NGANI JAKULIJIGANYA 10
NYIMBO NA. 31 Ajendeje ni Mlungu!
Aganisyeje Mpela Yehofa soni Yesu
“Pakuŵa Klistu ŵalasile paŵaliji mundu, jemanjasoni mlikosechelesye kuti mkole nganisyo mpela syaŵakwete jwalakwejo.”—1 PET. 4:1.
CHAKULINGA CHA NGANIJI
Chitulole yaŵalijiganyisye Petulo kutyochela pa yaŵatiga Yesu pakuganisya. Kaneko chitulolesoni yampaka tulijiganye m’weji.
1-2. Ana kumnonyela Yehofa kukusapwatikaposoni chichi, soni ana Yesu jwalosisye chamti uli yindu yeleyi?
“MUMNONYELEJE Yehofa Mlungu jwenu ni mtima wenu wosope, ni umi wenu wosope, ni machili genu gosope soni ni nganisyo syenu syosope.” (Luk. 10:27) Yesu jwasasile kuti lilamusili lyaliji lyakusosekwa mnope mu chilamusi cha Mose. Tukusosekwa kumanyilila kuti chinonyelo chetu pa Yehofa yikusakwaya mtima wetu yayikupwatikaposoni yatukusakumbilaga, yatukusaganisya soni mwatukusapikanila mumtima. Konjechesya pelepa, yikusakwayasoni kulipeleka kwetu ni mtima wosope soni ni machili getu gosope. Nambope kumnonyela kwetu Yehofa kukusapwatikaposoni nganisyo syetu, yayikupwatikapo mwatukusayiwonelaga yindu. Yili yisyene kuti nganituŵa tumanyilile kaganisye kosope ka Yehofa. Nambope mpaka tumanyilile chenene kaganisye ka Yehofa patukulijiganya “nganisyo sya Klistu” ligongo jwalakwejo ni jwakusalosya chenene mwakusaganichisya atati ŵakwe.—1 Akoli. 2:16.
2 Yesu jwamnonyelaga Yehofa ni nganisyo syakwe syosope. Jwalakwe jwamanyililaga chakulinga cha Mlungu pa jwalakwejo soni jwatendaga yindu mwakamulana ni chakulingacho. Jwatesile myoyo atamose kuti kutenda yeleyi kwamtendekasisye kuti asimane ni yakusawusya. Ligongo lyakuti nganisyo syakwe syaliji kutenda yakusasaka Mlungu, Yesu nganakunda kuti chilichose chisokonasye chakulinga chakwecho.
3. Ana ndumetume Petulo jwalijiganyisye chichi kwa Yesu, soni ana Petulo jwalimbikasisye Aklistu achimjakwe kuti atendeje chichi? (1 Petulo 4:1)
3 Petulo nambosoni ŵandumetume achimjakwe ŵakwete upile wakuŵa yimpepe ni Yesu soni kulijiganya mwajwaganichisyaga jwalakwejo. Mwamti muchikalata chakwe chandanda, jwalakwe jwalimbikasisye Aklistu achimjakwe kuti alikosechelesye kola nganisyo mpela syaŵakwete Klistu. (Aŵalanje 1 Petulo 4:1.) Petulo jwakamulichisye masengo maloŵe gakusakamulichisya masengo asilikali ku ngondo gakuti “mlikosechelesye.” Myoyo, naga Aklistu akuganisya mpela Yesu, nikuti chachikombola kukola yida yamachili yakwakamuchisya kulimbana ni kumbila yakusakala soni chilambo cha Satanachi.—2 Akoli. 10:3-5; Aef. 6:12.
4. Ana nganiji chijitukamuchisye chamti uli kukuya yaŵasasile Petulo?
4 Munganiji chitukambilane mwajwaganisyaga Yesu soni chitulole yampaka tujile pakumsyasya jwalakwe. Chitulolesoni yampaka tutende kuti (1) tusyasyeje kaganisye ka Yehofa yampaka yitukamuchisye kuti wosopewe tuganisyeje mwakulandana, (2) tuŵeje ŵakulinandiya soni (3) tumdalileje Yehofa mwakupopela kwa jwalakwe.
