Yampaka Atende Kuti Asangalalejepe Pakwasamalila Ŵakulwala Kapena Ŵakalambale

1-2. Ana Yehofa akusapikana uli wawojo pakumsamalila jwakunonyelwa jwawo jwamkalambale kapena jwakulwala? (Misyungu 19:17) (Alolesoni yiwulili.)

M’BALE jwine jwa ku Korea lina lyakwe Jin-yeol jwasasile kuti, “Une ni ŵamkwangu tutemi mu ulombela kwa yaka yakupunda 32. Kwa yaka 5 yipiteyo, ŵamkwanguŵa aŵele ali mkulwala mnope mwamti unejo ni jungusinasamalilaga. Ŵamkwanguŵa akusalwala ulwele wa mu ututu wawukusiwalepelekasya kwenda. Atamose yili myoyo ngusinanonyela mnope ŵamkwanguŵa soni ngusasangalala pangwasamalila. Mwamti chilo chilichose akusagona pa bedi jakulekangana ni ma bedi gane. Une ngusagona chiŵandika ni ŵamkwanguŵa ni tukusakamulana mkono patukugona.”

² Ana wawojo akumsamalila mundu jwinejwakwe jwakusamnonyela, mpela nangolo jwawo, ŵamkwawo, mwanache jwawo kapena mjawo? Naga yili myoyo, ngatukukayichila kuti akusayamichila upile wakwasamalila jemanjaji ligongo lyakuti akusiŵanonyela. Soni pakumsamalila jwakunonyelwa jwawo akusalosya kuti akusamnonyela mnope Yehofa. (1 Tim. 5:​4, 8; Yak. 1:27) Nambope, pakutenda yeleyi akusasimana ni yakusawusya yele ŵandu ŵane ngakusayimanyilila. Mwamti ndaŵi sine mpaka alipikaneje kuti wawojo jika ni ŵakusimana ni yakusawusya. Ŵandu mpaka ŵawoneje wawojo kuti akusangalala. Nambo jemanjajo ngakusamanyilila kuti ndaŵi sine wawojo akusadandawulaga. (Sal. 6:6) Atamose kuti ŵandu ŵane nganaŵa amanyilile yakusawusya yakusimana nayo, nambo Yehofa akusamanyilila. (Alole pa Ekisodo 3:7.) Mwamti misosi soni kulipeleka kwawo yili yakusosekwa mnope kwa Mlungu. (Sal. 56:8; 126:5) Jwalakwe akusamanyilila chilichose chakusatenda pakumsamalila jwakunonyelwa jwawo. Nambosoni akusayamichila mnope soni akusasala kuti chachawupa pa yindu yambone yakusatenda.—Aŵalanje Misyungu 19:17.

3. Ana ni yakusawusya yapi yiŵasimene nayo Abulahamu ni Sala piŵasamalilaga baba ŵawo?

³ M’Baibulo mwana ngani syejinji syasikusasala ya achalume ni achakongwe ŵaŵasamalilaga mundu jwamkalambale kapena jwakulwala. Mwachisyasyo, aganichisye ya Abulahamu ni Sala. Jemanjaji paŵatyosile ku Uli, baba ŵawo lina lyawo Tela, ŵakwete yaka chiŵandika 200. Nambope ŵajigele pa ulendowu. Jemanjaji kuti akayiche ku Halana ŵajesile ulendo wa makilomita 960. (Gen. 11:​31, 32) Mwangakayichila, Abulahamu ni Sala ŵanonyelaga mnope baba ŵawoŵa. Nambo agambe ganichisya yakusawusya yiŵasimanaga nayo paŵakamuchisyaga baba ŵawoŵa pandaŵi jiŵaliji paulendowu. Komboleka kuti jemanjaji ŵajesile pa ngamila kapena pa bulu yiyaliji yakusawusya mnope kwa Tela ligongo lya uchekulu. Yili yachimanyichile kuti ndaŵi sine jemanjaji ŵapelaga mnope. Mulimose muyaŵelelemo, nambope Yehofa ŵapaga jemanjaji machili gaŵasosechelaga. Mpela muŵatendele Yehofa pakumkamuchisya Abulahamu ni Sala, wawojosoni mpaka ŵakamuchisye.—Sal. 55:22.

