangasawusya ŵandu kutugopochela, kuŵa ŵakundilila, soni kuŵa ŵakuwusimana mtima mnope. Nambosoni tuchachimbichisyaga ŵane mpela mwakusatendela Yehofa. Tukumbuchileje kuti patukulingalinga kumŵandichila mnope Mlungu jwetu jwakulinandiya, jwalakwe chachituwona kuŵa ŵakusosekwa mnope.—Yes. 43:4.