TUSYASYEJE KAGANISYE KA YEHOFA
5. Ana ni pandaŵi japi pele Petulo nganalosya kaganisye ka Yehofa?
5 Aganichisye ya ndaŵi jine jele Petulo nganalosya kaganisye ka Yehofa. Yesu jwasalile ŵandumetume ŵakwe kuti akusosekwa kwawula ku Yelusalemu kwele achimlongola ŵa dini chakamkamule, kumlagasya soni kaneko kumwulaga. (Mat. 16:21) Petulo nganajitichisya kuti Yehofa mpaka amkunde Yesu juŵaliji chembecheyo cha Ayisalayeli soni Mesiya kuti awulajidwe. (Mat. 16:16) Myoyo, Petulo jwamjigalile Yesu pambali ni kutanda kumsalila kuti, “Alitendele chanasa Ambuje. Akakunda kose kuti yeleyi yatendechele.” (Mat. 16:22) Yesu soni Petulo nganakamulana panganiji ligongo lyakuti Petulo nganalosya mwajwaganichisyaga Yehofa.
6. Ana Yesu jwalosisye chamti uli kuti jwaganisyaga mpela Yehofa?
6 Yesu jwaganisyaga ndendende mpela Atatigwe ŵakwinani. Yesu jwamsalile Petulo kuti “Mjawule kunyuma kwangu, Satana! Mmwe mli chindu chakunguŵasya, ligongo nganisyo syenu nganisiŵa syakutyochela kwa Mlungu nambo kwa ŵandu.” (Mat. 16:23) Yesu jwayimanyi kuti naga akutenda yaŵasakaga Mlungu nikuti chasimane ni yakusawusya soni chawe. Myoyo, jwalakwe jwakanile kupikanila yaŵamsalile Petulo atamose kuti Petulojo jwawonekaga kuti akusaka kumkamuchisya. Pelepa Petulo jwalijiganyisye kuti akusosekwa kuganisyaga mpela Yehofa, mwamti wosopewe tukusosekwa kutendaga yeleyi.
7. Ana pali papite ndaŵi, Petulo jwalosisye chamti uli kuti jwasosekwaga kuchenga kaganisye kakwe kuti kalandaneje ni kaganisye ka Yehofa? (Alole chiwulili cha pachikuto.)
7 Kaneko Petulo jwalosisye kuti akusaka aganisyeje mpela mwakusaganichisyaga Yehofa. Jeleji jaliji ndaŵi jele Yehofa jwakundile ŵandu ŵangawumbala kuti aŵesoni mugulu ja ŵandu ŵakwe. Mwamti pandaŵiji Petulo jwasalilidwe kuti akamlalichile mundu jwa mtundu wine lina lyakwe Koneliyo. Jwalakweju jwaliji mugulu ja ŵandu ŵa mitundu jine ŵaŵaliji ŵandanda kuŵa Aklistu. Ayuda nganatendaga yindu ni ŵandu ŵa mitundu jine, mwamti nganiyiŵa yakusimonjesya kuti Petulo jwasosekwaga kumkamuchisya kuti akombole kutenda utumiki wakwewu. Myoyo, Petulo pajwamanyilie chakulinga cha Mlungu panganiji jwalakwe jwachenjile mwajwayiwonelaga yindu. Yakuyichisya yakwe, Koneliyo paŵamŵendile Petulo kuti ajawule kumangwakwe, jwalakwe jwapite “mwangakayichila.” (Mase. 10:28, 29) Jwalakwe jwamlalichile Koneliyo soni ŵamwiŵasa mwakwe mwamti ŵabatisidwe.—Mase 10:21-23, 34, 35, 44-48.
Petulo akwinjila m’nyumba ja Koneliyo (Alole ndime 7)
8. Ana mpaka tulosye chamti uli kuti kaganisye ketu kali kakukamulana ni kaganisye ka Yehofa? (1 Petulo 3:8 soni maloŵe ga mwiŵanda.)