4. Ana mungani ajino chitukambilane chichi?

⁴ Kuŵa ŵakusangalala mpaka kwakamuchisye kupilila pandaŵi jakumsamalila jwakunonyelwa jwawo jwamkalambale kapena jwakulwala. (Mis. 15:13) Mundu jwakusangalala mpaka apitilisye kuŵa jwakusangalala mwangasamala kandu ni mwayiŵelele yindu paumi wakwe. (Yak. 1:​2, 3) Ana mpaka atende uli kuti akusye ndamo jakusangalalaji? Litala limo lili kumdalila Yehofa soni kumŵenda jwalakwe kuti ŵakamuchisyeje kukola ndamo syambone. Mungani ajino chitukambilane yindu yine yakonjechesya yampaka atende mundu jwakusamsamalila jwamkalambale kapena jwakulwala kuti apitilisyeje kuŵa jwakusangalala. Chitukambilanesoni yampaka atende ŵane pakwakamuchisya jemanjajo. Chandanda, chitukambilane ligongo lyakwe akusosekwa kupitilisya kuŵa ŵakusangalala pakumsamalila jwakunonyelwa jwawo. Soni chitukambilane ligongo lyakwe kutenda yeleyi mpaka kuŵe kwakusawusya.

LIGONGO LYAKWE MPAKA YIŴE YAKUSAWUSYA KUSANGALALAGA PATUKUMSAMALILA MUNDU JWINE

5. Ligongo chichi ŵakusiŵasamalilaga ŵane akusosekwa kupitilisya kuŵa ŵakusangalala?

⁵ Naga ŵandu ŵakusiŵasamalila ŵakunonyelwa ŵawo ngakuŵa ŵakusangalala, mpaka awujile munyuma. (Mis. 24:10) Nambosoni jemanjaji pawujile munyuma, mpaka yiŵeje yakusawusya kwakamuchisya mwachinonyelo ŵandu ŵakwasamalilawo. Ana ni yakusawusya yapi yampaka yatendekasye jemanjaji ngasangalala?

6. Ligongo chichi ŵandu ŵakusiŵasamalilaga ŵane mpaka apeleje mnope?

⁶ Ŵandu Ŵakusiŵasamalila ŵane mpaka apeleje mnope. Mlongo jwine lina lyakwe Leah jwatite, “Kwasamalila ŵane kukusaŵaga kwakulagasya nganisyo atamose yiŵe kuti lisiku lyelelyo yindu yili chenene. Lisiku palikumala ngusaŵa kuti mbesile mnope. Ndaŵi sine ngangusakola machili gakuti mpaka njanje mautenga.” Ŵandu ŵane yikusaŵaga yakusawusya kuti apate ndaŵi jakugona mwakwanila kapena kupata ndaŵi jakupumula. Mlongo jwine lina lyakwe Inés jwatite, “Ngusalaga kuti nalupate lugono. Ndaŵi syejinji chilo, kwa maawala gaŵili galigose ngusajimukaga kuti nasamalile akwegwe ŵangu. Mwamti kwa yaka yejinji une ni ŵamkwangu nganitujawuleje kwinekwakwe kukupumula.” Ŵandu ŵane ŵakusiŵasamalila ŵane akusasosekwa kunandiya ndaŵi jakusamalila pakukunguluka ni achimjawo soni jakutendela mautumiki gane m’gulu ja Yehofa ligongo lyakuti jwakunonyelwa jwawo akusosekwa kumsamalila ndaŵi syosope. Yakuyichisya yakwe jemanjaji mpaka atendeje lipowo ligongo lya kuchenga kwa yindu paumi wawo.

