3 Yaŵasimene Nayo Ŵandu Ŵakusiŵasala M’Baibulo Mpaka Yakamuchisye

BAIBULO JIKUSASALA YA ŴANDU . . . Ŵakulupichika ŵaŵasimene ni yindu yakusawusya “mpela m’weji”—YAKOBO 5:17.

Ana Yeleyi Yikugopolela chichi?

Baibulo jikusasala ya ngani syakulekanganalekangana sya achalume ni achakongwe ŵaŵasimene ni yindu yakulagasya nganisyo. Myoyo patukuŵalanga ngani sya ŵandu ŵeleŵa mpaka tupate ngani sine syampaka silandane ni yindu yayikututendechela m’weji.

Ana Kuŵalanga Ngani Syelesi Mpaka Kutukamuchisye Chamtuli?

Wosopewe tukusasaka kuti ŵandu ŵane amanyilileje mwatukupikanila mumtima. Yeleyi yili yakusosekwa mnopemnope patukulagasika nganisyo. Patukuŵalanga Baibulo mpaka tulijiganye ya ŵandu ŵaŵaganisyaga soni kulipikana mumtima mpela mwatukusatendela m’weji. Yakuyichisya yakwe tukusamanyilila kuti panasoni ŵandu ŵane ŵaŵalagasiche nganisyo. Nambope nganalipikanaga kuti ali jikajikape paŵatendaga yakuti amalane ni kulagasika nganisyo soni kuleka kuganichisya yindu yakutengusya.

M’Baibulo tukusaŵalanga ya ŵandu ŵaŵalipikanaga kuti pangali mundu jwakumanyilila yakusimana nayo soni jwampaka ŵakamuchisye. Komboleka pakwete paŵechete kuti, ‘Yayikutendekwayi yimbesisye bola ngambe kuwa.’ Mwelemutu ni mwaŵalipikanilagasoni Mose, Eliya, soni Daudi.—Numeli 11:14; 1 Ayimwene 19:4; Salimo 55:4.
Baibulo jikusasala ya jwamkongwe jwine lina lyakwe Hana. Jwalakwe ‘jwalasile mnope mu mtima mwakwe’ ligongo lyakuti nganakola mwanache. Yeleyi yatendekasisye kuti jwamkongwe mjakwe amnyosyeje soni amsambuleje.—1 Samuele 1:6, 9, 10.
Mpaka tulijiganyesoni kutyochela ku yindu yaŵasimene nayo Yobu. Atamose kuti jwalakwe jwakwete chikulupi chakulimba, nambope ndaŵi jine jwayikene pakuŵecheta maloŵe gakuti, “Mbesile ni umi wangu, Une ngaŵa mkutama ni umi masiku gosope.”—Yobu 7:16.

Patukulijiganya yaŵatesile ŵandu ŵakusiŵasala m’Baibuloŵa kuti akombole kulimbana ni yindu yayalagasyaga nganisyo, mpaka yitukamuchisyesoni m’weji kulimbana ni yindu yayikusatulagasya nganisyo.

Kuŵalanga Baibulo Kukumkamuchisya Kevin

Yayikusandendechela Ligongo lya Ulwele wa Kulagasika Nganisyo

“Nasimanikwe ni ulwele wa kulagasika nganisyo ndili ni yaka chiŵandika 50. Ulwelewu ukusandendekasya kuti ngambeje kuchengachenga yindu yangutenda. Ndaŵi sine ngusalipika kuti mpaka malane nayo jika yakusawusya yangusimana nayo paumi. Nambo ndaŵi sinesoni ngusalipikana kuti umi uli ŵangali mate.”

Baibulo Jikungamuchisya

“Mundu jwine jwakusamsala m’Baibulo juŵasimene ni yindu yakulandana ni une ali ndumetume Petulo. Jwalakwe jwatesile yakulemwecheka yine yayamtendekasisye kuliwona mpela ali jwangali mate. Nambo mmalo mwakuti agambeje kuliwona kuti ali jwangali mate, Petulo jwakungulukaga ni ŵandu ŵaŵawonaga kuti mpaka amkamuchisye. Naga nganinjimuka chenene ligongo lyakulagasika nganisyo, ngusalipikana kuŵa mundu jwangali mate. Mwakulandana ni Petulo, nalijiganyisye kuti ngusosekwa ngungulucheje ni ŵandu ŵampaka angamuchisye kuti mbitilisyejepe kuŵa jwakusangalala.

“Mundu jwine jwakusamsala m’Baibulo jwakusalimbikasya mnope ali mwenye Daudi. Ndaŵi syejinji jwalakwe jwalagasikaga nganisyo ligongo lya mwayaŵelele yindu paumi wakwe soni jwalijimbaga magambo ligongo lya yakulemwa yajwatesile kalakala. Yayamtendechele Daudiyi yikusalandana ni yindu yayikusandendechela une, ligongo lyakuti ndaŵi sine ngusatenda soni kuŵecheta yindu yele panyuma pakwe ngusadandawula nayo. Maloŵe ga pa Salimo 51 gakusalimbikasya. Mu ndime 3, Daudi jwatite, ‘Yakulemwa yangu nguyimanyilila kulemwa kwangu kuli pa une ndaŵi syosope.’ Kusala yisyene yeleyi ni yayikusandendechela une pandaŵi jangulagasika mnope nganisyo. Pandaŵi jeleji yikusaŵa yakusawusya kuti naliwoneje kuŵa mundu jwakusosekwa. Nambosoni ngusalilandanya ni yaŵaŵechete Daudi mu ndime 10 kuti, ‘Ambanganichisye une mtima weswela, chonde Mlungu, aŵiche mwa une mtima wasambano ni wakutamilichika.’ Mwakulandana ni lilembali ngusamŵenda Mlungu kuti angamuchisyeje kuti naliwoneje mwakuŵajilwa. Pakumalisya, maloŵe gagali mundime 17 gakusalimbikasya mnope. Maloŵega gakusati, ‘Mtima wekasiche, mtima wachanasa ni wakwitichisya ulemwa, ŵalakwe Mlungu ngasawuchembulusya.’ Lilemba lyeleli likusasimichisya kuti Mlungu akusanonyela.

“Naga nguganichisya mnope yisyasyo ya m’Baibulo soni yindu yambele Mlungu apano ngusakola chembecheyo chakulimba pakwamba ya yindu ya ngwembecheya kusogolo. Nambosoni ngusakulupilila kuti yindu yajikusasala Baibulo yili yisyesyene. Yeleyi yikusangamuchisya kuti ngawujila munyuma.”