8 Pali papite yaka, Petulo jwalimbikasisye Aklistu achimjakwe kuti ‘aganisyeje mwakulandana.’ (Aŵalanje 1 Petulo 3:8, soni maloŵe ga mwiŵanda.) Mpela ŵakutumichila ŵa Mlungu, mpaka tuganisyeje mwakulandana naga tukulosya kaganisye ka Yehofa katukusalijiganya m’maloŵe gakwe. Mwachisyasyo, Yesu jwasalile ŵakumkuya ŵakwe kuti aŵicheje yindu ya uchimwene pamalo gandanda. (Mat. 6:33) Patukuganichisya mfundoji, tuwanichisye kuti mumpingo mwetu jwakulalichila jwine asagwile kulemba ma fomu gakuwuchisya utumiki wa ndaŵi syosope. Myoyo, mmalo mwakuŵecheta yangamlimbikasya, tukusosekwa kumsalilaga ya maumbone gampaka apate soni tukusosekwa kumkamuchisya kuti akombole kukwanilisya yakulinga yakweyo.
AŴEJE ŴAKULINANDIYA
9-10. Ana Yesu jwalosisye chamti uli kuti jwaliji jwakulinandiya mnope?
9 Pa chilo chakumalisya chakuti malaŵi gakwe Yesu chawulajidwe, jwalakwe ŵamsalile Petulo ni ŵandumetume ŵane kusosekwa kwakuŵa ŵakulinandiya. Yesu ŵaliji ali amtumile Petulo ni Yohane kuti akalinganye malo soni yakusosechela ni chakulinga chakuti akalile yimpepe ni jemanjajo mkanaŵe kuwulajidwa. Yakosechelayi yapwatikagapo kupata libeseni ni chakulipukutila kuti ŵandu ŵachakasimanikwewo akachape sajo syawo mkanalye chakulyachi. Nambo ana mundu jwapi juŵasosekwaga kukamula masengo gakuwoneka kuŵa gakutulukaga?
10 Yesu jwalosisye mtima wakulinandiya mwakukamula masengoga. Ŵandumetume ŵakwe ŵasimonjile mnope kumwona jwalakwe ali mkukamula masengo gagasosekwaga kukamulidwa ni kapolo. Yesu jwawusile malaja gakwe gakusa, kaneko jwataŵilile tawulo mchiwunu mwakwe soni jwaŵisile mesi mwibeseni ni kutanda kuchapa sajo sya ŵakulijiganyawo. (Yoh. 13:4, 5) Komboleka kuti yeleyi yamjigalile kandaŵi nditu kuti amalisye kuchapa sajo sya ŵandumetume 12 kupwatikapo Yudasi juŵaliji jwakuti champeleche jwalakwe. Nambope mwakulinandiya, Yesu jwamalisisye masengoga. Kaneko mwakuwusimana mtima Yesu jwatite, “Ana mkuyipikanichisya yindu yandesile kwa jemanjayi? Jemanja mkusangolanga une kuti ‘Mwalimu’ soni ‘Ambuje,’ yili yakuwona, pakuŵa ndili myoyo. Myoyo naga une, jwandili Ambuje soni Mwalimu, njapile sajo syenu, jwalijose jwa jemanja akusosekwasoni kuchapa sajo sya mjakwe.”—Yoh. 13:12-14.
Kulinandiya kusyesyene kukusapwatika . . . mwatukusaliwonela m’weji soni achimjetu
11. Ana Petulo jwalosisye chamti uli kuti jwalijiganyisye kuŵa jwakulinandiya? (1 Petulo 5:5) (Alole chiwulili.)
11 Petulo jwalijiganyisye kulinandiya kutyochela kwa Yesu. Panyuma pakuti Yesu awujile kwinani, Petulo jwatesile chakusimonjesya mwakumposya jwamlume jwine juŵapagwile ali jwamlemale. (Mase. 1:8, 9; 3:2, 6-8) Ŵandu ŵajinji ŵatesile chidwi ni chakusimonjesyachi mwamti ŵawutuchile kukulola. (Mase. 3:11) Nambo Petulo nganasaka kulipatila uchimbichimbi pachakutendekwachi atamose kuti jwakulile ku dela jele ŵandu ŵakwe ŵanonyelaga kulipatila uchimbichimbi. Mwakulinandiya Petulo jwakanile uchimbichimbiwu. Jwalakwe jwapeleche uchimbichimbi wosope kwa Yehofa ni Yesu mwakusala kuti, “Myoyo kupitila m’lina lya Yesu, soni mwa chikulupi chetu pa lina lyakwelyo, ngongolo sya mundu jwamkumwona soni kummanyililaju silimbangene.” (Mase. 3:12-16) Maloŵe gaŵakamulichisye masengo Petulo m’chikalata chakwe chakwawula kwa Aklistu pajwalondesyaga ya kulinandiya gakusatukumbusya yaŵatesile Yesu pakutaŵilila tawulo mchiwunu mwakwe ni kuchapa sajo sya ŵandumetume ŵakwe.—Aŵalanje 1 Petulo 5:5.