7. Ligongo chichi ŵandu ŵane ŵakusiŵasamalilaga ŵakunonyelwa ŵawo akusalijimba magambo soni kuŵa ŵachanasa?

⁷ Ŵandu ŵakusiŵasamalila ŵane mpaka alijimbeje magambo soni kuŵa ŵachanasa. Mlongo jwine lina lyakwe Jessica jwatite, “Ngusalaga ligongo lyakuti ngusalepela kutenda yindu yine. Pangumalila ndaŵi ndili mkulisamalila jika, ngusalijimba magambo soni ngusalipikana kuti ndili jwakulinonyela.” Ŵandu ŵane ŵakusiŵasamalila ŵakunonyelwa ŵawo akusalijimbaga magambo ligongo lya mwayiŵelele yindu paumi wawo. Ŵandu ŵane akusadandawulaga paganisya kuti ngakutenda yejinji pakumkamuchisya jwakunonyelwa jwawo. Nambosoni ŵane akusalijimbaga magambo ligongo lyakuti pandaŵi jine ali atumbile ŵaŵechete yindu yayamtumbilikasisye mundu juŵamsamalilagajo. (Yak. 3:2) Ŵandu ŵane mpaka adandawuleje ligongo lyakumwona mundu jwakumsamalilajo ulwele wakwe uli mkupitilisya kukula. Mlongo jwine lina lyakwe Barbara jwatite, “Chakusawusya chekulungwa kwa une chili kuwuwona ulwele wa mundu jwangusamnonyela uli mkukulilakulila lisiku lililyose.”

8. Asale chisyasyo chakulosya yampaka yijile pakwakwaya ŵandu ŵakusiŵasamalila ŵakulwala kapena ŵakalambale pakusalilidwa maloŵe gakuyamichila.

⁸ Ŵandu ŵane ŵakusiŵasamalilaga ŵane akusayiwona kuti ngakuyamichilidwa. Ligongo chichi akusayiwonaga myoyo? Ligongo lyakuti jemanjaji ngakusayamichilidwaga kaŵilikaŵili pamasengo gakusakamula mwakulimbichila soni mwakulijima. Atamose gamba kuŵecheta maloŵe gamnonope gakulosya kuyamichila mpaka gaŵe gakulimbikasya mnope. (1 Ates. 5:18) Mlongo jwine lina lyakwe Melissa jwatite, “Ndaŵi sine pandengwiche ngusakoposya misosi. Nambo ŵandu ŵangusinasamalilaga pasalile maloŵe gakuti, ‘Sikomo pa chilichose chimkusandendela,’ ngusasangalala mnope. Maloŵe gakulimbikasya gelega gakusangamuchisya kuti lisiku lyakuyichisya mbeje jwakoseka soni jwakusachilila kwasamalilasoni jemanjajo.” M’bale jwine lina lyakwe Amadu jwasasile yayikusati pakumkwaya pandaŵi jele mundu jwine akumyamichila. Jwalakwe ni ŵamkwakwe akusamsamalila msuwani jwawo jwakusalwala ulwele wekulungwa. Jwalakwe jwatite, “Atamose yili mkuti jwalakwe nganaŵa apikanichisye chenene kulipeleka ni mtima wosope kwatukusatenda pakumsamalila, uneji ngusasangalalaga jwalakwe pakulosya kuyamichila kapena pagambile kuŵecheta kuti ‘Ngusinanonyela.’”

YAMPAKA ATENDE KUTI APITILISYEJEPE KUSANGALALA

9. Ana mundu jwakusiŵasamalila ŵakulwala kapena ŵakalambale mpaka alosye chamti uli kulinandiya?

⁹ Aŵeje ŵakulinandiya. (Mis. 11:2) Wosopewe ngatukusakola ndaŵi kapena machili gakutendela chilichose chatukusaka. Myoyo mpaka asagule kutenda yindu yampaka akombole soni ndaŵi sine mpaka asosekwe kukana kutenda yindu yine. Sonitu kutenda yeleyi nganikuŵa kulemwa. Ligongo mpaka yilosye kuti ali ŵakulinandiya. Naga ŵane akusaka kwakamuchisya, ngakusosekwa kukana. M’bale jwine lina lyakwe Jay jwatite, “Mpaka tukombole kutenda yindu mwakamulana ni maawala gatukusakola pa lisiku. Myoyo, kumanyilila kuti tukwete malile gakutendela yindu ni kulingalingaga kuti tukapeleta malilego, mpaka yitukamuchisye kuŵaga ŵakusangalala.”

