2 “Malemba Gakusatulimbikasya”

BAIBULO JIKUSATI: “Yindu yosope yayalembedwe m’Malemba kalakalako, yalembedwe kuti yitujiganye. Soni tukwete chembecheyo ligongo Malembaga gakusatukamuchisya kupilila soni gakusatulimbikasya.”—ALOMA 15:4.

Ana Yeleyi Yikugopolela Chichi?

Baibulo jikusasala yindu yampaka yitulimbikasye soni kutukamuchisya pandaŵi jatutandite kuganisya m’litala lyakulemwecheka. Nambosoni yatukusaŵalanga m’Baibulo yikusatupa chembecheyo chakuti, yakusawusya yosope yayikusatendekasya kuti tulagasicheje nganisyo chiyimale pamkaŵapa.

Ana Baibulo Mpaka Jitukamuchisye Chamtuli?

Ndaŵi sine ŵanduwe tukusadandawula ni yindu yine. Nambo mwakulekangana ni ŵanewe, ŵandu ŵakusalwala ulwele wa kulagasika nganisyo akusalaga ndaŵi syosope. Ana Baibulo mpaka jakamuchisye chamtuli jemanjaji?

Baibulo jikusatusalila yindu yampaka yitukamuchisye kuti tuleche kuganichisya yindu yakulemwecheka. (Afilipi 4:8) Patukujiŵalanga tukusapata yindu yampaka yitulimbikasye soni kututamika mtima pasi. Yeleyi yikusatukamuchisya kuti tutandilesoni kuganisya chenene.—Salimo 94:18, 19.
Baibulo mpaka jitukamuchisye kuti tumalane ni nganisyo syakuliwona kuti tuli ŵangali mate.—Luka 12:6, 7.
Malemba gejinji m’Baibulo gakusatusimichisya kuti nganituŵa jika. Nambosoni kuti Mlungu juŵatupanganyisye akusamanyilila chenene mwatukusapikanila.—Salimo 34:18; 1 Yohane 3:19, 20.
Baibulo jasasile kala kuti Mlungu chachitendekasya kuti tuleche kukumbuchila yindu yakupweteka yayatutendechele. (Yesaya 65:17; Chiwunukuko 21:4) Myoyo yaŵasasile Mlunguyi, mpaka yitukamuchisye kuti tukomboleje kupilila patukusimana ni yindu yakutulagasya nganisyo.

Kuŵalanga Baibulo Kukumkamuchisya Jessica

Yayikusandendechela Ligongo lya Ulwele wa Kulagasika Nganisyo

“Nasimanikwe ni ulwele wa kulagasika nganisyo ndili ngwete yaka 25. Pandandite kukumbuchila yindu yayandendechele munyumamu, ngusalipikana mpela mundu jwine asomile ni chipula mumtimamu. Madokotala gasalile kuti yeleyi yikusandendechela ligongo lyakuti ngusaganichisya yindu yakusakala yayandendechele paumi wangu. Myoyo, napochele chikamuchisyo cha mtela. Kupwatika pelepa nasosekwagasoni kuti mbechetaneje ni madokotala ni chakulinga chakuti angamuchisyeje kuti ngombole kuleka kuganichisya yindu yakulemwecheka.”

Baibulo Jikungamuchisya

“Pangulagasika nganisyo mnope ngusatenda woga soni ngusalepela kugona. Ndaŵi syejinji chilo, sikusandupila mnope nganisyo mumtima mwangu. Mwamtitu yikusaŵa yakusawusya kuti ndandilesoni kuganisya chenene. Mpela mwalikusaŵechetela lilemba lya Salimo 94:19, Mlungu mpaka awutulasye soni kuwusangalasya mtima wetu patukulagasika nganisyo. Myoyo ngusasunga Baibulo soni buku jangusalemba malemba gakulimbikasya chiŵandika ni bedi jangu. Pangulepela kugona ngusaŵalanga Baibulo mwamti yeleyi yikusalimbikasya mnope.

“Baibulo jikusatulimbikasya kuti tukaganichisyaga yindu yakulekangana ni yakusasaka Mlungu. Pandanda naliwonaga kuti ndili mundu jwangali mate soni kuti pangali jwakusanonyela. Nambo kulijiganya Baibulo kungamuchisye kumanyilila kuti nganisyo syelesi sili syakulemwecheka. Yili myoyo ligongo lyakuti Baibulo jikusasala kuti Mlungu ali jwachinonyelo, jwachanasa soni Mtati jwambone jwakusasamala ya mundu jwalijose. Apano ngangusakundasoni kuti nganisyo syakulemwecheka silongoleleje umi wangu. Nalijiganyisye kuti naliwoneje chenene mpela mwakusambonela Mlungu. Kutenda yeleyi kungamuchisye mnope kuti ndeche kuliwona kuti ndili jwangali mate.

“Ngwembecheya ndaŵi jele ŵanduwe ngasitukumbuchilagasoni yindu yakupweteka yatwasimene nayo. Nambosoni ndaŵi jele ngasituganisyaga yindu yakusakala. Ngumanyililasoni kuti m’chilambo chasambano, ŵanduwe ngasitulagasikagasoni nganisyo. Kumanyilila yeleyi kukungamuchisya kuti mbilileje kwineku ndili mkwembecheya ndaŵi jele ngasindagasikagasoni nganisyo.”