Panyuma pakuti Petulo atesile chakusimonjesya, jwalakwe mwakulinandiya akupeleka uchimbichimbi kwa Yehofa soni Yesu. M’wejisoni mpaka tulosye kulinandiya mwakutenda yindu yambone mwangajembecheya kuti tumanyiche kapena kupochela kanekakwe (Alole ndime 11-12)
12. Mwakulandana ni Petulo, ana mpaka tupitilisye chamti uli kulosya ndamo jakulinandiya?
12 Mpaka tujigalile chisyasyo cha Petulo chakuŵa ŵakulinandiya. Akumbuchileje kuti kulinandiya kusyesyene kukusapwatika yejinji kupunda pagamba kuŵecheta maloŵe gakuŵajilwa. Maloŵe gaŵakamulichisye masengo Petulo pakusala ya “kulinandiya” gakusapwatika mwatukusaliwonela m’weji soni achimjetu. Tukusitwatumichila ŵane ligongo lyakumnonyela Yehofa soni ŵandu, ngaŵa kuti ŵane atukumbileje ligongo lyakutenda yeleyi. Myoyo, mpaka tulosye kuti tuli ŵakulinandiya naga tukusasangalala patukumtumichila Yehofa soni pakwatumichila Aklistu achimjetu atamose kuti ŵane ngakuyiwona yatukutendayo.—Mat. 6:1-4.
AŴEJE “ŴAGANISYA CHENENE”
13. Ana kuŵa “ŵaganisya chenene” kukusapwatikapo chichi?
13 Ana kuŵa “ŵaganisya chenene” kukusapwatikapo chichi? (1 Pet. 4:7) Mklistu jwakusaganisya chenene akusatenda yakomboleka kuti yakusagula yakwe yilosyeje mwakusaganichisya Yehofa. Mklistu jweleju akusamanyilila kuti paumi wakwe pangali chindu chakusosekwa mnope kupunda unasi wakwe ni Yehofa. Akusaliwonagasoni mwakuŵajilwa soni akusamanyilila kuti nganaŵa akombwele kumanyilila chilichose. Nambosoni akusalosya kuti akusamdalila Yehofa mwakupopela kwa jwalakwejo ndaŵi syosope.a
14. Ana ni pandaŵi japi jele Petulo jwalepele kumdalila Yehofa?
14 Chilo chakumalisya chakuti Yesu chawulajidwe, jwalakwe jwasalile ŵakulijiganya ŵakwe kuti, “Wosopemwe chimundile ligongo lya yindu yachiyindendechele chilo chinochino.” Nambo Petulo jwajanjile mwakulimba mtima kuti, “Atamose wosopeŵa ali ŵatisile ligongo lya yindu yachiyatendechele wawojo, nambo une nganimba natisile!” Chilo chelechi, Yesu jwasalile ŵane mwa ŵakulijiganya ŵakwe kuti: “Mŵe mesope soni mpitilisye kupopela.” (Mat. 26:31, 33, 41) Yikaŵe kuti Petulo jwakamulichisye masengo yajwasasile Yesuyi, nikuti akalimbile mtima kuŵecheta kuti jwaliji jwakulijiganya jwa Yesu. Nambo Petulo jwakanile Ambuje ŵakwe yayatendekasisye kuti alijimbeje magambo.—Mat. 26:69-75.
15. Ana Yesu jwalosisye chamti uli kuti jwaliji jwaganisya chenene pa chilo chakwe chakumalisya kuŵa pachilambopa?
15 Yesu jwamdalilaga mnope Yehofa. Atamose kuti Yesu jwaliji jwamlama, nambo jwalakwe jwapopelaga mwakuwilisyawilisya. Mwamti yeleyo ni yayamkamuchisyaga kuti atendeje yindu mwakamulana ni chakulinga cha Yehofa. (Mat. 26:39, 42, 44; Yoh. 18:4, 5) Kusala yisyene, Petulo nganaliŵalila yakuti Yesu pa chilo chakwe chakumalisya jwapopesile kwa maulendo gejinji.