10. Ligongo chichi ŵakusiŵasamalila ŵakulwala soni ŵakalambale akusasosekwa kuŵa ŵakupikanichisya yindu? (Misyungu 19:11)

¹⁰ Aŵeje ŵakupikanichisya yindu. (Aŵalanje Misyungu 19:11.) Kupikanichisya yindu kuchakamuchisya kuti atendeje yindu mwakuwusimana mtima atamose ŵane paŵatumbilikasisye. Mundu jwakupikanichisya yindu akusamanyilila ligongo lyakwe mundu jwine atesile yindu m’litala linelyakwe. Maulwele gane gakusamtendekasya mundu kutenda yindu yele ngamkanatenda yikaŵe kuti ali chenene. (Jwak. 7:7) Mwachisyasyo, mundu juŵaŵechetaga mwachinonyelo soni mwakwaganichisya, mpaka atande kutenda yindu yakangana ni wawojo. Kapena mpaka agambeje kutamila kudandawula mnope kapena gambaga kutumbila ni yiliyose. Myoyo, naga akumsamalila mundu jwakwete ulwele wekulungwa, mpaka asosekwe kumanyilila yejinji yakwamba ulwele wakwewo. Mwamti pawumanyilile chenene ulwele wakwewo, ni pampakasoni yiŵe yangasawusya kupikanichisya mwakutendela yindu jwakulwalajo.—Mis. 14:29.

11. Ana ŵakusiŵasamalila ŵakulwala kapena ŵakalambale akusasosekwa kutenda yindu yapi lisiku lililyose yayili yakusosekwa mnope? (Salimo 132:​4, 5)

¹¹ Apateje ndaŵi jakulimbisya unasi wawo ni Yehofa. Kwa kandaŵi kamnono, mpaka asosekwe kuleka kaje kukamula masengo gane ni chakulinga chakuti atende yindu “yayili yakusosekwa mnope.” (Afil. 1:10) Chimo mwa yindu yakusosekwa mnopeyi chili kulimbisya unasi wawo ni Yehofa. Mwamti nombe najo Mwenye Daudi jwakuwonaga kumtumichila Yehofa kuŵa kwakusosekwa mnope. (Aŵalanje Salimo 132:​4, 5.) Mwakulandanamo, yili yakusosekwa mnope kuti wawojosoni apateje ndaŵi ja kuŵalanga Baibulo soni kupopela lisiku lililyose. Mlongo jwine lina lyakwe Elisha jwatite, “Chachikusangamuchisya kuŵa jwakusangalala chili kupopela soni kuganichisya mnope nyimbo syakulimbikasya syasili m’buku ja Masalimo. Mwamti kupopela kwa Yehofa ni kwakukusangamuchisya mnope. Pa lisiku ngusapopela kwa maulendo gejinji kuti ngole mtendele wa mumtima.”

12. Ligongo chichi ŵandu ŵakusiŵasamalila ŵakulwala kapena ŵakalambale akusasosekwa kupataga ndaŵi jakuchisamalila chilu chawo?

¹² Apateje ndaŵi jakuchisamalila chilu chawo. Ŵandu ŵakusatanganidwaga mpela ŵele ŵakusiŵasamalila ŵakulwala kapena ŵakalambale, mpaka yasawusyeje kuti achisamalileje chilu chawo. Yili myoyo ligongo lyakuti akusakola ndaŵi jamnono jakuti akasume yakulya yambone soni yakamuchisya mchilu. Nambo kulya yakulya ya magulu soni kutenda masewela gakulimbisya chilu mpaka kwakamuchisye kuti akole chilu chambone soni kuti aganisyeje chenene. Myoyo, akusosekwa akamulichisyeje masengo kandaŵi kamnono kakusapatako pakulya yakulya yakamuchisya kola chilu chambone soni kutenda masewela gakulimbisya chilu. (Aef. 5:​15, 16) Konjechesya pelepa, agoneje mwakwanila. (Jwak. 4:6) Ŵandu ŵaŵalijiganyisye yakwamba ututu akusasala kuti kugona kukusakamuchisya kuti yakunyalaya yayikusaŵa mu ututu yityoche. Buku jine jakusala ya chipatala jasasile kuti kugona mwakwanila mpaka kunandiye kulagasika nganisyo soni mpaka kukamuchisye kuti mtima uŵeje mmalo atamose patusimene ni yakusawusya yekulungwa. Apatejesoni ndaŵi jakutenda yakusangalasya. (Jwak. 8:15) Mundu jwine jwakusamsamalila mundu jwakulwala jwasasile yindu yayikusamkamuchisya kuŵa jwakusangalala. Jwalakwe jwatite, “Nyengo pajili chenene, ngusakopoka pasa ni kotelaga lyuŵa. Mwamti kamo pa mwesi, ngusalinganya ya kuja kusangalala kwinekwakwe ni mjangu.”

13. Ligongo chichi kuseka kuli kwakamuchisya? (Misyungu 17:22)

¹³ Akaliŵalilaga kuseka. (Aŵalanje Misyungu 17:22; Jwak. 3:​1, 4) Kuseka kuli kwakamuchisya mnope kuti akole chilu chambone soni kuti aganisyeje chenene. Pakumsamalila mundu jwine, yindu mpaka yitendekwe m’litala lya kulekangana ni mwasachileje wawojo. Nambo naga agamba kuseka ni yindu yayitendekweyo, yichakamuchisya kuti akalagasikaga mnope nganisyo. Nambosoni, kuseka ni mundu jwakumsamalilajo kuchakamuchisya kuti akamulaneje mnope.

14. Ana kumsalila mjawo jwakusamdalila mwakupikanila mpaka kwakamuchisye chamti uli?

¹⁴ Amsalileje mjawo jwakusamdalila mwakupikanila. Atamose ali mkutenda yakomboleka kuti asangalaleje, ndaŵi sine mpaka adandawuleje. Pa ndaŵi mpela syelesi, mpaka asosekwe kumsalila mwakupikanila mjawo jwambone jwanganaŵa ŵatengwisye wawojo. (Mis. 17:17) Kwapikanila chenene pakuŵecheta soni maloŵe gakulimbikasya gampaka ŵasalile mjawojo komboleka ni yampaka yakamuchisye kuti apitilisye kuŵa ŵakusangalala.—Mis. 12:25.

15. Ana kuganichisya mnope ya chembecheyo chakwete mpaka kwakamuchisye chamti uli kuŵa ŵakusangalala?

¹⁵ Aliwanichisyeje ali mpaladaiso yimpepe ni ŵachinasi wawo. Akumbuchileje kuti masengo gakwasamalila ŵakulwala kapena ŵakalambale gali gakandaŵi, soni Mlungu nganiŵapanganya ŵandu kuti akamuleje masengoga. (2 Akoli. 4:​16-18) Nambo “umi usyesyene” ukwika sampano. (1 Tim. 6:19) Myoyo pakupata ndaŵi jakukambilana ni ŵachinasi wawo yindu yachachitenda mpaladaiso, mpaka yakamuchisye kuŵa ŵakusangalala. (Yes. 33:24; 65:21) Mlongo jwine lina lyakwe Heather jwatite, “Ngusanonyela kwasalila ŵandu ŵangusinasamamalilaga kuti pachangakaŵa tuchitotaga yimpepe, kuwutuka yimpepe, soni kukwela njinga yimpepe. Ngusinasalilasoni kuti tuchilinganya buledi soni kuteleka yakulya kuti chalye ŵachinasi ŵetu ŵachachijimuka. Mwamti wosopewe, tukusamyamichila Yehofa ligongo lyakutupa chembecheyo.”

YAMPAKA ATENDE ŴANE PAKWAKAMUCHISYA

16. Ana mpaka tumkamuchisye chamti uli mundu jwakusiŵasamalila ŵakulwala kapena ŵakalambale mumpingo mwetu? (Alolesoni chiwulili.)