16. Ana Petulo jwalosisye chamti uli kuti jwatandite kutenda yindu mwaganisya chenene? (1 Petulo 4:7)
16 Pali papite ndaŵi, Petulo jwatandite kumdalila mnope Yehofa mwakupopela kwa jwalakwe. Yesu pajwajimwiche ku chiwa, jwamsimichisye Petulo pampepe ni ŵandumetume achimjakwe kuti chachipochela msimu weswela wawuchakamuchisya kukwanilisya masengo gawo gakulalichila. Nambope, Yesu jwasalile kuti akusosekwa kuŵa kaje ku Yelusalemu mpaka yeleyi yili yitendekwe. (Luk. 24:49; Mase. 1:4, 5) Ana Petulo jwatendaga chichi pajwajembecheyaga ndaŵi jeleji? Petulo soni Aklistu achimjakwe “ŵaliji mkupopela pampepe.” (Mase. 1:13, 14) Pali papite ndaŵi, mu chikalata chakwe chandanda, Petulo jwalimbikasisye Aklistu achimjakwe kuti aŵeje ŵaganisya chenene soni kuti amdalileje Yehofa mwakupopela kwa jwalakwe. (Aŵalanje 1 Petulo 4:7.) Myoyo, Petulo jwalijiganyisye kumdalila Yehofa, mwamti jwaŵele jwakudalilichika mu mpingo.—Agal. 2:9.
17. Atamose tukusakombola kutenda yindu yine, ana tukusasosekwa kupitilisya kutenda chichi? (Alolesoni chiwulili.)
17 Kuti tuŵe ŵaganisya chenene tukusasosekwa kupopela kwa Yehofa ndaŵi syosope. Tukusamanyilila kuti tukusosekwa kupopelaga ndaŵi syosope kwa Yehofa atamose pa yindu yatukuyiwona kuti mpaka tuyikombole kutenda mwajika jetu. Myoyo, patukusagula yindu yakusosekwa mnope tukusosekwa kupopela kwa Yehofa kuti atulongolele. Tukusatenda yeleyi tuli tukwete chikulupi chakuti jwalakwejo ni jwakumanyilila yayili yakusosekwa mnope kwa m’weji.
Petulo jwalijiganyisye kumdalila Yehofa mwakupopela. M’wejisoni mpaka tuŵe ŵaganisya chenene mwakupopela kwa Yehofa kuti atukamuchisye, mnopemnope patukusaka kusagula yindu yakusosekwa mnope (Alole ndime 17)b
18. Ana mpaka tutende uli kuti tuganisyeje mpela Yehofa?
18 Tukuyamichila mnope ligongo lyakuti Yehofa jwatupanganyisye kuti tukomboleje kulosya ndamo syakwe. (Gen. 1:26) Atamose yili myoyo, nganituŵa tumsyasisye Yehofa mwangalemwesya chilichose. (Yes. 55:9) Nambope, mwakulandana ni Petulo, mpaka tukombole kuganisya mpela mwakusatendela Yehofa. Yeleyitu mpaka tuyikombole mwakupitilisya kusyasya kaganisye ka Mlungu, mwakuŵa ŵakulinandiya, soni ŵaganisya chenene.
NYIMBO NA. 30 Atati Ŵangu, Mlungu Jwangu Soni Mjangu
a Kuti amanyilile yejinji pa ngopolelo ja maloŵe gakuti kuganisya chenene kapena kuŵa jwakulimba mwausimu, alole pa jw.org kapena pa JW Library® app ngani ja Chichewa jakuti “Kufotokoza Mavesi a m’Baibulo” pa “2 Timoteyo 1:7—pa mtwe wakuti ‘Mulungu Sanatipatse Mzimu wa Mantha,’” pa mfundo jakuti “Kuganiza bwino.”
b KULONDESYA CHIWULILI Chapachikuto: Mlongo akupopela chamumtima pakwembecheya mayeso gakuwuchisya masengo.