¹⁶ Ŵakamuchisyeje ŵakusiŵasamalila ŵakulwala kapena ŵakalambale kupata ndaŵi jakupumula. Wosope ŵene mumpingo mpaka twakamuchisye jemanjaji kwasamalila ŵachinasi ŵawo. Yakuyichisya yakwe, mpaka twakamuchisye ŵandu ŵakusiŵasamalila ŵaneŵa kupata ndaŵi jakupumula soni jakutenda yindu yine pajika. (Agal. 6:2) Mwamti abale ni alongo ŵane wiki jilijose akusakola ndandanda kuti amanyilileje mundu juchakakamuchisye nawo pambali jeleji. Mlongo jwine lina lyakwe Natalya, jwelesoni akusiŵasamalila ŵamkwakwe ŵangakusakombolaga kwenda jwatite, “M’bale jumo jwa mumpingo mwetu akusayika kamo kapena kaŵili pa wiki kukunguluka ni ŵamkwangu. Akusalalichila yimpepe, kukunguluka yimpepe, soni pane kulolela fidiyo yimpepe. Ndaŵi jeleji jikusaŵaga jakusangalasya mnope kwa ŵamkwangu soni yikusambaga mpata wakutenda yindu yine pajika mpela kwawula kukwenda.” Mwamti pane, mpaka asagule yakuti akagone yimpepe ni mundu jwakusamalidwajo ni chakulinga chakuti mundu jwakwete udindo wakumsamalila mundujo agone mwakwanila.

17. Ana mpaka twakamuchisye chamti uli ŵandu ŵakusasamalila ŵakalambale kapena ŵakulwala pandaŵi ja misongano?

¹⁷ Ŵakamuchisyeje ŵakusiŵasamalila ŵakulwala kapena ŵakalambale pali pamisongano. Ŵandu ŵakusiŵasamalilaga ŵakulwala kapena ŵakalambale yindu jejinji mpaka yapiteje pali pa misongano ja mpingo, ja dela soni ja chigawo ligongo akusatanganidwa kwasamalila ŵachinasi ŵawo. Myoyo ŵandu ŵa mumpingomo mpaka ŵakamuchisye jemanjaji mwakutama yimpepe ni ŵachinasi ŵawowo pa msongano wosope kapena kwa ka ndaŵi kanekakwe. Naga mundu jwakusamalidwajo jwangatyoka panyumba, mpaka alipeleche kuti akatende misongano jakwambula ni mundujo ni chakulinga chakuti jwakusakamula masengoga ajawule kukutendela ku mpingo.

18. Ana mpaka twatendelesoni chichi ŵandu ŵakusiŵasamalila ŵakalambale kapena ŵakulwala?

¹⁸ Ŵayamichileje ŵakusiŵasamalila ŵakulwala kapena ŵakalambale soni ŵapopeleleje. Achakulungwa ŵa mumpingo akusosekwa kupataga ndaŵi jakwalimbikasya ŵandu ŵakusiŵasamalila ŵakalambale kapena ŵakulwala. (Mis. 27:23) Nambosoni mwangasamala kandu kuti tukusimana ni yamti uli, ŵandu wosope mumpingo mpaka ŵayamichileje jemanjaji pa masengo gakusakamula. Mpaka twapopelelejesoni jemanjaji kuti Yehofa apitilisye kwalimbisya soni kwakamuchisya kuti asangalalajepe.—2 Akoli. 1:11.

19. Ana kusogoloku tukwembecheya chichi?

¹⁹ Pachangakaŵapa Yehofa chachipukuta misosi josope kwa mundu jwalijose. Mwamti kulwala soni chiwa ngasiyipagwasoni. (Chiw. 21:​3, 4) “Ŵalemale tachisumba mpela mbaŵala ni kuŵina.” (Yes. 35:​5, 6) Mwamti yakuyichisya yakusakala yayikusayika ligongo lya uchekulu soni kupweteka kwakusapikana pakwasamalila ŵachinasi ŵawo ŵakulwala yichiŵa mu gulu ja yindu “Yiyatendeche kalakala [yele] ngasayikumbuchilasoni.” (Yes. 65:17) Atamose apano patukwembecheya kukwanilichikwa kwa yinduyi, Yehofa chapitilisyepe kutukamuchisya. Naga tukupitilisya kumkulupilila jwalakwe kuti ni jwampaka atupe machili, chachitukamuchisya kuti ‘tukombole kupilila mu yosope mwakuwusimana mtima soni mwakusangalala.’—Akolo. 1:11.